സാമൂഹ്യവിരുദ്ധരുടെ പ്രലോഭനങ്ങള്‍ക്കിരയായി ലഹരിയുടെ ലോകത്തേക്ക് വഴി തെറ്റി പോകുന്ന യുവജനങ്ങളെ ജീവിതത്തിലേക്ക് തിരിച്ചു കൊണ്ടുവരാന്‍ നീലേശ്വരത്ത് ലഹരി മോചന ചികിത്സാ കേന്ദ്രം പൂര്‍ണ്ണ സജ്ജമായി. ലഹരിക്കെതിരേ എക്‌സൈസ് വകുപ്പ് ആവിഷ്‌കരിച്ച വിമുക്തി പദ്ധതിയുടെ ഭാഗമായാണ് നീലേശ്വരം താലൂക്കാശുപത്രിക്ക് സമീപം ഡീ അഡിക്ഷന്‍ കേന്ദ്രം ഉദ്ഘാടനത്തിനൊരുങ്ങുന്നത്. ലഹരി ഉപയോഗം യുവാക്കളില്‍ വ്യാപകമാകുന്ന പശ്ചാത്തലത്തില്‍ ആരോഗ്യവകുപ്പിന്റെ സഹകരണത്തോടെ കൃത്യമായ ചികിത്സ നല്‍കി അവരെ ആരോഗ്യകരമായ സാമൂഹിക ജീവിതം നയിക്കാന്‍ പ്രാപ്തരാക്കുകയാണ് ചികിത്സാ കേന്ദ്രം കൊണ്ടുദ്ദേശിക്കുന്നത്. 

സംസ്ഥാന സർക്കാരിന്റെ 1000 ദിന ആഘോഷങ്ങളോടനുബന്ധിച്ച് സംസ്ഥാന ഭാഗ്യക്കുറി ഏജൻറുമാരുടേയും വിൽപനക്കാരുടേയും ക്ഷേമനിധി ബോർഡിന്റെ നേതൃത്വത്തിൽ ക്ഷേമനിധി അംഗങ്ങളായ ഭാഗ്യക്കുറി വിൽപനക്കാർക്കും ഏജൻറുമാർക്കും അനുവദിക്കുന്ന ധനസഹായത്തിന്റെയും സൗജന്യ ബീച്ച് അംബ്രല്ലകളുടെയും വിതരണത്തിന്റെ സംസ്ഥാനതല ഉദ്ഘാടനം 21ന് ധനകാര്യമന്ത്രി ഡോ. ടി.എം. തോമസ് ഐസക് ആലപ്പുഴയിൽ നിർവഹിക്കും. പ്രളയദുരന്തത്തിൽ സംസ്ഥാന ഭാഗ്യക്കുറി ടിക്കറ്റുകൾക്ക് നാശനഷ്ടം സംഭവിച്ച ക്ഷേമനിധി ബോർഡ് അംഗങ്ങളായ ഏജൻറുമാർക്കും വിൽപനക്കാർക്കുമാണ് ധനസഹായം നൽകുന്നത്.

 * രാഷ്ട്രീയനേതാക്കൾക്കായി ബോധവത്കരണ പരിപാടി സംഘടിപ്പിച്ചു     

മെഷീനിൽ വോട്ട് ചെയ്യാനും വിവി പാറ്റ് രസീത് കണ്ട് വോട്ടുറപ്പിക്കാനും അവസരമൊരുക്കി രാഷ്ട്രീയകക്ഷി നേതാക്കൾക്കായി തിരഞ്ഞെടുപ്പ് കമ്മീഷന്റെ ആഭിമുഖ്യത്തിൽ ബോധവത്കരണ പരിപാടി സംഘടിപ്പിച്ചു. ഇലക്‌ട്രോണിക് വോട്ടിംഗ് മെഷീന്റെ സാങ്കേതികതയും സുരക്ഷാ നടപടികളും വിശദീകരിച്ചതിനൊപ്പമാണ് മെഷീനിൽ ഡമ്മി വോട്ടിംഗും വോട്ടെണ്ണലും നടത്തി പ്രവർത്തനം മനസിലാക്കി നൽകിയത്. സംസ്ഥാന മുഖ്യ തിരഞ്ഞെടുപ്പ് ഓഫീസർ ടീക്കാറാം മീണയുടെ നേതൃത്വത്തിലാണ് നിയമസഭാ കോംപ്ലക്‌സിൽ ബോധവത്കരണത്തിനും സംശയദൂരീകരണത്തിനും അവസരമൊരുക്കിയത്. 

