കോട്ടയം: 2026ലെ അഖിലേന്ത്യാ ട്രേഡ് ടെസ്റ്റിൽ പങ്കെടുപ്പിക്കുന്നതിനായി പ്രൈവറ്റ് ട്രെയിനി പ്രവേശനത്തിന് അപേക്ഷ ക്ഷണിച്ചു. വാട്ടർ അതോറിട്ടി, കെ.എസ്.ഇ.ബി. ജീവനക്കാർക്കും 2018 ൽ എസ്.സി.വി.റ്റി. ട്രേഡ് ടെസ്റ്റ് വിജയിച്ച ട്രെയിനികൾക്കും അപേക്ഷിക്കാം. അപേക്ഷകൾ മാർച്ച് 10 ന് മുൻപായി വ്യാവസായിക പരിശീലന വകുപ്പ് ട്രെയിനിംഗ് ഡയറക്ടർക്ക് നേരിട്ടോ തപാൽ മുഖേനയോ നൽകണം. വിശദ വിവരങ്ങൾ ഐ.ടി.ഐയിൽ ലഭിക്കും. ഫോൺ: 0481 2380404, 9446119713.

കോട്ടയം: ഏറ്റുമാനൂർ ഐ.സി.ഡി.എസിന്റെ പരിധിയിലുള്ള 107 അങ്കണവാടികളിലേക്ക് കണ്ടിജൻസി സാധനങ്ങൾ വിതരണം ചെയ്യുന്നതിന് സ്ഥാപനങ്ങളിൽനിന്ന് ടെൻഡർ ക്ഷണിച്ചു. ടെൻഡറുകൾ മാർച്ച് 16ന് ഉച്ചക്ക് രണ്ടിന് മുൻപായി നൽകണം. ഫോൺ: 9188959695.

ചപ്പാരപ്പടവ്- കുപ്പം പുഴയ്ക്ക് കുറുകെ മംഗര കടവില്‍ നിര്‍മ്മിച്ച പാലം എം.വി ഗോവിന്ദൻ മാസ്റ്റർ എംഎൽഎ നാടിന് സമർപ്പിച്ചു. പതിറ്റാണ്ടുകളായുള്ള  പ്രദേശവാസികളുടെ സ്വപ്നമാണ് ഇതോടെ യാഥാർഥ്യമായത്. 175 മീറ്റർ നീളത്തിലും 11.05 മീറ്റർ വീതിയിലുമാണ് പാലം നിർമിച്ചത്. പാലത്തിന്റെ ഇരുഭാഗത്തുമായി 200 മീറ്ററിലുള്ള അപ്രോച്ച് റോഡുമുണ്ട്. 13.4 കോടി രൂപയാണ് നിർമാണച്ചെലവ്. 

സംസ്ഥാന സർക്കാരിൻ്റെ നാലാം വാർഷിക ആഘോഷങ്ങളുടെ ഭാഗമായി ആലപ്പുഴ  ജില്ലയിൽ മുഖ്യമന്ത്രി നേരിട്ട് പങ്കെടുക്കുന്ന അവലോകന യോഗം 2025 മെയ് 6 ന് കാമിലോട്ട് കൺവെൻഷൻ സെൻ്ററിൽ നടക്കുകയാണ്. യോഗത്തിലേക്ക് തെരഞ്ഞെടുക്കപ്പെട്ട പ്രത്യേക അതിഥികൾക്ക് നിലവാരമുള്ള ഭക്ഷണം കവറിലാക്കി വിതരണം ചെയ്യുന്നതിന് ബേക്കറി/ഹോട്ടൽ ഉടമകളിൽ നിന്ന് ക്വട്ടേഷൻ ക്ഷണിച്ചു.  ഭക്ഷണ പദാർത്ഥത്തിൻറെ നിലവാരം കൂടി പരിഗണിച്ചായിരിക്കും അന്തിമ തീരുമാനം എടുക്കുക. ഐറ്റങ്ങളുടെ എണ്ണത്തിലോ തരത്തിലോ ചെറിയ മാറ്റം സാഹചര്യം അനുസരിച്ചു വരാവുന്നതാണ്. ഭക്ഷ്യ സാധനങ്ങൾ വൃത്തിയായ കവറിലാക്കി അതിഥികൾക്ക് വിതരണം ചെയ്യുന്നതിന്റെ തുകയാണ് ക്വാട്ട് ചെയ്യേണ്ടത്.

