68 ഹരിത ടൂറിസം കേന്ദ്രങ്ങളുടെ പ്രഖ്യാപനം നവംബർ ഒന്നിന്

മാലിന്യമുക്ത നവകേരളം ജനകീയ ക്യാമ്പയിനിലൂടെ സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളിൽ നിന്ന് തിരഞ്ഞെടുത്ത വിനോദ സഞ്ചാര കേന്ദ്രങ്ങളെ നവംബർ ഒന്നിന് ഹരിത ടൂറിസം കേന്ദ്രങ്ങളായി പ്രഖ്യാപിക്കും. 
സഞ്ചാരികൾക്ക് നയന വിസ്മയം ഒരുക്കുന്നതിനൊപ്പം ശുചിത്വ മികവിലും മാതൃകയാകാൻ കേരളപ്പിറവി ദിനത്തിൽ ഒരുങ്ങുന്നത് 68 വിനോദ സഞ്ചാര കേന്ദ്രങ്ങളാണ്.

പാലക്കാട് വ്യാവസായിക ട്രൈബ്യൂണലും ഇന്‍ഷുറന്‍സ് കോടതി ജഡ്ജിയും  എംപ്ലോയീസ് കോമ്പന്‍സേഷന്‍ കമ്മീഷണറുമായ സാബു സെബാസ്റ്റ്യന്‍ നവംബര്‍ ഒന്ന്, ഏഴ്, തീയതികളില്‍ പെരിന്തല്‍മണ്ണ സബ് ഡിവിഷണല്‍ മജിസ്‌ട്രേറ്റ് കോടതി ഹാളിലും 15, 22, 29 തീയതികളില്‍  മഞ്ചേരി ഇന്ദിരാഗാന്ധി ബസ് ടെര്‍മിനല ബില്‍ഡിംഗിലെ ഒന്നാം നിലയിലെ കോടതി ഹാളിലും നവംബര്‍ 18, 19, 25, 26 തീയതികളില്‍ പാലക്കാട് റവന്യൂ ഡിവിഷണല്‍ മജിസ്‌ട്രേറ്റ് കോടതി ഹാളിലും തൊഴില്‍ തര്‍ക്ക കേസ്സുകളും ഇന്‍ഷുറന്‍സ് കേസ്സുകളും എംപ്ലോയീസ് കോമ്പന്‍സേഷന്‍ കേസ്സുകളും വിചാരണ ചെയ്യുമെന്ന് പാലക്കാട് വ്യാവസായിക ട്രൈബ്യൂണല്‍ സെക്രട്ടറി അറിയിച്ചു.
 

ഗാന്ധി ജയന്തി ആഘോഷങ്ങളോടനുബന്ധിച്ച്  കേരള ഖാദി ഗ്രാമ വ്യവസായ ബോര്‍ഡിന്റെ ആഭിമുഖ്യത്തില്‍ തിരുവനന്തപുരത്ത് നടന്ന സംസ്ഥാനതല ക്വിസ് മത്സരത്തില്‍ മാറാക്കര വി.വി.എം.എച്ച്.എസ്.എസിലെ വി. പ്രബിന്‍ പ്രകാശ്, സി. പ്രിന്‍സി എന്നിവര്‍ മൂന്നാം സ്ഥാനം നേടി. മഹാത്മാഗാന്ധിയും ഖാദിയും സ്വാതന്ത്ര്യസമരവും എന്ന വിഷയത്തെ അടിസ്ഥാനമാക്കിയായിരുന്നു ക്വിസ് മത്സരം. കേരള   ഖാദി ഗ്രാമവ്യവസായ ബോര്‍ഡ് സെക്രട്ടറി ഡോ.  കെ.എ രതീഷ് പുരസ്‌കാരം സമ്മാനിച്ചു.

മങ്കട സാമൂഹികാരോഗ്യകേന്ദ്രം കോമ്പൗണ്ടില്‍ കൂട്ടിയിട്ട പഴയ ഇരുമ്പ് സാധനങ്ങള്‍ നവംബര്‍ 11ന് രാവിലെ 11.30ന് പരസ്യമായി ലേലം ചെയ്തുവില്‍ക്കുമെന്ന് മെഡിക്കല്‍ ഓഫീസര്‍ അറിയിച്ചു. ലേലത്തില്‍ പങ്കെടുക്കുന്നവര്‍ 1000 രൂപ നിരതദ്രവ്യം കെട്ടിവയ്ക്കണം. കൂടുതല്‍ വിവരങ്ങള്‍ക്ക് മങ്കട സാമൂഹികാരോഗ്യകേന്ദ്രവുമായി ബന്ധപ്പെടണം. ഫോണ്‍: 04933 239217.

