കേന്ദ്ര കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ് പ്രകാരം അതിശക്തമായ കാറ്റിന് സാധ്യതയുള്ളതിനാൽ, മത്സ്യത്തൊഴിലാളികൾ ജൂൺ 11ന് തെക്ക് കിഴക്ക് അറബിക്കടലിലും ലക്ഷദ്വീപ്, കേരള-കർണാടക തീരങ്ങളിലും, 11, 12 തീയതികളിൽ മധ്യ കിഴക്കൻ അറബിക്കടലിലും മഹാരാഷ്ട്ര തീരത്തും 12, 13 തീയതികളിൽ വടക്ക് കിഴക്കൻ അറബിക്കടലിലും ഗുജറാത്ത് തീരങ്ങളിലും മത്സ്യബന്ധനത്തിന് പോകരുതെന്ന് കേന്ദ്ര കാലാവസ്ഥ നിരീക്ഷണ കേന്ദ്രം അറിയിച്ചു. ആഴക്കടലിൽ മത്സ്യബന്ധനത്തിലേർപ്പെടുന്നവർ എത്രയും പെട്ടെന്ന് ഏറ്റവും അടുതുള്ള തീരത്ത് തിരിച്ചെത്തണമെന്ന് കർശന നിർദേശം പുറപ്പെടുവിച്ചു. 

തൃശൂർ ജില്ലയിൽ ജൂൺ 11, 12, 13, 14 തീയതികളിൽ കേന്ദ്ര കാലാവസ്ഥ നിരീക്ഷണ കേന്ദ്രം മഞ്ഞ അലേർട്ട് പ്രഖ്യാപിച്ചു. ജില്ലയിലെ ഒറ്റപ്പെട്ടയിടങ്ങളിൽ ശക്തമായ മഴയ്ക്കുള്ള സാധ്യതയാണ് ഈ ദിവസങ്ങളിൽ പ്രവചിക്കപ്പെട്ടിരിക്കുന്നത്. ജൂൺ 12 ന് മലപ്പുറം, കോഴിക്കോട്, കണ്ണൂർ ജില്ലകളിൽ 'ഓറഞ്ച്' അലേർട്ട് പ്രഖ്യാപിച്ചു. ബന്ധപ്പെട്ട സർക്കാർ വകുപ്പുകളോടും ഉദ്യോഗസ്ഥരോടും തയ്യാറെടുപ്പുകൾ നടത്താനും താലൂക്ക് തലത്തിൽ കൺട്രോൾ റൂമുകൾ ആരംഭിക്കുവാനും സംസ്ഥാന ദുരന്ത നിവാരണ അതോറിറ്റി നിർദേശം നൽകി.

തൃശൂർ ജില്ലയിലെ തലപ്പിള്ളി താലൂക്കിലെ പൈക്കുളം വില്ലേജിൽ തൊഴുപ്പാടം ദേശത്ത് ഭാരതപ്പുഴയിൽ മീൻ പിടിക്കാനിറങ്ങിയ രണ്ടു പേർ മുങ്ങിമരിച്ചു. മോഹൻദാസ് (47), രാജേഷ് (26) എന്നിവരാണ് മരിച്ചത്. ഞായറാഴ്ച പുഴയിൽ മീൻ പിടിക്കാനിറങ്ങിയ ഇവരെ വൈകീട്ട് 5.30നാണ് കാണാതായത്. മോഹൻദാസിന്റെ മൃതദേഹം ഞായറാഴ്ച വൈകീട്ട് 6.30നും രാജേഷിന്റെ മൃതദേഹം തിങ്കളാഴ്ച രാവിലെ 10 മണിക്കുമാണ് കണ്ടെടുത്തത്. 
കൊടുങ്ങല്ലൂർ താലൂക്കിൽ എറിയാട് വില്ലേജിൽ മാർക്കറ്റിന് സമീപം ഞായറാഴ്ച കാലപ്പഴക്കം ചെന്ന കെട്ടിടം തകർന്നു. കട തകർന്നതിനെ തുടർന്ന് പുഞ്ചപ്പാടത്ത് സലാമിന് പരിക്ക് പറ്റിയിരുന്നു.

