ലോകസഭാ തെരഞ്ഞടുപ്പിന്റെ ഭാഗമായി ജില്ലയിലെ വോട്ടെടുപ്പ് കേന്ദ്രങ്ങളില്‍ ഭക്ഷണസൗകര്യമൊരുക്കിയത് കുടുംബശ്രീ. പോളിങ് ബൂത്തുകളിലെ തെരഞ്ഞെടുപ്പ് ഉദ്യോഗസ്ഥര്‍ക്ക് ഭക്ഷണവും കുടിവെള്ളവും ഉള്‍പ്പെടെയുള്ളവയാണ് കുടുംബശ്രീ ജില്ലാമിഷന്റെ നേതൃത്വത്തില്‍ അതത് കുടുബശ്രീ യൂണിറ്റുകള്‍ മുഖേന എത്തിച്ചു നല്‍കിയത.് പലപ്പോഴും തെരഞ്ഞെടുപ്പ് സമയങ്ങളില്‍ ഉദ്യോഗസ്ഥര്‍ക്ക്  ഭക്ഷണം ലഭ്യമല്ലാത്ത അവസ്ഥ ഉണ്ടാകാറുണ്ട്. ഇതിനു പരിഹാരമെന്ന നിലയിലാണ് ജില്ലാ വരണാധികാരികൂടിയ ജില്ലാ കളക്ടര്‍ ഡോ. ഡി സജിത് ബാബുവിന്റെ പ്രത്യേക നിര്‍ദേശ പ്രകാരം കുടുംബശ്രീ യൂണിറ്റുകള്‍ മുഖേന ഭക്ഷണ സൗകര്യമൊരുക്കിയത്. 

ഇന്ത്യന്‍ ജനാധിപത്യത്തിന് ശക്തി പകരാന്‍ കന്നിവോട്ടിന്റെ കരുത്തുമായി എത്തിയ ഇരട്ടകള്‍ക്കിത് ഇരട്ടി മധുരം. ചട്ടഞ്ചാല്‍ ഗവര്‍മെന്റ് ഹയര്‍സെക്കഡറി സ്‌കൂളിലെ 35-ാം നമ്പര്‍ ബൂത്തിലാണ് ജനാധിപത്യ പ്രക്രിയക്ക് പിന്തുണയര്‍പ്പിച്ച് ഇരട്ടകളായ അശ്വതിയും ആതിരയും എത്തിയത്. അമ്മ പ്രസന്നയും മുത്തശ്ശി ദാക്ഷായണിയും കൂടിയായതോടെ മൂന്നു തലമുറയുടെ കരുത്തുമായാണ് ഇവര്‍ വോട്ടു ചെയ്തത്. തങ്ങള്‍ പഠിച്ച സ്‌കൂളില്‍ തന്നെ ആദ്യ വോട്ട് രേഖപ്പെടുത്താന്‍ അവസരം ലഭിച്ചതിന്റെ ആഹ്ലാദത്തിലാണ് ഇവര്‍. ഈ സ്‌കൂളില്‍ തന്നെ  പ്ലസ് ടു പഠിച്ച്  പരീക്ഷ എഴുതി ഫലം കാത്തിരിക്കുകയാണ്  ഇരുവരും.

വോട്ടെടുപ്പ് ദിനത്തില്‍ കാഞ്ഞങ്ങാട് ദുര്‍ഗ ഹയര്‍ സെക്കന്‍ഡറി സ്‌കൂളിലെ  135-ാം നമ്പര്‍ പോളിങ് ബൂത്ത് ചരിത്ര മുഹൂര്‍ത്തത്തിന് സാക്ഷിയായി. ജില്ലയിലെ ഏക ട്രാന്‍സ്‌ജെന്‍ഡര്‍ വോട്ടര്‍ ആയ  ഇഷാ  കിഷോര്‍  വോട്ട് രേഖപ്പെടുത്തിയത് ഇവിടെയാണ്. ജില്ലയിലെ ആദ്യ ട്രാന്‍സ്‌ജെന്‍ഡര്‍ വോട്ടര്‍ കൂടിയാണിവര്‍. 

'വോട്ട് രേഖപ്പെടുത്തുന്നതിലൂടെ എന്റെ അധികാരം, എന്റെ അവകാശം, ഞാന്‍ വിനിയോഗിക്കുകയാണ് ചെയ്തത്. എനിക്ക് എന്റെ ഐഡന്റിറ്റി വെളിപ്പെടുത്തി വോട്ട് ചെയ്യാന്‍ സാധിച്ചത് അതിയായി സന്തോഷമുള്ള കാര്യമാണ്.ഞാന്‍ ഞാന്‍ ആയി അംഗീകരിപ്പെട്ടതിലാണ് സന്തോഷം.'- ഇഷാ കിഷോര്‍ പറഞ്ഞു.

