പ്രളയാനന്തര കേരളത്തിൽ വീട് നിർമ്മാണത്തിന് പുതിയ നിർമ്മാണ സാമഗ്രികൾ ഉപയോഗിച്ചുള്ള ഹരിത നിർമ്മാണ രീതികൾ ചർച്ച ചെയ്ത് സംസ്ഥാന സർക്കാറിന്റെ ആയിരം ദിനാഘോഷത്തിന്റെ ഭാഗമായി സംഘടിപ്പിച്ച 'നവകേരളം: നിർമ്മിതിയിലെ നവീന സാങ്കേതിക വിദ്യകൾ' സെമിനാർ. ചെന്നൈ ഐ.ഐ.ടി ഗവേഷകൻ ഡോ. ഷിന്റോ പോൾ അവതരിപ്പിച്ച ഗ്ലാസ് ഫൈബർ റീഇൻഫോഴ്‌സ്ഡ് ജിപ്‌സം (ജി എഫ് ആർ ജി) പാനലുകൾ ഉപയോഗിച്ച് കുറഞ്ഞ സമയത്തിനുള്ളിൽ വീട് നിർമ്മിക്കാനുള്ള സാങ്കേതിക വിദ്യ ശ്രദ്ധേയമായി.

സംസ്ഥാന സര്‍ക്കാരിന്റെ ആയിരം ദിനാഘോഷത്തിന്റെ ഭാഗമായി ഇന്‍ഫര്‍മേഷന്‍ ആന്റ് പബ്ലിക് റിലേഷന്‍ വകുപ്പിന്റെ ആഭിമുഖ്യത്തിലുള്ള 'അതിജീവനം ഡോക്യുഫെസ്റ്റ്' പ്രമുഖ സിനി ഡോക്യുമെന്ററി സംവിധായകന്‍  ഫാറൂഖ് അബ്ദുള്‍ റഹ്മാന്‍ ഉദ്ഘാടനം ചെയ്തു.   തൃക്കരിപ്പൂര്‍ ബസ്റ്റാന്റ് പരിസരത്ത് നടന്ന ചടങ്ങില്‍ തൃക്കരിപ്പൂര്‍ ഗ്രാമ പഞ്ചായത്ത് മെമ്പര്‍ ടി.വി കുഞ്ഞികൃഷണന്‍  അധ്യക്ഷത വഹിച്ചു. ഡോക്യുഫെസ്റ്റിന്റെ മുന്നോടിയായി നവോത്ഥാന ചിത്ര പ്രദര്‍ശനം ജില്ലാ പഞ്ചായത്തംഗം ഡോ.വി.പി.പി മുസ്തഫ ഉദ്ഘാടനം ചെയ്തു.

അന്തരീക്ഷ മലിനീകരണം പരമാവധി കുറക്കുന്ന വാഹനങ്ങളാകണം ഇനി കേരളത്തില്‍ ഓടേണ്ടതെന്ന് ഗതാഗത വകുപ്പ് മന്ത്രി എ കെ ശശീന്ദ്രന്‍. അതുകൊണ്ടാണ് ഒരു ഇലക്ട്രിക്കല്‍ ബസ് ട്രാന്‍സ്‌പോര്‍ട്ട് നയം ഈ സര്‍ക്കാര്‍ സ്വീകരിച്ചിട്ടുള്ളതെന്നും തിരുവനന്തപുരം, കൊച്ചി സിറ്റികളില്‍ ഇലക്ട്രിക്കല്‍ വാഹനങ്ങള്‍ സര്‍വീസ് നടത്താന്‍ പോകുകയാണെന്നും മന്ത്രി കൂട്ടിച്ചേര്‍ത്തു. പറശ്ശിനിക്കടവില്‍ പുതിയ ബോട്ട് സര്‍വീസ് ഉദ്ഘാടനം ചെയ്ത് സംസാരിക്കുകയായിരുന്നു  അദ്ദേഹം. 

