അടിമാലി അഡീഷണല്‍  ശിശുവികസന പദ്ധതി ഓഫീസിലേക്ക് വാഹനം വാടകയ്ക്ക് നല്‍കുന്നതിന് ഉടമകളില്‍ നിന്നും ടെണ്ടറുകള്‍ ക്ഷണിച്ചു. ടെണ്ടറുകള്‍ ജൂണ്‍ 18ന് രണ്ട് മണിവരെ സ്വീകരിക്കും. കൂടുതല്‍ വിവരങ്ങള്‍ക്ക് ഫോണ്‍ 04865 265268.

കുളമാവ് ജവഹര്‍ നവോദയ വിദ്യാലയത്തില്‍ ഈ അധ്യയനവര്‍ഷത്തിലേക്ക് ഫിസിക്കല്‍ എഡ്യൂക്കേഷന്‍ ടീച്ചര്‍ താല്‍ക്കാലിക ഒഴിവിലേക്ക് നിയമനത്തിനായി ജൂണ്‍ 4ന് അഭിമുഖം നടത്തും. അഭിമുഖത്തിന് അസ്സല്‍ സര്‍ട്ടിഫിക്കറ്റുകളും സ്വയം സാക്ഷ്യപ്പെടുത്തിയ കോപ്പിയും ഫോട്ടോയും ഹാജരാക്കണം. ഫോണ്‍ 04862 259916.

ഇടുക്കി ജില്ലാ പ്രൊബേഷന്‍ ഓഫീസിലേക്ക് പ്രൊബേഷന്‍ അസിസ്റ്റന്റിന്റെ ഒഴിവിലേക്ക് താല്‍ക്കാലിക നിയമനം നടത്തും. കരാര്‍ അടിസ്ഥാനത്തില്‍ ആറ് മാസത്തേക്കാണ് നിയമനം. അപേക്ഷകര്‍ എം.എസ്.ഡബ്ല്യൂ ബിരുദധാരികളും മൂന്ന് വര്‍ഷത്തില്‍ കുറയാത്ത പ്രവൃത്തിപരിചയമുള്ളവരുമായിരിക്കണം.  35 വയസ്സില്‍ താഴെയുള്ള ഇടുക്കി ജില്ലയില്‍ നിന്നുള്ളവര്‍ മാത്രം അപേക്ഷിച്ചാല്‍ മതി. താല്‍പ്പര്യമുള്ളവര്‍ ജൂണ്‍ ഏഴിന് രാവിലെ 11 ന് തൊടുപുഴ മിനി സിവില്‍ സ്റ്റേഷനിലുള്ള ഇടുക്കി ജില്ലാ പ്രൊബേഷന്‍ ഓഫീസില്‍ അസ്സല്‍ സര്‍ട്ടിഫിക്കറ്റ്, ബയോഡേറ്റ എന്നിവയുമായി നേരിട്ട് ഹാജരാകണം. 12 മണിക്കുള്ളില്‍ ഹാജരാകുന്നവരെ മാത്രമേ പരിഗണിക്കുകയുള്ളൂ.

സ്റ്റുഡന്റ്‌സ് ട്രാവല്‍ ഫെസിലിറ്റി കമ്മിറ്റിയുടെ ജില്ലായോഗം ജൂണ്‍ 12ന് രാവിലെ 11ന് കലക്ടറുടെ ചേമ്പറില്‍ ചേരും. യോഗത്തില്‍ കമ്മിറ്റി അംഗങ്ങള്‍, വിദ്യാര്‍ത്ഥി പ്രതിനിധികള്‍, വിദ്യാഭ്യാസ സ്ഥാപന മേധാവികള്‍ തുടങ്ങിയവര്‍ പങ്കെടുക്കണമെന്ന് ഇടുക്കി ആര്‍.ടി.ഒ ആര്‍. രാജീവ് അറിയിച്ചു.

 ചക്കപ്പായസത്തിന്റെ മാധുര്യം പകര്‍ന്ന് ഭക്ഷ്യ സുരക്ഷാ വാരാചരണത്തിന് കട്ടപ്പനയില്‍ ഗംഭീര തുടക്കം. ഭക്ഷ്യ സുരക്ഷയെ കുറിച്ച് ജനങ്ങളെ ബോധവത്ക്കരിക്കുയെന്ന ലക്ഷ്യത്തോടെ ജൂണ്‍ ഒന്നു മുതല്‍ ഏഴുവരെ   സംഘടിപ്പിക്കുന്ന ഭക്ഷ്യ സുരക്ഷാ വാരാചരണത്തിന് ആരംഭം കുറിച്ചുകൊണ്ടുള്ള ഭക്ഷ്യമേള - രുചിമഹോത്സവം 2019 (ഈറ്റ് റൈറ്റ് മേള ) ലാണ് ചക്ക വിഭവങ്ങളും നാടന്‍ ഭക്ഷ്യോത്പന്നങ്ങളും രുചിയുടെ വൈവിധ്യമൊരുക്കിയത്. രണ്ട് ദിവസങ്ങളിലായി കട്ടപ്പന മിനി സ്റ്റേഡിയത്തില്‍ നടക്കുന്ന ഭക്ഷ്യമേള കുടുംബശ്രീ ജില്ലാ മിഷന്റെ ആഭിമുഖ്യത്തിലാണ് സംഘടിപ്പിച്ചിരിക്കുന്നത്.