തിരുവനന്തപുരം സർക്കാർ മെഡിക്കൽ കോളേജിലെ മൈക്രോബയോളജി വിഭാഗത്തിൽ ജൂനിയർ ലാബ് അസിസ്റ്റന്റ് തസ്തികയിലേക്ക് കരാർ നിയമനം നടത്തുന്നു. ഒരൊഴിവാണുള്ളത്. ഡി.എം.എൽ.റ്റി-വി.എച്ച്.എസ്.ഇ/ഡി.എം.എൽ.റ്റിയാണ് യോഗ്യത. ശമ്പളം 19,320 രൂപ. കരാർ കാലാവധി ഒരു വർഷമാണ്. നിശ്ചിത യോഗ്യതയുള്ളവർ ജനനതിയതി, വിദ്യാഭ്യാസ യോഗ്യത, മുൻപരിചയം എന്നിവ തെളിയിക്കുന്ന സാക്ഷ്യപ്പെടുത്തിയ പകർപ്പുകൾ സഹിതം 29ന് മുമ്പ് തിരുവനന്തപുരം മെഡിക്കൽ കോളേജ് പ്രിൻസിപ്പലിന്റെ കാര്യാലയത്തിൽ അപേക്ഷിക്കണം.
പി.എൻ.എക്‌സ്. 4372/2020

തിരുവനന്തപുരം ജില്ലയിലേക്ക് മുന്നാക്ക സംവരണ വിഭാഗത്തിൽ ഡി.എൽ.എഡ്-ന് നിലവിൽ അപേക്ഷ സമർപ്പിച്ചവർ ആനുകൂല്യം ലഭിക്കുന്നതിനായി  റവന്യു അധികൃതരിൽ നിന്നും ബന്ധപ്പെട്ട സർട്ടിഫിക്കറ്റ് വാങ്ങി 23ന് വൈകിട്ട് നാലിനകം പത്മവിലാസം റോഡിൽ അറ്റ്‌ലസ് ജൂവലറിക്ക് എതിർവശത്തായി പ്രവർത്തിക്കുന്ന തിരുവനന്തപുരം വിദ്യാഭ്യാസ ഉപഡയറക്ടറാഫീസിൽ നേരിട്ടോ തപാൽ മുഖേനയോ എത്തിക്കണം. സർട്ടിഫിക്കറ്റ് ഹാജരാക്കുന്നവരെ മാത്രമേ ആനുകൂല്യത്തിന് പരിഗണിക്കുകയുള്ളൂ.
പി.എൻ.എക്‌സ്. 4370/2020

ശിശുദിനം 2020 ബാലാവകാശ വാരാചരണത്തിന്റെ ഭാഗമായി പത്തനംതിട്ട ജില്ലാ ശിശു സംരക്ഷണ യൂണിറ്റ് സംഘടിപ്പിച്ച പരിപാടികളുടെ വിജയികളായ കുട്ടികള്‍ക്കും ജില്ലയിലെ ശിശു സംരക്ഷണ സ്ഥാപനങ്ങള്‍ക്കും രക്ഷിതാക്കള്‍ക്കുമുള്ള സമ്മാനദാനം ജില്ലാ കളക്ടര്‍ പി.ബി. നൂഹ് നിര്‍വഹിച്ചു. ജീവിതത്തില്‍ നിരവധി പ്രതിസന്ധികള്‍ ഉണ്ടാകും എന്നാല്‍ അവയെല്ലാം തരണം ചെയ്ത് മുന്നോട്ട് പോകണമെന്ന് കളക്ടര്‍ പറഞ്ഞു. കളക്ടറേറ്റില്‍ ചേര്‍ന്ന ചടങ്ങില്‍ വിജയികളെ അനുമോദിച്ച് സംസാരിക്കുകയായിരുന്നു കളക്ടര്‍.

