ശിശുദിന വാരാഘോഷത്തോടനുബന്ധിച്ച് സംസ്ഥാന ബാലാവകാശ സംരക്ഷണ കമ്മീഷന്റെയും ജില്ലാഭരണകൂടത്തിന്റെയും ജില്ലാ ശിശുസംരക്ഷണ യൂണിറ്റിന്റെയും നേതൃത്വത്തില്‍ നടത്തിയ ബോജ ഫെസ്റ്റ് (വര്‍ണ്ണോല്‍സവം) വിജയികള്‍ക്ക് സര്‍ട്ടിഫിക്കറ്റും ട്രോഫിയും ജില്ലാ കളക്ടര്‍ ഡോ.അദീല അബ്ദുള്ള വിതരണം ചെയ്തു. ഫോട്ടോഗ്രഫി, പോസ്റ്റര്‍ രചനാ, കത്തെഴുത്ത്, ചിത്ര നിരൂപണം തുടങ്ങിയ മത്സരങ്ങളാണ് ബോജ  ഫെസ്റ്റിനോടനുബന്ധിച്ച് കുട്ടികള്‍ക്കായി നടത്തിയത്. ചടങ്ങില്‍ എ.ഡി.എം കെ.അജീഷ്, ശുശു സംരക്ഷണ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

കോഴിക്കോട് ജില്ലാ പഞ്ചായത്ത് സ്‌കില്‍ ഡവലപ്മെന്റ് സെന്ററില്‍  ഇലക്ട്രിക്കല്‍ ടെക്നീഷ്യന്‍,സോളാര്‍ ടെക്നീഷ്യന്‍, റഫ്രിജറേഷന്‍ & എയര്‍കണ്ടീഷനിങ്ങ്, ഹാര്‍ഡ്വേര്‍ & നെറ്റ്‌വര്‍ക്കിങ്ങ് എന്നീ കേന്ദ്ര സര്‍ക്കാര്‍ അംഗീകൃത  കോഴ്സുകളില്‍ സീറ്റുകള്‍ ഒഴിവുണ്ട്. താല്‍പര്യമുള്ളവര്‍ക്ക് നിശ്ചിത സര്‍ട്ടിഫിക്കറ്റുകളുമായി നേരിട്ട് ഹാജരായി പ്രവേശനം നേടാവുന്നതാണെന്ന് ഡയറക്ടര്‍ അറിയിച്ചു.   ഫോണ്‍: 0495 2370026, 8891370026.

കോഴിക്കോട് ജില്ലയില്‍ വിവിധ വകുപ്പുകളിലേക്കുള്ള എല്‍ഡി ടൈപ്പിസ്റ്റ് (കാറ്റഗറി നം. 280/18, 281/18) തസ്തികയുടെ റാങ്ക് പട്ടിക പ്രസിദ്ധീകരിച്ചു.

മാസ്ക് ധരിക്കാതെ പൊതുസ്ഥലങ്ങളിൽ ഇറങ്ങിയ 61 പേർക്കെതിരെ പോലീസ് ഇന്ന്  (നവംബർ 30) കേസെടുത്തു.  മാസ്ക് ധരിക്കേണ്ടതിന്റെ   ആവശ്യകത ബോധ്യപ്പെടുത്തി കോടതിയിൽ പിഴ അടയ്ക്കാൻ നോട്ടീസ് നൽകി വിട്ടയച്ചു. 
 

ജില്ലാഭരണകൂടത്തിന്റെയും ജില്ലാ ശിശുസംരക്ഷ യൂണിറ്റിന്റെയും ആഭിമുഖ്യത്തില്‍ നടത്തിയ ടേക്ക് ഓഫ് സംവാദ പരിപാടിയില്‍  ജില്ലാ കളക്ടര്‍ ഡോ. അദീല അബ്ദുള്ള, ജില്ലാ പോലീസ് മോധാവി ജി. പൂങ്കുഴലി, ജില്ലാ മെഡിക്കല്‍ ഓഫീസര്‍ ആര്‍.രേണുക തുടങ്ങിയവര്‍ കുട്ടികളുമായി സംവദിച്ചു. സിവില്‍ സര്‍വ്വീസിലെ പ്രവേശനത്തെക്കുറിച്ചും പഠന പ്രവര്‍ത്തനത്തെക്കുറിച്ചും കുട്ടികള്‍ കളക്ടറോട് സംശയങ്ങള്‍ ചോദിച്ചു. തികഞ്ഞ ലക്ഷ്യബോധവും അടുക്കും ചിട്ടയുമുള്ള പഠന രീതിയും പരന്ന വായനയുമാണ് കുട്ടികളെ ലക്ഷ്യത്തിലെത്തിക്കുകയെന്ന് ജില്ലാ കളക്ടര്‍ ഡോ. അദീല അബ്ദുള്ള പറഞ്ഞു.

കോഴിക്കോട് ഗവ.എഞ്ചിനീയറിംഗ് കോളേജിലെ എഇ ആന്റ് എഞ്ചിനീയറിംഗ് ഡിപ്പാര്‍ട്ട്മെന്റിലെ സിസ്റ്റം സിമുലേഷന്‍ ലാബിലേക്കാവശ്യമായ  5 കെവിഎ യുപിഎസിന് ബൈ ബാക്ക് സ്‌കീം പ്രകാരം ബാറ്ററി വാങ്ങുന്നതിന് ക്വട്ടേഷന്‍ ക്ഷണിച്ചു. അവസാന തീയതി ഡിസംബര്‍ 17 ന് രണ്ട് മണി വരെ. ഫോണ്‍ : 0495 2383220, 2383210.

