ജില്ലയിലെ സമ്മതിദായകര്‍ക്ക് വോട്ടര്‍ പട്ടിക പരിശോധിക്കുവാന്‍ രണ്ടിനും മൂന്നിനും എല്ലാ പോളിംഗ് സ്റ്റേഷനുകളും രാവിലെ 10 മുതല്‍ വൈകിട്ട് അഞ്ച് വരെ പ്രവര്‍ത്തിക്കും. വോട്ടര്‍ പട്ടികയില്‍ പേര് ചേര്‍ക്കുന്നതിനും തിരുത്തല്‍ വരുത്തുന്നതിനുമുള്ള സൗകര്യവും പോളിംഗ് സ്റ്റേഷനില്‍ ക്രമീകരിച്ചിട്ടുള്ളതായി ഇലക്ഷന്‍ ഡെപ്യൂട്ടി കളക്ടര്‍ അറിയിച്ചു.                 (പിഎന്‍പി 768/19)

     റാന്നി വലിയപാലം സാക്ഷാത്കാരത്തിലേക്ക്. പാലത്തിന്റെ നിര്‍മ്മാണോദ്ഘാടനം ഇന്ന് വൈകിട്ട് നാലിന് റാന്നി പെരുമ്പുഴയില്‍ തദ്ദേശസ്വയംഭരണ വകുപ്പ് മന്ത്രി എ സി മൊയ്തീന്‍ നിര്‍വഹിക്കും. മുഖ്യമന്ത്രി പിണറായി വിജയന്‍ മുന്‍കൈയെടുത്ത് പ്രാരംഭ നടപടികള്‍ ആരംഭിച്ച ശബരിമല എയര്‍പോര്‍ട്ടിനെ മുന്നില്‍കണ്ടാണ്  ജില്ലയിലെ തന്നെ ഏറ്റവും നീളമേറിയ പാലം വിഭാവനം ചെയ്തിരിക്കുന്നത്.

     റാന്നിയുടെ കിഴക്കന്‍ മലയോര മേഖലയിലെ പ്രധാന മലയോര പാതയായ മീത്തുംചാല്‍-മുക്കൂട്ടുതറ റോഡിന്റെ നിര്‍മാണോദ്ഘാടനം ഇന്ന് വൈകിട്ട് അഞ്ചിന്  വെച്ചൂച്ചിറയില്‍ തദ്ദേശസ്വയംഭരണ വകുപ്പ് മന്ത്രി എസി മൊയ്തീന്‍ നിര്‍വഹിക്കും.  റാന്നി നിയോജകമണ്ഡലത്തിലെ നാല് പഞ്ചായത്തുകളില്‍ കൂടി കടന്നുപോകുന്ന 31.5 കി.മീ നീളമുള്ള റോഡ് പുനരുദ്ധാരണത്തിനായി 40 കോടി രൂപയാണ് അനുവദിച്ചിരിക്കുന്നത്.

മണ്ണാറക്കുളഞ്ഞി-കോഴഞ്ചേരി റോഡില്‍ പഴയതെരുവ് മുതല്‍ വെട്ടിമൂട്പടി കനാലിന് സമീപം വരെയുള്ള ഭാഗത്ത് നിര്‍മാണ പ്രവര്‍ത്തനങ്ങള്‍ നടക്കുന്നതിനാല്‍ ഇന്ന് മുതല്‍ ഇതുവഴിയുള്ള ഗതാഗതം നിരോധിച്ചു. റാന്നി ഭാഗത്തു നിന്നും വരുന്ന വാഹനങ്ങള്‍ പൊയ്യാനില്‍ ജംഗ്ഷനിലേക്കുള്ള വണ്‍വേ വഴി പോകണമെന്ന് പൊതുമരാമത്ത് അധികൃതര്‍ അറിയിച്ചു.                             (പിഎന്‍പി 764/19)

മെഡിക്കല്‍ ലാബുകളുടെ ചൂഷണത്തിനെതിരെയുള്ള ജനകീയ പ്രതിരോധമാണ് നീതി ക്ലിനിക്കല്‍ ലാബ് എന്ന് സഹകരണ ടൂറിസം, ദേവസ്വം വകുപ്പ് മന്ത്രി കടകംപള്ളി സുരേന്ദ്രന്‍ പറഞ്ഞു. ഇരവിപേരൂര്‍ സര്‍വീസ് സഹകരണ ബാങ്കിന്റെ നേതൃത്വത്തില്‍ ആരംഭിച്ച നീതി ക്ലിനിക്കല്‍ ലാബിന്റെ ഉദ്ഘാടനം ഇരവിപേരൂരില്‍ നിര്‍വഹിക്കുകയായിരുന്നു അദ്ദേഹം. ജനകീയവും ജനാധിപത്യവുമായ ഇടപെടലുകളാണ് ആരോഗ്യമേഖലയെ ശക്തിപ്പെടുത്തുന്നത്. ജനങ്ങളുടെ ആരോഗ്യസുരക്ഷയാണ് സര്‍ക്കാരിന്റെ പ്രധാന ലക്ഷ്യമെന്നും അതുകൊണ്ട് തന്നെ ഇത്തരം ലാബുകളുടെ പ്രോത്സാഹനത്തിനുള്ള നടപടികള്‍ സഹകരണവകുപ്പിന്റെ ഭാഗത്ത് നിന്നുണ്ടാകുമെന്നും മന്ത്രി പറഞ്ഞു. 

അടൂര്‍ താലൂക്ക് വികസന സമിതിയോഗം മാര്‍ച്ച് അഞ്ചിന് രാവിലെ 10ന് താലൂക്ക് ഓഫീസില്‍ ചേരും. ബന്ധപ്പെട്ടവര്‍ പങ്കെടുക്കണമെന്ന് തഹസീല്‍ദാര്‍ അറിയിച്ചു.

          (പിഎന്‍പി 762/19)