മെഡിക്കൽ വിദ്യാഭ്യാസ വകുപ്പ് പട്ടികജാതി പട്ടികവർഗ വിഭാഗത്തിൽപ്പെട്ടവർക്കായി 2020-21 ൽ നടത്തുന്ന ഡിപ്ലോമ ഇൻ ജനറൽ നഴ്‌സിംഗ് ആൻഡ് മിഡ് വൈഫറി കോഴ്‌സിലേയ്ക്കുള്ള പ്രവേശന നടപടികളുമായി ബന്ധപ്പെട്ട് ഒഴിവു വന്ന ആറ് സീറ്റുകളിലേയ്ക്കുള്ള സ്‌പോട്ട് അഡ്മിഷൻ ഡിസംബർ 22ന് രാവിലെ 11 മണിക്ക് മെഡിക്കൽ വിദ്യാഭ്യാസ കാര്യാലയത്തിൽ (മെഡിക്കൽ കോളേജ് പി.ഒ, തിരുവനന്തപുരം) നടത്തും. എസ്.സി വിഭാഗത്തിൽ രണ്ട് ഒഴിവും എസ്.ടി വിഭാഗത്തിൽ നാല് ഒഴിവും ഉണ്ട്. ഇനി റിപ്പോർട്ട് ചെയ്യുന്ന ഒഴിവുകൾ കൂടി അന്ന് സ്‌പോട്ട് അഡ്മിഷനിലൂടെ നികത്തും.

തിരുവിതാംകൂർ, കൊച്ചി എന്നീ ദേവസ്വം ബോർഡുകളിലേക്ക് പട്ടികജാതി/ പട്ടികവർഗ വിഭാഗത്തിൽപെടുന്ന ഓരോ അംഗങ്ങളെ വീതവും മലബാർ ദേവസ്വം ബോർഡിലേക്ക് രണ്ടു അംഗങ്ങളെയും (പൊതുവിഭാഗം) തിരഞ്ഞെടുക്കുന്നതിന് വോട്ടെടുപ്പ് ഡിസംബർ 23ന് നടക്കും. രാവിലെ 10 മുതൽ വൈകുന്നേരം നാലുവരെ ഗവ: സെക്രട്ടേറിയറ്റ് ദർബാർ ഹാളിൽ കോവിഡ് മാനദണ്ഡങ്ങൾ കർശനമായി പാലിച്ചുകൊണ്ടായിരിക്കും തിരഞ്ഞെടുപ്പ്. അന്ന് 4.15 മുതൽ വോട്ടെണ്ണി ഫലം പ്രഖ്യാപിക്കും.

ക്രിസ്മസ് കാലത്ത് വിപണിയിലെ ഉപഭോക്തൃ ചൂഷണം തടയുന്നതിന് ലീഗൽ മെട്രോളജി വകുപ്പ് പ്രത്യേക പരിശോധന നടത്തുന്നു. അളവ് തൂക്ക സംബന്ധമായതോ പാക്കേജ്ഡ് കമ്മോഡിറ്റീസ് റൂൾസ് സംബന്ധമായതോ ആയ പരാതികൾ ഉണ്ടെങ്കിൽ ലീഗൽ മെട്രോളജി വകുപ്പിനെ സമീപിക്കാം.

ഐ.എച്ച്.ആർ.ഡിയുടെ വിവിധ സ്ഥാപനങ്ങളിൽ ആരംഭിക്കുന്ന സൗജന്യ തൊഴിലധിഷ്ഠിത കോഴ്‌സുകളിലേക്ക് അപേക്ഷ ക്ഷണിച്ചു. കൂടുതൽ വിവരങ്ങൾക്ക് www.ihrd.ac.in, mfsekm.ihrd.ac.in, ihrdrcekm.kerala.gov.in എന്നിവ സന്ദർശിക്കുക. അപേക്ഷ സ്വീകരിക്കുന്ന അവസാന തിയതി ഡിസംബർ 30.
പി.എൻ.എക്‌സ്. 4365/2020