കാത്തിരിപ്പിന് വിരാമമിട്ട് ഏഴാമത് പട്ടയമേള നെടുങ്കണ്ടത്ത് മുഖ്യമന്ത്രി പിണറായി വിജയന്‍ ഓണ്‍ലൈന്‍ ആയി ഉദ്ഘാടനം നിര്‍വഹിച്ചു. സര്‍ക്കാര്‍ അധികാരത്തില്‍ വന്നപ്പോള്‍ വലിയ മുന്‍ഗണനയാണ് പട്ടയം നല്‍കുന്നതില്‍ കാണിച്ചത്.  രണ്ടു ലക്ഷത്തോളം പേര്‍ക്ക് പട്ടയം വിതരണം ചെയ്തിട്ടുണ്ട്. ഇത് സര്‍വകാല റെക്കോര്‍ഡാണ്. എന്നാലിതില്‍ സര്‍ക്കാര്‍ തൃപ്തരല്ലെന്നും ഇനിയും തുടര്‍ന്ന് പട്ടയം നല്‍കാനുള്ള നടപടികള്‍ സര്‍ക്കാര്‍ സ്വീകരിക്കുമെന്നും മുഖ്യമന്ത്രി പറഞ്ഞു.

ഗവ. വനിതാ പോളിടെക്നിക് കോളേജില്‍ പുതുതായി നിര്‍മ്മിക്കുന്ന വര്‍ക്ക്ഷാപ്പ്, ഡ്രോയിംഗ് ഹാള്‍, ലബോറട്ടറി കെട്ടിടങ്ങളുടെ ശിലാസ്ഥാപനം ഇന്ന് (ഫെബ്രു.16) വൈകീട്ട് നാല് മണിക്ക് മുഖ്യമന്ത്രി പിണറായി വിജയന്‍ നിര്‍വഹിക്കും. ചടങ്ങില്‍ ഉന്നത വിദ്യാഭ്യാസ വകുപ്പ് മന്ത്രി ഡോ. കെ.ടി ജലീല്‍ അധ്യക്ഷത വഹിക്കും. എം.കെ രാഘവന്‍ എം.പി, എ പ്രദീപ് കുമാര്‍ എം.എല്‍.എ തുടങ്ങിയവര്‍ പങ്കെടുക്കും. മുഖ്യമന്ത്രിയുടെ നൂറുദിനം നൂറു പദ്ധതി പരിപാടിയുടെ രണ്ടാം ഘട്ടത്തില്‍ ഉള്‍പ്പെടുത്തിയാണ് കെട്ടിട നിര്‍മ്മാണം.

ചിറ്റാരിക്കടവ് റഗുലേറ്റര്‍ കം ബ്രിഡ്ജ് നാളെ (ഫെബ്രു.17) ജലവിഭവ വകുപ്പ് മന്ത്രി കെ കൃഷ്ണന്‍ കുട്ടി ഉദ്ഘാടനം ചെയ്യും. പുരുഷന്‍ കടലുണ്ടി എം.എല്‍.എ അധ്യക്ഷത വഹിക്കുന്ന ചടങ്ങില്‍ കെ.ദാസന്‍ എം.എല്‍.എ ഷട്ടര്‍ സ്വിച്ച് ഓണ്‍ ചെയ്യും.

കൊയിലാണ്ടി മുനിസിപ്പാലിറ്റിയും ഉള്ളിയേരി ഗ്രാമപഞ്ചായത്തും അതിര്‍ത്തി പങ്കിടുന്ന കോരപ്പുഴയുടെ കൈവഴിയായ രാമന്‍ പുഴയ്ക്ക് കുറുകെ ചിറ്റാരിക്കടവിലാണ് റഗുലേറ്റര്‍ കം ബ്രിഡ്ജ് നിര്‍മാണം പൂര്‍ത്തീകരിച്ചത്.

