സംസ്ഥാന സര്‍ക്കാരിന്റെ ആയിരം ദിനാഘോഷത്തിന്റെ ഭാഗമായി മഞ്ചേശ്വരം ഗോവിന്ദ പൈ സ്മാരക സമിതിയുടെ സഹകരണത്തോടെ സംഘടിപ്പിക്കുന്ന പരിപാടികളുടെ സംഘാടക സമിതിയോഗം ഫെബ്രുവരി 15 ന് വൈകുന്നേരം നാലിന് മഞ്ചേശ്വരം ഗിളിവിണ്ടുവില്‍ ചേരുമെന്ന് മഞ്ചേശ്വരം ഗോവിന്ദ പൈ സ്മാരക സമിതി സെക്രട്ടറി കെ.ആര്‍.ജയാനന്ദ അറിയിച്ചു.

ജില്ലാ സാക്ഷരതാമിഷന്റെ 2018-19 വര്‍ഷത്തെ പദ്ധതിയില്‍ ഉള്‍പ്പെടുത്തി നടപ്പിലാക്കുന്ന കന്നഡ ഭാഷയിലുള്ള ഹയര്‍ സെക്കണ്ടറി തുല്യത പുസ്തക നിര്‍മ്മാണ ശില്‍പശാല ജില്ലാ പഞ്ചായത്തില്‍ സംഘടിപ്പിച്ചു.

കാസര്‍കോട് ജില്ലാ എംപ്ലോയ്‌മെന്റ് എക്‌സ്‌ചേഞ്ചിനു കീഴിലുള്ള എംപ്ലോയബിലിറ്റി സെന്ററില്‍ ഫെബ്രുവരി 14 ന്  രാവിലെ 11  ന് അക്കൗണ്ടന്റ്, സെയില്‍സ് എക്‌സിക്യൂട്ടീവ്, സ്റ്റോര്‍ മാനേജര്‍, ഗ്രാഫിക് ഡിസൈനര്‍, പ്രൊമോട്ടര്‍, ഫാഷന്‍ കോണ്‍സള്‍ട്ടന്റ് എന്നീ തസ്തികകളിലേക്ക് അഭിമുഖം നടത്തുന്നു. അക്കൗണ്ടിന്റെ യോഗ്യത  ഡിഗ്രിയും  അക്കൗണ്ടിങ്ങും സെയില്‍സ് എക്‌സിക്യൂട്ടീവിന്റെ യോഗ്യത   പ്ലസ് ടു /ഡിഗ്രിയും പ്രൊമോട്ടര്‍, ഗ്രാഫിക് ഡിസൈനര്‍  സ്റ്റോര്‍ മാനേജര്‍ എന്നീ തസ്തികയുടെ യോഗ്യത  ഡിഗ്രി /പി ജിയും ഫാഷന്‍ കോണ്‍സള്‍ട്ടിന്റെ   യോഗ്യത   പ്ലസ് ടു /ഡിഗ്രിയും ആണ്. പുരുഷ ഉദ്യോഗാര്‍ത്ഥികള്‍ മാത്രം അപേക്ഷിച്ചാല്‍ മതി.

ഉദുമ ഗ്രാമപഞ്ചായത്തിലെ കച്ചവട വ്യാപാര സ്ഥാപനങ്ങള്‍ക്കായി   ഫെബ്രുവരി 20, 21 തീയ്യതികളിലായി ലൈസന്‍സ് അദാലത്ത് സംഘടിപ്പിക്കുന്നു. വ്യാപാരി വ്യവസായ സംഘടനയുടെ ഉദുമ യൂണിറ്റിന് കീഴിലുളളവര്‍ ഫെബ്രുവരി 20 നും പാലക്കുന്ന് യൂണിറ്റിന് കീഴിലുളളവര്‍ ഫെബ്രവരി 21 നും അപേക്ഷ സമര്‍പ്പിക്കണം. 2018-19 ലൈസന്‍സിന്റെ  പകര്‍പ്പ് കൊണ്ടുവരണം. 