പരിയാരം ഗവ.ആയുർവേദ കോളേജിൽ പൂർത്തികരിച്ച വിവിധ പദ്ധതികളുടെ ഉദ്ഘാടനം മാർച്ച് 10 ചൊവ്വാഴ്ച രാവിലെ 11 മണിക്ക് ആരോഗ്യ വകുപ്പ് മന്ത്രി വീണാ ജോർജ് ഓൺലൈനായി നിർവ്വഹിക്കുമെന്ന് എം വിജിൻ എം എൽ എ അറിയിച്ചു. രണ്ട് കോടി രൂപ അനുവദിച്ച് പുതുതായി നിർമ്മാണം പൂർത്തീകരിച്ച ബാച്ചിലേഴ്‌സ്' ക്വാർട്ടേഴ്സ‌്, 49.67 ലക്ഷത്തിൻ്റെ ആനിമൽ ഹൗസ്, 1.9 കോടി അനുവദിച്ച് പൂർത്തികരിച്ച സെൻട്രൽ റിസർച്ച് ലബോറട്ടറി, 68.79 ലക്ഷം ഉപയോഗിച്ച് നവീകരിച്ച ക്യാമ്പസ് റോഡ് എന്നിവയുടെ ഉദ്ഘാടനമാണ് മന്ത്രി നിർവ്വഹിക്കുക.

കല്യാശ്ശേരി ഗ്രാമ പഞ്ചായത്തിൽ
സംസ്ഥാന സർക്കാർ കിഫ്‌ബി പദ്ധതിയിൽ ഉൾപ്പെടുത്തി 1.75
 കോടി ഉപയോഗിച്ച്  നിർമ്മിക്കുന്ന ആധുനിക വാതക ശ്മശാനത്തിൻ്റെ പ്രവൃത്തി ഉദ്ഘാടനം മാർച്ച് 10 ചൊവ്വാഴ്ച രാവിലെ ഒൻപത് മണിക്ക് കല്യാശേരി ബിക്കിരിയൻ പറമ്പിൽ എം വിജിൻ എംഎൽഎ നിർവ്വഹിക്കും.
കല്യാശ്ശേരി പഞ്ചായത്തിന്റെ അധീനതയിലുളള 50 സെന്റ് സ്ഥലത്താണ് പദ്ധതി നടപ്പിലാക്കുന്നത്.

കണ്ണൂർ പരിയാരം ഗവ മെഡിക്കൽ കോളേജ് ആശുപത്രിയിൽ ചികിത്സ തേടിയെത്തുന്നവർക്കായി ഒരുക്കിയ പ്രത്യേകയിടം "കനിവിടം"എം വിജിൻ എം എൽ എ ഉദ്ഘാടനം ചെയ്തു.
മെഡിക്കൽ കോളേജ് പ്രിൻസിപ്പൽ ഡോ. സൈറു ഫിലിപ്പ് അധ്യക്ഷയായി.
സംസ്ഥാനത്ത് ഇതാദ്യമായാണ് മെഡിക്കൽ കോളേജ് കേന്ദ്രീകരിച്ച് ചികിത്സ തേടിയെത്തുന്നവർക്കായി ആകർഷകവും പ്രകൃതിദത്തവും ശാന്തസുന്ദരവുമായ ഒരിടം രൂപപ്പെടുത്തുന്നത്. എം എൽ എയുടെ ആസ്തി വികസനഫണ്ട് 30 ലക്ഷം രൂപ ഉപയോഗിച്ചാണ് 'കനിവിടം' രൂപപ്പെടുത്തിയത്.