തമിഴ് ചിത്രമായ മഹാമുനിയുടെ ഷൂട്ടിങ് ലോക്കേഷനായ പൊള്ളാച്ചിയില്‍ നിന്നാണ് മഹിമ നമ്പ്യാര്‍ വോട്ട് ചെയ്യാന്‍ കാസര്‍കോട് എത്തിയത്.തമിഴകത്തെ അറിയപ്പെടുന്ന ചലച്ചിത്രതാരമായ മഹിമ നമ്പ്യാര്‍ നായമ്മാര്‍മൂല ടി ഐ എച്ച്  എസ് എസിലെ 101-ാം നമ്പര്‍ പോളിങ് ബൂത്തിലാണ് വോട്ട് രേഖപ്പെടുത്തിയത്. 'വോട്ട് രേഖപ്പെടുത്തുന്നതിലൂടെ നമ്മളെ ആര് ഭരിക്കണം എന്ന് നാം തന്നെ തീരുമാനിക്കുകയാണ്.വോട്ട് രേഖപ്പെടുത്തുകയെന്നത് നമ്മുടെ അവകാശമാണ്.അതോടെപ്പം സമൂഹത്തോടുള്ള നമ്മുടെ ഉത്തരവാദിത്വം കൂടിയാണിത്' മഹിമ പറഞ്ഞു.ഏട്ടന്‍ ഉണ്ണികൃഷ്ണനോടൊപ്പമാണ് മഹിമ എത്തിയത്. 

പതിനേഴാം ലോക്‌സഭയിലേക്കുള്ള തെരഞ്ഞെടുപ്പില്‍ റവന്യൂ വകുപ്പ് മന്ത്രി ഇ ചന്ദ്രശേഖരനും ജില്ലയിലെ എം എല്‍ എമാരും  കാസര്‍കോട് ലോക്‌സഭാ മണ്ഡലത്തിലെ വിവിധ കേന്ദ്രങ്ങളില്‍ വോട്ട് രേഖപ്പെടുത്തി. റവന്യൂ വകുപ്പ് മന്ത്രി ഇ ചന്ദ്രശേഖരന്‍ കോളിയടുക്കം ഗവര്‍മെന്റ് യുപി സ്‌കൂളിലെ  33-ാം നമ്പര്‍  പോളിങ് ബൂത്തിലാണ് വോട്ട് രേഖപ്പെടുത്തിയത്.എന്‍.എ  നെല്ലിക്കുന്ന് എം എല്‍ എ, നെല്ലിക്കുന്ന് ഗവര്‍മെന്റ് ഗേള്‍സ് ഹയര്‍സെക്കഡറി സ്‌കൂളിലെ 141-ാം ബൂത്തില്‍ ആദ്യവോട്ടര്‍ ആയി വോട്ട് ചെയ്തു. കൂട്ടക്കനി ഗവര്‍മെന്റ് യുപി സ്‌കൂളിലെ 132-ാം നമ്പര്‍ പോളിങ് ബൂത്തിലാണ് കെ.കുഞ്ഞിരാമന്‍ എം എല്‍ എ വോട്ട് രേഖപ്പെടുത്തിയത്.

തെരഞ്ഞെടുപ്പ് ദിനത്തില്‍ ജില്ലയിലെ 43 പ്രശ്‌നബാധിത ബൂത്തുകളിലെ പ്രവര്‍ത്തനങ്ങള്‍ തല്‍സമയം നിരീക്ഷിച്ച് തെരഞ്ഞെടുപ്പ് വരണാധികാരികൂടിയായ ജില്ലാകളക്ടര്‍ ഡോ. ഡി സജിത് ബാബുവും സംഘവും. കളക്ടറേറ്റ് മിനികോണ്‍ഫറന്‍സ് ഹാളില്‍ പ്രത്യേകം സജ്ജമാക്കിയ കണ്‍ട്രോള്‍ റൂമിലാണ് ജില്ലയിലെ 43 ബൂത്തുകളിലെ വോട്ടെടുപ്പ് കളക്ടര്‍ തല്‍സമയം നിരീക്ഷിച്ചത്. കളക്ടര്‍ക്കു പുറമെ പൊതുനിരീക്ഷകന്‍ എസ്.ഗണേഷ്, പൊലീസ് നിരീക്ഷകന്‍ ഓംപ്രകാശ് ത്രിപാഠി, എഡിഎം: സി ബിജു, ഇലക്ഷന്‍ ഡെപ്യൂട്ടി കളക്ടര്‍ വി പി അബ്ദു റഹ്മാന്‍,  ട്രയിനിങ്ങ് നോഡല്‍ ഓഫീസര്‍ കെ.വിനോദ് കുമാര്‍ എന്നിവര്‍ തല്‍സമയ നിരീക്ഷണത്തില്‍ പങ്കാളികളായി. 

തെരഞ്ഞെടുപ്പ് ദിനത്തില്‍ ഫ്‌ളയിങ് സ്‌ക്വാഡ് നടത്തിയ പരിശോധനയില്‍ 2,80,000 രൂപ പിടികൂടി. നീലേശ്വരം കരുവാച്ചേരിയില്‍ കാറില്‍ നിന്നാണ് പണം പിടികൂടിയത്. സ്‌ക്വാഡ് മജിസ്‌ട്രേറ്റ് മധു കരിമ്പിലിന്റെ നേതൃത്വത്തിലായിരുന്നു പരിശോധന.