കണ്ണൂർ കല്യാട് സ്ഥാപിക്കുന്ന അന്താരാഷ്ട്ര ആയുർവേദ ഗവേഷണകേന്ദ്രത്തിന്റെ ശിലാസ്ഥാപനം ഇന്ന് (ഫെബ്രുവരി 22) വൈകുന്നേരം അഞ്ചിന് മുഖ്യമന്ത്രി പിണറായി വിജയൻ നിർവഹിക്കും. ആരോഗ്യ, ആയുഷ്  മന്ത്രി കെ.കെ. ശൈലജടീച്ചർ ചടങ്ങിൽ അധ്യക്ഷത വഹിക്കും. വ്യവസായ, സ്പോർട്സ,് യുവജനകാര്യമന്ത്രി ഇ.പി. ജയരാജൻ മുഖ്യാതിഥിയാവും. തുറമുഖ, മ്യൂസിയം, പുരാവസ്തു, പുരാരേഖ വകുപ്പുമന്ത്രി രാമചന്ദ്രൻ കടന്നപ്പള്ളി വിശിഷ്ടാതിഥിയാവുന്ന ചടങ്ങിൽ ജില്ലയിൽ നിന്നുള്ള എം.പി.മാർ, എം.എൽ.എ.മാർ മറ്റ് ജനപ്രതിനിധികൾ, വകുപ്പ് തലവൻമാർ എന്നിവർ പങ്കെടുക്കും.

സംസ്ഥാന സര്‍ക്കാറിന്റെ ആയിരം ദിനാഘോഷത്തിന്റെ ഭാഗമായി വ്യവസായ വാണിജ്യ വകുപ്പ്, ജില്ലാ വ്യവസായ കേന്ദ്രം എന്നിവയുടെ നേതൃത്വത്തില്‍ സംഘടിപ്പിച്ച ജില്ലാതല നിക്ഷേപക സംഗമവും മടിക്കൈ ഗ്രാമ പഞ്ചായത്തിലെ 99 ഏക്കര്‍ റവന്യൂ ഭൂമിയുടെ രേഖ വ്യവസായ പാര്‍ക്കിനായി  കൈമാറുന്ന ചടങ്ങും  വ്യവസായികള്‍ക്കുള്ള ആനുകുല്യ വിതരണവും വ്യവസായ-വാണിജ്യ, കായിക യുവജനക്ഷേമ വകപ്പ് മന്ത്രി ഇ.പി ജയരാജന്‍ ഉദ്ഘാടനം ചെയ്തു.   പടന്നക്കാട് ബേക്കല്‍ ക്ലബില്‍ സംഘടിപ്പിച്ച പരിപാടിയില്‍ റവന്യൂ വകുപ്പ് മന്ത്രി ഇ ചന്ദ്രശേഖരന്‍ അധ്യക്ഷനായി. 

ജില്ല നിലവില്‍ വന്ന് 35 വര്‍ഷം പൂര്‍ത്തിയാകുമ്പോഴും  വ്യവസായ രഹിത ജില്ല എന്ന പേരുദോഷം മാറ്റാന്‍ നമുക്ക് ഇതുവരെ കഴിഞ്ഞില്ലെന്നും ചെറിയ സംരംഭങ്ങള്‍ ആരംഭിച്ചെങ്കിലും  കാസര്‍കോടിന്റെ വ്യവസായ ഭൂപടം പരിശോധിച്ചാല്‍ കാര്യമായ മാറ്റമൊന്നും വരുത്താന്‍ സാധിച്ചിട്ടില്ലെന്നും റവന്യൂ വകുപ്പ് മന്ത്രി ഇ ചന്ദ്രശേഖരന്‍ പറഞ്ഞു. പടന്നക്കാട് ബേക്കല്‍ ക്ലബില്‍ സംഘടിപ്പിച്ച  ജില്ലാതല നിക്ഷേപ സംഗമത്തില്‍ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. 

