അരിമ്പൂർ ഗ്രാമപഞ്ചായത്തിലെ വില്ലുകുളം ചാൽ മുതൽ മണിയൻചാൽ വരെയുള്ള ഭാഗത്ത് കയർ ഭൂവസ്ത്രം വിരിക്കൽ ആരംഭിച്ചു. ഹരിതകേരളമിഷൻ പദ്ധതിയുടെ ഭാഗമായി 4 ലക്ഷം രൂപ വിനിയോഗിച്ചാണ് കയർഭൂവസ്ത്രം വിരിക്കുന്നത് വില്ലുകുളം ഭാഗത്തുനിന്ന് ആരംഭിക്കുന്ന 906 ചാൽ മുതൽ മണിയൻചാൽ വരെ 490 മീറ്റർ നീളത്തിൽ ചാലിന്റെ ഇരുവശങ്ങളിലുമായാണ് കയർഭൂവസ്ത്രം വിരിക്കുന്നത്. പദ്ധതിയിലൂടെ ഒരുകിലോ മീറ്ററോളം ദൂരത്തിൽ വില്ലുകുളം കോൾ പടവിലെ മണ്ണും ജലവും സംരക്ഷിക്കപ്പെടും. മഹാത്മാ ഗാന്ധി ദേശീയ തൊഴിലുറപ്പ് പ്രവർത്തകർ 523 തൊഴിൽദിനങ്ങളിലായാണ് ഭൂവസ്ത്രം വിരിക്കൽ പൂർത്തിയാക്കുക.

ജില്ലാ ആസൂത്രണ സമിതി നിർദ്ദേശമനുസരിച്ച് ഈ സാമ്പത്തിക വർഷം മുഴുവൻ അവശ്യപദ്ധതികൾക്കും വിഹിതം നീക്കി വച്ച എല്ലാ തദ്ദേശസ്വയംഭരണ സ്ഥാപനങ്ങളുടെയും പദ്ധതികൾക്ക് ആസൂത്രണസമിതി അംഗീകാരം നൽകി. എബിസി പദ്ധതിയുൾപ്പെടെയുളള സംയുക്ത പദ്ധതികൾക്ക് വിഹിതം നീക്കി വെക്കാത്ത തദ്ദേശസ്വയംഭരണ സ്ഥാപനങ്ങളുടെ പദ്ധതികൾ ജൂൺ 17 ന് ചേരുന്ന ആസൂത്രണസമിതി പരിശോധിക്കും. അതിന് മുമ്പ് വകയിരുത്താനുളള വിഹിതങ്ങൾ തദ്ദേശസ്വയംഭരണ സ്ഥാപനപ്രതിനിധികൾക്ക് ജില്ലാ ആസൂത്രണസമിതി ചെയ്‌പേഴ്‌സൺ കൂടിയായ ജില്ലാ പഞ്ചായത്ത് പ്രസിഡണ്ട് മേരി തോമസ് നിർദ്ദേശം നൽകി.

ട്രിവാൻഡ്രം കോളേജ് ഓഫ് എൻജിനീയറിംഗിൽ ആർക്കിടെക്ചർ വിഭാഗത്തിൽ ട്രേഡ് ഇൻസ്ട്രക്ടർ തസ്തികയിൽ ഒരു താത്കാലിക ഒഴിവുണ്ട്. ഡിപ്ലോമ ഇൻ ആർക്കിടെക്ച്ചർ (കാഡിലുള്ള അറിവ് അഭികാമ്യം) യോഗ്യതയുള്ള ഉദ്യോഗാർത്ഥികൾ ജൂൺ 25 രാവിലെ പത്തിന് ബയോഡാറ്റയും വയസ്സ്, യോഗ്യത, പരിചയം എന്നിവ തെളിയിക്കുന്ന അസ്സൽ സർട്ടിഫിക്കറ്റുകൾ സഹിതം ആർക്കിടെക്ച്ചർ വിഭാഗത്തിൽ ഹാജരാകണം.  ടെസ്റ്റ്/ ഇന്റർവ്യൂ നടത്തി തയ്യാറാക്കുന്ന ലിസ്റ്റിന്റെ അടിസ്ഥാനത്തിൽ മാത്രമായിരിക്കും നിയമനം.  മുൻപരിചയം ഉള്ളവർക്ക് മുൻഗണന.  ഫോൺ: 0471-2515565, 9447893024.
പി.എൻ.എക്സ്.1811/19