ജില്ലയിലെ 2018-19 വാര്‍ഷിക പദ്ധതികള്‍ക്ക്‌ ജില്ലാ ആസൂത്രണ സമിതി യോഗത്തില്‍ ഭേദഗതികളോടെ അംഗീകാരം നല്‍കി. വിവിധ തദ്ദേശസ്വയംഭരണ സ്ഥാപനങ്ങള്‍ വഴി നടപ്പിലാക്കുന്ന ഭേദഗതി പദ്ധതികള്‍ക്കാണ്‌ ജില്ലാ പഞ്ചായത്ത്‌ പ്രസിഡന്റ്‌ മേരി തോമസിന്റെ അധ്യക്ഷതയില്‍ ആസൂതണ സമിതി ഹാളില്‍ നടന്ന യോഗത്തില്‍ അംഗീകാരം നല്‍കിയത്‌. 65 തദ്ദേശസ്വയംഭരണസ്ഥാപനങ്ങളില്‍ നിന്നുള്ള 248 ഭേദഗതി പദ്ധതികള്‍ക്കും 81 പുതിയ പദ്ധതികള്‍ക്കും അംഗീകാരം ലഭിച്ചു.

മാള ഗവണ്‍മെന്റ്‌ ഐടിഐ കമ്പ്യൂട്ടര്‍ ഹാര്‍ഡ്‌ വെയര്‍ ആന്‍ഡ്‌ നെറ്റ്‌ വര്‍ക്ക്‌ മെയിന്റിനന്‍സ്‌ ട്രേഡില്‍ ഗസ്റ്റ്‌ ഇന്‍സ്‌ട്രക്‌ടര്‍ തസ്‌തികയില്‍ നിയമനം നടത്തുന്നു. ബന്ധപ്പെട്ട ട്രേഡില്‍ ഡിഗ്രി / ഡിപ്ലോമ / എന്‍ടിസി ആണ്‌ യോഗ്യത. താല്‍പര്യമുളളവര്‍ അസ്സല്‍ സര്‍ട്ടിഫിക്കറ്റ്‌ സഹിതം മാര്‍ച്ച്‌ 5 രാവിലെ 11 ന്‌ ഐടിഐ യില്‍ അഭിമുഖത്തിന്‌ എത്തണം. കൂടുതല്‍ വിവരങ്ങള്‍ക്ക്‌ ഫോണ്‍ : 0480-2893127. 

എന്‍വയോണ്‍മെന്റല്‍ സയന്‍സ്‌, ജിയോളജി, സോഷ്യോളജി, സോഷ്യല്‍ വര്‍ക്ക്‌, കെമിസ്‌ട്രി, ബോട്ടണി തുടങ്ങി വിഷയങ്ങളില്‍ ബിരുദാനന്തര ബിരുദധാരികള്‍ക്കും സിവില്‍ എഞ്ചിനീയറിംഗ്‌, കൃഷി എന്നീ വിഷയങ്ങളില്‍ ബിരുദധാരികള്‍ക്കും ജേര്‍ണലിസത്തില്‍ ബിരുദാനന്തര ബിരുദമോ പി.ജി ഡിപ്ലോമയോ കഴിഞ്ഞ വിദ്യാര്‍ത്ഥികള്‍ക്കും ഹരിത കേരളം മിഷനില്‍ ഇന്റേണ്‍ഷിപ്പ്‌ പ്രോഗ്രാമിന്‌ അപേക്ഷിക്കാം. 6 മാസമാണ്‌ കാലാവധി. തെരഞ്ഞെടുക്കപ്പെടുന്നവര്‍ 14 ജില്ലാ മിഷന്‍ ഓഫീസുമായും ഹരിതകേരളം മിഷന്‍ സംസ്ഥാന ഓഫീസുമായും ബന്ധപ്പെട്ടാണ്‌ പ്രവര്‍ത്തിക്കേണ്ടത്‌.

മത്സ്യബന്ധനയാനങ്ങള്‍ക്കുള്ള ഇന്‍ഷുറന്‍സ്‌ പരിരക്ഷ/ലൈഫ്‌ ജാക്കറ്റ്‌്‌/ ലൈഫ്‌ ബോയ/ സാറ്റലൈറ്റ്‌ ഫോണ്‍/ ജി.പി.എസ്‌ എന്നിവയ്‌ക്കുള്ള അപേക്ഷ ക്ഷണിച്ചു. അഴീക്കോട്‌, ചേറ്റുവ, ചാവക്കാട്‌, കയ്‌പമംഗലം, നാട്ടിക മത്സ്യഭവനുകളില്‍ നിന്ന്‌ ഇതിനുളള സൗജന്യ അപേക്ഷ ലഭിക്കും. പൂരിപ്പിച്ച അപേക്ഷ മാര്‍ച്ച്‌ 8 നകം അതത്‌ മത്സ്യഭവനുകളില്‍ നല്‍കണം. ഈ സംവിധാനങ്ങള്‍ പ്രയോജനപ്പെടുത്തിയില്ലെങ്കില്‍ സര്‍ക്കാര്‍ അനുവദിക്കുന്ന ആനുകൂല്യങ്ങള്‍ കിട്ടുന്നതല്ലെന്ന്‌ ഫിഷറീസ്‌ ഡെപ്യൂട്ടി ഡയറക്ടര്‍ അറിയിച്ചു. കൂടുതല്‍ വിവരങ്ങള്‍ക്ക്‌ 0487-2441132 എന്നീ നമ്പറില്‍ ബന്ധപ്പെടുക. 