കാര്‍ഷിക മേഖലയ്ക്ക് കൂടുതല്‍ പ്രാധാന്യം നല്‍കികൊണ്ട് കേരളത്തില്‍ മൂന്നിടങ്ങളില്‍ റൈസ് പാര്‍ക്ക് ആരംഭിക്കുമെന്നും ഇതുവഴി സംസ്ഥാനത്ത് ഉത്പാദിപ്പിക്കുന്ന മുഴുവന്‍ അരിയും ശേഖരിച്ച് കുത്തരിയാക്കി 25 കിലോയുടെ പായ്ക്ക് സിവില്‍ സപ്ലൈയ്‌സിനോ കണ്‍സ്യൂമര്‍ഫെഡിലേക്കും നല്‍കുമെന്നും അധികം വരുന്നവ വില്‍ക്കാനുള്ള നടപടി സ്വീകരിക്കുമെന്നും മന്ത്രി ഇ.പി ജയരാജന്‍ പറഞ്ഞു. പടക്കാട് ബേക്കല്‍ ക്ലബില്‍ സംഘടിപ്പിച്ച  ജില്ലാതല നിക്ഷേപ സംഗമം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

സംസ്ഥാന സര്‍ക്കാരിന്റെ ആയിരം ദിനാഘോഷ പരിപാടിയുടെ ഭാഗമായി കാഞ്ഞങ്ങാട് അലാമിപ്പള്ളിയിലെ വേദിയില്‍ ജില്ലയിലെ 20 വികസന പദ്ധതികള്‍ മുഖ്യമന്ത്രി പിണറായി വിജയന്‍ ഇന്ന് ഉദ്ഘാടനം ചെയ്യും. 275.52 കോടി രൂപയുടെ പദ്ധതികളാണ് മുഖ്യമന്ത്രി ഉദ്ഘാടനം ചെയ്യുന്നത്.

കെ.ടെറ്റ് കാറ്റഗറി 1, 2, 3, 4 പരീക്ഷകളുടെ ഉത്തരസൂചികകൾ പരീക്ഷാഭവന്റെ വെബ്‌സൈറ്റിൽ പ്രസിദ്ധീകരിച്ചു. ഉത്തരസൂചികകളിൽ പരീക്ഷാർത്ഥികൾക്ക് ഏതെങ്കിലും തരത്തിലുള്ള പരാതികളുണ്ടെങ്കിൽ വെബ്‌സൈറ്റിലുള്ള നിശ്ചിത ഫോർമാറ്റിൽ അവയ്ക്ക് ആധാരമായ രേഖകൾ സഹിതം ഈ മാസം 27 ന് മുമ്പ് നേരിട്ടോ തപാൽ മാർഗ്ഗമോ പരീക്ഷാസെക്രട്ടറി പരീക്ഷാഭവൻ, പൂജപ്പുര, തിരുവനന്തപുരം-12 എന്ന വിലാസത്തിൽ നൽകണം.

പി.എൻ.എക്സ്. 651/19

ഫെബ്രുവരി 28 മുതൽ നടക്കേണ്ടിയിരുന്ന എസ്.എസ്.എൽ.സി ഐ.റ്റി പ്രാക്ടിക്കൽ പരീക്ഷ മാർച്ച് ഒന്നിന് എല്ലാ പരീക്ഷാകേന്ദ്രങ്ങളിലും ആരംഭിക്കുമെന്ന് പരീക്ഷാഭവൻ അറിയിച്ചു.  ഫെബ്രുവരി 18ന് നടക്കേണ്ടിയിരുന്ന എസ്.എസ്.എൽ.സി മോഡൽ പരീക്ഷ ഫെബ്രുവരി 28 നു നടക്കും.

പി.എൻ.എക്സ്. 650/19

കേരള ദേവസ്വം റിക്രൂട്ട്മെന്റ് ബോർഡിൽ 25200-54000 രൂപ ശമ്പള സ്‌കെയിലിലുള്ള ക്ലാർക്ക് തസ്തികയിലേക്ക് ഡെപ്യൂട്ടേഷൻ വ്യവസ്ഥയിൽ സംസ്ഥാന സർക്കാർ വകുപ്പുകളിൽ സമാന തസ്തികകളിൽ സേവനമനുഷ്ഠിക്കുന്ന ജീവനക്കാരിൽ നിന്നും അപേക്ഷകൾ ക്ഷണിച്ചു. അപേക്ഷ ബോർഡ് ഓഫീസിൽ ലഭിക്കേണ്ട അവസാന തീയതി മാർച്ച് ആറ്.  വിശദാംശങ്ങൾ  www.kdrb.kerala.gov.in  എന്ന വെബ്സൈറ്റിൽ ലഭ്യമാണ്. 

പി.എൻ.എക്സ്. 649/19