വെള്ളിക്കോത്ത് ഇന്‍സ്റ്റിറ്റ്യൂട്ടില്‍ നടത്തുന്ന സൗജന്യ ഫോര്‍ വീലര്‍ ഡ്രൈവിംഗ് കോഴ്‌സിലേക്ക് അപേക്ഷ ക്ഷണിച്ചു.പരിശീലനം, ഭക്ഷണം സൗജന്യമാണ്. 20 നും 45 നും ഇടയില്‍       പ്രായമുള്ള, പത്താം തരം വരെ പഠിച്ച യുവതി യുവാക്കള്‍ക്ക് അപേക്ഷിക്കാം. ബി പി ല്‍  റേഷന്‍ കാര്‍ഡ് ഉള്ളവര്‍ക്ക്  മുന്‍ഗണന.പേര്, മേല്‍വിലാസം, ജനനത്തിയതി, വിദ്യാഭ്യാസ യോഗ്യത, ഫോണ്‍നമ്പര്‍ എന്നിവ അടങ്ങിയ അപേക്ഷ ഫെബ്രുവരി 16 നകം ഡയറക്ടര്‍, വെള്ളിക്കോത്ത് ഇന്‍സ്റ്റിറ്റ്യൂട്ട്, ആനന്ദാശ്രമം പിഒ, കാഞ്ഞങ്ങാട്-671 531 എന്ന വിലാസത്തില്‍ സമര്‍പ്പിക്കണം. കൂടുതല്‍ വിവരങ്ങള്‍ക്ക് 0467 2268240 

കഠിനാധ്വാനത്തിന്റെയും പരിശ്രമത്തിന്റെയും  ഫലമായി എളേരിത്തട്ട് ഇ.കെ. നായനാര്‍ സ്മാരക ഗവ. കോളേജിന് നാക് അക്രഡിറ്റേഷന്‍   ബി ഗ്രേഡ്.ഈ അംഗീകാരം ലഭിച്ച മലയോര മേഖലയിലെ ഏക സര്‍ക്കാര്‍ കലാലയമാണ് ഇത്. ജനുവരി   17, 18 തീയതകളിലായി ത്രിപുര കേന്ദ്ര സര്‍വ്വകലാശാലയിലെ മുന്‍ വൈസ് ചാന്‍സലര്‍ പ്രഫ. അരുണോദയസാഹ, ബനാറാസ് ഹിന്ദു യൂണിവേഴ്‌സിറ്റിയിലെ പ്രഫ. രാധാ റായ്, മുംബൈ യൂണിവേഴ്‌സിറ്റിയിലെ പ്രഫ. ചൈതലി ചക്രബര്‍ത്തി എന്നിവര്‍ കോളേജിലെ പാഠ്യ-പാഠ്യേതര രംഗത്തെ ഭൗതിക സാഹചര്യങ്ങള്‍ സന്ദര്‍ശനം നടത്തി വിശകലനം ചെയ്തതിന്റെ അടിസ്ഥാനത്തിലാണ് 2.37 പോയന്റോടെ  കോളേജ് 'ബി' ഗ്രേഡ് കരസ്ഥമാക്കിയത്.

ലോക്‌സഭാ തെരഞ്ഞെടുപ്പ് അടുത്തിരിക്കെ ജില്ലയില്‍ കൂടുതല്‍ പേരെ വോട്ടര്‍പട്ടികയില്‍ ചേര്‍ക്കുന്നതിനുള്ള പ്രവര്‍ത്തനങ്ങള്‍ പുരോഗമിക്കുന്നു. ജനുവരി 31 വരെ വോട്ടര്‍ പട്ടികയില്‍ 17,376 പേരുടെ വര്‍ധനയുണ്ടാക്കാന്‍ സാധിച്ചതായി തെരഞ്ഞെടുപ്പ് വിഭാഗം ഡെപ്യൂട്ടി കളക്ടര്‍ എ.കെ. രമേന്ദ്രന്‍ പറഞ്ഞു. ജില്ലയിലെ വിവിധ രാഷ്ട്രീയ പാര്‍ട്ടി പ്രതിനിധികളെ ഇലക്‌ട്രോണിക് വോട്ടിങ് മെഷീന്‍, വിവിപാറ്റ് സംവിധാനം എന്നിവ പരിചയപ്പെടുത്തുന്നതിന് കളക്ടറേറ്റ് കോണ്‍ഫറന്‍സ് ഹാളില്‍ നടത്തിയ പരിശീലന പരിപാടിയില്‍ സംസാരിക്കുകയായിരുന്നു അദ്ദേഹം. 

ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് പൊതുജനങ്ങള്‍ക്കായി സംഘടിപ്പിക്കുന്ന ഓണ്‍ലൈന്‍ വീഡിയോ മത്സരം 'മിഴിവ് 2019' ന് തുടക്കമായി . www.mizhiv2019.kerala.gov.in വെബ്‌സൈറ്റില്‍ പേര് രജിസ്റ്റര്‍ ചെയ്ത മത്സരത്തില്‍ പങ്കെടുക്കാം. അപ്ലോഡ് ചെയ്യുന്ന വീഡിയോകള്‍  പ്രമുഖ സിനിമാ പരസ്യ സംവിധായകര്‍ വിലയിരുത്തി ക്യാഷ്‌പ്രൈസുകള്‍ നല്‍കും. ഒന്നാം സമ്മാനം: ഒരുലക്ഷംരൂപ, രണ്ടാം സമ്മാനം: 50,000  രൂപ, മൂന്നാം സമ്മാനം:25,000 രൂപ, പ്രോത്സാഹന സമ്മാനം 5,000 രൂപ വീതം പത്ത് പേര്‍ക്ക്.

യു.എ.ഇയിലെ ഹെല്‍ത്ത് കെയര്‍ സിറ്റി ആശുപത്രിയിലേക്ക്  നഴ്‌സിങ് ബിരുദ/ഡിപ്ലോമ യോഗ്യതയുള്ള എന്‍ഡോസ്‌കോപി ടെക്‌നീഷന്‍മാരുടെ രണ്ട് ഒഴിവുകളിലേയ്ക്ക് നോര്‍ക്ക റൂട്ട്‌സ് മുഖേന തെരഞ്ഞെടുപ്പ് നടത്തുന്നു. ശമ്പളം-6000 യു.എ.ഇ ദിര്‍ഹം. തെരഞ്ഞെടുക്കപ്പെടുന്നവര്‍ക്ക് താമസം, വിമാന ടിക്കററ് എന്നിവ സൗജന്യമായി ലഭിക്കും. പ്രായപരിധി 22 നും 35 നും മധ്യേ. രണ്ട്  മുതല്‍ അഞ്ച് വര്‍ഷം വരെ  ഈ മേഖലയില്‍ പ്രവര്‍ത്തിപരിചയമുള്ള എന്‍ഡോസ്‌കോപി ടെക്‌നീഷന്‍മാര്‍  ഫെബ്രുവരി 20 നകം നോര്‍ക്ക റൂട്ട്‌സിന്റെ www.norkaroots.net എന്ന വെബ് സൈററില്‍ അപേക്ഷിക്കണം.

കാസര്‍കോട് നഗരസഭയിലെ വിധവാ പെന്‍ഷന്‍,അവിവാഹിത പെന്‍ഷന്‍ കൈപ്പറ്റുന്ന എല്ലാ ഗുണഭോക്താക്കളും പുനര്‍ വിവാഹം, വിവാഹം ചെയ്തിട്ടില്ലെന്നുള്ള ഗസറ്റഡ് ഓഫീസറുടെ സാക്ഷ്യപത്രം ഫെബ്രുവരി 28 നകം  നഗരസഭയില്‍ സമര്‍പ്പിക്കണം.അല്ലാത്തപക്ഷം ഇനിയൊരറിയിപ്പു കൂടാതെ പെന്‍ഷന്‍ തടഞ്ഞുവക്കുമെന്ന് നഗരസഭാ സെക്രട്ടറി അറിയിച്ചു.