താനാളൂര്‍ ഗ്രാമപഞ്ചായത്ത്  പ്രാഥമികാരോഗ്യ കേന്ദ്രത്തോടനുബന്ധിച്ച് നിര്‍മ്മിച്ച കെട്ടിടത്തില്‍ ആരംഭിക്കുന്ന ഡയാലിസിസ് യൂണിറ്റിന്റെ ഉദ്ഘാടനം തദ്ദേശസ്വയംഭരണ വകുപ്പ് മന്ത്രി എ.സി.മൊയ്തിന്‍ നാളെ (ഫെബ്രുവരി 23) വൈകിട്ട് നാലിന് നിര്‍വഹിക്കും.
വി.അബ്ദുറഹിമാന്‍ എം.എല്‍.എയുടെ ആസ്തി വികസന ഫണ്ടില്‍ നിന്നും  67 ലക്ഷം രൂപ ചെലവഴിച്ചാണ് ഡയാലിസിസ് സെന്റര്‍ സജ്ജീകരിച്ചിരിക്കുന്നത്. പദ്ധതിയുടെ തുടര്‍ പ്രവര്‍ത്തനം സുഗമമാക്കാന്‍ പഞ്ചായത്ത് തലത്തില്‍ കിഡ്നി പേഷ്യന്റ്‌സ് വെല്‍ഫയര്‍ സൊസൈറ്റിക്ക് രൂപം നല്‍കിയിട്ടുണ്ട്.

സര്‍ക്കാരിന്റെ ആയിരം ദിനാഘോഷ പരിപാടിയില്‍ കൗതുകമായി ഏഴാം  ക്ലാസുകാരിയുടെ ചിത്രപ്രദര്‍ശനം. ചേന്നര വി.വി.യു.പി സ്‌കൂളിലെ വിദ്യാര്‍ത്ഥിനിയായ  സൗപര്‍ണിക രമേഷിന്റെ 17 ഓളം ചിത്രങ്ങളാണ് തിരൂര്‍ സാംസ്‌കാരിക സമുച്ചയത്തോട് ചേര്‍ന്നൊരുക്കിയ പ്രദര്‍ശന നഗരിയില്‍ പ്രദര്‍ശിപ്പിച്ചിട്ടുള്ളത്. വള്ളത്തോള്‍ നാരായണ മേനോന്‍, വൈക്കം മുഹമ്മദ് ബഷീര്‍, എസ്.കെ പൊറ്റക്കാട്, ഒ.വി വിജയന്‍ ,ലളിതാംബിക അന്തര്‍ജനം, കുഞ്ഞുണ്ണി മാഷ് തുടങ്ങിയവരുടെ  ചിത്രങ്ങളാണ് പ്രദര്‍ശനത്തിലുള്ളത്.

ബി ആര്‍ സി സമഗ്ര ശിക്ഷ വഴി വിദ്യാലയങ്ങളില്‍ നടത്തിയ പഠന പോഷണ പരിപാടികളുടെ പ്രവര്‍ത്തനങ്ങളും റിപ്പോര്‍ട്ടുകളും അവതരിപ്പിച്ച്  പൊതുവിദ്യാഭ്യാസ വകുപ്പിന്റെ സ്റ്റാള്‍ കൗതുകമാകുന്നു. ഗണിത വിജയം, ഹലോ ഇംഗ്ലീഷ്, മലയാളത്തിളക്കം, സുലിലി ഹിന്ദി, ശ്രദ്ധ തുടങ്ങിയ പദ്ധതികളുടെ പുരോഗമന റിപ്പോര്‍ട്ടുകളാണ് സ്റ്റാളില്‍ ഒരുക്കിയിരിക്കുന്നത്. ഒപ്പം കുട്ടികള്‍ക്ക്  കണക്കും ശാസ്ത്രവും രസകരമായി പഠിക്കാവുന്ന തരത്തില്‍ ഗണിത പസിലും  ശാസ്ത്ര പാര്‍ക്കും ഒരുക്കിയിട്ടുണ്ട്.

സര്‍ക്കാരിന്റെ ആയിരം ദിനാഘോഷത്തോടനുബന്ധിച്ച് തിരൂര്‍ സാംസ്‌കാരിക സമുച്ചയത്തിനോട് ചേര്‍ന്നൊരുക്കിയ പ്രദര്‍ശന സ്റ്റാളുകള്‍ പിആര്‍ ഡി ഡയറക്ടര്‍  ടി.വി സുബാഷ് ഐ എ എസ് സന്ദര്‍ശിച്ചു. ജില്ലാ ഇന്‍ഫര്‍മേഷന്‍ ഓഫീസര്‍ സി.അയ്യപ്പന്‍, അസി. എഡിറ്റര്‍ ശ്രീകാന്ത് എം.ഗിരിനാഥ്, ഡെപ്യൂട്ടി തഹസില്‍ദാര്‍ പി. ഉണ്ണി എന്നിവരും ഒപ്പമുണ്ടായിരുന്നു. 35 വകുപ്പുകളുടെ 85 ഓളം സ്റ്റാളുകളാണ് പ്രദര്‍ശനത്തില്‍  ഒരുക്കിയിരിക്കുന്നത്.

