ആലപ്പുഴ :കൊടും വെയിലിലും ആലപ്പുഴയുടെ തീരദേശ മേഖലയുടെ തിരഞ്ഞെടുപ്പ് ആവേശത്തിന് തെല്ലും കുറവുണ്ടായിരുന്നില്ല . ഉച്ചക്ക് ശേഷം മണ്ഡലത്തിന്റെ തീരദേശ മേഖലകളിലെ മിക്ക പോളിങ് ബൂത്തുകളിലും വോട്ടർമാരുടെ നീണ്ട നിരയാണ് കാണപ്പെട്ടത്. പലരും തങ്ങളുടെ സമ്മതിദാനാവകാശം നിർവഹിക്കാനായി മണിക്കൂറുകൾ തന്നെ കാത്തു നിന്നു. സ്ത്രീകളടക്കമുള്ള വോട്ടർമാർ കൈക്കുഞ്ഞുങ്ങളുമായി വരെയാണ് വോട്ട് ചെയ്യാനായി പോളിങ് ബൂത്തുകളിലേക്ക് എത്തിയത്. അർത്തുങ്കൽ ,ചേന്നവേലി ,കാട്ടൂർ തുടങ്ങിയ ആലപ്പുഴ മണ്ഡലത്തിലെ  തീരദേശ മേഖലകളിലെല്ലാം തന്നെ വോട്ടർമാരുടെ തിരക്ക് ദൃശ്യമായിരുന്നു.

ആലപ്പുഴ: ജില്ലയിൽ ഭിന്നശേഷിക്കാർക്ക് സുഖകരമായി വോട്ട് രേഖപ്പെടുത്തുന്നതിന് അവസരം ഒരുക്കി തിരഞ്ഞെടുപ്പ് കമ്മീഷനും ജില്ലാ ഭരണകൂടവും. ജില്ലയിലെ ഭിന്നശേഷിക്കാർക്കായി 261 ഓട്ടോറിക്ഷകൾ, ആവശ്യത്തിന് വീൽചെയറുകൾ, 79 പാലിയേറ്റീവ് വാഹനങ്ങൾ, മൂന്നു ബോട്ടുകൾ എന്നിവ തയ്യാറാക്കി നൽകി. ഭിന്നശേഷിക്കാരായ വോട്ടർമാരുടെ ലിസ്റ്റ് തയ്യാറാക്കി അവരെ നേരിൽ ഉദ്യോഗസ്ഥർ സമീപിച്ചാണ് വോട്ട് ചെയ്യാനുള്ള അവസരം ഒരുക്കിയത്. ചമ്പക്കുളം, കൈനകരി ഭാഗങ്ങളിലേക്കാണ് ഭിന്നശേഷിക്കാരായ വോട്ടർമാർക്കുവേണ്ടി ബോട്ട് സർവീസ് ഒരുക്കിയത്.

ആലപ്പുഴ: ലോക്‌സഭാ തിരഞ്ഞെടുപ്പിനോടനുബന്ധിച്ച് ഇന്ന് (23.04.2019) നടക്കുന്ന വോട്ടെടുപ്പില്‍ കള്ളവോട്ട്/ ഒന്നില്‍ കൂടുതല്‍ വോട്ട് ചെയ്യാന്‍ ശ്രമിക്കുന്നവര്‍ക്കെതിരെ ക്രിമിനല്‍ നിയമ നടപടി സ്വീകരിക്കുമെന്ന് ജില്ലാ തിരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കളക്ടര്‍ എസ്. സുഹാസ് അറിയിച്ചു. രാവിലെ ഏഴ് മുതല്‍ വൈകിട്ട് ആറ് മണി വരെ വോട്ട് രേഖപ്പെടുത്താം. തിരഞ്ഞെടുപ്പ് കമ്മീഷന്റെ തിരിച്ചറിയല്‍ കാര്‍ഡ് കൂടാതെ തിരഞ്ഞെടുപ്പ് കമ്മീഷന്‍ അംഗീകരിച്ച മറ്റു തിരിച്ചറിയല്‍ രേഖകള്‍ ഉപയോഗിച്ചും വോട്ട് രേഖപ്പെടുത്താം.

