ടൂറിസം വകുപ്പിനു കീഴിലുള്ള തൃശൂർ ഗവ. ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിൽ ഈ മാസം ആരംഭിക്കുന്ന 15 ദിവസത്തെ കുക്കറി പരിശീലന ക്ലാസ്സിന് അപേക്ഷിക്കാനുള്ള തിയതി മെയ് 13 വരെ നീട്ടി. താൽപര്യമുള്ളവർ പൂത്തോൾ വഞ്ചിക്കുളത്തിനടുത്തുള്ള ഗവ. ഫുഡ് ക്രാഫ്റ്റ് ഇൻസ്റ്റിറ്റ്യൂട്ടുമായി ബന്ധപ്പെടണം. ഫോൺ: 0487 2384253, 9847677549. 

മഴക്കാലപൂർവ ശുചീകരണം, പകർച്ചാവ്യാധി പ്രതിരോധം എന്നിവയുടെ ഭാഗമായി മെയ് 10, 11, 12 തീയതികളിൽ ജില്ലയിൽ നടത്തുന്ന ശുചീകരണ പ്രവർത്തനങ്ങളിൽ വിനോദ സഞ്ചാരവകുപ്പും ജില്ലാ ടൂറിസം പ്രൊമോഷൻ കൗൺസിലും സഹകരിക്കും.

തൃശൂർ ഭക്ഷ്യസുരക്ഷാ അസിസ്റ്റന്റ് കമീഷണറുടെ കാര്യാലയത്തിലേക്ക്, ക്വിക് റെസ്പോൺസ് ടീമിന്റെ സുഗമമായ പ്രവർത്തനത്തിന് 2019-20 കാലയളവിൽ കരാറടിസ്ഥാനത്തിൽ വാഹനം നൽകുന്നതിന് വാഹന ഉടമകളിൽനിന്ന് മുദ്രവെച്ച ദർഘാസുകൾ ക്ഷണിച്ചു. ദർഘാസ് സ്വീകരിക്കുന്ന അവസാന തീയതി: ജൂൺ 12 രാവിലെ 11 മണി.

മണലൂർ ഗവ. ഐടിഐയിൽ എംപ്ലോയബിലിറ്റി സ്‌കിൽ പഠിപ്പിക്കുന്നതിന് ഗസ്റ്റ് ഇൻസ്ട്രക്ടറുടെ ഒഴിവുണ്ട്. മെയ് 14 ന് രാവിലെ 11 ന് മണലൂർ ഗവ. ഐടിഐയിൽ നടക്കുന്ന ഇന്റർവ്യൂവിന് ഉദ്യോഗാർത്ഥികൾ അസ്സൽ സർട്ടിഫിക്കറ്റ് സഹിതം ഹാജരാകണം. യോഗ്യത: എംബിഎ അല്ലെങ്കിൽ ബിബിഎയും രണ്ടുവർഷത്തെ പരിചയവും. അല്ലെങ്കിൽ സോഷ്യോളജി, സോഷ്യൽ വെൽഫെയർ/ ഇക്കണോമിക്‌സ് ബിരുദവും രണ്ടുവർഷത്തെ പ്രവൃത്തി പരിചയവും. അല്ലെങ്കിൽ ബിരുദം/ ഡിപ്ലോമ, രണ്ടുവർഷത്തെ പ്രവൃത്തി പരിചയം. കൂടാതെ എംപ്ലോയബിലിറ്റി സ്‌കില്ലിൽ ഡി ജി ഇ റ്റി സ്ഥാപനങ്ങളിൽ നിന്നും പരിശീലനം നേടിയിരിക്കണം.

