ലൈസന്‍സുള്ള ആയുധങ്ങള്‍ കൈവശമുള്ളവര്‍ തദ്ദേശസ്വയംഭരണ തെരഞ്ഞെടുപ്പിന്റെ പശ്ചാത്തലത്തില്‍ അവ  തൊട്ടടുത്ത പോലീസ് സ്റ്റേഷനുകളില്‍  രണ്ടു ദിവസത്തിനകം ഹാജരാക്കണമെന്നു ജില്ലാ വരണാധികാരി കൂടിയായ ജില്ലാ കളക്ടര്‍ ഉത്തരവിട്ടു. ആയുധങ്ങള്‍ സൂക്ഷിക്കേണ്ടവര്‍ ആരൊക്കെയാണെന്നുള്ളത് തീരുമാനിക്കാനും പരിശോധിക്കാനുമായി ജില്ലാ കളക്ടര്‍, ജില്ലാ പോലീസ് മേധാവി, എഡിഎം എന്നിവരടങ്ങുന്ന കമ്മറ്റി രൂപീകരിച്ചിട്ടുണ്ട്.

പട്ടികജാതി വിഭാഗത്തില്‍പെട്ട അംഗീകൃത പെട്രോളിയം ഡീലര്‍മാര്‍ക്ക് അവരുടെ നിലവില്‍ പെട്രോള്‍/ഡീസല്‍ വില്‍പ്പനശാലകള്‍ പ്രവര്‍ത്തനനിരതമാക്കുന്നതിനായി പ്രവര്‍ത്തനമൂലധന വായ്പ നല്‍കാന്‍ പരിഗണിക്കുന്നതിനായി കേരള പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്‍ അപേക്ഷ ക്ഷണിച്ചു. അപേക്ഷകന്‍ പട്ടികജാതി വിഭാഗത്തില്‍പ്പെട്ടയാളും പൊതുമേഖലയിലുള്ള ഏതെങ്കിലും പെട്രോളിയം കമ്പനിയുടെ അംഗീകൃത ഡീലര്‍ ആയിരിക്കേണ്ടതുമാണ്. അപേക്ഷകന് സംരംഭം നടത്തുന്നതിനാവശ്യമായ അടിസ്ഥാന സൗകര്യങ്ങള്‍, വിവിധ ലൈസന്‍സുകള്‍, ടാക്‌സ് രജിസ്‌ട്രേഷന്‍ എന്നിവ ഉണ്ടായിരിക്കണം

സംസ്ഥാനത്തെ സ്‌കൂളുകളില്‍ 2010 മുതല്‍ സ്റ്റുഡന്റ് പോലീസ് കേഡറ്റുകളായി പ്രവര്‍ത്തിച്ചു വന്നവരെ ഉള്‍പ്പടെുത്തി പുതിയ ഒരു സന്നദ്ധ സേന രൂപം കൊള്ളുന്നു. സ്റ്റുഡന്റ് പോലീസ് വോളണ്ടിയര്‍ കോര്‍പ്‌സ് (SVC)  എന്ന് പേര് നല്‍കിയിരിക്കുന്ന സംഘടനയില്‍ 40000/ കേഡറ്റുകള്‍ ഇതിനകം പേര് രജിസ്റ്റര്‍ ചെയ്തുകഴിഞ്ഞു. സംസ്ഥാന എസ് പി സി ഡയറക്ടറേറ്റ് ആണ് പ്രവര്‍ത്തനങ്ങള്‍ ഏകോപിപ്പിക്കുക. ഇന്ന് വരെ 100000 ത്തോളം പേര്‍ പരിശീലനം പൂര്‍ത്തിയാക്കി പാസ് ഔട്ടായതായിട്ടാണ് കണക്കാക്കുന്നത്. ഇവരെയെല്ലാം എസ് വി സിയില്‍ ഭാഗമാക്കാനുള്ള പ്രവര്‍ത്തനങ്ങള്‍ നടന്നു വരുന്നു.

