പേരാമ്പ്ര ബൈപാസിനായി ഭൂമി ഏറ്റെടുക്കുന്ന നടപടി ക്രമങ്ങള്‍ ചര്‍ച്ച ചെയ്യുന്നതിനായി തൊഴില്‍ എക്‌സൈസ് വകുപ്പ് മന്ത്രി ടി.പി രാമകൃഷ്ണന്റെ അധ്യക്ഷതയില്‍ യോഗം ചേര്‍ന്നു. നടപടികള്‍ വേഗത്തിലാക്കാന്‍ മന്ത്രി ഉദ്യോഗസ്ഥരോട് ആവശ്യപ്പെട്ടു.  അഞ്ച് മാസത്തിനകം ആവശ്യമായ സ്ഥലം ഏറ്റെടുത്തു ടെന്‍ഡര്‍ നടപടികള്‍ ആരംഭിക്കണമെന്ന് മന്ത്രി നിര്‍ദ്ദേശം നല്‍കി. വ്യക്തിഗത സര്‍വ്വേ, വിലനിര്‍ണയം എന്നീ നടപടികള്‍ രണ്ട്  മാസത്തിനകം പൂര്‍ത്തീകരിക്കാനും  തീരുമാനമായി. 59.44 കോടി രൂപയാണ് നിലവില്‍ ബൈപാസ് നിര്‍മാണ പ്രവൃത്തികള്‍ക്കായി അനുവദിച്ചിരിക്കുന്നത്.

ഗവണ്‍മെന്റ് വനിതാ പോളിടെക്നിക്ക് കോളേജില്‍ പുതുതായി നിര്‍മ്മിച്ച അക്കാദമിക് ബ്ലോക്കിന്റെയും പ്രൊഡക്ഷന്‍ ആന്റ് ട്രെയിനിംഗ് സെന്റര്‍ കെട്ടിടത്തിന്റെയും ഉദ്ഘാടനം മാര്‍ച്ച് ഒന്നിന് ഉച്ചക്ക് 12 മണിക്ക് ഉന്നതവിദ്യാഭ്യാസ വകുപ്പ് മന്ത്രി കെ.ടി ജലീല്‍ നിര്‍വഹിക്കും. പുതുതായി നിര്‍മ്മിച്ച ഹോസ്റ്റല്‍ കെട്ടിടം എം.കെ രാഘവന്‍ എം.പി ഉദ്ഘാടനം ചെയ്യും. എ.പ്രദീപ് കുമാര്‍ എം.എല്‍.എ അധ്യക്ഷത വഹിക്കും. ചടങ്ങില്‍ ജില്ലാ പഞ്ചായത്ത് പ്രസിഡന്റ് ബാബു പറശ്ശേരി മുഖ്യാതിഥിയാവും. 

തടമ്പാട്ടുതാഴം - പറമ്പില്‍കടവ് - പുല്ലാലൂര്‍ റോഡിന്റെ നവീകരണ പ്രവൃത്തി നടക്കുന്നതിനാല്‍ ഫെബ്രുവരി 27 മുതല്‍ കണ്ണാടിക്കലിനും മല്ലിശ്ശേരി ഭാഗത്തിനുമിടയില്‍ പ്രവൃത്തി കഴിയുന്നതുവരെ വാഹന ഗതാഗതം നിരോധിച്ചു. കണ്ണാടിക്കല്‍ ഭാഗത്ത് നിന്നും മല്ലിശ്ശേരി ഭാഗത്തേക്ക് പോകുന്ന വാഹനങ്ങള്‍ പാറോപ്പടി-എന്‍.എച്ച്. 212- മൂഴിക്കല്‍ വഴിയും തിരിച്ചും പോകേണ്ടതാണെന്ന് എക്സിക്യൂട്ടീവ് എഞ്ചിനീയര്‍ അറിയിച്ചു.

കോട്ടൂളി മുതല്‍ സിവില്‍ സ്റ്റേഷന്‍ വരെയുളള റോഡിന്റെ നവീകരണ പ്രവൃത്തി നടക്കുന്നതിനാല്‍ ഫെബ്രുവരി 27 മുതല്‍ പ്രവൃത്തി കഴിയുന്നതുവരെ വാഹന ഗതാഗതം നിയന്ത്രിച്ചു. കോട്ടൂളിയില്‍ നിന്നും സിവില്‍ സ്റ്റേഷനിലേക്ക് പോകേണ്ട വാഹനങ്ങള്‍ തൊണ്ടയാട് മലാപ്പറമ്പ് വഴിയും തിരിച്ചും പോകേണ്ടതാണെന്ന് എക്സിക്യൂട്ടീവ് എഞ്ചിനീയര്‍ അറിയിച്ചു.

കോഴിക്കോട് ഗവ. ഹോമിയോപ്പതിക് മെഡിക്കല്‍ കോളേജില്‍ സി.സി.പി കോഴ്സ് 2019 നായി ദിവസവേതനാടിസ്ഥാനത്തില്‍ അധ്യാപകരെ  നിയമ#ിക്കുന്നു. യോഗ്യത - ബിഎച്ച്എംഎസ് (അധ്യാപന പരിചയം അഭികാമ്യം). താല്‍പര്യമുളളവര്‍ ഫെബ്രുവരി 28 ന് രാവിലെ 10.30 മണിക്ക് പ്രിന്‍സിപ്പാള്‍  മുമ്പാകെ അസ്സല്‍ സര്‍ട്ടിഫിക്കറ്റുകളുമായി ഇന്റര്‍വ്യൂവിന് ഹാജരാകണം.