കോവിഡ് രോഗവ്യാപനം നിയന്ത്രിക്കുന്നതിന്റെ ഭാഗമായി ഒറ്റൂര്‍ ഗ്രാമപഞ്ചായത്തിലെ കല്ലമ്പലം(മാവിന്‍മൂട് കോളനി മാത്രം), നാവായിക്കുളം ഗ്രാമപഞ്ചായത്തിലെ വെട്ടിയറ(കണ്ണന്‍കരകോണം ലക്ഷം വീട് പ്രദേശം മാത്രം), തിരുവനന്തപുരം കോര്‍പ്പറേഷനു കീഴിലെ തുരുത്തുമൂല എന്നീ പ്രദേശങ്ങളെ മൈക്രോ കണ്ടെയ്ന്‍മെന്റ് സോണായി പ്രഖ്യാപിച്ചതായി ജില്ലാ കളക്ടര്‍ ഡോ. നവ്ജ്യോത് ഖോസ അറിയിച്ചു. ഇവിടെ കര്‍ശന ലോക്ഡൗണ്‍ നിയന്ത്രണങ്ങള്‍ ഏര്‍പ്പെടുത്തുമെന്നും കളക്ടര്‍ അറിയിച്ചു.

തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന്റെ നാമനിർദേശ പത്രികകളുടെ സൂക്ഷ്മ പരിശോധനയിൽ 123 പത്രികകൾ തള്ളി. 13,972 സ്ഥാനാർഥികളാണ് നിലവിൽ മത്സര രംഗത്തുള്ളത്. നാളെ(23 നവംബർ) വൈകിട്ടു മൂന്നു വരെ പത്രികകൾ പിൻവലിക്കാൻ സമയമുണ്ട്.

തിരുവനന്തപുരം കോർപ്പറേഷനിലെ വിവിധ വാർഡുകളിൽ ലഭിച്ച പത്രികകളിൽ 963 എണ്ണം സ്വീകരിച്ചു. അഞ്ചെണ്ണം തള്ളി. മുനിസിപ്പാലിറ്റികളിൽ ലഭിച്ചവയിൽ 17 എണ്ണം തള്ളി. 1,201 എണ്ണം സ്വീകരിച്ചു.

തിരുവനന്തപുരത്ത് ഇന്ന് (21 നവംബര്‍ 2020) 399 പേര്‍ക്കു കൂടി കോവിഡ് 19 സ്ഥിരീകരിച്ചു. 609 പേര്‍ രോഗമുക്തരായി. നിലവില്‍ 5,307 പേരാണു രോഗം സ്ഥിരീകരിച്ചു ചികിത്സയില്‍ കഴിയുന്നത്. ജില്ലയില്‍ ഏഴു പേരുടെ മരണം കോവിഡ് മൂലമാണെന്നു സ്ഥിരീകരിച്ചു. വെള്ളായണി സ്വദേശിനി സരോജിനി (82), തിരുപുരം സ്വദേശി ജെറാഡ് (74), കരിക്കകം സ്വദേശിനി സിനു (42), പള്ളിത്തുറ സ്വദേശി സുബ്രഹ്മണ്യന്‍ (68), കാഞ്ഞിരംപാറ സ്വദേശിനി നളിനി (57), കോട്ടക്കല്‍ സ്വദേശിനി സരോജിനി (65), പാച്ചല്ലൂര്‍ സ്വദേശി ശിശുപാലന്‍ (61),  എന്നിവരുടെ മരണമാണു കോവിഡ് മൂലമാണെന്നു സ്ഥിരീകരിച്ചത്.

കെല്‍ട്രോണ്‍ നടത്തുന്ന കംപ്യൂട്ടര്‍ ഹാര്‍ഡ് വെയര്‍ ആന്റ് നെറ്റ്#വര്‍ക്ക് മെയിന്റനന്‍സ് വിത്ത് ഇ-ഗാഡ്ജറ്റ് ടെക്ക്‌നോളജീസ്, ഡി.സി.എ, ഫയര്‍ ആന്റ് സേഫ്റ്റി, മെഡിക്കല്‍ കോഡിംഗ്, ഡിജിറ്റല്‍ മാര്‍ക്കറ്റിംഗ് കോഴ്‌സുകളിലേക്ക് അപേക്ഷ ക്ഷണിച്ചു. താത്പര്യമുള്ളവര്‍ സ്‌പെന്‍സര്‍ ജംഗ്ഷനില്‍ പ്രവര്‍ത്തിക്കുന്ന കെല്‍ട്രോണ്‍ നോളജ് സെന്ററുമായി ബന്ധപ്പെടണം. കൂടുതല്‍ വിവരങ്ങള്‍ക്ക് 0471-2337450, 2320332.