ജില്ലാ ഐ.ടി മേളയ്ക്ക് മേലാറ്റൂരില്‍ സമാപനമായി. നിര്‍മിത ബുദ്ധി മുഖ്യപ്രമേയമായ മേള സര്‍ഗാത്മകവും വൈവിധ്യപൂര്‍ണവുമായ ഉള്ളടക്കം കൊണ്ട് ശ്രദ്ധേയമായി. നിത്യജീവിതത്തില്‍ നിര്‍മ്മിത ബുദ്ധിയുടെ അനന്ത സാധ്യതകള്‍ മേളയില്‍ അവതരിപ്പിക്കപ്പെട്ടു. ഒരേസമയം രണ്ടു പേര്‍ക്ക് കളിക്കാവുന്ന റേസിംഗ് ഗെയിമുകളും  ദുരന്തമുഖങ്ങളിലെ രക്ഷാപ്രവര്‍ത്തനം വിവരിക്കുന്ന ആനിമേഷനുകളും മികച്ച നിലവാരം പുലര്‍ത്തി.

 വനം-വന്യജീവി വകുപ്പ് മലപ്പുറം സോഷ്യല്‍ ഫോറസ്ട്രി ഡിവിഷന്റെ  ആഭിമുഖ്യത്തില്‍ നാട്ടാന പാപ്പാന്മാര്‍ക്ക് വേണ്ടി ഏകദിന ശില്‍പശാല നടത്തി. നാട്ടാനകളുടെ പരിപാലനം കാര്യക്ഷമമായി നടത്തുന്നതിനും നാട്ടാന പരിപാലന ചട്ടം കര്‍ശനമായി പാലിച്ച് ആനകളെ എഴുന്നള്ളിക്കുന്നതിന് പാപ്പാന്മാരെ സജ്ജരാക്കുന്നതിനുമാണ് ശില്പശാല സംഘടിപ്പിച്ചത്.  രജിസ്‌ട്രേഷന്‍ ഇല്ലാത്ത സ്ഥാപനങ്ങളില്‍ ആനകളെ എഴുന്നള്ളിക്കരുതെന്നും അനുവദിച്ചതില്‍ കൂടുതല്‍ ആനകളെ എഴുന്നള്ളിക്കരുതെന്നും പാപ്പാന്മാര്‍ക്കും ആന ഉടമകള്‍ക്കും നിര്‍ദ്ദേശം നല്‍കി. ജില്ലയില്‍ 320 കമ്മിറ്റികളാണ് രജിസ്റ്റര്‍ ചെയ്തിട്ടുള്ളത്.

കേരള സംസ്ഥാന ന്യൂനപക്ഷ കമ്മീഷൻ നവംബർ ഒന്ന് മുതൽ വാട്സ് ആപ്പിലൂടെയും പരാതി സ്വീകരിക്കുമെന്ന് ചെയർമാൻ അഡ്വ. എ. എ. റഷീദ് അറിയിച്ചു. നവംബർ ഒന്നിന്, പദ്ധതിയുടെ സംസ്ഥാനതല ഉദ്ഘാടനം തൈക്കാട് ഗവ. ഗസ്റ്റ് ഹൗസിൽ ന്യൂനപക്ഷ ക്ഷേമ വകുപ്പ് ഡയറക്ടർ ഡോ. രേണുരാജ് നിർവഹിക്കും.

നിലവിൽ  നേരിട്ടും ഇ- മെയിൽ, തപാൽ മുഖേനയും പരാതികൾ സ്വീകരിക്കുന്നുണ്ട്. ഇതിന് പുറമെയാണ് വാട്‌സ് ആപ്പിലൂടെയും പരാതി സ്വീകരിക്കുന്നത്. പരാതികൾ 9746515133 നമ്പറിൽ അയയ്ക്കാവുന്നതാണ്.

ജില്ലയിൽ  നവംബർ ഒന്നിനും രണ്ടിനും, 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാൽ കേന്ദ്രകാലാവസ്ഥാ വകുപ്പ് ജില്ലയിൽ മഞ്ഞ അലർട്ട് മുന്നറിയിപ്പ് നൽകി.

        മാലിന്യം ജൈവം, അജൈവം എന്നിങ്ങനെ തരംതിരിച്ച് അംഗീകൃത ഏജൻസികൾ മുഖാന്തിരം ശാസ്ത്രീയമായി നിർമാർജനം ചെയ്യണമെന്ന് മലിനീകരണ നിയന്ത്രണ ബോർഡ് അറിയിച്ചു. 2016ലെ പ്ലാസ്റ്റിക് മാലിന്യ പരിപാലന ചട്ടങ്ങൾ, ഖര മാലിന്യ പരിപാലന ചട്ടങ്ങൾ എന്നിവ പ്രകാരമാണ് അറിയിപ്പ്.