മാന്നാനം പാലത്തിന്റെ നിർമാണോദ്ഘാടനം ഞായറാഴ്ച (ഓഗസ്റ്റ് 24) വൈകിട്ട് നാലുമണിക്കു പൊതുമരാമത്ത്്-ടൂറിസം വകുപ്പുമന്ത്രി അഡ്വ. പി.എ. മുഹമ്മദ് റിയാസ് നിർവഹിക്കും. മാന്നാനത്തു നടക്കുന്ന ചടങ്ങിൽ സഹകരണം-തുറമുഖം- ദേവസ്വം വകുപ്പ് മന്ത്രി വി.എൻ. വാസവന്റെ അധ്യക്ഷത വഹിക്കും. കെ. ഫ്രാൻസിസ് ജോർജ് എം.പി, മുൻ എം.പി. തോമസ് ചാഴികാടൻ എന്നിവർ മുഖ്യാതിഥികളാകും. 
 റീ ബിൽഡ് കേരള പദ്ധതിയിൽ ഉൾപ്പെടുത്തി 24.83 കോടി രൂപ ചെലവഴിച്ചു ദേശീയ ജലപാതാ മാനദണ്ഡങ്ങൾ പാലിച്ചാണ് നിർമാണം. 228.7 മീറ്റർ നീളത്തിലും 12 മീറ്റർ വീതിയിലും വർഷകാല ജലനിരപ്പിൽ നിന്ന് ആറുമീറ്റർ ഉയരത്തിലുമാണ് പണിയുന്നത്.

സഹകരണ വകുപ്പിന് കീഴിലുള്ള സംസ്ഥാന സഹകരണ യൂണിയന്റെ തിരുവനന്തപുരത്തെ കേരള ഇൻസ്റ്റിറ്റ്യൂട്ട് ഓഫ് കോ-ഓപ്പറേറ്റീവ് മാനേജ്‌മെൻ്റിൽ (കിക്മ) എം.ബി.എ. (ഫുൾടൈം) 2025-27 ബാച്ച് പ്രവേശനത്തിനായുള്ള അഭിമുഖം ആഗസ്റ്റ് 25 ന് രാവിലെ 10 മണി മുതൽ ഉച്ചയ്ക്ക് ഒരു മണി വരെ വിക്ടോറിയ കോളേജ് റോഡിന് സമീപത്തുളള കോ-ഓപ്പറേറ്റീവ് ട്രെയിനിങ് കോളേജിൽ നടക്കും. 50 ശതമാനം മാർക്കോട് കൂടിയ ബിരുദമാണ് അടിസ്ഥാന യോഗ്യത. വിദ്യാർഥികൾ അസൽ സർട്ടിഫിക്കറ്റുകളുമായി ഹാജരാവണം. കൂടുതൽ വിവരങ്ങൾ 8281743442/8547618290 എന്നീ നമ്പരിലും, www.kicma.ac.in എന്ന വെബ്സൈറ്റിലും ലഭിക്കും.‌

ഉദ്ഘാടനം മന്ത്രി എം.ബി രാജേഷ് നിര്‍വഹിക്കും

ഓണക്കാലത്ത് വർധിച്ചുവരുന്ന പാലിന്റെ ഉപഭോഗം കണക്കിലെടുത്ത്, ശുദ്ധമായ പാൽ വിതരണം ഉറപ്പാക്കാൻ ക്ഷീരവികസന വകുപ്പ് രംഗത്ത്. ഇതിന്റെ ഭാഗമായി വകുപ്പിലെ ഗുണനിയന്ത്രണ വിഭാഗത്തിന്റെ മേല്‍നോട്ടത്തില്‍ ജില്ലയില്‍ രണ്ട്  ഇന്‍ഫര്‍മേഷന്‍ സെന്ററുകള്‍ സജ്ജീകരിച്ച്  പാൽ പരിശോധനയ്ക്കുള്ള സംവിധാനം ഒരുക്കും. ആഗസ്റ്റ് 29 മുതല്‍ സെപ്റ്റംബര്‍ മൂന്ന് വരെ സെന്ററുകള്‍ പ്രവര്‍ത്തിക്കും. ആഗസ്റ്റ് 29 മുതല്‍ സെപ്റ്റംബര്‍ രണ്ട് വരെ രാവിലെ പത്ത് മുതല്‍ വൈകുന്നേരം അഞ്ച് വരെയും, സെപ്റ്റംബര്‍ മൂന്നി-ന് രാവിലെ ഒമ്പതു മുതല്‍ 12 വരെയുമാണ് സെന്ററുകളുടെ പ്രവര്‍ത്തന സമയം.

