* നവാംഗന 2019-വനിതാ സംരംഭകരുടെ കൂട്ടായ്മ ഗവർണർ ഉദ്ഘാടനം ചെയ്തു

നിക്ഷേപ, സംരംഭരംഗങ്ങളിലേക്ക് സ്ത്രീകൾ സധൈര്യം മുന്നോട്ടുവരണമെന്ന് ഗവർണർ പി. സദാശിവം. നവസംരംഭങ്ങളെക്കുറിച്ചും തങ്ങളുടെ ആശയങ്ങളെക്കുറിച്ചും ഉറക്കെ വിളിച്ചുപറയാൻ സ്ത്രീകൾ തയ്യാറാകണമെന്നും ഗവർണർ പറഞ്ഞു. കേരള സംസ്ഥാന വനിതാ വികസന കോർപ്പറേഷൻ സംഘടിപ്പിക്കുന്ന വനിതാ സംരംഭകരുടെ കൂട്ടായ്മ നവാംഗന 2019 തിരുവനന്തപുരത്ത് ജവഹർ സഹകരണ ഭവൻ ഓഡിറ്റോറിയത്തിൽ ഉദ്ഘാടനം ചെയ്യുകയായിരുന്നു അദ്ദേഹം. 

മങ്കൊമ്പ് :പ്രളയം തകർത്തെറിഞ്ഞ കുട്ടനാടിന്റെ കാർഷിക മേഖലയുടെ സമഗ്ര വികസനം ലക്ഷ്യമിടുന്ന കാർഷിക ശിൽപശാല ഇന്നു സമാപിക്കും.  പരിസ്ഥിതി സൗഹൃദ നെൽ കൃഷി സമ്പ്രദായമെങ്ങനെ വളർത്തിയെടുക്കാമെന്നതാണ് ശില്പശാലയിലെ പ്രധാന ചർച്ച. പ്രളയത്തിന് മുമ്പും  ശേഷവുമുള്ള കുട്ടനാടിന്റെ കാർഷിക പരിസ്ഥിതിയെക്കുറിച്ച് ശാസ്ത്രീയമായി അവലോകനം നടക്കുകയാണ്.  കുട്ടനാട്ടിൽ പുതിയ കാർഷിക കലണ്ടർ  ആരംഭിക്കുന്നതിനുള്ള തീരുമാനവുമെടുക്കും.

ആലപ്പുഴ: രാഷ്ട്രീയ ഗ്രാമസ്വരാജ് അഭിയാൻ  ഇ-ഗവേണൻസിന്റെ ഭാഗമായി ജില്ല പ്ലാനിങ് ഓഫീസിലേക്ക് ഐ.ടി. വിദഗ്ധൻ, ഡേറ്റ എൻട്രി ഓപ്പറേറ്റർ എന്നിവരെ  ഒരു വർഷത്തേക്ക് കരാറടിസ്ഥാനത്തിൽ  നിയമിക്കുന്നു. യോഗ്യതയുള്ളവർ  കമ്പ്യൂട്ടർ പരിജ്ഞാന പരീക്ഷയ്ക്കും  അഭിമുഖത്തിനുമായി മാർച്ച് ഒന്നിന് രാവിലെ 10ന് യോഗ്യത തെളിയിക്കുന്ന അസൽ സർട്ടിഫിക്കറ്റുകൾ സഹിതം കളക്ടറേറ്റ് അങ്കണത്തിലെ ജില്ല ആസൂത്രണ സമിതി സെക്രട്ടറിയേറ്റ് മന്ദിരത്തിൽ നേരിട്ട് ഹാജരാകണം. യോഗ്യത: ഐ.ടി. വിദഗ്ധൻ- ബി.ടെക്/ഡിപ്ലോമ ഐ.ടി അല്ലെങ്കിൽ കമ്പ്യൂട്ടർ സയൻസ്, രണ്ടു വർഷത്തെ പരിശീലനം. വേതനം 20,000 രൂപ.

