സ്ത്രീകള്‍ക്ക് സാമ്പത്തിക ഭദ്രത ഉറപ്പാക്കാന്‍ 'ഗൃഹസമൃദ്ധി വീട്ടമ്മയ്ക്കൊരു കൈത്താങ്ങ്' പദ്ധതിയുമായി പത്തനാപുരം ബ്ലോക്ക്പഞ്ചായത്ത്.   പിറവന്തൂര്‍, പട്ടാഴി, പട്ടാഴി വടക്കേക്കര, വിളക്കുടി, പത്തനാപുരം, തലവൂര്‍  ഗ്രാമപഞ്ചായത്തുകളിലെ    വനിതാ വ്യക്തിഗത ഉപഭോക്താക്കളുടെ ക്ലസ്റ്റര്‍ ബ്ലോക്ക് തലത്തില്‍ രൂപീകരിച്ച്  ഒരു കറവപശുവും എട്ടുമാസം പ്രായമായ പെണ്ണാടും 10 മുട്ടക്കോഴികളും നല്‍കുന്ന  പദ്ധതിയാണിത്.

 കേരള യുവജനക്ഷേമ ബോര്‍ഡ് സംഘടിപ്പിച്ച  സംസ്ഥാനതല ശാസ്ത്ര ക്വിസ് മത്സരത്തില്‍  കൊല്ലം ജില്ലയിലെ ഏരൂര്‍  സര്‍ക്കാര്‍ ഹൈസ്‌കൂളിലെ 10-ാം ക്ലാസ് വിദ്യാര്‍ഥികളായ എ.എസ് അഭിനവ്, എം.എസ് വര്‍ഷ ഉള്‍പ്പെട്ട ടീമിന് ഒന്നാം സ്ഥാനം.   ഒരു ലക്ഷം രൂപയും മെമന്റോയും സര്‍ട്ടിഫിക്കറ്റുമാണ് ലഭിച്ചത്. തുടര്‍ച്ചയായി രണ്ടാം തവണയാണ് ഇരുവരും ഉള്‍പ്പെട്ട ടീം ഒന്നാം സ്ഥാനം നേടുന്നത്. അയിലറ കാര്‍ത്തികയില്‍ പരേതനായ അനില്‍ കുമാറിന്റെയും സൗമ്യയുടേയും മകനാണ് എ.എസ് അഭിനവ്. അയിലറ ശ്രീനന്ദനത്തില്‍ മനോജ് കുമാറിന്റെയും സന്ധ്യയുടേയും മകളാണ് എം.എസ് വര്‍ഷ.  

 ജില്ലാ വികസന സമിതി യോഗം സെപ്റ്റംബര്‍ 27ന് രാവിലെ 11 ന് കലക്‌ട്രേറ്റ് കോണ്‍ഫറന്‍സ് ഹാളില്‍ ചേരും.
 

 കൊല്ലം താലൂക്ക് വികസന സമിതി യോഗം സെപ്റ്റംബര്‍ 20ന് രാവിലെ 10.30ന് താലൂക്ക് കോണ്‍ഫറന്‍സ് ഹാളില്‍  ചേരും.
 

 കേരളത്തിന് പുറത്തു പഠിക്കുന്ന 2.5 ലക്ഷം രൂപയില്‍ താഴെ വരുമാനമുള്ള   പട്ടികജാതി വിഭാഗം വിദ്യാര്‍ഥികള്‍   പോസ്റ്റ്‌മെട്രിക്ക് സ്‌കോളര്‍ഷിപ്പിനുള്ള അപേക്ഷ സമര്‍പ്പിക്കുന്നതിന്  മുന്നോടിയായി നാഷണല്‍ സ്‌കോളര്‍ഷിപ്പ്  പോര്‍ട്ടലിലെ ബയോമെട്രിക് ഓതന്റിക്കേഷന്‍ നിര്‍ബന്ധമായും പൂര്‍ത്തീകരിക്കണം. എല്ലാ സ്ഥാപന മേധാവികളും വിവരങ്ങള്‍  അപ്‌ഡേറ്റ് ചെയ്ത്, 2025-26 വര്‍ഷത്തെ പുതിയ അപേക്ഷകളും പുതുക്കാനുള്ള അപേക്ഷകളും ഇ-ഗ്രാന്‍സ് പോര്‍ട്ടല്‍ വഴി സമയബന്ധിതമായി സമര്‍പ്പിക്കണമെന്ന്  അസിസ്റ്റന്റ് ജില്ലാ പട്ടികജാതി വികസന ഓഫീസര്‍ അറിയിച്ചു.

 പുനലൂര്‍ താലൂക്കാശുപത്രിയില്‍ ഒപ്‌ടോമെട്രിസ്റ്റ് തസ്തികയില്‍ താല്‍ക്കാലിക നിയമനം നടത്തും. യോഗ്യത: കേരളത്തിലെ മെഡിക്കല്‍ കോളേജുകളില്‍ നിന്ന് രണ്ട് വര്‍ഷത്തെ ഒഫ്താല്‍മിക് അസിസ്റ്റന്റ് ഡിപ്ലോമ കോഴ്‌സ്.  പ്രായപരിധി : 40 വയസ്.   യോഗ്യത തെളിയിക്കുന്ന സര്‍ട്ടിഫിക്കറ്റുകളുടെ അസലും പകര്‍പ്പും ബയോഡേറ്റയും വെള്ളപേപ്പറില്‍ തയ്യാറാക്കിയ അപേക്ഷയും സഹിതം സെപ്റ്റംബര്‍ 22ന് ഉച്ചയ്ക്ക് 12ന് നടത്തുന്ന വോക്ക് ഇന്‍ ഇന്റര്‍വ്യൂവില്‍ പങ്കെടുക്കണം. ഫോണ്‍: 0475 2228702.