വിദ്യാഭ്യാസ വകുപ്പില്‍ ഹൈസ്‌കൂള്‍ ടീച്ചര്‍ (ഇംഗ്ലീഷ് - കാറ്റഗറി നമ്പര്‍: 603/2024) തസ്തികയിലേക്കുള്ള ഒന്നാംഘട്ട അഭിമുഖം മെയ് 22-ന് ആരംഭിക്കും. മലപ്പുറം സിവില്‍ സ്റ്റേഷനിലെ പി.എസ്.സി ജില്ലാ ഓഫീസിലാണ് അഭിമുഖം. അര്‍ഹരായവര്‍ക്ക്  അറിയിപ്പ് എസ്.എം.എസ് ആയും പ്രൊഫൈല്‍ വഴിയും നല്‍കിയിട്ടുണ്ട്. ഉദ്യോഗാര്‍ത്ഥികള്‍ തങ്ങളുടെ പ്രൊഫൈലില്‍ നിന്നും ഇന്റര്‍വ്യൂ മെമ്മോ ഡൗണ്‍ലോഡ് ചെയ്ത്,  നിര്‍ദ്ദേശിച്ചിട്ടുള്ള അസ്സല്‍ സര്‍ട്ടിഫിക്കറ്റുകള്‍ സഹിതം നിശ്ചിത സമയത്ത് അഭിമുഖത്തിന് എത്തണം.

സാമൂഹ്യനീതി വകുപ്പിന് കീഴിലുള്ള താനൂര്‍ പ്രതീക്ഷാ ഭവനിലേക്ക് വിവിധ തസ്തികകളില്‍ കരാര്‍ അടിസ്ഥാനത്തില്‍ നിയമനം നടത്തുന്നു. മള്‍ട്ടി ടാസ്‌ക് കെയര്‍ പ്രൊവൈഡര്‍ , ജൂനിയര്‍ പബ്ലിക് ഹെല്‍ത്ത് നഴ്‌സ് തസ്തികകളിലേക്കാണ് നിയമനം. മള്‍ട്ടി ടാസ്‌ക് കെയര്‍ പ്രൊവൈഡര്‍ നിയമനത്തിന് എട്ടാം ക്ലാസ് വിജയമാണ് അടിസ്ഥാന യോഗ്യത. പ്രായപരിധി 50 വയസ്സ്. ഭിന്നശേഷി മേഖലയില്‍ പരിശീലനം ലഭിച്ചവര്‍ക്കും പ്രവൃത്തിപരിചയമുള്ളവര്‍ക്കും മുന്‍ഗണന ലഭിക്കും. ജൂനിയര്‍ പബ്ലിക് ഹെല്‍ത്ത് നഴ്‌സ് തസ്തികയ്ക്ക് എ.എന്‍.എം  കോഴ്‌സ് വിജയിക്കണം. 50 വയസ്സില്‍ താഴെയുള്ളവര്‍ക്ക് അപേക്ഷിക്കാം.

മലപ്പുറം ജില്ലയില്‍ ഒഴിവുള്ള 77 ലൊക്കേഷനിലേക്ക് 2026 ഫെബ്രുവരി 20ലെ നോട്ടിഫിക്കേഷന്‍ പ്രകാരം അക്ഷയ സംരഭകരാകാന്‍ അപേക്ഷിച്ചവര്‍ക്കുള്ള  ഒ.എം.ആര്‍ പരീക്ഷ മെയ് 17 ന് വിവിധ കേന്ദ്രങ്ങളില്‍ നടക്കും. യോഗ്യരായ അപേക്ഷകര്‍ക്ക് അഡ്മിറ്റ് കാര്‍ഡ് എല്‍.ബി.എസിന്റെ https://lbsedp.lbscentre.in/akshaya26/ എന്ന പോര്‍ട്ടല്‍ ലോഗിന്‍ ചെയ്ത് ഡൗണ്‍ലോഡ് ചെയ്ത് എടുക്കാം. ആദ്യഘട്ട പരിശോധനക്ക് ശേഷം നിശ്ചിത യോഗ്യത നേടിയ അപേക്ഷകര്‍ക്കാണ് പരീക്ഷ എഴുതാന്‍ അവസരം. ഒ.എം.ആര്‍ പരീക്ഷയില്‍ യോഗ്യത നേടുന്നവരില്‍ നിന്ന് അഭിമുഖം വഴിയാണ് സംരംഭകരെ തിരഞ്ഞെടുക്കുന്നത്.