ആലപ്പുഴ: കേരളസർവ്വകലാശാലയുടെയും, എ.ഐ.സി.റ്റി.ഇയുടെയും അംഗീകാരത്തോടെ പുന്നപ്ര അക്ഷര നഗരികേപ്പ് കാമ്പസിൽ പ്രവർത്തിക്കുന്ന സർക്കാർ അംഗീകൃത സ്ഥാപനമായ ഇൻസ്റ്റിറ്റ്യൂട്ട് ഓഫ് മാനേജ്മെന്റ് ആന്റ് ടെക്നോളജി (ഐ.എം.റ്റി)യിൽ 2019 - 2021  ബാച്ചിലേയ്ക്കുള്ള ദ്വിവത്സര മുഴുവൻസമയ എം.ബി.എ. പ്രോഗ്രാമിലേയ്ക്ക്  പ്രവേശനം നടത്തുന്നു.

ചെങ്ങന്നൂർ: ചെങ്ങന്നൂരിൽ എല്ലാവർക്കും കുടിവെള്ള പദ്ധതിയെന്ന സ്വപ്നം യാഥാർത്ഥ്യമാകുന്നു. കുടിവെളള പദ്ധതിക്കായി സജി ചെറിയാൻ എം.എൽ.എ സർക്കാരിനു സമർപ്പിച്ച പദ്ധതി നടപ്പാക്കുന്നതിന്റെ ആദ്യഘട്ടമായി 188.68 കോടി രൂപ അനുവദിച്ചതായി എം.എൽ.എ അറിയിച്ചു. കിഫ്ബി ഫണ്ടു വഴിയാണ് തുക ലഭിക്കുക.  ആല, പുലിയൂർ, ബുധനൂർ, പാണ്ടനാട്, മുളക്കുഴ, വെൺമണി, ചെറിയനാട് എന്നീ പഞ്ചായത്തുകൾക്കായി   200 കോടി ചെലവുവരുന്ന സമഗ്രകുടിവെള്ള പദ്ധതിയാണ് സമർപ്പിച്ചിരുന്നത്. സംസ്ഥാനത്തെ തന്നെ ഏറ്റവും വലിയ കുടിവെള്ള പദ്ധതികളിലൊന്നാണിത്. 

കലവൂർ: കലവൂർ എൻ.ഗോപിനാഥന്റെ സ്മരണയ്ക്കായി നിർമ്മിക്കുന്ന സ്റ്റേഡിയത്തിന്റെ ശിലാ സ്ഥാപനം ഇന്ന്  (മാർച്ച് ഒന്ന്) വൈകിട്ട് അഞ്ചിന്  പ്രീതികുളങ്ങര ഗ്രൗണ്ടിൽ  ധനമന്ത്രി ഡോ.ടി. എം.തോമസ് ഐസക്ക്  നിർവഹിക്കും.  കിഫ്ബിയിൽ ഉൾപ്പെടുത്തി നിർമ്മിക്കുന്ന സ്റ്റേഡിയത്തിന്  ആദ്യഘട്ടത്തിൽ് 5.5  കോടി രൂപയാണ് ചെലവ് പ്രതീക്ഷിക്കുന്നത്.

200 മീറ്റർ നാലുവരി ട്രാക്ക്, മിനി ഫുട്ബാൾ ഗ്രൗണ്ട്, വിവിധോദ്ദേശ്യ മൈതാനം,  ഫിറ്റ്നെസ്സ് ജിം, 200 പേർക്കുള്ള പവലിയൻ സൗകര്യം എന്നിവയാണ് ഒരുക്കുന്നത്.  പ്രീതികുളങ്ങര സ്‌കൂളിന്റെ സംരക്ഷണവും വികസനവും പദ്ധതിയിൽ ഉൾപ്പെടുത്തിയിട്ടുണ്ട്. 

