2016 ജനുവരി മുതല്‍ അംശദായ അടവ് മുടങ്ങിയതുമൂലം അംഗത്വം റദ്ദായവര്‍ക്ക്  പുനസ്ഥാപിക്കാന്‍ ജൂണ്‍ മാസം വരെ അവസരം. അംഗത്വ പാസ്ബുക്ക്, ടിക്കറ്റ് അക്കൗണ്ട് ബുക്ക് എന്നിവ സഹിതം ജില്ലാ ഭാഗ്യക്കുറി ക്ഷേമനിധി ഓഫീസില്‍ നേരിട്ട് ഹാജരാകണം.  ക്ഷേമനിധി പദ്ധതി വിജ്ഞാപന പ്രകാരമുള്ള ത്രൈമാസ വില്‍പ്പന ശരാശരി തുകയായ 30000 രൂപയ്ക്കുള്ള ടിക്കറ്റുകള്‍ വില്‍പ്പന നടത്തിയതിന്റെ രേഖകളും ഹാജരാക്കണം. 

ലോക്‌സഭാ തെരഞ്ഞെടുപ്പില്‍ പത്തനംതിട്ടയില്‍ 80 ശതമാനത്തിലധികം പോളിംഗ് നടന്നത് 160 ബൂത്തുകളില്‍. അടൂരിലെ മൂന്നാളം ഗവണ്‍മെന്റ് എല്‍പിഎസ് സ്‌കൂളിലെ 89-ാം നമ്പര്‍ ബൂത്ത് ഇക്കാര്യത്തില്‍ ഏറ്റവും മുന്നിലെത്തുകയും ചെയ്തു. ഇവിടെ 100 ശതമാനമാണ് പോളിംഗ്. 90 ശതമാനത്തിന് മുകളില്‍ പോളിംഗ് നടന്ന ഏക ബൂത്തും ഇതുതന്നെ.

ലോക്‌സഭാ തെരഞ്ഞെടുപ്പില്‍ 60 ശതമാനത്തില്‍ താഴെ വോട്ടിംഗ് രേഖപ്പെടുത്തിയത് നാല് ബൂത്തുകളില്‍ മാത്രം. ഒരു ബൂത്ത് തിരുവല്ലയിലും മൂന്ന് ബൂത്തുകള്‍ റാന്നിയിലുമാണ്. തിരുവല്ലയിലെ സിറിയന്‍ ക്രിസ്ത്യന്‍ സെമിനാരി എല്‍പി സ്‌കൂള്‍ തുകലശേരിയിലെ ബൂത്ത് നമ്പര്‍ 111ല്‍ 59.40 ശതമാനം പോളിംഗ് മാത്രമാണ് നടന്നത്. 

ലോക്‌സഭാ തെരഞ്ഞെടുപ്പില്‍ തിരിച്ചറിയല്‍ രേഖയായി ബഹുഭൂരിപക്ഷം വോട്ടര്‍മാരും ഉപയോഗിച്ചത് തെരഞ്ഞെടുപ്പ് കമ്മിഷന്‍ നല്‍കിയ വോട്ടര്‍ തിരിച്ചറിയല്‍ കാര്‍ഡ്. ആകെ പോള്‍ ചെയ്ത 1022763 വോട്ടര്‍മാരില്‍ 859755 പേരും തിരിച്ചറിയല്‍ രേഖയായി ബൂത്തിനുള്ളില്‍ കൊണ്ടുവന്നത് ഇതുതന്നെയായിരുന്നു. 12 കാര്‍ഡുകളെയാണ് തെരഞ്ഞെടുപ്പ് കമ്മിഷന്‍ തിരിച്ചറിയല്‍ രേഖയായി അംഗീകരിച്ചിരുന്നത്. അതില്‍ പറയുന്ന മറ്റു രേഖകള്‍ ഉപയോഗിച്ചവര്‍ 163008 പേര്‍ മാത്രമാണ്. 

പത്തനംതിട്ട ലോക്‌സഭാ മണ്ഡലത്തില്‍ ഇത്തവണയുണ്ടായത് റെക്കോഡ് പോളിംഗും വോട്ടിംഗ് ശതമാനവും. മണ്ഡല ചരിത്രത്തില്‍ ആദ്യമായാണ് വോട്ടിംഗ് ശതമാനം 70 കടക്കുന്നത്. വോട്ട് ചെയ്തവരുടെ എണ്ണം 10 ലക്ഷം കടക്കുന്നതും ഇത് ആദ്യം. 74.19 ശതമാനമാണ് ഇത്തവണത്തെ വോട്ടിംഗ് ശതമാനം. ആകെയുള്ള 13,78,587 പേരില്‍ 10,22,763 പേര്‍ വോട്ട് ചെയ്യുകയും ചെയ്തു. 

ഇത്തവണ ലോക്‌സഭാ തെരഞ്ഞെടുപ്പിന്റെ വോട്ടെടുപ്പു കഴിഞ്ഞപ്പോള്‍ ഏറെ ശ്രദ്ധേയമായത് സ്വീപിന്റെ നേതൃത്വത്തില്‍ നടന്ന വോട്ടര്‍ ബോധവത്കരണ പ്രവര്‍ത്തനങ്ങള്‍. ബൂത്തിലെത്താന്‍ മടികാണിച്ചിരുന്നവരുടെ മണ്ഡലം എന്ന പേര് മാറ്റി, മുഖ്യധാരയിലേക്ക് പത്തനംതിട്ടയെയും കൈപിടിച്ചുയര്‍ത്തിയത് ജില്ലാ കളക്ടര്‍ പി.ബി. നൂഹ്, സ്വീപ്പ് നോഡല്‍ ഓഫീസര്‍ കെ.കെ. വിമല്‍രാജ് എന്നിവരുടെ നേതൃത്വത്തില്‍ നടന്ന വിജയകരമായ ബോധവത്കരണ പ്രവര്‍ത്തനങ്ങള്‍ കൊണ്ടുുകൂടിയാണ്. 'നമ്മുടെ ഭാവി നമ്മുടെ വിരല്‍ത്തുമ്പില്‍' എന്ന സ്വീപ് ആപ്തവാക്യം ജനങ്ങള്‍ നെഞ്ചിലേറ്റിയെന്ന് തെളിയിക്കുന്നതാണ് വോട്ടിംഗ് നില. 

ജില്ലയിലെ രണ്ടു ലോക്‌സഭാ മണ്ഡലങ്ങളിലും സമാധാനപരവും സുഗമവുമായി വോട്ടെടുപ്പ് നടപടികള്‍ പൂര്‍ത്തിയാക്കാന്‍ സഹായിച്ച എല്ലാവര്‍ക്കും നന്ദി പറയുന്നതായി ജില്ലാ കളക്ടര്‍ ഡോ. കെ. വാസുകി അറിയിച്ചു. തെരഞ്ഞെടുപ്പ് ജോലികള്‍ കൃത്യമായി നിര്‍വഹിച്ച ഉദ്യോഗസ്ഥരെയും ജില്ലാ കളക്ടര്‍ പ്രശംസിച്ചു. മാര്‍ ഇവാനിയോസ് കോളജ് ഓഡിറ്റോറിയത്തില്‍ നടന്ന യോഗത്തില്‍ സ്ഥാനാര്‍ഥികള്‍, സ്ഥാനാര്‍ഥികളുടെ പ്രതിനിധികള്‍, ഉദ്യോഗസ്ഥ പ്രതിനിധികള്‍ എന്നിവരുടെ യോഗത്തില്‍ സംസാരിക്കുകയായിരുന്നു കളക്ടര്‍.