കോട്ടയം ജില്ലയില്‍ എക്‌സൈസ് വകുപ്പില്‍ ഡ്രൈവര്‍ (കാറ്റഗറി നമ്പര്‍ 659/17) തസ്തികയുടെ ചുരുക്കപ്പട്ടിക കേരള പബ്ലിക സര്‍വ്വീസ് കമ്മീഷന്‍ പ്രസിദ്ധീകരിച്ചു. വിശദ വിവരങ്ങള്‍ www.keralapsc.gov.in എന്ന വെബ് സൈറ്റില്‍ ലഭിക്കും.  

മണര്‍കാട് ദേവീക്ഷേത്രത്തിലെ പത്താമുദയ മഹോത്സവത്തോടനുബന്ധിച്ച് ക്ഷേത്രത്തിന്റെ മൂന്നു കിലോമീറ്റര്‍ ചുറ്റളവിലുള്ള പ്രദേശം ഏപ്രില്‍ 24 വരെ ജില്ലാ കളക്ടര്‍ ഉത്സവമേഖലയായി പ്രഖ്യാപിച്ചു. 

ലോക്‌സഭാ തിരഞ്ഞെടുപ്പ് നടക്കുന്ന സാഹചര്യത്തില്‍ ഇന്ന് (ഏപ്രില്‍ 21) വൈകുന്നേരം ആറുമുതല്‍ വോട്ടെടുപ്പ് ദിനമായ ഏപ്രില്‍ 23ന് വൈകുന്നേരം ആറു വരെ ജില്ലയില്‍ സമ്പൂര്‍ണ്ണ മദ്യനിരോധനം ഏര്‍പ്പെടുത്തി ജില്ലാ വരണാധികാരിയായ ജില്ലാ കളക്ടര്‍ ഉത്തരവ് പുറപ്പെടുവിച്ചു.

ലോക്‌സഭാ തിരഞ്ഞെടുപ്പുമായി ബന്ധപ്പെട്ട കോട്ടയം ജില്ലയിലെ  അടിസ്ഥാന വിവരങ്ങളും ഇതുവരെ നടത്തിയ പ്രവര്‍ത്തനങ്ങളുടെ വിശദാംശങ്ങളും ഉള്‍പ്പെടുന്ന തിരഞ്ഞെടുപ്പ് ഗൈഡ് പുറത്തിറങ്ങി. വോട്ടര്‍ ബോധവത്കരണ കര്‍മ്മ പരിപാടിയായ സ്വീപും ഇന്‍ഫര്‍മേഷന്‍-പബ്ലിക് റിലേഷന്‍സ് വകുപ്പും സംയുക്തമായാണ് ഗൈഡ് തയ്യാറാക്കിയിരിക്കുന്നത്. 

കേരളത്തില്‍ വേനല്‍ മഴയോടനുബന്ധിച്ച് ഉച്ചക്ക് രണ്ടു മുതല്‍ വൈകിട്ട് എട്ടു വരെ ശക്തമായ ഇടിമിന്നല്‍ ഉണ്ടാകുന്നതിനാല്‍ സംസ്ഥാന ദുരന്തനിവാരണ അതോറിറ്റി ജാഗ്രതാ നിര്‍ദ്ദേശം പുറപ്പെടുവിച്ചു.  ഇടിമിന്നല്‍ സമയത്ത് ടെറസിലേക്കോ വീടിന് പുറത്തേക്കോ  പോകുന്നത് ഒഴിവാക്കണമെന്നും കുട്ടികളെ തുറസായ സ്ഥലത്ത് കളിക്കാന്‍ അനുവദിക്കരുതെന്നും നിര്‍ദേശത്തില്‍ പറയുന്നു. 