പട്ടികജാതി വികസന വകുപ്പിനു കീഴിൽ തൃശൂർ ജില്ലയിൽ പ്രവർത്തിക്കുന്ന വടക്കാഞ്ചേരി മോഡൽ റെസിഡൻഷ്യൽ സ്‌കൂൾ (മലയാളം മീഡിയം), ചേലക്കര മോഡൽ റസിഡൻഷ്യൽ സ്‌കൂൾ (ഇംഗ്ലീഷ് മീഡിയം) എന്നിവിടങ്ങളിൽ 2019-20 അധ്യയന വർഷം കരാർ അടിസ്ഥാനത്തിൽ അധ്യാപകരെ നിയമിക്കുന്നതിന് അപേക്ഷ ക്ഷണിച്ചു. ബന്ധപ്പെട്ട വിഷയത്തിൽ ബിരുദവും ബി എഡുമാണ് യോഗ്യത. 

ചാവക്കാട് ഗവ. റീജിയണൽ ഫിഷറീസ് ടെക്‌നിക്കൽ ഹൈസ്‌കൂളിൽ മത്സ്യത്തൊഴിലാളികളുടെയും അനുബന്ധ തൊഴിലാളികളുടെയും ആൺകുട്ടികളിൽ നിന്ന് 8,9,10 ക്ലാസുകളിലേക്കുള്ള പ്രവേശനത്തിന് അപേക്ഷ ക്ഷണിച്ചു. സൗജന്യ താമസം, ഭക്ഷണം എന്നിവ ലഭിക്കും. വിദ്യാർത്ഥികൾക്ക് റഗുലർ ക്ലാസ് കൂടാതെ സ്‌പെഷ്യൽ കോച്ചിങ്, കെയർ ടേക്കറുടെ സേവനം, സംഗീതം, മാർഷൽ ആർട്‌സ്, സ്‌പോർട്‌സ് കോച്ചിങ്, മെഡിക്കൽ പരിരക്ഷ എന്നിവയും നൽകും. തിരഞ്ഞെടുക്കപ്പെടുന്നവർക്ക് ലംപ്‌സംഗ്രാന്റ് ഉൾപ്പെടെയുള്ള സൗകര്യങ്ങളും ഉണ്ടാകും. കൂടുതൽ വിവരങ്ങൾക്ക് ഫോൺ : 0487-2501965, 9645300791. ഇ-മെയിൽ വിലാസം : grfthsfish@yahoo.com 

സംസ്ഥാന ന്യൂനപക്ഷ ക്ഷേമ വകുപ്പിനു കീഴിലുള്ള കൊടുങ്ങല്ലൂരിലെ ന്യൂനപക്ഷ യുവജന പരിശീലന കേന്ദ്രത്തിൽ യു പി എസ് സി, റെയിൽവേ, എസ് എസ് സി പരീക്ഷകൾക്ക് പരിശീലനം നൽകുന്നതിനായുള്ള അധ്യാപക പാനലിലേക്ക് പരിചയ സമ്പന്നരായ അധ്യാപകരെ ആവശ്യമുണ്ട്. ബിരുദവും ബിരുദാനന്തര ബിരുദവുമാണ് യോഗ്യത. താൽപര്യമുള്ളവർ ബയോഡാറ്റ, ഒരു വർഷത്തിൽ കുറയാതെയുള്ള പരിചയ സർട്ടിഫിക്കറ്റ്, യോഗ്യത തെളിയിക്കുന്ന ഒറിജിനൽ സർട്ടിഫിക്കറ്റുകൾ എന്നിവ സഹിതം മെയ് 14 ന് രാവിലെ 11 ന് കൊടുങ്ങല്ലൂർ ചേരമൻ ജുമാമസ്ജിദ് കോമ്പൗണ്ടിലുള്ള ഓഫീസിൽ നേരിട്ട് ഇന്റർവ്യൂവിന് ഹാജരാകണം.

