കൊല്ലം, ആലപ്പുഴ ജില്ലകളിൽ ജൂൺ 9, 10 തിയതികളിലും തിരുവനന്തപുരം, എറണാകുളം ജില്ലകളിൽ പത്തിനും കേന്ദ്ര കാലാവസ്ഥ നിരീക്ഷണ കേന്ദ്രം ഓറഞ്ച് അലർട്ട് പ്രഖ്യാപിച്ചു. ഓറഞ്ച് അലർട്ടുള്ള ജില്ലകളിൽ ഒറ്റപ്പെട്ടയിടങ്ങളിൽ ശക്തമായതോ (115 മില്ലീമീറ്റർ വരെ മഴ) അതിശക്തമായതോ (115 മില്ലീമീറ്റർ മുതൽ 204.5 മില്ലീമീറ്റർ വരെ മഴ) ആയ മഴയ്ക്ക് സാധ്യതയുണ്ട്. സർക്കാർ സംവിധാനങ്ങളും പൊതുജനങ്ങളും ജാഗ്രത പാലിക്കുന്നതിനാണ് അലർട്ട് നൽകിയിരിക്കുന്നത്.

കേരള വനഗവേഷണ സ്ഥാപനത്തിൽ 2023 മേയ് വരെ കാലാവധിയുളള ഗവേഷണ പദ്ധതിയായ സോഫിസ്റ്റികെറ്റഡ് അനലിറ്റിക്കൽ ഇൻസ്ട്രുമെന്റഷൻ ഫെസിലിറ്റിയിൽ ഒരു പ്രോജക്ട് ഫെല്ലോയുടെ താല്കാലിക ഒഴിവിലേക്ക് ജൂൺ 17 രാവിലെ പത്തിന് തൃശ്ശൂർ പീച്ചിയിലെ ഓഫീസിൽ വാക്-ഇൻ-ഇന്റർവ്യൂ നടക്കും. പത്ത് മാസം കാലാവധിയുളള ഗവേഷണ പദ്ധതിയായ 'അപ്‌സേഷൻ ഓഫ് കെ.എഫ്.ആർ.ഐ. ലൈബ്രറി പോർട്ടലിൽ പ്രോജക്ട് അസിസ്റ്റന്റിന്റെ താല്കാലിക ഒഴിവിലേക്ക് ജൂൺ 21ന് രാവിലെ പത്തിന് പീച്ചിയിലുളള ഓഫീസിൽ ഇന്റർവ്യൂ നടക്കും. വിശദവിവരങ്ങൾക്ക്: www.kfri.res.in.    
പി.എൻ.എക്സ്.1670/19

സാമൂഹ്യനീതി വകുപ്പ് മുഖാന്തിരം നടപ്പിലാക്കി വരുന്ന വ്യക്തിഗത ഗുണഭോക്തൃ പദ്ധതികളായ വിദ്യാകിരണം, വിദ്യാജ്യോതി, സ്വാശ്രയ, പരിണയം, തുല്യതാ പരീക്ഷ എഴുതുന്നതിനുളള ധനസഹായം, മാതൃജ്യോതി, വിദൂരവിദ്യാഭ്യാസം ചെയ്യുന്നതിനുളള ധനസഹായം എന്നിവയ്ക്ക് 2019-20 സാമ്പത്തിക വർഷത്തിലേക്ക് അപേക്ഷ ക്ഷണിച്ചു. അപേക്ഷ ഫോറത്തിനും കൂടുതൽ വിവരങ്ങൾക്കും ചെമ്പൂക്കാവിലുളള ജില്ലാ സാമൂഹ്യനീതി ഓഫീസുമായോ ബന്ധപ്പെട്ട ശിശുവികസന പദ്ധതി ഓഫീസുമായോ ബന്ധപ്പെടണം. അപേക്ഷ സ്വീകരിക്കുന്ന അവസാന തീയതി ജൂലൈ 31. കൂടുതൽ വിവരങ്ങൾക്ക് www.sjd.kerala.gov.in എന്ന വെബ് സൈറ്റിൽ ലഭിക്കും.
 

ഒളരിക്കര ഇഎസ്‌ഐ ആശുപത്രിയിൽ ജൂൺ 20 വൈകീട്ട് മൂന്നിന് സൂപ്രണ്ടിന്റെ ഓഫീസിൽ പരാതിപരിഹാരസെൽ ചേരും. സ്ഥാപനത്തിന്റെ പ്രവൃത്തി സംബന്ധിച്ച പരാതി ഓഫീസിൽ നൽകാമെന്ന് സൂപ്രണ്ട് അറിയിച്ചു. ഫോൺ : 0487-2361239.
 

വിദ്യാർഥികളെ വരിയിൽ നിർത്താതെ, സീറ്റ് നിഷേധിക്കാതെ യാത്രാ സൗകര്യമൊരുക്കാൻ ജില്ലാതല സ്റ്റുഡൻറ് ട്രാവലിങ് ഫെസിലിറ്റി കമ്മിറ്റി യോഗം തീരുമാനിച്ചു. ഇത് സംബന്ധിച്ച ഹൈകോടതി നിർദേശപ്രകാരമാണിത്. പ്ലസ്ടു വരെയുള്ള സ്‌കൂൾ വിദ്യാർഥികൾക്കും സ്വാശ്രയ കോഴ്സിന് പഠിക്കുന്നവർ ഒഴികെ റെഗുലർ കോളജ് വിദ്യാർഥികൾക്കും പ്രിൻസിപ്പൽ നൽകുന്ന കാർഡ് ഉപയോഗിച്ച് യാത്ര ചെയ്യാവുന്നതാണ്. സഞ്ചരിക്കേണ്ട സ്ഥലം കാർഡിൽ രേഖപ്പെടുത്തേണ്ടതാണ്. 

ആകാശവാണി പ്രക്ഷേപണം ചെയ്യുന്ന ഡോക്ടറോട് ചോദിക്കാം ലൈവ് ഫോൺ ഇൻ പരിപാടിയിൽ ''നിപാരോഗം-ശ്രദ്ധിക്കേണ്ട കാര്യങ്ങളും മുൻ കരുതലുകളും'' വിഷയവുമായി ബന്ധപ്പെട്ട സംശയങ്ങൾക്ക് തൃശൂർ ജില്ലാ മെഡിക്കൽ ഓഫീസർ ഡോക്ടർ കെ.ജി.റീന മറുപടി നൽകും. സംശയ നിവാരണത്തിനായി വിളിക്കേണ്ട നമ്പർ 1707066. തൃശ്ശൂരിനു പുറത്തുനിന്നു വിളിക്കുന്നവർ 0487 എന്ന കോഡ് കൂടി ചേർക്കണം. വിളിക്കേണ്ട സമയം ശനിയാഴ്ച (ജൂൺ 8) രാവിലെ 11 മണി മുതൽ 12 മണി വരെ.