പരപ്പ ബ്ലോക്ക്‌ പഞ്ചായത്തിന്റെ വാർഷിക പദ്ധതിയുടെ ഭാഗമായി കേരള സാംസ്കാരിക വകുപ്പിന്റെ വജ്രജൂബിലി ഫെല്ലോഷിപ്പ് പദ്ധതിയുടെ സഹായത്തോടെ ചായോത്ത്‌ എൻ. ജി.സ്മാരക കലാവേദിയിൽ വച്ച് വജ്രജൂബിലി ഫെല്ലോഷിപ്പ് വഴി കലാപഠനം പൂർത്തിയാക്കിയ കലാകാരന്മാരുടെ അരങ്ങേറ്റവും സാംസ്കാരിക സമ്മേളനവും കലാ പരിപാടികളും നടത്തി. വിവിധ പഞ്ചായത്തുകളിലെ 11കേന്ദ്രങ്ങളിൽ വച്ചു വജ്ര ജൂബിലി ഫെല്ലോഷിപ് നേടിയ കലാ പ്രവർത്തകരുടെ നേതൃത്വത്തിൽ സംഗീതം, നാടകം, ചിത്രകല, നാടൻ പാട്ട് എന്നീ ഇനങ്ങളിൽ പരിശീലനം നൽകിയ 250 കലാപ്രവർത്തകരുടെ അരങ്ങേറ്റമാണ് നടന്നത്.

കോട്ടയം: ജില്ലാ നെഹ്റു യുവകേന്ദ്രയുടെ ആഭിമുഖ്യത്തിൽ 18 വയസിനും 25 വയസിനും ഇടയിൽ പ്രായമുള്ളവർക്കായി ജില്ലാ-സംസ്ഥാന-ദേശീയതലത്തിൽ ' നാഷണൽ യൂത്ത് പാർലമെന്റ് ഫെസ്റ്റിവൽ 2024 ' വിഷയത്തിൽ പ്രസംഗമത്സരം നടത്തുന്നു. ജില്ലയിലെ ഒന്നും രണ്ടും സ്ഥാനക്കാരാണ് സംസ്ഥാനതലത്തിൽ മത്സരിക്കുക. സംസ്ഥാനതലത്തിലെ ആദ്യ മൂന്നു സ്ഥാനക്കാർക്ക് ദേശീയതലത്തിൽ പങ്കെടുക്കാം. ദേശീയതലത്തിലെ വിജയികൾക്ക് യഥാക്രമം രണ്ടു ലക്ഷം, ഒന്നര ലക്ഷം,ഒരു ലക്ഷം രൂപ സമ്മാനം ലഭിക്കും. മലയാളം, ഹിന്ദി, ഇംഗ്ളീഷ് എന്നീ ഭാഷകളിൽ മത്സരം നടത്തും. അപേക്ഷ സമർപ്പിക്കുന്നതിനുള്ള അവസാനതീയതി: ഫെബ്രുവരി 19.

 
കോട്ടയം: ടൂറിസം കേന്ദ്രങ്ങളുടെ വികസനത്തിനായി കേന്ദ്ര വിനോദസഞ്ചാര മന്ത്രാലയം കുമരകത്ത് നടപ്പാക്കുന്ന സ്വദേശ് ദർശൻ 2.0 സ്‌കീമിൽ വിഭാവനം ചെയ്യുന്ന ടൂറിസം പദ്ധതികളുടെ മാർക്കറ്റിംഗ് /പ്രൊമോഷനുമായി ബന്ധപ്പെട്ട് തിരുവനന്തപുരം ഇൻസ്റ്റിറ്റ്യൂട്ട് ഓഫ് ഹോട്ടൽ മാനേജ്മെന്റ് നേതൃത്വം നൽകുന്ന പരിശീലനപരിപാടികളിലേക്ക് 18 വയസിനു മുകളിലുള്ളവർക്ക് അപേക്ഷിക്കാം. അപേക്ഷകർ പത്താംക്ലാസ് പാസായിരിക്കണം.