ഉന്നത വിദ്യാഭ്യാസ വകുപ്പിന് കീഴിലുള്ള കേരള സ്റ്റേറ്റ് സെന്റർ ഫോർ അഡ്വാൻസ്ഡ് പ്രിന്റിംഗ് & ട്രെയിനിംഗ് (സി-ആപ്റ്റ്) പി.ജി.ഡി.സി.എ, അക്കൗണ്ടിംഗ്, അനിമേഷൻ ഉൾപ്പെടെ പി.എസ്.സി. അംഗീകരിച്ച കമ്പ്യൂട്ടർ കോഴ്‌സുകൾ നടത്തുന്നതിന് ഫ്രഞ്ചൈസി നൽകുന്നു. സെന്റർ ആരംഭിക്കുന്നതിന് 18 വരെ അപേക്ഷിക്കാം. അപേക്ഷ ഫോറം www.captmultimedia.com ൽ ലഭിക്കും. കൂടുതൽ വിവരങ്ങൾക്ക് 7012612567, 9388830684.

പി.എൻ.എക്സ്. 517/19

ഒരു കേന്ദ്ര സർക്കാർ സ്ഥാപനത്തിൽ ഭിന്നശേഷിക്കാർക്ക് (സംസാരശേഷിക്കുറവ്, കേൾവിക്കുറവ്) സംവരണം ചെയ്തിട്ടുള്ളതും സ്ഥിരമാകാൻ സാധ്യതയുള്ളതുമായ ഒരു ലാബ് ടെക്‌നീഷ്യൻ (ക്ലിനിക്കൽ) ഒഴിവുണ്ട്.  പ്ലസ്ടു സയൻസ്, അംഗീകൃത സ്ഥാപനത്തിൽ നിന്നും മെഡിക്കൽ ലാബ് ടെക്‌നോളജിയിൽ ലഭിച്ച ഡിപ്ലോമ, അംഗീകൃത ആശുപത്രിയിൽ രണ്ട് വർഷം ലാബ് ടെക്‌നീഷ്യനായി ജോലി ചെയ്ത പരിചയം എന്നിവയാണ് യോഗ്യത.  5,200 - 20,200 + ജി.പി 2,400 ആണ് ശമ്പളം.  27 വയസ് കവിയരുത്. (നിയമാനുസൃത വയസ്സിളവ് ലഭിക്കും)  യോഗ്യതയുള്ളവർ അസൽ സർട്ടിഫിക്കറ്റുകളുമായി 18നകം അടുത്തുള്ള എംപ്ലോയ്‌മെന്റ് എക്‌സ്‌ചേഞ്ചുകളിൽ എത്തണം.

പി.എൻ.എക്സ്. 515/19

പ്രളയക്കെടുതി: യോഗം ഇന്ന് (ഫെബ്രുവരി 12) 

ബാങ്ക് പ്രതിനിധികളുടെയും പ്രളയക്കെടുതി ബാധിച്ച വ്യവസായ വാണിജ്യ സ്ഥാപനങ്ങളുടെ ഉടമകളുടെയും സംയുക്ത യോഗം ഫെബ്രുവരി 12 ചൊവ്വാഴ്ച വൈകുന്നേരം 4മണിക്കു കളമശ്ശേരിയിലെ കെ.എസ് എസ്എ  ഹാളില്‍ നടത്തും. ജില്ലാ കളക്ടറുടെ  അധ്യക്ഷതയില്‍ ചേരുന്ന ഈ യോഗത്തില്‍  പ്രളയ ബാധിത വ്യവസായ വാണിജ്യ സ്ഥാപനങ്ങള്‍ക്കായി കേരള സര്‍ക്കാര്‍ ആവിഷ്‌കരിച്ചിട്ടുള്ള ഉജ്ജീവന പദ്ധതിയെ കുറിച്ചാണ് ചര്‍ച്ച ചെയ്യുക.. എല്ലാ ബാങ്ക് പ്രതിനിധികളും വ്യവസായ വാണിജ്യ സ്ഥാപനങ്ങളുടെ ഉടമകളും യോഗത്തില്‍ പങ്കെടുക്കണം. ഈ പദ്ധതിക്കായി അപേക്ഷകള്‍ സമര്‍പ്പിക്കേണ്ട അവസാന തീയതി മാര്‍ച്ചു  31.