ദേശീയ സരസ്സ്‌ മേള കുന്നംകുളത്ത്‌ നടത്തുന്നതുമായി ബന്ധപ്പെട്ട സംഘാടകസമിതി രൂപീകരണ യോഗം ഇന്ന്‌ (മാര്‍ച്ച്‌ 3) ഉച്ചയ്‌ക്ക്‌ 2 ന്‌ തദ്ദേശസ്വയംഭരണ വകുപ്പ്‌ മന്ത്രി എ സി മൊയ്‌തീന്റെ അദ്ധ്യക്ഷതയില്‍ കുന്നംകുളം ഗവണ്‍മെന്റ്‌ മോഡല്‍ ബോയ്‌സ്‌ ഹയര്‍ സെക്കണ്ടറി സ്‌കൂളില്‍ ചേരും.

റേഷന്‍ കാര്‍ഡുകള്‍ മുന്‍ഗണനാ വിഭാഗത്തിലേക്ക്‌ പരിവര്‍ത്തനം ചെയ്യുന്നതിനുളള അപേക്ഷ കളക്‌ടറേറ്റില്‍ സ്വീകരിക്കില്ലെന്നും താലൂക്ക്‌ സപ്ലൈ ഓഫീസുകളിലാണ്‌ നല്‍കേണ്ടതെന്നുമുളള വാര്‍ത്തയെ തുടര്‍ന്ന്‌ നിരവധി അപേക്ഷകള്‍ താലൂക്ക്‌ സപ്ലൈ ഓഫീസില്‍ എത്തുന്നുണ്ട്‌. മുന്‍പ്‌ അപേക്ഷ നല്‍കിയവര്‍ വീണ്ടും അപേക്ഷ നല്‍കേണ്ടതില്ല. അപേക്ഷ പരിശോധന നടത്തിയാണ്‌ മുന്‍ഗണനാ വിഭാഗത്തിലേക്ക്‌ പരിവര്‍ത്തനം ചെയ്യുന്നത്‌. ആയതിനാല്‍ കാര്‍ഡുടമകള്‍ വീണ്ടും താലൂക്ക്‌ സപ്ലൈ ഓഫീസില്‍ അപേക്ഷ നല്‍കേണ്ടതില്ലെന്ന്‌ ജില്ലാ സപ്ലൈ ഓഫീസര്‍ അറിയിച്ചു.

ദക്ഷിണേന്ത്യയിലെ ആദ്യക്ഷേത്രമ്യൂസിയത്തിന്‌ കൊടുങ്ങല്ലൂര്‍ ശ്രീകുരുംബ ഭഗവതി ക്ഷേത്രത്തില്‍ നാളെ (മാര്‍ച്ച്‌ 3) തറക്കല്ലിടും. ക്ഷേത്രത്തിന്റെ നവരാത്രി മണ്ഡപത്തില്‍ രാവിലെ 10 ന്‌ നടക്കുന്ന ചടങ്ങില്‍ സംസ്ഥാന സഹകരണ ടൂറിസം വകുപ്പ്‌ മന്ത്രി കടകംപള്ളി സുരേന്ദ്രന്‍ ശിലാസ്ഥാപനം നിര്‍വ്വഹിക്കും. മുസിരിസ്‌ പൈതൃക പദ്ധതിയില്‍ ഉള്‍പ്പെടുത്തി 3.23 കോടി രൂപ ചെലവഴിച്ചാണ്‌ ക്ഷേത്ര മ്യൂസിയം കൊടുങ്ങല്ലൂരില്‍ യാഥാര്‍ത്ഥ്യമാകുക. നൂറ്റാണ്ടുകള്‍ പഴക്കമുളള കച്ചേരിപ്പുരയാണ്‌ ക്ഷേത്രമ്യൂസിയമായി രൂപാന്തരം പ്രാപിക്കുന്നത്‌. 

ജില്ലയില്‍ വിവിധ വകുപ്പുകളിലായി നബാര്‍ഡ്‌ നടപ്പിലാക്കുന്ന 21 കോടി രൂപയുടെ പദ്ധതികള്‍ മാര്‍ച്ച്‌ 31നകം പൂര്‍ത്തിയാക്കി ബില്ലുകള്‍ സമര്‍പ്പിക്കണമെന്ന്‌ ജില്ലാ കളക്ടര്‍ ടി.വി. അനുപമ കളക്ടറേറ്റ്‌ ചേംബറില്‍ നടന്ന നബാര്‍ഡ്‌ ആര്‍.ഐ.ഡി.എഫ്‌ അവലോകനയോഗത്തിലാണ്‌ അദ്ധ്യക്ഷത വഹിച്ച കളക്ടര്‍ ഇക്കാര്യം അറിയിച്ചത്‌. നബാര്‍ഡ്‌ ആര്‍.ഐ.ഡി.എഫ്‌ ട്രാന്‍ചെ-2019 പദ്ധതിയില്‍ വിവിധ വകുപ്പുകളിലായി 22 പദ്ധതികളാണുള്ളത്‌.

               കേരള എയ്ഡഡ് കണ്‍ട്രോള്‍ സൊസൈറ്റിയുടെ സുരക്ഷാ പദ്ധതിയുടെ അവലോകന യോഗം മാര്‍ച്ച് അഞ്ചിന് രാവിലെ 11.30ന് കലക്ടറുടെ ചേമ്പറില്‍ ചേരും.