ആലപ്പുഴ: നെല്ലിന് ഏറ്റവും കൂടുതൽ താങ്ങുവില കൃഷിക്കാർക്ക് നൽകുന്ന സംസ്ഥാനമാണ് കേരളമെന്ന് കൃഷി മന്ത്രി വി.എസ്.സുനിൽകുമാർ പറഞ്ഞു. നെല്ലിന് വീണ്ടും താങ്ങുവില ഒരു രൂപ കൂടി വർധിപ്പിക്കാൻ സർക്കാർ തീരുമാനിച്ചു. ഇതോടെ കിലോയ്ക്ക് 26 രൂപ 30 പൈസയാകും. ഇത് ഔദാര്യമല്ല. മറിച്ച് കേരളത്തിലെ കർഷകരുടെ അവകാശം സർക്കാർ നൽകുകയാണെന്നും മന്ത്രി പറഞ്ഞു. സർക്കാർ കുട്ടനാട്ടിൽ നടപ്പിലാക്കാനുദ്ദേശിക്കുന്ന നല്ല കൃഷി മുറ പദ്ധതിക്ക്  മുന്നോടിയായി  മങ്കൊമ്പ് നെല്ല് ഗവേഷണ കേന്ദ്രത്തിൽ നടക്കുന്ന ദ്വിദിന ശിൽപശാല 'പരിസ്ഥിതിസൗഹൃദ കുട്ടനാട്' ഉദ്ഘാടനം ചെയ്യുകയായിരുന്നു മന്ത്രി.

പാമ്പാടി ബ്ലോക്ക് പഞ്ചായത്തിന്റെ ഉടമസ്ഥതയിലുളള കിടങ്ങൂര്‍ ജംഗ്ഷനിലുളള കെട്ടിടത്തിലെ ഒന്നാം നിലയിലുളള ഹാള്‍, പാമ്പാടി ബ്ലോക്ക് ഓഫീസ് കോമ്പൗണ്ടിലെ കെട്ടിടത്തിലെ ഒന്നും മൂന്നും നമ്പര്‍ മുറികള്‍ എന്നീ വനിത തൊഴില്‍ സംരംഭക കേന്ദ്രങ്ങളിലെ മുറികളുടെ  ലേലം മാര്‍ച്ച് ആറ് ഉച്ചയ്ക്ക് 12ന് പാമ്പാടി ബ്ലോക്ക് പഞ്ചായത്ത് ഓഫീസില്‍ നടക്കും. വനിത സംരംഭകര്‍ മാത്രമേ പങ്കെടുക്കാവൂ. കൂടുതല്‍ വിവരങ്ങള്‍ക്ക് ഫോണ്‍: 0481 2551060 

(കെ.ഐ.ഒ.പി.ആര്‍ 408/19) 

         ഭക്ഷ്യ സുരക്ഷാ അസിസ്റ്റന്റ് കമ്മീണറുടെ കാര്യാലയത്തിലേക്ക് മഹീന്ദ്ര ബൊലേറോ അല്ലെങ്കില്‍ തുല്യ സീറ്റിംഗ് കപ്പാസിറ്റിയുളള വാഹനം 2019-20 വര്‍ഷത്തേക്ക് കരാര്‍ അടിസ്ഥാനത്തില്‍ ഡ്രൈവര്‍ ഉള്‍പ്പെടെ വിട്ടു നല്‍കുന്നതിനായി വാഹന ഉടമകളില്‍ നിന്നും ദര്‍ഘാസ് ക്ഷണിക്കുന്നു. ദര്‍ഘാസ്  മാര്‍ച്ച് 20 ഉച്ചയ്ക്ക് 2 മണിവരെ സ്വീകരിക്കും. കൂടുതല്‍ വിവരങ്ങള്‍ക്ക് ഫോണ്‍: 0481 2564677

(കെ.ഐ.ഒ.പി.ആര്‍ 407/19)