ലോക്‌സഭാ തെരഞ്ഞെടുപ്പിന്റെ ഭാഗമായി മെയ് 23 ന് നടക്കുന്ന വോട്ടെണ്ണലിന്റെ ക്രമീകരണങ്ങൾ തൃശൂർ മണ്ഡലം വരണാധികാരിയായ ജില്ലാ കളക്ടർ ടി വി അനുപമ വിലയിരുത്തി. വോട്ടെണ്ണൽ ഹാൾ പരിശോധിക്കുകയും വോട്ടെണ്ണൽ ടേബിൾ ക്രമീകരിക്കുകയും ചെയ്യണം. അസിസ്റ്റന്റ് റിട്ടേണിങ് ഓഫീസർമാർ പോസ്റ്റൽ ബാലറ്റ് രാവിലെ കൃത്യസമയത്തു തന്നെ എണ്ണുമെന്നും ജില്ലാ വരണാധികാരി അറിയിച്ചു. വോട്ടെണ്ണൽ സുഖകരമായി നടപ്പിലാക്കാൻ സുവിധ, ട്രെന്റ് എന്നീ സോഫ്റ്റ്‌വെയറുകൾ ഉപയോഗപ്പെടുത്തും. ട്രെന്റിലൂടെ റൗണ്ട് തല കണക്ക് ലഭിക്കും. പൊതുജനങ്ങൾക്കായി എൻ ഐ സി മൊബൈൽ ആപ്പും സജ്ജീകരിക്കും. വോട്ടെണ്ണൽ ക്ലാസും ഉടൻ സംഘടിപ്പിക്കുമെന്നും വരണാധികാരി അറിയിച്ചു.

പൂരം നടത്തിപ്പുമായി ബന്ധപ്പെട്ട് മെയ് ഒമ്പതിന്‌ തിരുവമ്പാടി ദേവസ്വം ബിൽഡിങ്ങിലെ നന്ദനം ഹാളിൽ മോക് ഡ്രിൽ സംഘടിപ്പിക്കും. ജില്ലാ കളക്ടർ ടി വി അനുപമയുടെ അധ്യക്ഷതയിൽ നടക്കുന്ന പരിപാടിയിൽ സംസ്ഥാന ദുരന്ത നിവാരണ ഉദ്യോഗസ്ഥർ, എഡിഎം, ദുരന്തനിവാരണ ഡെപ്യൂട്ടി കളക്ടർ, ആർ ഡി ഒ, സിറ്റി പോലീസ് മേധാവി, ദേവസ്വം ബോർഡ് പ്രതിനിധികൾ, ഡി എം ഒ, ഇലക്ട്രിക്കൽ സേഫ്റ്റി ഇൻസ്‌പെക്ടർ, ഫുഡ് സേഫ്റ്റി ഉദ്യോഗസ്ഥർ, എൻ ഡി ആർ എഫ് സംഘങ്ങൾ, ഫയർ ആന്റ് റസ്‌ക്യൂ അംഗങ്ങൾ എന്നിവർ പങ്കെടുക്കും. 

രാത്രികളിലുണ്ടാകുന്ന ബോധക്ഷയത്തിന് സ്വകാര്യ ആശുപത്രിയിൽ ചികിത്സ തേടിയ പെൺകുട്ടിക്ക് ചികിത്സാ പിഴവുണ്ടായെന്ന പരാതിയെക്കുറിച്ച് അനേ്വഷിക്കാൻ സംസ്ഥാന മനുഷ്യാവകാശ കമ്മീഷൻ തൃശുർ ജില്ലാ പോലീസ് മേധാവിക്ക് നിർദ്ദേശം നൽകി. 
തൃശൂർ ജില്ലാ മെഡിക്കൽ ഓഫീസറും ചികിത്സാപ്പിഴവിനെ കുറിച്ച് അനേ്വഷിക്കണമെന്ന് കമ്മീഷൻ ജുഡീഷ്യൽ അംഗം പി. മോഹനദാസ് ആവശ്യപ്പെട്ടു. 30 ദിവസത്തിനകം അനേ്വഷണ റിപ്പോർട്ട് സമർപ്പിക്കണം. കേസ് അടുത്തമാസം തൃശൂരിലെ സിറ്റിങിൽ പരിഗണിക്കും.കണ്ണൂർ സ്വദേശി മുജീബ് റഹ്മാൻ നൽകിയ പരാതിയിലാണ് നടപടി.