1236.55 കോടി രൂപ ഇടുക്കി ജില്ലയില്‍ നടപ്പു സാമ്പത്തിക വര്‍ഷം ജൂണില്‍ അവസാനിച്ച ആദ്യ പാദത്തില്‍  ബാങ്കുകള്‍ വിതരണം ചെയ്തത് 1236.55 കോടി രൂപ .ഇതില്‍ 1000.68 കോടി രൂപ  മുന്‍ഗണന വിഭാഗത്തിനാണ് നല്‍കിയത് . കാര്‍ഷിക മേഖലയില്‍ 646.10 കോടി രൂപയും സൂക്ഷ്മ ചെറുകിട ഇടത്തരം സംരംഭങ്ങള്‍ക്ക് 184.30 കോടി രൂപയും ഭവന വായ്പ, വിദ്യാഭ്യാസ വായ്പ എന്നിവ ഉള്‍പ്പെടുന്ന മറ്റ് മുന്‍ഗണന മേഖലയ്ക്ക് 170.28 കോടി രൂപയും വിതരണം ചെയ്തു . ജൂണ്‍ അവസാനം ജില്ലയിലെ ബാങ്കുകളിലെ ആകെ നിക്ഷേപം 8920.41 കോടി രൂപയും മൊത്തം വായ്പ 11143.39 കോടി രൂപയും ആണ് .

ജില്ലയിലെ ബ്ലോക്കുകളിലേക്കും മുനിസിപ്പാലിറ്റിയിലേക്കുമുള്ള തിരഞ്ഞെടുപ്പ് സംബന്ധിച്ച  നാമനിര്‍ദ്ദേശ പത്രിക ഫോറം, അനുബന്ധ ഫോമുകളും മാര്‍ഗ നിര്‍ദ്ദേശങ്ങളും വിതരണം ചെയ്തു. തദ്ദേശ തിരഞ്ഞെടുപ്പുമായി ബന്ധപ്പെട്ടുള്ള പരാതികള്‍, സംശയങ്ങള്‍, മാര്‍ഗ നിര്‍ദ്ദേശങ്ങള്‍, നാമനിര്‍ദ്ദേശ പത്രികകള്‍, പെരുമാറ്റചട്ടം  തുടങ്ങിയുള്ള വിവിധ തിരഞ്ഞെടുപ്പ് സാമഗ്രികളാണ് വിതരണം ചെയ്തത്. ആര്‍ഒ മാരും എആര്‍ഒ മാരും കളക്ടറേറ്റിലെത്തി ഇലക്ഷന്‍ ഓഫീസില്‍ നിന്ന് കൈപറ്റി.

ആദ്യ ദിനത്തില്‍ ഇടുക്കി ജില്ലയില്‍ 7 നാമനിര്‍ദ്ദേശപത്രികകള്‍ ലഭിച്ചു. തൊടുപുഴ മുന്‍സിപ്പാലിറ്റി, വണ്ടന്‍മേട് പഞ്ചായത്ത് എന്നിവിടങ്ങളിലാണ് പത്രികകള്‍ ലഭിച്ചത്. തൊടുപുഴ മുന്‍സിപ്പാലിറ്റിയിലെ 25, 33 വാര്‍ഡുകളിലേയ്ക്കായി ഓരോ വനിതകളാണ് പത്രിക നല്കിയത്
വണ്ടന്‍മേട് ഗ്രാമപഞ്ചായത്തിലെ 1,2,13, 17, 18 വാര്‍ഡുകളിലേയ്ക്ക് ഓരോരുത്തര്‍ വീതം പത്രിക സമര്‍പ്പിച്ചു. ഒരു വനിതയും നാല് പുരുഷന്‍മാരുമാണ് ആദ്യ ദിനത്തില്‍ പത്രിക സമര്‍പ്പിച്ചത്.

പൊതുതിരഞ്ഞെടുപ്പിന്റെ വിജ്ഞാപനം വന്നതിനെ തുടര്‍ന്ന് തദ്ദേശ സ്വയംഭരണ സ്ഥാപനങ്ങളില്‍ തിരഞ്ഞെടുപ്പ് നോട്ടീസ് പ്രസിദ്ധീകരിച്ചു. ദേവികുളം ബ്ലോക്ക് പഞ്ചായത്തിലെ 13 ഡിവിഷനുകളിലേയ്ക്കുള്ള തെരഞ്ഞെടുപ്പ്  നോട്ടീസ് മലയാളം, തമിഴ് ഭാഷകളില്‍ ദേവികുളം ആര്‍ ഡി ഒ ഓഫീസ്, ബ്ലോക്ക് പഞ്ചായത്ത് ഓഫീസ് എന്നിവിടങ്ങളില്‍ പ്രസിദ്ധീകരിച്ചു.