യുവജനക്ഷേമബോർഡ് ജില്ലാ യുവജന കേന്ദ്രത്തിന്റെ ആഭിമുഖ്യത്തിൽ പരിസ്ഥിതി വാരാചരണത്തോടനുബന്ധിച്ച് ഇന്ന് (ജൂൺ എഴ്) രാവിലെ പത്ത് മണി മുതൽ നിപ വൈറസ് സംബന്ധിച്ച ബോധവൽക്കരണ ക്ലാസ്സും ജില്ലാ മാനസിക ആരോഗ്യ കേന്ദ്രം ശുചീകരണപരിപാടിയും സംഘടിപ്പിക്കുന്നു. ജില്ലാ പഞ്ചായത്ത് വൈസ് പ്രസിഡണ്ട് എൻ കെ ഉദയപ്രകാശ് പരിപാടി ഉദ്ഘാടനം ചെയ്യും. യുവജനക്ഷേമബോർഡംഗം അഫ്‌സൽ കുഞ്ഞുമോൻ അദ്ധ്യക്ഷത വഹിക്കും. ആർഎംഒ ഡോ. ലക്ഷ്മി ബോധവൽക്കരണ ക്ലാസ്സ് നയിക്കും. ജില്ലാ യൂത്ത് പ്രോഗ്രാം ഓഫീസർ പി ആർ ശ്രീകല, ജില്ലാ കോർഡിനേറ്റർ ഒ എസ് സുബീഷ് എന്നിവർ പങ്കെടുക്കും.

നിപ്പ രോഗിയുമായി സമ്പർക്കത്തിലേർപ്പെട്ടിട്ടുള്ള പുതിയ കേസുകൾ ഒന്നും തന്നെ റിപ്പോർട്ട് ചെയ്തിട്ടില്ലെന്ന് തൃശൂർ ജില്ലാ മെഡിക്കൽ ഓഫീസർ അറിയിച്ചു. നിരീക്ഷണത്തിലുള്ളവർക്കാർക്കും തന്നെ ആശങ്കാജനകമായ ലക്ഷണങ്ങളൊന്നും തന്നെ നിലവിലില്ലയെന്ന് അറിയിച്ചു.
 

കേന്ദ്ര കാലാവസ്ഥ വകുപ്പിന്റെ മഴ പ്രവചനം അനുസരിച്ച് ജൂൺ ഏഴ്, എട്ട് തീയതികളിൽ ജില്ലയിൽ നേരിയ തോതിലുള്ള മഴയും ഒമ്പത്, 10 തീയതികളിൽ ജില്ലയിൽ മഞ്ഞ അലേർട്ടും പ്രഖ്യാപിച്ചു. ജില്ലയിലെ ഒറ്റപ്പെട്ടയിടങ്ങളിൽ ശക്തമായ മഴയ്ക്കുള്ള സാധ്യതയാണ് ഈ ദിവസങ്ങളിൽ പ്രവചിക്കപ്പെട്ടിരിക്കുന്നത്. മഞ്ഞ അലെർട്ട് പ്രകാരം കാലാവസ്ഥയെ കരുതലോടെ നിരീക്ഷിക്കണം. സാഹചര്യങ്ങൾക്കനുസരിച്ചു അപ്ഡേറ്റ് ചെയ്യും. ഭയപ്പെടേണ്ട സാഹചര്യം ഇല്ല. അപകട സാധ്യത അപ്ഡേറ്റ് ചെയ്യപ്പെടുന്നതനുസരിച്ചു മുന്നൊരുക്കങ്ങൾ നടത്തും.

മാള ബ്ലോക്ക് തല സ്‌കൂൾ പ്രവേശനോത്സവം എസ്. സി. ജി. എച്. എസ്. എസ്. കോട്ടക്കൽ സ്‌കൂളിൽ നടന്നു. മാള പഞ്ചായത്ത് പ്രസിഡന്റ് പി. കെ. സുകുമാരൻ പ്രവേശനോത്സവം ഉദ്ഘാടനം ചെയ്തു. ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർമാൻ ടി. പി. രവീന്ദ്രൻ അധ്യക്ഷത വഹിച്ചു. റോട്ടറി ക്ലബ്ബിന്റെ നേതൃത്വത്തിൽ കുട്ടികൾക്ക് പഠന കിറ്റ് വിതരണം ചെയ്തു. സ്‌കൂൾ പ്രധാന അദ്ധ്യാപിക സി ഫ്ള വറന്റ് വിഭ്യാഭ്യാസ മന്ത്രിയുടെ സന്ദേശം വായിച്ചു. ബി ആർ സി മാള സി ആർ സി കോർഡിനേറ്റർ സൈന ജോസഫ് പ്രവേശനോത്സവ സന്ദേശം പങ്കുവെച്ചു.

ഭാവിതലമുറയെ ഇല്ലാതാകാൻ ശ്രമിക്കുന്ന ലഹരി മാഫിയെ ജനകീയമായി നേരിടുമെന്ന് മുഖ്യമന്ത്രി പിണറായി വിജയൻ പറഞ്ഞു. സംസ്ഥാന പ്രവേശനോത്സവം തൃശൂരിലെ ചെമ്പൂച്ചിറ ഗവ. എച്ച് എസ് എസിൽ ഉദ്ഘാടനം ചെയ്തു സംസാരിക്കുകയായിരുന്നു മുഖ്യമന്ത്രി. ഊർജസ്വലമായ ഒരു യുവതയെ ഇല്ലാതാക്കാനുളള ശ്രമമാണ് ലഹരി മാഫിയ വിദ്യാഭ്യാസ സ്ഥാപനങ്ങൾ കേന്ദ്രീകരിച്ച് നടത്തുന്നത്. വലിയ വേരുകളാണ് ഇവർക്കുളളത്. ഇത്തരക്കാരെ വിദ്യാഭ്യാസ വകുപ്പിന്റെ നേതൃത്വത്തിൽ ജനകീയ പ്രചാരണം നടത്തി നേരിടും-മുഖ്യമന്ത്രി പറഞ്ഞു.

സംസ്ഥാന സര്‍ക്കാര്‍ നടപ്പിലാക്കിയ വിദ്യാഭ്യാസ യജ്ഞം നാട്ടുകാരും അധ്യാപകരും ഏറ്റെടുത്തതോടെ പുതിയ ഉയരങ്ങളിലേക്കു കുതിക്കുകയാണ് കുമ്പള ഗ്രാമപഞ്ചായത്തിലെ പേരാല്‍ ഗവണ്‍മെന്റ് ജൂനിയര്‍ ബേസിക് സ്‌കൂള്‍. ഒരു കാലത്ത് പ്രവേശനം തേടുന്ന കുട്ടികളുടെ എണ്ണം വളരെ കുറഞ്ഞ് കടുത്ത പ്രതിസന്ധി നേരിട്ട ഈ സ്‌കൂള്‍ ഇപ്രാവശ്യം ഒന്നാം ക്ലാസില്‍ നാലു ഡിവിഷനുകളോടെ മാതൃകാപരമായ നേട്ടവുമായി മുന്നേറുകയാണ്.