1. തിരഞ്ഞെടുപ്പ് കമ്മീഷന്‍ നല്‍കിയ തിരിച്ചറിയല്‍ കാര്‍ഡ്

2. പാസ്പോര്‍ട്ട്

കോട്ടയം ജില്ലയില്‍ തിരഞ്ഞെടുപ്പ് കമ്മീഷന്‍റെ നിര്‍ദേശങ്ങള്‍ പാലിക്കാതെ സ്ഥാപിച്ച 85835 തിരഞ്ഞെടുപ്പ് പ്രചാരണ സാമഗ്രികള്‍ ഡീഫേസ്മെന്‍റ് സ്ക്വാഡുകള്‍ ഇതുവരെ നീക്കം ചെയ്തു. പൊതുസ്ഥലങ്ങളിലും ഉടമസ്ഥന്‍റെ അനുമതിയില്ലാത്ത സ്വകാര്യ സ്ഥലങ്ങളിലും പ്രദര്‍ശിപ്പിച്ച ബോര്‍ഡുകള്‍, ബാനറുകള്‍, പോസ്റ്ററുകള്‍ തുടങ്ങിയവയാണ് നീക്കം ചെയ്തത്. 

ഇലക്‌ട്രോണിക് വോട്ടിങ് യന്ത്രത്തിൽ ചെയ്ത വോട്ട് വിവിപാറ്റ് പേപ്പർ സ്ലിപ്പിൽ തെറ്റായി അച്ചടിച്ചുവന്നാൽ വോട്ടർക്ക് പരാതിപ്പെടാം. ഈ സാഹചര്യത്തിൽ 49എം.എ ചട്ടപ്രകാരം നടപടി സ്വീകരിക്കും. പരാതിയുണ്ടെങ്കിൽ വോട്ടറിൽനിന്ന് സത്യവാങ്മൂലം എഴുതി ഒപ്പിട്ട് വാങ്ങും. ഫോം 17എയിൽ പ്രസ്തുത വോട്ടറുടെ പേര് രണ്ടാമതും രേഖപ്പെടുത്തണം. തുടർന്ന് പ്രിസൈഡിങ് ഓഫീസറുടെയും പോളിങ് ഏജൻറുമാരുടെയും സാന്നിധ്യത്തിൽ ടെസ്റ്റ് വോട്ട് ചെയ്യാൻ അനുവദിച്ച് വിവിപാറ്റ് പേപ്പർ സ്ലിപ്പ് നിരീക്ഷിക്കുക. ആരോപണം ശരിയെന്ന് തെളിഞ്ഞാൽ, പോളിങ് നിർത്തിവെച്ച് വരണാധികാരിയായ ജില്ലാ കളക്ടറെ വിവരം അറിയിക്കും.

പോളിംഗ് ബൂത്തിന്‍റെ നൂറു മീറ്റര്‍ ചുറ്റളവിനുള്ളില്‍ മൊബൈള്‍ ഫോണ്‍, കോഡ് ലെസ് ഫോണ്‍ തുടങ്ങിയവ ഉപയോഗിക്കുന്നത് കേന്ദ്ര തിരഞ്ഞെടുപ്പ് കമ്മീഷന്‍ വിലക്കിയിട്ടുണ്ട്. പ്രിസൈഡിംഗ് ഓഫീസര്‍ക്കും പോളിംഗ് ജോലിയിലുള്ള മറ്റ് ഉദ്യോഗസ്ഥര്‍ക്കും മൊബൈല്‍ ഫോണ്‍ കൈവശം വയ്ക്കാമെങ്കിലും പോളിംഗ് സമയത്ത് ഇവ സ്വിച്ചോഫ് ചെയ്തിരിക്കണം. 

കോട്ടയം ജില്ലയിലെ പ്രിസൈഡിംഗ് ഓഫീസര്‍മാര്‍ക്ക് പോളിംഗ് ബൂത്തില്‍ അടിസ്ഥാന സൗകര്യങ്ങളുടെ അപര്യാപ്തത കണ്ടെത്തിയാല്‍ നിമിഷങ്ങള്‍ക്കുള്ളില്‍ അധികൃതരെ അറിയിച്ച് പരിഹാരം തേടാം. ഇലക്ഷന്‍ കോട്ടയം എന്ന ആന്‍ഡ്രോയ്ഡ് ആപ്ലിക്കേഷനാണ് ഇതിന് വഴിതുറക്കുന്നത്.