ജീവന്റെ സുരക്ഷയും തൊഴില്‍ സംരക്ഷണവുമാണ് മത്സ്യ ബന്ധനമേഖലയില്‍ ഏറ്റവും പ്രധാനമെന്ന് മത്സ്യഫെഡ് ചെയര്‍മാന്‍ ചിത്തരഞ്ജന്‍ അഭിപ്രായപ്പെട്ടു. കിലെയുടെ നാല്‍പതാം വാര്‍ഷിക സമാപന സമ്മേളനത്തിന്റെ ഭാഗമായുള്ള സെമിനാറില്‍ തൊഴില്‍ മേഖലയിലെ പരിഷ്‌കാരങ്ങള്‍ എന്ന വിഷയത്തില്‍ സംസാരിക്കുകയായിരുന്നു അദ്ദേഹം. മത്സ്യമേഖലയുമായി ബന്ധപ്പെട്ട് ജീവന്റെ സുരക്ഷയ്ക്കാണ് പ്രാധാന്യം. അത് ഉറപ്പാക്കാനായി ശാസ്ത്ര സാങ്കേതിക മേഖലയെ ഉപയോഗപ്പെടുത്തി വിവിധങ്ങളായ പ്രവര്‍ത്തനങ്ങള്‍ നടത്തുന്നുണ്ട.് അതേ പോലെ തൊഴില്‍ സംരക്ഷണത്തിനായി  മറൈന്‍ ആംബുലന്‍സ് മത്സ്യ മേഖലയില്‍ എത്തിക്കഴിഞ്ഞതായും അദ്ദേഹം അഭിപ്രായപ്പെട്ടു.  

കടുത്ത ലാഭ മോഹം കൊണ്ട് വിഷകരമായതും മായം കലര്‍ന്നതുമായ ഉല്‍പ്പന്നങ്ങള്‍ പൊതുജനാരോഗ്യത്തിന് പോലും ഭീഷണിയാകുന്ന തരത്തില്‍ വിറ്റഴിക്കപ്പെടുകയാണ്. ഇതിനെതിരെയുള്ള  സമര പ്രവര്‍ത്തനമാണ് കുടുംബശ്രീ ഹോംഷോപ്പ് ഓണര്‍മാര്‍ നടത്തുന്നതെന്ന് തൊഴില്‍ എക്സൈസ് വകുപ്പ് മന്ത്രി ടിപി രാമകൃഷ്ണന്‍. കുടുംബശ്രീ ഹോംഷോപ്പ് ഓണര്‍മാര്‍ക്ക് കുടുംബശ്രീ മിഷന്‍ പലിശരഹിത വായ്പ നല്‍കി അനുവദിച്ച ഇരുചക്രവാഹനങ്ങളുടെ വിതരണോല്‍ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി.

പുതുതായി റേഷന്‍ കാര്‍ഡിന് പഞ്ചായത്ത് അടിസ്ഥാനത്തില്‍ അപേക്ഷകള്‍ വാങ്ങിയ  മരുതോങ്കര, നരിപ്പറ്റ, വില്ല്യാപ്പള്ളി, കായക്കൊടി, കാവിലുംപാറ, അഴിയൂര്‍, ഒഞ്ചിയം, ചോറോട്, എടച്ചേരി, ഏറാമല, കുറ്റ്യാടി, വാണിമേല്‍ എന്നീ പഞ്ചായത്തുകളിലെ  റേഷന്‍ കാര്‍ഡ് വിതരണം വടകര താലൂക്ക് സപ്ലൈ ഓഫീസില്‍  നടത്തും.  അപേക്ഷകര്‍ ടോക്കണ്‍, നിലവില്‍ പേരുള്‍പ്പെട്ട റേഷന്‍ കാര്‍ഡ്, അസ്സല്‍ തിരിച്ചറിയല്‍ കാര്‍ഡ് എന്നിവ സഹിതം ഓഫീസില്‍ ഹാജരായി അതാതു ദിവസങ്ങളില്‍ പുതിയ റേഷന്‍ കാര്‍ഡ് കൈപ്പറ്റണമെന്ന്  താലൂക്ക് സപ്ലൈ ഓഫീസര്‍ അറിയിച്ചു.