പൊതുവിദ്യാഭ്യാസ സംരക്ഷണ യജ്ഞത്തില്‍ പി.ടി.എ യുടെ പങ്ക് എന്ന വിഷയത്തില്‍ നാഷണല്‍ പാരന്റ്സ് അസോസിയേഷന്‍ (നാപ) ജില്ലാ ഇന്‍ഫര്‍മേഷന്‍ ഓഫീസുമായി സഹകരിച്ച് നാളെ (ശനി) രാവിലെ 10.30 ന് സെമിനാര്‍ സംഘടിപ്പിക്കുന്നു. ജില്ലയിലെ പി.ടി.എ പ്രസിഡണ്ടുമാര്‍,  വൈസ് പ്രസിഡണ്ടുമാര്‍,  എം.പി.ടി.എ പ്രസിഡണ്ടുമാര്‍ എന്നിവര്‍ പങ്കെടുക്കും. സര്‍ക്കാരിന്റെ ആയിരം ദിനാഘോഷങ്ങളുടെ ഭാഗമായി തിരൂര്‍ നഗരസഭ സാംസ്‌കാരിക സമുച്ചയത്തില്‍ നടക്കുന്ന പരിപാടികളുടെ  ഭാഗമായാണ് സെമിനാര്‍.  

ഇന്‍ഫര്‍മേഷന്‍ പബ്ലിക് റിലേഷന്‍ വകുപ്പും റോഡ് ആക്‌സിഡന്റ് ആക്ഷന്‍ ഫോറവും സംയുക്തമായി ഗതാഗത രംഗത്തെ നേട്ടങ്ങളും മാറ്റങ്ങളും എന്ന വിഷയത്തില്‍ വികസന സെമിനാര്‍ സംഘടിപ്പിക്കുന്നു.  ഫെബ്രുവരി 25ന് രാവിലെ 10ന് തിരൂര്‍ സാമന്‍ ഓഡിറ്റോറിയത്തില്‍ നടക്കുന്ന പരിപാടി തിരൂര്‍ നഗരസഭ ചെയര്‍മാന്‍  ബാവഹാജി ഉദ്ഘാടനം ചെയ്യും.  റോഡ് ആക്‌സിഡന്റ് ആക്ഷന്‍ ഫോറം സംസ്ഥാന പ്രസിഡന്റ് കെ.എം അബു അധ്യക്ഷത വഹിക്കും.  എ.ഡി.എം പി. സയ്യിദ് അലി മുഖ്യാതിഥിയും ആകും.

സര്‍ക്കാരിന്റെ ആയിരം ദിനാഘോഷത്തിന്റെ ഭാഗമായി ശ്രീശങ്കരാചാര്യ സംസ്‌കൃത സര്‍വ്വകലാശാല തിരൂര്‍ പ്രാദേശിക കേന്ദ്രം ഇന്‍ഫര്‍മേഷന്‍ ആന്റ് പബ്ലിക് റിലേഷന്‍ വകുപ്പിന്റെ സഹകരണത്തോടെ തിരൂര്‍ സാംസ്‌കാരിക സമുച്ചയത്തില്‍  സെമിനാര്‍ സംഘടിപ്പിച്ചു.  'ഭാഷയും സംസ്‌കാരവും' എന്ന വിഷയത്തില്‍ നടന്ന സെമിനാര്‍ എഴുത്തുകാരിയും സാമൂഹ്യ പ്രവര്‍ത്തകയുമായ ഡോ. പി.ഗീത ഉദ്ഘാടനം ചെയ്തു.

കേരള നഴ്‌സസ് ആന്റ് മിഡ് വൈവ്‌സ് കൗൺസിൽ തെരഞ്ഞെടുപ്പിൽ വോട്ടു രേഖപ്പെടുത്തിയ വോട്ടിംഗ് പേപ്പർ മാർച്ച് അഞ്ചിന് വൈകിട്ട് 5 മണിവരെ തപാൽ മുഖേനയും നേരിട്ടും കൗൺസിൽ ഓഫീസിൽ സ്വീകരിക്കുമെന്ന് വരണാധികാരി അറിയിച്ചു.

പി.എൻ.എക്സ്. 665/19