വിവരാവകാശ അപേക്ഷയിൽ ഒരു വർഷത്തിലധികമായും കൃത്യമായ വിവരം നൽകിയില്ലെന്ന പരാതിയിൽ കൊച്ചിൻ ദേവസ്വം ബോർഡ് പബ്ലിക്ക് ഇൻഫർമേഷൻ ഓഫീസർക്കെതിരെ നടപടി സ്വീകരിക്കുമെന്ന് സംസ്ഥാന വിവരാവകാശ കമ്മീഷൻ അംഗം പി.ആർ.ശ്രീലത. കളക്‌ട്രേറ്റ് കോൺഫറൻസ് ഹാളിൽ നടന്ന വിവരാവകാശ കമ്മീഷൻ സിറ്റിങ്ങിലാണ് തീരുമാനം. 2018 ഫെബ്രുവരി 20 ന് സമർപ്പിച്ച അപേക്ഷയിൽ ഇതുവരെയും ഉദ്യോഗസ്ഥൻ മറുപടി നൽകിയിട്ടില്ലെന്നും കമ്മീഷനോട് മോശം രീതിയിൽ പെരുമാറിയെന്നും കണ്ടെത്തിയതിന്റെ അടിസ്ഥാനത്തിലാണ് കമ്മീഷന്റെ തീരുമാനം. 

തൃശൂർ പൂരത്തിന്റെ ഭാഗമായി നഗരത്തിൽ തേക്കിൻകാട് മൈതാനം, സ്വരാജ് റൗണ്ട്, നെഹ്‌റു പാർക്ക്, പൂരം പ്രദർശന മൈതാനം എന്നിവ മെയ് 11 മുതൽ 14 വരെ കോട്പ നിയമപ്രകാരം പുകയില രഹിത മേഖലയായി ജില്ലാ കളക്ടർ പ്രഖ്യാപിച്ചു. ഈ ഉത്തരവ് നടപ്പിൽ വരുത്താനായി ജില്ലാ മെഡിക്കൽ ഓഫീസറെ (ആരോഗ്യം) ചുമതലപ്പെടുത്തി.

കലാമണ്ഡലത്തിൽ ആർട്ട് ഹയർ സെക്കണ്ടറി സ്‌കൂളിൽ പ്ലസ് വൺ പ്രവേശനത്തിന് അപേക്ഷ ക്ഷണിച്ചു. പത്താം ക്ലാസ് പാസായ, 2019 ജൂൺ ഒന്നിന് 20 വയസ്സ് കവിയാത്ത വിദ്യാർത്ഥി/വിദ്യാർത്ഥിനികൾക്ക് അപേക്ഷിക്കാം. പട്ടികജാതി/പട്ടികവർഗ വിദ്യാർത്ഥികൾക്ക് രണ്ടുവർഷത്തെ ഇളവുണ്ട്. പഠനത്തിൽ മികവു പുലർത്തുന്നവർക്ക് എൻഡോവ്‌മെന്റ് അവാർഡുകൾ നൽകും.

തൃശൂർ എക്‌സൈസ് ഡിവിഷനിൽ വിവിധ അബ്കാരി കേസുകളിൽ ഉൾപ്പെട്ട് സർക്കാരിലേക്ക് കണ്ടുകെട്ടിയതും എക്‌സൈസ് ഓഫീസുകളിലും പോലീസ് സ്റ്റേഷനുകളിലുമായി സൂക്ഷിച്ചുവരുന്ന വിവിധ വാഹനങ്ങളായ പാസഞ്ചർ ഓട്ടോറിക്ഷ -1, മോട്ടോർ സൈക്കിൾ -13, ടാറ്റ മാജിക് ഐറിസ് -1, സ്‌കോർപ്പിയോ -1 (സ്‌ക്രാപ്പ്-ഡിപ്പാർട്ട്‌മെന്റ് വാഹനം), ക്വാളീസ് - 1 (സ്‌ക്രാപ്പ്-ഡിപ്പാർട്ട്‌മെന്റ് വാഹനം) എന്നിവയുൾപ്പെടെ 17 വാഹനങ്ങൾ തൃശൂർ എക്‌സൈസ് ഡിവിഷൻ ഓഫീസിൽവച്ച് മെയ് 16 രാവിലെ 11 ന് ലേലം ചെയ്യും. ലേല നിബന്ധങ്ങളും വ്യവസ്ഥകളും എക്‌സൈസ് ഡിവിഷൻ ഓഫീസിൽ നിന്നും ജില്ലയിലെ എല്ലാ എക്‌സൈസ് ഓഫീസുകളിൽ നിന്നും അറിയാം. 