ജില്ലാ ഫുഡ് ടെസ്റ്റിംഗ് ലബോറട്ടറിയില്‍ ദിവസ വേതനാടിസ്ഥാനത്തില്‍ താത്ക്കാലികമായി ടെക്‌നിക്കല്‍ അസിസ്റ്റന്റിനെ നിയമിക്കുന്നു. കെമിസ്ട്രിയില്‍ ബിരുദമോ ഫുഡ് ടെക്‌നോളജിയില്‍ ഡിപ്ലോമയോ രണ്ടാം ക്ലാസില്‍ കുറയാതെ പാസായവര്‍ക്ക് അപേക്ഷിക്കാം. താത്പര്യമുളളവര്‍ അസല്‍ സര്‍ട്ടിഫിക്കറ്റുകളും സാക്ഷ്യപ്പെടുത്തിയ പകര്‍പ്പുകളും സഹിതം ഈ മാസം 15ന് രാവിലെ 10ന് ജില്ലാ ഫുഡ് ടെസ്റ്റിംഗ് ലബോറട്ടറിയില്‍ എത്തണം. 

                (പിഎന്‍പി 1357/19)

കാലവര്‍ഷം മൂലം അണക്കെട്ടുകള്‍ തുറന്നു വിടുന്ന സാഹചര്യത്തില്‍ ഓരോ വകുപ്പുകളും ശ്രദ്ധിക്കേണ്ട മുന്‍കരുതലുകള്‍, പ്രവര്‍ത്തനങ്ങള്‍ എന്നിവ ഊര്‍ജിതപ്പെടുത്തുമെന്നും, അടിയന്തര കര്‍മ പദ്ധതി തയാറാക്കിയതിലൂടെ അപകടങ്ങള്‍ ഒഴിവാക്കാന്‍ കഴിയുമെന്നും ജില്ലാ കളക്ടര്‍ പി.ബി നൂഹ് പറഞ്ഞു. കളക്ടറേറ്റ് കോണ്‍ഫറന്‍സ് ഹാളില്‍ ബന്ധപ്പെട്ട വകുപ്പുകളിലെ ഉദ്യോഗസ്ഥര്‍ക്ക് അടിയന്തര കര്‍മ പദ്ധതി പരിചപ്പെടുത്തുന്ന യോഗത്തില്‍ സംസാരിക്കുകയായിരുന്നു ജില്ലാ കളക്ടര്‍. സമഗ്രമായ കര്‍മ പദ്ധതി തയാറാക്കിയതിലൂടെ ദുരന്തത്തിന്റെ വ്യാപ്തി ഒരു പരിധി വരെ കുറയ്ക്കാനാകുമെന്നും കളക്ടര്‍ പറഞ്ഞു.

കൈപ്പട്ടൂര്‍ ഗവണ്‍മെന്റ് ഹൈസ്‌കൂളില്‍ എല്‍പിഎസ്എയുടെ താത്ക്കാലിക ഒഴിവിലേക്ക് ഈ മാസം 14ന് രാവിലെ 10ന് കൂടിക്കാഴ്ച നടത്തും. യോഗ്യരായവര്‍ അസല്‍ സര്‍ട്ടിഫിക്കറ്റുകള്‍ സഹിതം ഹാജരാകണം.          (പിഎന്‍പി 1354/19)

നാഷണല്‍ ആയുഷ് മിഷന്റെ ആയുഷ്ഗ്രാം പദ്ധതിയിലേക്ക് മള്‍ട്ടിപര്‍പ്പസ് വര്‍ക്കര്‍/ ഹെല്‍പ്പര്‍ തസ്തികയില്‍ നിലവിലുള്ള ഒരു താത്ക്കാലിക ഒഴിവിലേക്ക് ദിവസ വേതന അടിസ്ഥാനത്തില്‍ നിയമിക്കുന്നതിന് ഭാരതീയ ചികിത്സാ വകുപ്പിന്റെ ജില്ലാ മെഡിക്കല്‍ ഓഫീസില്‍ നാളെ (12) രാവിലെ 11.30ന് ഇന്റര്‍വ്യൂ നടത്തും. എസ്എസ്എല്‍സി പാസായതും കായികക്ഷമതയുള്ളവരുമായവര്‍ക്ക് പങ്കെടുക്കാം. പ്രായം 40ന് താഴെയായിരിക്കണം. താത്പര്യമുള്ളവര്‍ ബന്ധപ്പെട്ട രേഖകകളുടെ അസലും സാക്ഷ്യപ്പെടുത്തിയ പകര്‍പ്പും സഹിതം ഹാജരാകണം. ഫോണ്‍: 0468 2324337.                      (പിഎന്‍പി 1351/19)