കോഴിക്കോട് ജില്ലയിലെ വിദ്യാഭ്യാസ വകുപ്പില്‍ ഫുള്‍ടൈം ജൂനിയര്‍ ലാംഗ്വേജ് ടീച്ചര്‍ (ഹിന്ദി) (കാറ്റഗറി നം. 277/17) തസ്തികയുടെ 2019 മെയ് 13 ന് നിലവില്‍ വന്ന ചുരുക്കപട്ടികയുടെ പകര്‍പ്പ് പി.എസ്.സി പ്രസിദ്ധീകരിച്ചു. ലിസ്റ്റ് ജില്ലാ ഇന്‍ഫര്‍മേഷന്‍ സെന്ററില്‍ പരിശോധനക്ക് ലഭിക്കും.

കെല്‍ട്രോണിന്റെ കോഴിക്കോടുള്ള നോളജ് സെന്ററില്‍ പ്രൊഫഷണല്‍ ഡിപ്ലോമ ഇന്‍ മൊബൈല്‍ ഫോണ്‍ ടെക്‌നോളജി കോഴ്‌സിലേക്ക് (പി.ഡി.എം.പി.ടി) അപേക്ഷ ക്ഷണിച്ചു. വിശദവിവരങ്ങള്‍ക്ക് 9847925335, 9947495335 എന്ന നമ്പറിലോ റാം മോഹന്‍ റോഡിലുള്ള കെല്‍ട്രോണ്‍ ഓഫീസുമായോ ബന്ധപ്പെടുക. 

ദേശീയ ഡങ്കിപ്പനി ദിനാചരണത്തിന്റെ ജില്ലാതല ഉദ്ഘാടനവും സെമിനാറും ഇന്ന് (മെയ് 16) രാവിലെ 10 മണിക്ക് മരുതോങ്കര പഞ്ചായത്ത് സാംസ്‌കാരിക നിലയത്തില്‍ നടക്കും. സെമിനാറില്‍ ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ.ജയശ്രീ വി മുഖ്യ പ്രഭാഷണവും ജില്ലാ സര്‍വയിലന്‍സ് ഒഫീസര്‍ ഡോ.ആശാ ദേവി വിഷയാവതരണവും നടത്തും. മെഡിക്കല്‍ ഓഫീസര്‍മാര്‍, ജില്ലാ മലേറിയാ ഓഫീസര്‍ മറ്റു പ്രോഗ്രാം ഓഫീസര്‍മാര്‍ തുടങ്ങിയവര്‍ സെമിനാറില്‍ വിഷയങ്ങള്‍ അവതരിപ്പിക്കും. കന്നുമ്മല്‍ ബ്ലോക്ക് പഞ്ചായത്ത് പ്രസിഡണ്ട് കെ.സജിത്ത്, മരുതോങ്കര ഗ്രാമപഞ്ചായത്ത് പ്രസിഡണ്ട് കെ.എം.സതി മറ്റു ജനപ്രതിനിധികള്‍ എന്നിവര്‍ പങ്കെടുക്കും.

മലപ്പുറം, എറണാകുളം, പാലക്കാട്, ഇടുക്കി ജില്ലകളില്‍ ഇടിയോടു കൂടിയ കനത്ത മഴയ്ക്ക് സാധ്യതയുണ്ടെന്ന് കേന്ദ്രകാലാവസ്ഥ നിരീക്ഷണ വകുപ്പ് അറിയിച്ചു. മേല്‍പറഞ്ഞ പ്രദേശങ്ങളില്‍ 30-40 കി.മി വരെ കാറ്റുവീശാനും സാധ്യതയുണ്ട്.

    കുടുംബശ്രീ മിഷന്‍ ഉപയോഗിച്ചതും കണ്ടം ചെയ്തതുമായ കെ.എല്‍ 10 എല്‍ 1883 നമ്പര്‍ ഐഷര്‍ ലോറി (2000 മോഡല്‍) മെയ് 25ന് ഉച്ചക്ക് രണ്ടിന് കുടുംബശ്രീ മിഷന്‍ ഓഫീസില്‍ ലേലം ചെയ്യും.  ദര്‍ഘാസുകള്‍ മെയ് 24ന് വൈകുന്നേരം അഞ്ചിനകം ലഭിക്കണം.

    തവനൂര്‍ ഗവ. മഹിളാ മന്ദിരത്തില്‍ കെയര്‍ പ്രൊവൈഡര്‍ ഒഴിവിലേക്ക് അപേക്ഷ ക്ഷണിച്ചു.  ഏഴാം ക്ലാസ് യോഗ്യതയുള്ള 25നും 50നും ഇടയില്‍ പ്രായമുള്ള സ്ത്രീകള്‍ക്ക്  ജൂണ്‍ 12 രാവിലെ 11 ന് നടക്കുന്ന കൂടിക്കാഴ്ചയ്ക്ക് പങ്കെടുക്കാം.  ജില്ലയിലുള്ളവര്‍ക്ക് മുന്‍ഗണന.  ഫോണ്‍ 0494 2699611.

    നാവിക സേനയില്‍ നിന്ന് വിരമിച്ച ജില്ലയിലെ വിമുക്തഭടന്‍മാരുടെ വിധവകള്‍ക്കായുള്ള ബോധവല്‍ക്കരണം മെയ് 28 രാവിലെ 11 മണി മുതല്‍ 12:30 വരെ ജില്ലാ സൈനിക ക്ഷേമ ഓഫീസില്‍ നടത്തും. വിവിധ ക്ഷേമ കാര്യങ്ങളെ സംബന്ധിച്ച് നാവികസേനാ പ്രതിനിധികള്‍ വിശദീകരിക്കും. ജില്ലയിലെ നാവികസേനാ വിമുക്തഭടന്‍മാരുടെ വിധവകള്‍ക്ക് പങ്കെടുക്കാം. ഫോണ്‍ : 04985 223380.

എംപ്ലോയബിലിറ്റി സെന്റര്‍ മുഖേന ജില്ലയിലെ പ്രമുഖ സ്വകാര്യ വിദ്യാഭ്യാസ സ്ഥാപനങ്ങളിലേക്ക് മോണ്ടിസോറി, പ്രൈമറി, എച്ച്.എസ്.എ വിഭാഗങ്ങളില്‍ വിവിധ തസ്തികകളിലേക്ക് അധ്യാപകരെ ആവശ്യമുണ്ട്. എംപ്ലോയബിലിറ്റി സെന്ററില്‍ മെയ്18 ന് രാവിലെ 10 ന് നടക്കുന്ന  കൂടിക്കാഴ്ചയില്‍ ടി.ടി.സി, ഡിഗ്രി, പി.ജി (ബി.എഡ്), മോണ്ടിസോറി യോഗ്യതയുള്ളവര്‍ക്ക് പങ്കെടുക്കാം.  ഫോണ്‍ : 04832 734 737.

അംശദായ കുടിശ്ശിക നിമിത്തം ലോട്ടറി ക്ഷേമനിധി അംഗത്വം റദ്ദായവര്‍ അംഗത്വം പുതുക്കുന്നതിന് പാസ്സ് ബുക്ക്, ടിക്കറ്റ് അക്കൌണ്ട് ബുക്ക്,  ടിക്കറ്റ് വാങ്ങിയ ബില്ലുകള്‍ സഹിതം ജൂണ്‍ 29വരെ ജില്ലാ ഭാഗ്യക്കുറി ക്ഷേമനിധി ഓഫീസില്‍  അപേക്ഷ നല്‍കാം.