    ന്യൂനപക്ഷ ക്ഷേമ വകുപ്പിനു കീഴില്‍ ഭിന്നശേഷിക്കാര്‍ക്കു വേണ്ടിയുള്ള വിവാഹപൂര്‍വ്വ കൗണ്‍സലിംഗ് പ്രോഗ്രാമിന്റെ കോഴിക്കോട് ജില്ലയിലെ ഉദ്ഘാടനം ഇന്ന് (മാര്‍ച്ച് 1) ഉച്ചക്ക് രണ്ട് മണിക്ക് റഹ്മാനിയ വികലാംഗ വിദ്യാലയത്തില്‍ ന്യൂനപക്ഷക്ഷേമ വകുപ്പ് ഡയരക്ടര്‍ ഡോ. എ ബി മൊയ്തീന്‍കുട്ടി നിര്‍വ്വഹിക്കും. പ്രീ മാരിറ്റല്‍ കൗണ്‍സലിംഗ് പ്രോഗ്രാം ജില്ലയിലുടനീളം വിജയകരമായി നടക്കുന്നതിന്റെ പശ്ചാലത്തിലാണ് ഡയരക്ടറേറ്റ് തയ്യാറാക്കിയത്. ഫാക്കല്‍റ്റികള്‍ക്ക് പുറമെ വ്യാഖ്യാതാക്കള്‍, പി പി ടി അവതരണം, രക്ഷിതാക്കള്‍ക്കുള്ള ആംഗ്യ ക്ലാസ്സുകള്‍ എന്നിവയടങ്ങുന്ന ക്ലാസ്സുകളാണ് കോഴ്സില്‍ നല്‍കുന്നത്.

വടകര താലൂക്കിലെ മുന്‍സിപ്പാലിറ്റി/ പഞ്ചായത്ത് തല ജനപ്രതിനിധികള്‍ക്ക് ദേശീയ ഭക്ഷ്യ ഭദ്രതാ നിയമം 2013. അതനുസരിച്ചുളള റേഷന്‍ വിതരണവും ഇ പോസ്  സംവിധാനവും സംബന്ധിച്ച പരിശീലനം  ഇന്ന് ( മാര്‍ച്ച് 1)  11 മണിക്ക് വടകര മുന്‍സിപ്പല്‍ ടൗണ്‍ ഹാളില്‍ സംഘടിപ്പിക്കുമെന്ന് വടകര താലൂക്ക് സപ്ലൈ ഓഫീസര്‍ അറിയിച്ചു.  

    പട്ടിക വര്‍ഗ്ഗ വികസന വകുപ്പ് നടത്തുന്ന മോഡല്‍ റസിഡന്‍ഷ്യല്‍ സ്‌കൂള്‍ പ്രവേശന പരീക്ഷ മാര്‍ച്ച് രണ്ടിന് രാവിലെ 10 മണി മുതല്‍ 12 മണി വരെയും അയ്യങ്കാളി ടാലന്റ് സെര്‍ച്ച് ആന്റ് ഡവലപ്മെന്റ് സ്‌കീം പ്രകാരമുള്ള സ്‌കോളര്‍ഷിപ്പ് പരീക്ഷ ഉച്ചക്ക്  രണ്ട് മണി മുതല്‍ നാല് മണി വരെയും മാനാഞ്ചിറ ഗവ. മോഡല്‍ യു.പി. സ്‌ക്കൂളില്‍  നടത്തും. അപേക്ഷ നല്‍കിയവര്‍ പരീക്ഷ ആരംഭിക്കുന്നതിന് അര  മണിക്കൂര്‍ മുന്‍പു പരീക്ഷാ ഹാളില്‍ എത്തണമെന്ന്  ട്രൈബല്‍ ഡവലപ്മെന്റ് ഓഫീസര്‍ അറിയിച്ചു. ഫോണ്‍ - 0495 2376364.