ജില്ലയിലെ ത്രിതല പഞ്ചായത്തുകളുടെയും മുനിസിപ്പാലിറ്റികളുടെയും ഭരണസമിതികളുടെ ചുമതല വഹിക്കുന്ന അഡ്മിനിസ്ട്രേറ്റീവ് കമ്മിറ്റി അംഗങ്ങള്‍ക്ക് കേരള ഇന്‍സ്റ്റിറ്റ്യൂട്ട് ഓഫ് ലോക്കല്‍ അഡ്മിനിസ്‌ട്രേഷന്‍ (കില) നടത്തുന്ന ഓണ്‍ലൈന്‍ പരിശീലന പരിപാടി ഇന്ന്(22 നവംബര്‍) നടക്കും. ഉച്ചയ്ക്ക് 12 മുതല്‍ രണ്ടുമണി വരെ സൂം വെര്‍ച്ച്വല്‍ മീറ്റിംഗ് പ്ലാറ്റഫോമിലൂടെയാണ് പരിശീലനം നടക്കുന്നത്. ജില്ലാ കളക്ടര്‍ ഡോ. നവജ്യോത് ഖോസ, ജില്ലാ മെഡിക്കല്‍ ഓഫീസര്‍ ഡോ. കെ.എസ് ഷിനു, ദുരന്തനിവാരണം ഡെപ്യൂട്ടി കളക്ടര്‍, പഞ്ചായത്ത് ഡെപ്യൂട്ടി ഡയറക്ടര്‍ എന്നിവര്‍ പങ്കെടുക്കും.

തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതു തെരഞ്ഞെടുപ്പിന്റെ ജില്ലയിലെ നിരീക്ഷകയായി ഐടി മിഷൻ ഡയറക്ടർ ചിത്ര എസിനെ സംസ്ഥാന തെരഞ്ഞെടുപ്പ് കമ്മിഷൻ നിയമിച്ചു. സർവേ ആൻഡ് ലാൻഡ് റെക്കോഡ്‌സ് വകുപ്പ് ഡയറക്ടർ ആർ. ഗിരിജയ്ക്കു പകരമാണു നിയമനം.

തദ്ദേശ തിരഞ്ഞെടുപ്പിൽ മത്സരിക്കുന്ന സ്ഥാനാർഥികളെ തിരിച്ചറിയാൻ പേരിനൊപ്പം കൂട്ടിച്ചേർക്കലുകൾ നടത്താൻ അവസരം. ഒരേ വാർഡിൽ മത്സരിക്കുന്ന സമാന പേരുള്ള സ്ഥാനാർഥികളെയും നാട്ടിൽ മറ്റു പേരുകളിൽ അറിയപ്പെടുന്നവരെയും വോട്ടർമാർക്ക് തിരിച്ചറിയുന്നതിനു വേണ്ടിയാണ് നാമനിർദ്ദേശ പത്രികയിൽ നൽകിയ പേരിനൊപ്പമോ പേരിന് മുന്നിലോ പിന്നിലോ കൂട്ടിച്ചേർക്കലുകൾക്ക് അനുമതി നൽകുന്നത്.

തദ്ദേശ സ്വയംഭരണ സ്ഥാപന തെരഞ്ഞെടുപ്പിനുള്ള നാമനിർദേശ പത്രികകൾ പിൻവലിക്കാനുള്ള സമയ പരിധി നാളെ(23 നവംബർ) വൈകിട്ട് മൂന്നിന് അവസാനിക്കും. അതിനു ശേഷമാകും ഓരോ സ്ഥാനാർഥികൾക്കും ചിഹ്നം അനുവദിക്കുക.

നാളെ വൈകിട്ടോടെ അന്തിമ സ്ഥാനാർഥിപ്പട്ടിക തയാറാകും. അതിനു ശേഷം വരണാധികാരികളുടെ ഓഫിസ് നോട്ടിസ് ബോർഡുകളിൽ സ്ഥാനാർഥി പട്ടിക പ്രസിദ്ധീകരിക്കും. പട്ടികയുടെ ഒരു കോപ്പി സ്ഥാനാർഥിക്കോ തെരഞ്ഞെടുപ്പ് ഏജന്റിനോ നൽകുകയും ചെയ്യും. 

ആൾക്കൂട്ടം ഒഴിവാക്കാൻ പ്രത്യേക ശ്രദ്ധവേണം

പ്രചാരണേതര ബോർഡുകൾ ഉടൻ നീക്കണം

തദ്ദേശ സ്വയംഭരണ സ്ഥാപന തെരഞ്ഞെടുപ്പിന്റെ പ്രചാരണ പരിപാടികൾ കണ്ടെയ്ൻമെന്റ് സോണുകളിൽ നടത്തുമ്പോൾ കടുത്ത ജാഗ്രത പാലിക്കണമെന്നു ജില്ലാ കളക്ടർ ഡോ. നവ്‌ജ്യോത് ഖോസ. 20 പേരിൽ കൂടുതൽ  പേർ പങ്കെടുക്കുന്ന ഒരു പരിപാടിയും കണ്ടെയ്ൻമെന്റ് സോണിൽ നടത്തരുത്. കണ്ടെയ്ൻമെന്റ് സോണിനു പുറത്തും വലിയ തോതിലുള്ള ആൾക്കൂട്ടം ഒഴിവാക്കണമെന്നു കളക്ടർ അഭ്യർഥിച്ചു. കോവിഡ് പ്രതിരോധത്തിന്റെ ഭാഗമായാണു നിയന്ത്രണങ്ങൾ.

തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ ബ്ലോക്ക് ലെവൽ ട്രെയിനർമാരായി നിയോഗിച്ചിട്ടുള്ളവരുടെ പരിശീലനം ഇന്നു രാവിലെ 10നു കളക്ടറേറ്റ് കോൺഫറൻസ് ഹാളിൽ നടക്കും. തെരഞ്ഞെടുക്കപ്പെട്ട ബ്ലോക്ക് ലെവൽ ഓഫിസർമാർ കൃത്യസമയത്തു പരിശീലനത്തിനെത്തണമെന്നു ജില്ലാ കളക്ടർ അറിയിച്ചു.