ജില്ലയിലെ കോവിഡ് ബാധിതരെ ചികിത്സിക്കാനായി ആരംഭിച്ച കോവിഡ് പ്രാഥമിക ചികിത്സാ കേന്ദ്രങ്ങളില്‍ ഒഴിഞ്ഞുകിടക്കുന്ന അറുപതോളം കേന്ദ്രങ്ങള്‍ തിരികെ നല്‍കാന്‍ ജില്ലാ ദുരന്തനിവാരണ അതോറിറ്റി ചെയര്‍മാന്‍ കൂടിയായ കലക്ടര്‍ കെ. ഗോപാലകൃഷ്ണന്‍ ഉത്തരവിട്ടു. കോവിഡ് 19 രോഗവ്യാപനമുണ്ടായാല്‍ പൊതുജനാരോഗ്യ സംവിധാനത്തെ ബാധിക്കാത്ത തരത്തില്‍ തദ്ദേശ സ്വയം ഭരണ സ്ഥാപനങ്ങള്‍ക്ക് കീഴില്‍ ആരംഭിച്ച കോവിഡ് ചികിത്സാ കേന്ദ്രങ്ങളില്‍ 13 എണ്ണം മാത്രമാണ് നിലവില്‍ പ്രവര്‍ത്തിക്കുന്നത്.

തദ്ദേശ സ്വയം ഭരണ തെരഞ്ഞെടുപ്പിന്റെ പ്രചാരണത്തില്‍ കോവിഡ് മാനദണ്ഡങ്ങള്‍ പാലിക്കുന്നതിനെക്കുറിച്ച് ഓര്‍മിപ്പിക്കുന്ന ഹ്രസ്വചിത്രം വൈറലാകുന്നു. മലപ്പുറം ജില്ലാ ഇഫര്‍മേഷന്‍ ഓഫീസാണ് ചിത്രം തയ്യാറാക്കിയിരിക്കുന്നത്. മുളങ്കുറ്റി പഞ്ചായത്തിലെ വട്ടവട ഡിവിഷന്‍ എന്ന സാങ്കല്പിക ഭൂമികയാണ് പശ്ചാത്തലം. വോട്ട് ചോദിക്കാനെത്തുന്ന ഡേവിഡേട്ടനോടും സംഘത്തോടും കോവിഡ് പെരുമാറ്റച്ചട്ടം പാലിക്കാന്‍ യുവാക്കള്‍ മുതല്‍ മുതിര്‍ന്നവര്‍ വരെ ഓര്‍മിപ്പിക്കുന്ന രീതിയിലാണ് അവതരണം.

ഏറനാട് താലൂക്കിലെ പാലക്കാട് കരിങ്കാളികാവ് ക്ഷേത്രത്തിലെ പാരമ്പര്യേതര ട്രസ്റ്റിമാരുടെ ഒഴിവിലേക്ക് ട്രസ്റ്റികളായി നിയമിക്കപ്പെടുന്നതിന് ഹിന്ദുമതധര്‍മ്മ സ്ഥാപന നിയമപ്രകാരം അര്‍ഹരായ തദ്ദേശവാസികളില്‍ നിന്ന്  അപേക്ഷ ക്ഷണിക്കുന്നു. പൂരിപ്പിച്ച അപേക്ഷകള്‍ 2020 ഡിസംബര്‍ 31 ന് വൈകീട്ട് അഞ്ച് മണിക്ക് മുന്‍പായി കോഴിക്കോട് സിവില്‍ സ്‌റ്റേഷനിലെ ഡി ബ്ലോക്കില്‍ പ്രവര്‍ത്തിക്കുന്ന മലബാര്‍ ദേവസ്വം ബോര്‍ഡ് കോഴിക്കോട് അസിസറ്റന്റ് കമ്മീഷണറുടെ ഓഫീസില്‍ എത്തിക്കണം. അപേക്ഷ ഫോറത്തിനും മറ്റ് വിശദ വിവരങ്ങള്‍ക്കും ഓഫീസുമായി ബന്ധപ്പെടുക.

ആതവനാട് മൃഗസംരക്ഷണ പരിശീലന കേന്ദ്രത്തില്‍ രജിസ്റ്റര്‍ ചെയ്തിട്ടുള്ള കര്‍ഷകര്‍ക്ക് വേണ്ടി 2020 ഡിസംബര്‍ 10 ന് വൈകീട്ട് ഏഴ് മണി മുതല്‍ 'അലങ്കാര പക്ഷികളുടെ പരിചരണവും പരിപാലനവും' എന്ന വിഷയത്തില്‍ സൗജന്യ വെബിനാര്‍ സംഘടിപ്പിക്കുന്നു. വെബിനാറില്‍ രജിസ്റ്റേര്‍ഡ് വെറ്റിനെറി പ്രാക്ടീഷനര്‍ ഡോ. ജിനു ജോണ്‍ ക്ലാസെടുക്കും. ഗൂഗിള്‍ മീറ്റ് അപ്ലീക്കേഷന്‍ വഴിയാണ് പരിശീലനം സംഘടിപ്പിക്കുന്നത്. പരിശീലനത്തില്‍ പങ്കെടുക്കുവാനുള്ള ഗൂഗിള്‍ മീറ്റ് ലിങ്ക് http://meet.google.com/vba-uwkm-evd , മീറ്റിങ് കോഡ് vba-uwkm-evd

പെരിന്തല്‍മണ്ണ പിടിഎം ഗവ. കോളജില്‍ ബി.ബി.എ ബിരുദ കോഴ്‌സിന് എല്‍.സി സംവരണ വിഭാഗത്തില്‍ ഒരു സീറ്റ്് ഒഴിവുണ്ട്. കാപ് രജിസ്‌ട്രേഷന്‍ ഉള്ള  പ്രസ്തുത  വിഭാഗത്തില്‍പെട്ട വിദ്യാര്‍ത്ഥികള്‍ അസ്സല്‍ സര്‍ട്ടിഫിക്കറ്റുകള്‍ സഹിതം 2020 ഡിസംബര്‍ ഒന്‍പതിന് ഉച്ചയ്ക്ക് 12 ന് മുന്‍പായി  കോളജില്‍ നേരിട്ട് ഹാജരാകണം. കൂടുതല്‍ വിവരങ്ങള്‍ക്ക് www.ptmgovenmentcollege.in  സന്ദര്‍ശിക്കുക. ഫോണ്‍ - 9495552560

മലപ്പുറം സര്‍ക്കാര്‍ കോളജില്‍ കെമിസ്ട്രി, ഫിസിക്‌സ്, ഉറുദ്ദു എന്നീ ബിരുദ കോഴ്‌സുകളില്‍  ഏതാനും ഭിന്നശേഷി സംവരണ സീറ്റുകള്‍ ഒഴിവുണ്ട്.  അര്‍ഹരായ അപേക്ഷകര്‍ അനുബന്ധ രേഖകളുമായി ഡിസംബര്‍ ഒമ്പതിന് രാവിലെ 10 മണിക്ക് കോളജില്‍ റിപ്പോര്‍ട്ട്് ചെയ്യണം.