ഐ.എച്ച്.ആര്‍.ഡിക്ക് കീഴില്‍ നെല്ലിശ്ശേരിയില്‍ പ്രവര്‍ത്തിക്കുന്ന വട്ടംകുളം കോളേജ് ഓഫ് അപ്ലൈഡ് സയന്‍സില്‍ കംപ്യൂട്ടര്‍ പ്രോഗ്രാമര്‍ തസ്തികയിലേക്ക് താത്ക്കാലിക നിയമനം നടത്തുന്നു. ഫസ്റ്റ് ക്ലാസ്സോടെയുള്ള ബി.എസ്.സി കംപ്യൂട്ടര്‍ സയന്‍സ് ബിരുദം അല്ലെങ്കില്‍ പി.ജി.ഡി.സി.എ ആണ് യോഗ്യത. താത്പര്യമുള്ളവര്‍ പ്രായം, യോഗ്യത എന്നിവ തെളിയിക്കുന്ന അസല്‍ സര്‍ട്ടിഫിക്കറ്റുകളും പകര്‍പ്പും സഹിതം മെയ് 22ന് രാവിലെ 10 ന് കോളേജില്‍  അഭിമുഖത്തിന് എത്തണം. ഫോണ്‍ 8547006802, 0494-2689655.

മലപ്പുറം ഗവണ്‍മെന്റ് കോളേജിലെ സ്റ്റാറ്റിസ്റ്റിക്‌സ് വിഭാഗത്തില്‍ അതിഥി അധ്യാപകരുടെ ഒഴിവുകളിലേക്ക് അപേക്ഷ ക്ഷണിച്ചു. കോഴിക്കോട് മേഖലാ കോളേജ് വിദ്യാഭ്യാസ വകുപ്പ് ഡെപ്യൂട്ടി ഡയറക്ടറേറ്റില്‍ പേര് രജിസ്റ്റര്‍ ചെയ്തവര്‍ക്ക് അഭിമുഖത്തില്‍ പങ്കെടുക്കാം. യോഗ്യരായവര്‍ അസല്‍ സര്‍ട്ടിഫിക്കറ്റുകളും രേഖകളും സഹിതം മെയ് 16-ന് രാവിലെ 9.30-ന് കോളേജില്‍ എത്തണം. ഫോണ്‍ 9061734918, 0483-2734918.

ജില്ലാ പഞ്ചായത്തിലും ജില്ലാ സാക്ഷരതാമിഷനിലുമായി ഇന്റേണ്‍ഷിപ്പ് പൂര്‍ത്തിയാക്കിയ ആദ്യ രണ്ട് ബാച്ചുകളിലെ  വിദ്യാര്‍ത്ഥികള്‍ക്കായി സമാപന സമ്മേളനവും ആധുനിക സാങ്കേതിക വിദ്യകളെ പരിചയപ്പെടുത്തുന്നതിനായി 'ആര്‍ട്ടിഫിഷ്യല്‍ ഇന്റലിജന്‍സ്' ക്ലാസും സംഘടിപ്പിച്ചു.ജില്ലാ പഞ്ചായത്ത്  ഹാളില്‍ നടന്ന ചടങ്ങില്‍ വിവിധ കോളേജുകളില്‍ നിന്നായി എത്തിയ 55 വിദ്യാര്‍ത്ഥികള്‍ പങ്കെടുത്തു. വിഷയ വിദഗ്ധനും ജില്ലാ പഞ്ചായത്ത് അംഗവുമായ കെ.ടി അഷ്റഫ്  ഉദ്ഘാടനം ചെയ്തു.