കേച്ചേരി എന്റര്‍പ്രൈസസ്, പുനലൂര്‍ എന്ന സ്ഥാപനത്തിന്റെ ആലപ്പുഴ ജില്ലയിലെ വിവിധ ബ്രാഞ്ചുകളിൽ നിക്ഷേപം നടത്തി പണം തിരികെ ലഭിക്കാത്തവർക്ക്  അപേക്ഷ  നൽകാം. പണം നഷ്ടപ്പെട്ട നിക്ഷേപകർ നിർദിഷ്ട ഫോമിലുള്ള ക്ലെയിം അപേക്ഷകൾ അനുബന്ധരേഖകൾ സഹിതം സമർപ്പിക്കണം. ഈ വാർത്ത പ്രസിദ്ധീകരിച്ച് 14 ദിവസങ്ങൾക്കുള്ളിൽ നോഡൽ ഓഫീസറായ ഡെപ്യൂട്ടി കളക്ടർ (ജനറൽ) മുമ്പാകെ  നേരിട്ടോ തപാൽ മുഖേനയോ  അപേക്ഷകൾ സമർപ്പിക്കേണ്ടതാണെന്ന് അറിയിച്ചു.
 

കോട്ടയം: വേനൽക്കാല രോഗങ്ങളെ നേരിടാനുള്ള ഒരുക്കങ്ങൾ ഊർജിതമാക്കാൻ ജില്ലാ കളക്ടർ ചേതൻകുമാർ മീണയുടെ അധ്യക്ഷതയിൽ കൂടിയ വിവിധ വകുപ്പുകളുടെ യോഗം തീരുമാനിച്ചു. വെയിലത്ത് പണിയെടുക്കുന്നവർ, വിദ്യാർഥികൾ, തൊഴിലുറപ്പു തൊഴിലാളികൾ, ആശാ വർക്കർമാർ തുടങ്ങി പകൽ സമയത്ത് പുറത്തിറങ്ങുന്നവരുടെ കാര്യത്തിൽ പ്രത്യേക ശ്രദ്ധനൽകണമെന്ന് കളക്ടർ നിർദ്ദേശിച്ചു.

മുഖ്യമന്ത്രിയുടെ തദ്ദേശ റോഡ് പുന:രുദ്ധാരണ പദ്ധതിയിൽ ഉൾപ്പെടുത്തി ചെറുതാഴം പഞ്ചായത്തിലെ നരിക്കാംവള്ളി മൃഗാശുപത്രി അറത്തിപ്പറമ്പ് അറത്തിലമ്പലം റോഡിൻ്റെയും പിരക്കാംതടം കക്കോണി റോഡിൻ്റെയും ഉദ്ഘാടനം എം വിജിൻ എം എൽ എ നിർവ്വഹിച്ചു. 48 ലക്ഷം രൂപയാണ് ഇരു റോഡുകളും നവീകരിക്കുന്നതിന് അനുവദിച്ചത്.

 ചെറുതാഴം ഗ്രാമ പഞ്ചായത്ത് പ്രസിഡൻ്റ് സനൂപ് മോഹൻ അധ്യക്ഷത വഹിച്ചു. ചെറുതാഴം പഞ്ചായത്ത് ആസൂത്രണ സമിതി ഉപാധ്യക്ഷന്‍ എം.വി.രാജീവന്‍, കെ.സി.തമ്പാന്‍ മാസ്റ്റര്‍, വാര്‍ഡ് അംഗങ്ങളായ വി.വി.രാമേന്ദ്രന്‍, സി രോഹിണി,  എം.വി.രാജീവന്‍, കെ സി തമ്പാന്‍ മാസ്റ്റര്‍, എം.സജേഷ് തുടങ്ങിയവർ സംസാരിച്ചു.