കോട്ടയം: സേവനമേഖലയിൽ ഭവന നിർമാണത്തിനും ക്ഷേമ പദ്ധതികൾക്കും ഊന്നൽ നൽകി മീനച്ചിൽ ഗ്രാമപഞ്ചായത്ത് 2024-25 വാർഷിക ബജറ്റ് വൈസ് പ്രസിഡന്റ് ലിൻസി മാർട്ടിൻ അവതരിപ്പിച്ചു. ഗ്രാമ പഞ്ചായത്ത് പ്രസിഡന്റ് ഗ്രാമപഞ്ചായത്ത് ഹാളിൽ നടന്ന യോഗത്തിൽ സാജോ പൂവത്താനി അധ്യക്ഷത വഹിച്ചു. 21.64 കോടി രൂപ വരവും 21.14 കോടി രൂപ ചെലവും 49.48 ലക്ഷം രൂപ മിച്ചവും പ്രതീക്ഷിക്കുന്ന ബജറ്റാണ് അവതരിപ്പിച്ചത്.

കോട്ടയം: സ്ത്രീ-വയോജന-ഭിന്നശേഷി പദ്ധതികൾക്ക് ഊന്നൽ നൽകി ഏറ്റുമാനൂർ ബ്ലോക്ക് പഞ്ചായത്ത് 2024-25 വാർഷിക ബജറ്റ്. 47.97 കോടി രൂപ വരവും 47.83 കോടി രൂപ ചെലവും 13.8 ലക്ഷം രൂപ നീക്കിയിരിപ്പും വരുന്ന ബജറ്റാണ് ബ്ലോക്ക് പഞ്ചായത്ത് വൈസ് പ്രസിഡന്റ് എ.എം. ബിന്നു അവതരിപ്പിച്ചത്. ഏറ്റുമാനൂർ ബ്ലോക്ക് പഞ്ചായത്ത് ഹാളിൽ ചേർന്ന യോഗത്തിൽ ബ്ലോക്ക് പഞ്ചായത്ത് പ്രസിഡന്റ് ആര്യ രാജൻ അധ്യക്ഷത വഹിച്ചു.

കോട്ടയം :സംസ്ഥാന വിവരാവകാശ കമ്മീഷണർ ഡോ. കെ. എം ദിലീപ് കളക്ടറേറ്റ് കോൺഫറൻസ് ഹാളിൽ വെച്ച് ഇന്ന് (ഫെബ്രുവരി 13)രാവിലെ 10മണി മുതൽ സിറ്റിംഗ്  നടത്തും.

കോട്ടയം: കൊല്ലം ഇൻഡസ്ട്രിയൽ ട്രൈബ്യൂണൽ സുനിത വിമൽ ഫെബ്രുവരി 17,24 തീയതികളിൽ പീരുമേടും ആറ് , 13, 20 തീയതികളിൽ പുനലൂരിലും മറ്റു പ്രവൃത്തിദിനങ്ങളിൽ ആസ്ഥാനത്തും തൊഴിൽ തർക്കകേസുകളും എംപ്ലോയീസ് ഇൻഷുറൻസ് കേസുകളും എംപ്ലോയീസ് കോമ്പൻസേഷൻ കേസുകളും വിചാരണ നടത്തും.

കോട്ടയം: ജില്ലയിൽ വിവിധ വകുപ്പുകളിലെ  ഡ്രൈവർ ഗ്രേഡ് (എൽ.ഡി.വി) ഡ്രൈവർ കം ഓഫീസ് അറ്റൻഡന്റ്  (എൽ.ഡി.വി തസ്തികമാറ്റം) ( കാറ്റഗറി നമ്പർ 020/2021)തസ്തികയിലേക്ക് പ്രസിദ്ധീകരിച്ച റാങ്ക് പട്ടികയിലെ എല്ലാവരെയും നിയമനശുപാർശ ചെയ്തതിനാൽ 2023 നവംബർ 22 ന് പൂർവാഹ്നത്തിൽ റാങ്ക് പട്ടിക റദ്ദായതായി പി.എസ്.സി. ജില്ലാ ഓഫീസർ അറിയിച്ചു.

കോട്ടയം: സംസ്ഥാനത്തെ സ്വകാര്യ ആശുപത്രി  മേഖലയിലെ തൊഴിലാളികളുടെ മിനിമം വേതനം പരിഷ്‌ക്കരിക്കുന്നതിന് ലേബർ കമ്മിഷണറുടെ അധ്യക്ഷതയിൽ  തെളിവെടുപ്പ് യോഗം ഫെബ്രുവരി 20ന്  രാവിലെ 11ന്  കോട്ടയം ജില്ലാ പഞ്ചായത്ത് ഹാളിൽ ചേരും. പ്രസ്തുത യോഗത്തിൽ ബന്ധപ്പെട്ട തൊഴിലാളി -തൊഴിലുടമ പ്രതിനിധികൾ പങ്കെടുക്കണമെന്നു ജില്ലാ ലേബർ ഓഫീസർ അറിയിച്ചു.