മാട്ടൂല്‍-അഴീക്കല്‍ ബോട്ട് സര്‍വീസ് ഗതാഗത വകുപ്പ് മന്ത്രി എ കെ ശശീന്ദ്രന്‍ ഫ്‌ളാഗ് ഓഫ് ചെയ്തു. മാട്ടൂല്‍ സൗത്തിലെ ബോട്ട് ജെട്ടിക്ക് സമീപം നടന്ന ചടങ്ങില്‍ ടി വി രാജേഷ് എംഎല്‍ എ അധ്യക്ഷത വഹിച്ചു.

'നവകേരളം നിര്‍മിതിയിലെ നവീന സാങ്കേതിക വിദ്യകള്‍' എന്ന വിഷയത്തില്‍ നടത്തുന്ന സെമിനാര്‍ നാളെ (ഫെബ്രുവരി 25) രാവിലെ 10 മണിക്ക് ജില്ലാ ആസൂത്രണസമിതി ഹാളില്‍ പി കെ ശ്രീമതി ടീച്ചര്‍ എം പി ഉദ്ഘാടനം ചെയ്യും. ജെയിംസ് മാത്യു എം എല്‍ എ അധ്യക്ഷനായിരിക്കും. ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റി പ്രസിഡന്റ് പാലേരി രമേശന്‍ മുഖ്യാതിഥിയാവും. ചെന്നൈ ഐ.ഐ.ടിയിലെ ഷിന്റോ പോള്‍ സെമിനാര്‍ വിഷയാവതരണം നടത്തും. 

വിവി പാറ്റ് വോട്ടിംഗ് യന്ത്രത്തിന്റെ പ്രവര്‍ത്തനം വോട്ടര്‍മാര്‍ക്ക് പരിചയപ്പെടുത്തുകയും അതേക്കുറിച്ച് ജനങ്ങളെ ബോധവല്‍ക്കരിക്കുന്നതിനുമായി വിവി പാറ്റ് വോട്ടിങ്ങ് യന്ത്രത്തിന്റെ മാതൃകയിലുള്ള വാഹനം സജ്ജമായി. വാഹനം നാളെ(ഫെബ്രുവരി 25) രാവിലെ 10.30ന് കലക്ടറേറ്റ് പരിസരത്ത് നിന്ന് ജില്ലാ കലക്ടര്‍ മീര്‍ മുഹമ്മദലി ഫ്‌ളാഗ് ഓഫ് ചെയ്യും.

കണ്ണൂര്‍ നഗരത്തിലെ ടൂറിസം വികസനത്തിന്റെ ഭാഗമായി പുതുതായി നിര്‍മിക്കുന്ന പാലക്കാട് സ്വാമിമഠം പാര്‍ക്ക്, പയ്യാമ്പലം അഡ്വഞ്ചര്‍ പാര്‍ക്ക് എന്നിവയുടെ പ്രവൃത്തി തുറമുഖ മകുപ്പ് മന്ത്രി രാമചന്ദ്രന്‍ കടന്നപ്പള്ളി ഉദ്ഘാടനം ചെയ്തു. ഇതോടൊപ്പം പയ്യാമ്പലം ബീച്ച് ഗാര്‍ഡന്‍, ഗസ്റ്റ് ഹൗസ് പാത്ത്‌വേ എന്നിവയുടെ നവീകരണ പ്രവൃത്തികളുടെ ഉദ്ഘാടനവും മന്ത്രി നിര്‍വഹിച്ചു.

സംസ്ഥനത്തെ സ്വകാര്യ മേഖലകളില്‍ ഖാദി എന്ന പേരില്‍ വില്‍ക്കപ്പെടുന്ന തുണിത്തരങ്ങള്‍ യഥാര്‍ത്ഥ ഖാദിയല്ലെന്നും ഇത്തരം വ്യാജ ഖാദികളുടെ വില്‍പ്പന തടയുന്നതിനാവശ്യമായ നടപടികള്‍ സ്വീകരിക്കുമെന്നും വ്യവസായ വകുപ്പ് മന്ത്രി ഇ പി ജയരാജന്‍. മഹാത്മാ ഗാന്ധിയുടെ 150-ാം ജന്മവാര്‍ഷികത്തോടനുബന്ധിച്ച് കേരള ഖാദി ഗ്രാമവ്യവസായ ബോര്‍ഡ് സംഘടിപ്പിച്ച ഗാന്ധി സ്മൃതി സദസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.