കാഴ്ച പരിമിതിയുള്ളവര്‍ക്കായി സംസ്ഥാന സാക്ഷരതാ മിഷന്‍ നടപ്പാക്കുന്ന ബ്രെയില്‍ സാക്ഷരതാ പദ്ധതിയുടെ ഭാഗമായി 'മികവുത്സവം' എന്ന പേരില്‍ പരീക്ഷ സംഘടിപ്പിച്ചു. പാലക്കാട് മോയന്‍സ് എല്‍.പി. സ്‌കൂളില്‍ നടന്ന പരിപാടി ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ഷാബിറ ടീച്ചര്‍ ഉദ്ഘാടനം ചെയ്തു. 80 വയസ്സുള്ള ദേവയാനി അമ്മയ്ക്ക് ചോദ്യപേപ്പര്‍ നല്‍കിയാണ് പരീക്ഷയ്ക്ക് തുടക്കം കുറിച്ചത്.

എരുത്തേമ്പതി ഗ്രാമപഞ്ചായത്തിലെ പുതിയ ആയുര്‍വേദ ഡിസ്‌പെന്‍സറി കെട്ടിടം ഗ്രാമപഞ്ചായത്ത് പ്രസിഡന്റ് എസ്. പ്രിയദര്‍ശിനി ഉദ്ഘാടനം ചെയ്തു. 2022-23 പദ്ധതിയില്‍ ഉള്‍പ്പെടുത്തി 35.61 ലക്ഷം രൂപ ചെലവഴിച്ചാണ് കെട്ടിടം നിര്‍മ്മിച്ചത്.
1400 ചതുരശ്ര അടി വിസ്തൃതിയുള്ള കെട്ടിടത്തില്‍ ഡോക്ടര്‍മാരുടെ മുറി, സ്റ്റാഫ് റൂം, സന്ദര്‍ശകമുറി, സ്റ്റോര്‍ റൂം, അടുക്കള, ചികിത്സാമുറി, ഓഫീസ് റൂം, ഫാര്‍മസി, നാല് ടോയ്ലെറ്റുകള്‍ എന്നിവ സജ്ജീകരിച്ചിട്ടുണ്ട്.

ഹരിത കര്‍മ്മസേനാംഗങ്ങള്‍ കൃഷി ചെയ്ത പൂക്കളും പച്ചക്കറികളും വിളവെടുത്തു. പുതുക്കോട് എം.സി.എഫ് കെട്ടിടത്തിന്റെ പരിസരത്തായി വനിതകള്‍ക്ക് പച്ചക്കറി കൃഷി 2025-26 പദ്ധതിയുടെ ഭാഗമായാണ് പൂന്തോട്ടവും പച്ചക്കറിത്തോട്ടവും ഒരുക്കിയത്. ഗ്രാമപഞ്ചായത്ത് പ്രസിഡന്റ് ഐ. ഹസീന ടീച്ചര്‍ വിളവെടുപ്പ് ഉദ്ഘാടനം ചെയ്തു. കൃഷിഭവന്‍ നല്‍കിയ വെണ്ട, വഴുതന, പച്ചമുളക്, ചെണ്ടുമല്ലി എന്നിവയാണ്  കൃഷി ചെയ്തത്. പൂര്‍ണമായും ജൈവവളം ഉപയോഗിച്ച് ജൂണ്‍ മാസത്തിലാണ് കൃഷി ഇറക്കിയത്. ഒഴിവ് സമയങ്ങളിലായി ഹരിത കര്‍മ്മസേനാംഗങ്ങള്‍ കൂട്ടായി പരിശ്രമിച്ചാണ് ഈ നേട്ടം കൈവരിച്ചത്.

  വണ്ടാഴി ഗ്രാമപഞ്ചായത്തിന്റെ നേതൃത്വത്തിൽ ‘ജലമാണ് ജീവന്‍' എന്ന പേരില്‍ കിണര്‍ ക്ലോറിനേഷന്‍ ക്യാമ്പയിന്‍ നടത്തുന്നു.  അമീബിക് മസ്തിഷ്‌കജ്വരം തടയുന്നതിനുള്ള പ്രതിരോധ നടപടികളുടെ ഭാഗമായി  ആഗസ്റ്റ് 30, 31 തീയതികളിലാണ് ക്യാമ്പയിന്‍ നടക്കുക. ഗ്രാമ പഞ്ചായത്ത് വൈസ് പ്രസിഡന്റ് പി. ശശികലയുടെ അധ്യക്ഷതയിൽ ചേർന്ന ക്ലോറിനേഷൻ കൂടിലോചന യോഗത്തിലാണ് തീരുമാനം. ക്യാമ്പയിന്റെ ഭാഗമായി 998 സ്വകാര്യ കിണറുകളും 22 പൊതു കിണറുകളും ക്ലോറിനേറ്റ് ചെയ്യും.