കാക്കുനി - നമ്പാംവയല്‍ റോഡ് പ്രവൃത്തിയും കലുങ്ക് നിര്‍മ്മാണ പ്രവൃത്തിയും ആരംഭിക്കുന്നതിനാല്‍ ഇന്നു (ഡിസംബര്‍ ഒന്ന് ) മുതല്‍ പ്രവൃത്തി തീരുന്നതുവരെ ഇതു വഴിയുളള വാഹന ഗതാഗതം നിരോധിച്ചതായി എക്സിക്യൂട്ടീവ് എഞ്ചിനീയര്‍ അറിയിച്ചു.   നമ്പാംവയല്‍ ഭാഗത്തു നിന്നും കാക്കുനി ഭാഗത്തേക്ക് പോകുന്ന വാഹനങ്ങള്‍ കുളങ്ങരത്ത് അരൂര്‍ ഗുളികപ്പുഴ റോഡ് വഴിയും കാക്കുനി ഭാഗത്ത് നിന്നും തിരികെ പോകുന്ന വാഹനങ്ങള്‍ കാവില്‍ - തൂക്കുനി - കുറ്റ്യാടി റോഡ് വഴിയും പോകണം.  
 

മാനന്തവാടി ഗവണ്‍മെന്റ് കോളേജില്‍ 2020-21 അധ്യായന വര്‍ഷത്തെ ഒന്നാം വര്‍ഷ എം.എ ഡെവലപ്‌മെന്റ് എക്കണോമിക്‌സ് കോഴ്‌സില്‍ എസ്.ടി വിഭാഗത്തില്‍ 2 സീറ്റും, എം.എ ഇംഗ്ലീഷ് കോഴ്‌സില്‍ എസ്.ടി വിഭാഗത്തില്‍ മൂന്ന് സീറ്റും, ഒന്നാം വര്‍ഷ എം.കോം കോഴ്‌സിന് എസ്.സി വിഭാഗത്തില്‍ ഒരു സീറ്റും എസ്.ടി വിഭാഗത്തില്‍ രണ്ട് സീറ്റും, ഒന്നാം വര്‍ഷ എം.എസ്.സി ഇലക്ട്രോണിക്‌സിന് എസ്.സി വിഭാഗത്തില്‍ ഒരു സീറ്റും, എസ്.ടി വിഭാഗത്തില്‍ രണ്ട് സീറ്റും ഒഴിവുണ്ട്. പ്രവേശനത്തിന് താല്‍പ്പര്യമുള്ള വിദ്യാര്‍ത്ഥികള്‍ അസ്സല്‍ സര്‍ട്ടിഫിക്കറ്റുകളുമായി ഡിസംബര്‍ 2ന് വൈകുന്നേരം 3ന് മുന്‍പായി കോളേജില്‍ ഹാജരാകണം.

കോവിഡ് 19 ബാധിതരായി  ജില്ലയില്‍ നിലവില്‍ 4781 പേരാണ് ചികിത്സയിലുള്ളത്.  ഇന്ന് (നവംബർ 30) ജില്ലയില്‍ 242 പേര്‍ക്കാണ് രോഗം സ്ഥിരീകരിച്ചത്. ഇന്ന് 128 പേരെ ആശുപത്രിയില്‍ പ്രവേശിപ്പിക്കുകയും ചെയ്തു.  

ഇതുവരെ 98643 സാമ്പിളുകള്‍ പരിശോധനയ്ക്കായി അയച്ചതില്‍ 96252 പരിശോധനാ ഫലങ്ങളാണ് ലഭ്യമായത്. ഇന്ന് 285 പരിശോധനാ ഫലങ്ങളാണ് ലഭിച്ചത്. പുതുതായി 448 സാമ്പിളുകൾ അയച്ചു.  38393 പേർക്കാണ് ഇതുവരെ  പരിശോധനാഫലം പോസിറ്റീവായത്. ഇതുവരെ 33113 പേർ രോഗമുക്തി നേടി. 

തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതുതെരഞ്ഞെടുപ്പില്‍ മാധ്യമങ്ങളുമായി ബന്ധപ്പെട്ട് സംസ്ഥാന തെരഞ്ഞെടുപ്പ് കമ്മീഷന്‍ പുറപ്പെടുവിച്ച മാര്‍ഗനിര്‍ദ്ദേശങ്ങള്‍ കൃത്യമായി പാലിക്കണമെന്ന് ജില്ലാ തെരഞ്ഞെടുപ്പ് ഓഫീസറായ ജില്ലാ കലക്ടര്‍ ഡോ. അദീല അബ്ദുള്ള അഭ്യര്‍ഥിച്ചു. വോട്ടെടുപ്പ് സമാപനത്തിന് 48 മണിക്കൂര്‍ സമയപരിധിയില്‍ ഒരു മാധ്യമത്തിലൂടെയും തെരഞ്ഞെടുപ്പ് ഫലത്തെ സ്വാധീനിക്കുന്നതോ ബാധിക്കുന്നതോ ആയ പ്രചാരണങ്ങള്‍ നടത്തരുത്.