ആലപ്പുഴ: ഇന്ത്യൻ മഹാസമുദ്രത്തിന്റെ ഭൂമധ്യരേഖ പ്രദേശത്തും അതിനോട്  ചേർന്നുള്ള  തെക്കു  പടിഞ്ഞാറൻ  ബംഗാൾ  ഉൾക്കടലിലും ശ്രീലങ്കയുടെ തെക്കുകിഴക്കുമായി ഏപ്രിൽ 25ന്  ന്യൂനമർദ്ദം പ്രതീക്ഷിക്കുന്നതായി കേന്ദ്ര കാലാവസ്ഥ നിരീക്ഷണ കേന്ദ്രം അറിയിച്ചു. ഇതുമൂലം  ഏപ്രിൽ 25നും  ഇന്ത്യൻ മഹാസമുദ്രത്തിന്റെ ഭൂമധ്യരേഖ പ്രദേശത്തും അതിനോട്  ചേർന്നുള്ള  തെക്കു  പടിഞ്ഞാറൻ  ബംഗാൾ  ഉൾക്കടലിലും  കാറ്റിന്റെ വേഗത മണിക്കൂറിൽ 35  മുതൽ 45  കിലോമീറ്റർ വരെയാവാനും ഏപ്രിൽ 26നും കാറ്റിന്റെ വേഗത മണിക്കൂറിൽ 40   മുതൽ 55  കിലോമീറ്റർ വരെയാവാനും സാധ്യതയുണ്ട്.

ആലപ്പുഴ: ആലപ്പുഴ ലോകസഭ  മണ്ഡലത്തിലെ ചേർത്തല നിയോജകമണ്ഡലത്തിൽ ഉൾപ്പെട്ട 88-ാം നമ്പർ ബൂത്തിൽ പോളിങ് ആരംഭിക്കുന്നതിനുമുമ്പ്   മോക്ക്പോൾ നടത്തിയപ്പോൾ ബാലറ്റ് യൂണിറ്റിൽ പ്രസ് ഏറർ സംഭവിച്ചതുമൂലമാണ് ബാലറ്റ് യൂണിറ്റ് മാറ്റിയിട്ടുള്ളതെന്നും  മാധ്യമങ്ങളിൽ പ്രചരിച്ചതുപോലെ ഒരു പിശകും  സംഭവിച്ചിട്ടില്ലെന്നും ജില്ല തിരഞ്ഞെടുപ്പ് ഓഫീസറായ  ജില്ല കളക്ടർ അറിയിച്ചു

ആലപ്പുഴ:  സ്ത്രീസൗഹൃദം അന്വർഥമാക്കി ജില്ലയിലെ പിങ്ക് പോളിങ് ബൂത്തുകൾ. ഒമ്പതു നിയമസഭ മണ്ഡലങ്ങളിലുമായി 45 സ്ത്രീസൗഹൃദ ബൂത്തുകളാണ് ഈ തിരഞ്ഞെടുപ്പിൽ ഒരുക്കിയിരുന്നത്. പ്രിസൈഡിംഗ് ഓഫീസർ, പൊലീസ് ഉൾപ്പെടെ പോളിങ് ജോലിക്കെത്തിയവരെല്ലാം  വനിതകളായിരുന്നു. ചില സൗഹൃദ ബൂത്തുകളിൽ രാഷ്ട്രീയ പാർട്ടികളുടെ ഏജന്റുമാരായെത്തിയതും വനിതകളായിരുന്നുവെന്നത് കൗതുകമായി. 

ആലപ്പുഴ : ജില്ലയിൽ നിന്നുള്ള ജനനേതാക്കൾ കുടുംബലസമേതമെത്തി വോട്ടു ചെയ്തു. ജില്ലയിൽ നിന്നുള്ള  മൂന്നു മന്ത്രിമാരും പ്രതിപക്ഷനേതാവും  ഭരണ പരിഷ്‌കാര കമ്മീഷൻ ചെയർമാനും ഉൾപ്പടെയുള്ള ജനനായകർ, ആദ്യകേരള മന്ത്രിസഭയിലെ വനിത പ്രതിനിധി തുടങ്ങി ജില്ലയുടെ ജനനായകരെല്ലാം രാവിലെ തന്നെ വോട്ടു ചെയ്യാനെത്തി. നൂറാം വയസിലും ആദ്യവോട്ടിന്റെ ആവേശത്തോടെയാണ് ഗൗരിയമ്മ എസ്.ഡി.വി. സ്‌കൂളിലെ 206-ാം നമ്പർ ബൂത്തിൽ ബന്ധുക്കൾക്കൊപ്പം വോട്ടുചെയ്യാനെത്തിയത്. 