കേരളത്തിലെ സംഘടിത/അസംഘടിത മേഖലകളില്‍ ജോലി ചെയ്യുന്ന തൊഴിലാളികളുടെ മക്കള്‍ക്കും ആശ്രിതര്‍ക്കും കിലെ ഐ.എ.എസ് അക്കാദമി 2026-2027 അക്കാദമിക വര്‍ഷത്തില്‍ ആരംഭിക്കുന്ന സിവില്‍ സര്‍വീസ് പ്രിലിമിനറി/മെയിന്‍ പരിക്ഷയുടെ കോഴ്സ് പരിശീലനത്തിന് കേരള മോട്ടോര്‍ തൊഴിലാളി ക്ഷേമനിധി ബോര്‍ഡ്, കേരള ചെറുകിട തോട്ടം തൊഴിലാളി ക്ഷേമനിധി ബോര്‍ഡ്, കള്ള് വ്യവസായ ക്ഷേമനിധി ബോര്‍ഡ് എന്നിവയില്‍ അംഗങ്ങളായ തൊഴിലാളികളുടെ മക്കളില്‍/ആശ്രിതരില്‍ നിന്ന് അപേക്ഷ ക്ഷണിച്ചു. ഒരു വര്‍ഷം ദൈര്‍ഘ്യമുള്ള അക്കാദമിയിലെ അടുത്ത ബാച്ച്  ജൂണ്‍ ആദ്യവാരം ആരംഭിക്കും. ബിരുദമാണ് അടിസ്ഥാന യോഗ്യത.

ഹജ്ജിന് പോകുന്ന തീര്‍ത്ഥാടകര്‍ക്കായി ജില്ലാ ഹോമിയോപ്പതി വകുപ്പിന്റെ ആഭിമുഖ്യത്തില്‍ കരിപ്പൂര്‍ ഹജ്ജ് ഹൗസില്‍ മെഡിക്കല്‍ ക്യാംപും 'ഹജ്ജ് ശിഫ' മെഡിസിന്‍ കിറ്റ് വിതരണവും സംഘടിപ്പിക്കുന്നു. മെയ് 13-ന് ക്യാംപ് ആരംഭിക്കും. ഇരുപത്തിനാല് മണിക്കൂറും പ്രവര്‍ത്തിക്കുന്ന മെഡിക്കല്‍ ക്യാംപിലേക്ക് മൂന്ന് ഷിഫ്റ്റുകളിലായി മെഡിക്കല്‍ ഓഫീസര്‍മാരെയും പാരാമെഡിക്കല്‍ സ്റ്റാഫിനെയും നിയോഗിച്ചിട്ടുണ്ട്.

പെരിന്തല്‍മണ്ണ പി.ടി.എം ഗവ.കോളേജില്‍ 2026-27 അധ്യയന വര്‍ഷത്തേക്ക് ഒഴിവുള്ള മൂന്ന് കെമിസ്ട്രി അതിഥി അധ്യാപക തസ്തികകളിലേക്കുള്ള അഭിമുഖം മെയ് 19ന് രാവിലെ 11ന് നടക്കും. കോളേജ് വിദ്യാഭ്യാസ വകുപ്പിന്റെ കോഴിക്കോട് മേഖല ഓഫീസില്‍ പേര് രജിസ്റ്റര്‍ ചെയ്ത, യു.ജി.സി റെഗുലേഷന്‍ പ്രകാരം അസിസ്റ്റന്റ് പ്രൊഫസറായി നിയമനം നേടുന്നതിനുള്ള യോഗ്യതയുള്ള (നെറ്റ്/പി.എച്ച്.ഡി) ഉദ്യോഗാര്‍ത്ഥികള്‍ യോഗ്യത തെളിയിക്കുന്ന അസല്‍ സര്‍ട്ടിഫിക്കറ്റുകളുമായി അഭിമുഖത്തിനെത്തണം. ഫോണ്‍- 04933-227370, 9188900199.

എടവണ്ണ സാമൂഹികാരോഗ്യകേന്ദ്രത്തില്‍ ദിവസ വേതനാടിസ്ഥാനത്തില്‍ ഫാര്‍മസിസ്റ്റിനെ നിയമിക്കുന്നതിന് മെയ് 15ന് രാവിലെ 10ന് എടവണ്ണ ബി. എഫ് .എച്ച്.സി ഹാളില്‍ അഭിമുഖം നടക്കും. യോഗ്യത- ബി.ഫാം/ ഡി.ഫാം, ഫാര്‍മസി കൗണ്‍സില്‍ രജിസ്ട്രേഷന്‍. 2026 മെയ് 15 ന് 40 വയസ് കവിയരുത്. യോഗ്യരായ ഉദ്യോഗാര്‍ഥികള്‍ വയസ്, വിദ്യാഭ്യാസ യോഗ്യത, പ്രവൃത്തി പരിചയം എന്നിവ തെളിയിക്കുന്ന സര്‍ട്ടിഫിക്കറ്റുകളും പകര്‍പ്പുകളും സഹിതം അഭിമുഖത്തിനെത്തണം. ഫോണ്‍- 0483- 2701029.