ബാലുശ്ശേരി നിയോജകമണ്ഡലത്തിലെ പനങ്ങാട്, കൂരാച്ചുണ്ട്, അവിടനല്ലൂര്‍ വില്ലേജ് ഓഫീസുകളുടെ പുതിയ കെട്ടിടത്തിന്റെ നിര്‍മ്മാണ പ്രവൃത്തി ഉദ്ഘാടനം മുഖ്യമന്ത്രി പിണറായി വിജയന്‍ നിര്‍വഹിച്ചു. റവന്യു വകുപ്പ് മന്ത്രി ഇ. ചന്ദ്രശേഖരന്‍ അധ്യക്ഷത വഹിച്ചു. മൂന്ന് വില്ലേജ് ഓഫീസുകളിലും ശിലാഫലകം അനാച്ഛാദനം പുരുഷന്‍ കടലുണ്ടി എം.എല്‍.എ നിര്‍വഹിച്ചു.

മേനംകുളത്തെ ബി.പി.സി.എൽ. പാചകവാതക ബോട്ട്‌ലിങ് പ്ലാന്റിൽ ജില്ലാ ദുരന്ത നിവാരണ അതോറിറ്റിയും ദേശീയ ദുരന്ത പ്രതികരണ സേനയും സംയുക്തമായി ഇന്ന് (16 ഫെബ്രുവരി) മോക്ഡ്രിൽ നടത്തുമെന്നു ജില്ലാ കളക്ടർ ഡോ. നവ്‌ജ്യോത് ഖോസ അറിയിച്ചു. രാവിലെ 11.30 മുതലാണ് മോക്ഡ്രിൽ. മോക്ഡ്രിൽ നടപടിക്രമങ്ങളിൽ ജനങ്ങൾ പരിഭ്രാന്തരാകരുതെന്നും കളക്ടർ അറിയിച്ചു.

തിരുവനന്തപുരത്ത് ഇന്ന് (15 ഫെബ്രുവരി 2021) 248 പേർക്കു കൂടി കോവിഡ് 19 സ്ഥിരീകരിച്ചു. 302 പേർ രോഗമുക്തരായി. നിലവിൽ 4,243 പേരാണു രോഗം സ്ഥിരീകരിച്ചു ചികിത്സയിൽ കഴിയുന്നത്. 

ഇന്നു രോഗം സ്ഥിരീകരിച്ചവരിൽ 176 പേർക്കു സമ്പർക്കത്തിലൂടെയാണു രോഗബാധയുണ്ടായത്. ഇതിൽ ആറു പേർ ആരോഗ്യപ്രവർത്തകരാണ്. രോഗലക്ഷണങ്ങളെത്തുടർന്നു ജില്ലയിൽ 1,723 പേരെക്കൂടി നിരീക്ഷണത്തിലാക്കി. ഇവരടക്കം ആകെ 26,437 പേർ വീടുകളിലും 58 പേർ സ്ഥാപനങ്ങളിലും ക്വാറന്റൈനിൽ കഴിയുന്നുണ്ട്. ഇന്നലെവരെ നിരീക്ഷണത്തിലുണ്ടായിരുന്ന 1,869 പേർ രോഗലക്ഷണങ്ങളില്ലാതെ നിരീക്ഷണകാലം പൂർത്തിയാക്കി.

ജില്ലയിൽ  പ്രവാസി സ്പെഷ്യൽ അദാലത്ത് സംഘടിപ്പിച്ചു. പ്രവാസികളുടെ പരാതികൾ പരിഹരിക്കുന്നതിനായി നടത്തിയ അദാലത്തിൽ 382 പേരുടെ അപേക്ഷകളാണ് പരിഗണിച്ചത്. ജില്ലാ പഞ്ചായത്ത്‌ ഹാളിൽ നടന്ന അദാലത്ത്  എ. ഡി. എം ഡോ.എം.സി റെജിൽ ഉദ്ഘാടനം ചെയ്തു.

141 ഓളം പേർ പങ്കെടുത്ത അദാലത്തിൽ ഏറ്റവും കൂടുതൽ പരാതികൾ പരിഗണിച്ചത് നോർക്കയിലാണ്.

സാന്ത്വന സഹായം, കോവിഡ് റിലീഫ്, മരണാനന്തര സഹായം, കോവിഡ് 19 മൂലം തിരിച്ചു പോകാൻ കഴിയാതെ ബുദ്ധിമുട്ടുന്നവർ, തൊഴിലിൽ ബുദ്ധിമുട്ടു നേരിടുന്നവർ, ഭൂമിയുമായി ബന്ധപ്പെട്ട പരാതികൾ തുടങ്ങിയ പരാതികളാണ് അദാലത്തിൽ പരിഗണിച്ചത്.