പൂരങ്ങളുടെയും വെടിക്കെട്ടിന്റെയും സമയക്രമം ദേവസ്വം അധികൃതരും പോലീസുമായി കൂടിയാലോചിച്ച് നിശ്ചയിച്ചതായി ജില്ലാ കളക്ടർ ടി.വി അനുപമ അറിയിച്ചു.
മെയ് 11നുള്ള സാമ്പിൾ വെടിക്കെട്ട് സമയം: പാറമേക്കാവ് രാത്രി ഏഴ് മുതൽ ഒമ്പത് വരെ, തിരുവമ്പാടി ഏഴ് മുതൽ 8.30 വരെ. മെയ് 14 നുള്ള മുഖ്യ വെടിക്കെട്ട്: പാറമേക്കാവ് പുലർച്ചെ മൂന്ന് മുതൽ ആറ് മണി വരെ. തിരുവമ്പാടി പുലർച്ചെ മൂന്ന് മുതൽ അഞ്ച് വരെ. മെയ് 14 ന് പകൽപൂരത്തിന്റെ വെടിക്കെട്ട്: പാറമേക്കാവ് രാവിലെ 11.30 മുതൽ ഉച്ച രണ്ട് മണി വരെ. തിരുവമ്പാടി ഉച്ചയ്ക്ക് 12.30 മുതൽ 1.30 വരെ.

തൃശൂർ പൂരം നടക്കുന്ന മെയ് 13, 14 തീയതികളിൽ ഹെലികോപ്റ്റർ, ഹെലികാം, എയർഡ്രോൺ, ജിമ്മിജിബ് ക്യാമറ, ലേസർ ഗൺ എന്നിവയുടെ ഉപയോഗം വടക്കുംനാഥൻ ക്ഷേത്ര മൈതാനത്തിന് മുകളിലും സ്വരാജ് റൗണ്ടിലും പൂർണമായും നിരോധിച്ചതായി ജില്ലാ കളക്ടർ ടി.വി അനുപമ അറിയിച്ചു. കൂടാതെ, കാഴ്ച മറക്കുന്ന തരത്തിലുള്ള വലിയ ട്യൂബ് ബലൂണുകൾ, ആനകൾക്കും പൊതുജനങ്ങൾക്കും അലോസരമുണ്ടാക്കുന്ന ഉച്ചത്തിലുള്ള ശബ്ദങ്ങൾ പുറപ്പെടുവിക്കുന്ന വിസിലുകൾ, വാദ്യങ്ങൾ, മറ്റ് ഉപകരണങ്ങൾ, ലേസർ ലൈറ്റുകൾ എന്നിവയുടെ ഉപയോഗവും 13, 14 തീയതികളിൽ പൂർണമായും നിരോധിച്ചിട്ടുണ്ട്.

 കോഴിക്കോട് ജില്ലയിലെ എക്‌സൈസ് വകുപ്പില്‍ സിവില്‍ എക്‌സൈസ് ഓഫീസര്‍- നേരിട്ടുളള നിയമനം (കാറ്റഗറി നം. 340/16) തസ്തികയുടെ  റാങ്ക് പട്ടിക  പി.എസ്.സി പ്രസിദ്ധീകരിച്ചു. പകര്‍പ്പ്   ജില്ലാ ഇന്‍ഫര്‍മേഷന്‍ സെന്ററില്‍ പരിശോധനക്ക് ലഭിക്കും.