ഭാഗ്യക്കുറി ക്ഷേമനിധി കുടിശ്ശിക അടക്കാം

സംസ്ഥാന ഭാഗ്യക്കുറി ക്ഷേമനിധിയില്‍ അംഗമായി 2016 ജനുവരി മുതല്‍ അംശദായം അടക്കുന്നതില്‍ വീഴ്ച വരുത്തിയതിനാല്‍ അംഗത്വം റദ്ദായവര്‍ക്ക് കുടിശ്ശിക പിഴ  സഹിതം ഒടുക്കി അംഗത്വം പുനസ്ഥാപിക്കുവാന്‍ അവസരം നല്‍കുന്നു.  അര്‍ഹരായവര്‍ മെയ്, ജൂണ്‍ മാസങ്ങളില്‍ അംഗത്വ പാസ് ബുക്ക്, ഏജന്‍സി നമ്പറോട് കൂടിയ ഏജന്‍സി സീല്‍ പതിപ്പിച്ച ഏജന്റിന്റെ ഒപ്പു സഹിതം സാക്ഷ്യപ്പെടുത്തിയ ടിക്കറ്റ് അക്കൗണ്ട് ബുക്ക്, അതാതുമാസത്തെ ബില്‍ എന്നിവ ഓഫീസില്‍ നേരിട്ട് ഹാജരാകേണ്ടതാണെന്ന് ജില്ലാ ഭാഗ്യക്കുറി ക്ഷേമനിധി ഓഫീസര്‍ അറിയിച്ചു.

ലോക്‌സഭ തെരഞ്ഞെടുപ്പിന്റെ ഭാഗമായുള്ള വോട്ടെടുപ്പില്‍ ജില്ലയില്‍ കരുത്തുകാട്ടി വനിതാ വോട്ടര്‍മാര്‍.  വ84.76 ശതമാനം സ്ത്രീകളാണ് ജില്ലയില്‍ വോട്ട് ചെയ്യാനെത്തിയത്. 80.85 ശതമാനം പുരുഷന്മാരും വോട്ട് രേഖപ്പെടുത്തി. ആകെ 9,24,421 പുരുഷ വോട്ടര്‍മാരില്‍ 7,47,438 പേരും 10,40,028 സ്ത്രീ വോട്ടര്‍മാരില്‍ 8,81,530 പേരും ജില്ലയിലെ വിവധ മണ്ഡലങ്ങളിലായി വോട്ട് ചെയ്തു. തളിപ്പറമ്പ് നിയോജക മണ്ഡലമാണ് വോട്ട് രേഖപ്പെടുത്തിയ സ്ത്രീകളുടെ എണ്ണത്തില്‍ മുന്നില്‍ - 87.82 ശതമാനം.     

മണ്ഡലം- ആകെ പോള്‍ ചെയ്ത സ്ത്രീ വോട്ട് - ശതമാനം - ബ്രാക്കറ്റില്‍ മണ്ഡലത്തിലെ ആകെ സ്ത്രീ വോട്ട് എന്നീ ക്രമത്തില്‍.

പതിനേഴാമത് ലോക്‌സഭാ തെരഞ്ഞെടുപ്പില്‍ സംസ്ഥാനത്തെ ഏറ്റവും വലിയ പോളിംഗ് ശതമാനവുമായി കണ്ണൂര്‍ ജില്ല അഭിമാനകരമായ നേട്ടം കൈവരിച്ചപ്പോള്‍ ശരിക്കും തിളങ്ങിയത് ജില്ലാ ഭരണകൂടം. പരാതികള്‍ക്കും പ്രശ്‌നങ്ങള്‍ക്കും ഇടം നല്‍കാതെ വോട്ടെടുപ്പ് പ്രക്രിയ പൂര്‍ത്തീകരിക്കാന്‍ ജില്ലാ തെരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കലക്ടറുടെ നേതൃത്വത്തില്‍ നടന്ന ചിട്ടയായ പ്രവര്‍ത്തനങ്ങളിലൂടെ സാധിച്ചു. വോട്ടിംഗ് മെഷീന്‍ പണിമുടക്കിയതും വൈദ്യുതി തകരാറും മൂലമുണ്ടായ കാലതാമസവും മാറ്റിനിര്‍ത്തിയാല്‍ തികച്ചും സുഗമമായ രീതിയിലായിരുന്നു ജില്ലയിലെ പോളിംഗ്.