ചാത്തമംഗലം - കുഴക്കോട് - വെളളന്നൂര്‍ റോഡില്‍ ചാത്തമംഗലം അങ്ങാടിക്കു സമീപമുളള കലുങ്കിന്റെ പുനര്‍ നിര്‍മ്മാണ  പ്രവൃത്തി ആരംഭിക്കുന്നതിനാല്‍ ഇന്ന് (മെയ് 10)  മുതല്‍ പ്രൃവൃത്തി തീരന്നതുവരെ വാഹന ഗതാഗതം നിരോധിച്ചു. കുന്ദമഗംലം ഭാഗത്ത്  നിന്നു വരുന്ന വാഹനങ്ങള്‍ ചാത്തമംഗലം - വേങ്ങേരിമഠം - വെളളന്നൂര്‍ വഴി മാവൂര്‍ ഭാഗത്തേക്കും തിരിച്ചും പോകേണ്ടതാണെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു.  

ആരോഗ്യ ജാഗ്രതയുടെ ഭാഗമായി മെയ് 11,12 തീയതികളില്‍ ജനപ്രതിനിധികളുടെ നേതൃത്വത്തില്‍ സംസ്ഥാന വ്യാപകമായി ശുചീകരണ പ്രവര്‍ത്തനങ്ങള്‍ നടത്തുന്നതിന് സര്‍ക്കാര്‍ തീരുമാനിച്ച സാഹചര്യത്തില്‍ കുന്ദമംഗലം നിയോജകമണ്ഡലത്തിലെ പ്രവര്‍ത്തനങ്ങള്‍ ഏകോപിപ്പിക്കുന്നതിന് ബന്ധപ്പെട്ടവരുടെ യോഗം  ഇന്ന് (മെയ് 10) രാവിലെ 10.30 മണിക്ക് പെരുമണ്ണ ഗ്രാമപഞ്ചായത്ത് ഹാളില്‍ ചേരും. യോഗത്തില്‍ മണ്ഡലം പരിധിയിലുളള ബ്ലോക്ക്/ഗ്രാമപഞ്ചായത്ത് പ്രസിഡന്റ്/സെക്രട്ടറിമാര്‍, ജില്ലാ ബ്ലോക്ക് ഗ്രാമ പഞ്ചായത്ത് മെമ്പര്‍മാര്‍  പങ്കെടുക്കണം. 

ഈ വിദ്യാര്‍ഥിനികള്‍ ഒരു മാതൃകയാണ്......സമൂഹത്തിനും വിദ്യാര്‍ഥികള്‍ക്കും. പേപ്പര്‍ പേന നിര്‍മ്മാണത്തിലൂടെ വരുമാന മാര്‍ഗം കണ്ടെത്തുന്നതിനൊപ്പം പ്ലാസ്റ്റിക് വസ്തുക്കളുടെ ഉപയോഗം കുറക്കുന്നതിനുള്ള ബോധവല്‍ക്കരണം കൂടിയാണ് മീഞ്ചന്ത ഗവ.ആര്‍ട്‌സ് ആന്റ് സയന്‍സ് കോളേജിലെ അഞ്ചംഗ വിദ്യാര്‍ഥിനികള്‍ ഏറ്റെടുത്തിരിക്കുന്നത്. ഗണിത വിഭാഗത്തിലെ  സി അനുശ്രീ, മുര്‍ഷിദ ഖദീജ, മറിയം മര്‍സീന, ബബിന, ഷൈമ ജിന്‍സി എന്നിവരാണ് പേപ്പര്‍ പേന നിര്‍മ്മാണവുമായി രംഗത്തുള്ളത്.