ലോക്‌സഭാ തെരഞ്ഞെടുപ്പിന്റെ വോട്ടെണ്ണലിനായി നിയമനം ലഭിച്ച ഉദ്യോഗസ്ഥര്‍ക്ക് കളക്ടറേറ്റ് മിനി കോണ്‍ഫറന്‍സ് ഹാളില്‍ ഇന്നും നാളെയും (മേയ് 17, 18) പരിശീലനം നല്‍കും. കൗണ്ടിങ് സൂപ്പര്‍വൈസര്‍മാര്‍, കൗണ്ടിങ് അസിസ്റ്റന്റുമാര്‍, മൈക്രോ ഒബ്‌സര്‍വര്‍ എന്നിവര്‍ക്കാണ് പരിശീലനം നല്‍കുന്നത്. ഇന്ന് (മേയ് 17) രാവിലെ 9.30നും ഉച്ചയ്ക്ക് 1.30 നും നാളെ (18) രാവിലെ 9.30നും മൂന്നു ബാച്ചുകളിലുമായാണ് പരിശീലനം. മൈക്രോ ഒബ്‌സര്‍വര്‍മാര്‍ക്കുള്ള പരിശീലന പരിപാടി ഈ മാസം 21 ന് രാവിലെ 9.30നും നടക്കും. 

ദേശീയ  ഡെങ്കിപ്പനി ദിനാചരണം
ജില്ലാതല ഗൃഹസന്ദര്‍ശന പരിപാടിക്ക് പെരുമ്പാവൂരില്‍ തുടക്കം 

കൊച്ചി: ദേശീയ ഡെങ്കിപ്പനി ദിനാചരണത്തിന്റെ ഭാഗമായി ജില്ലയില്‍  ഊര്‍ജ്ജിത ഉറവിടനിര്‍മ്മാര്‍ജ്ജന ഗൃഹസന്ദര്‍ശന ബോധവത്ക്കരണ പരിപാടിക്ക്  തുടക്കം കുറിച്ചു. ഡെങ്കിപ്പനി പ്രതിരോധിക്കുക എന്ന ലക്ഷ്യത്തോടെ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില്‍ ആരോഗ്യപ്രവര്‍ത്തകര്‍, ആശാ ,അങ്കണവാടി, കുടുംബശ്രീ പ്രവര്‍ത്തകര്‍, നഴ്‌സിങ് വിദ്യാര്‍ത്ഥികള്‍ എന്നിവരടങ്ങുന്ന സംഘം ഭവന സന്ദര്‍ശനം നടത്തി കൊതുക് വളരുന്ന സാഹചര്യങ്ങള്‍ ഇല്ലാതാക്കുകയും  ബോധവല്‍ക്കരണ പ്രവര്‍ത്തനങ്ങള്‍ നടത്തുകയും ചെയ്തു. 

പട്ടികവര്‍ഗ്ഗ വിദ്യാര്‍ത്ഥികളുടെ അവാര്‍ഡിന് അപേക്ഷിക്കാം

കൊച്ചി: എറണാകുളം ജില്ലയിലെ എസ്.എസ്.എല്‍.സി മുതല്‍ പോസ്റ്റ് ഗ്രാജ്യുവേഷന്‍ വരെയുള്ള പരീക്ഷകളില്‍ ഉന്നത വിജയം നേടി ആദ്യ പ്രാവശ്യം പാസ്സായ പട്ടികവര്‍ഗ്ഗ വിദ്യാര്‍ത്ഥികളുടെ പ്രോത്സാഹന അവാര്‍ഡിനുള്ള അപേക്ഷ ക്ഷണിച്ചു. എസ്.എസ്.എല്‍.സിക്ക് 6 ബി, 4 സി ഗ്രേഡുകളും അതില്‍ കൂടുതല്‍ ലഭിച്ചവരും സി.ബി.എസ്.ഇ (10th) യ്ക്ക് 3 ബി, 2 സി , പ്ലസ് ടു വിന് 4 ബി, 2 സി, ഡിഗ്രിക്ക് ഫസ്റ്റ് ക്ലാസ്, പോസ്റ്റ് ഗ്രാജ്യുവേഷനും ഫസ്റ്റ് ക്ലാസ് ലഭിച്ചവരും അവാര്‍ഡിന് യോഗ്യരാണ്.

മേയ് 17ന് നടത്താനിരുന്ന എൽ.പി./യു.പി  അറബിക്/ഉറുദു/സംസ്‌കൃതം ഭാഷാധ്യാപക യോഗ്യതാപരീക്ഷ മേയ് 27ലേക്ക്  മാറ്റിയതായി പരീക്ഷാഭവൻ അറിയിച്ചു.  പരീക്ഷാർഥികളുടെ കാൻഡിഡേറ്റ് ലിസ്റ്റ് www.keralapareekshabhvan.in ൽ പ്രസിദ്ധീകരിച്ചിട്ടുണ്ട്.

പി.എൻ.എക്സ്. 1348/19

കേരള ഷോപ്‌സ് ആന്റ് കൊമേഴ്‌സ്യൽ എസ്റ്റാബ്ലിഷ്‌മെന്റ് തൊഴിലാളി ക്ഷേമനിധി ബോർഡിലെ അംഗങ്ങളുടെ മക്കളിൽ സി.ബി.എസ.്ഇ/ഐ.സി.എസ്.ഇ/സ്റ്റേറ്റ് സിലബസുകളിലെ 10, പ്ലസ് ടൂ പരീക്ഷകളിൽ മികച്ച വിജയം നേടിയവർക്ക് ക്യാഷ് അവാർഡ് നൽകുന്നതിന് അപേക്ഷ ക്ഷണിച്ചു. സ്റ്റേറ്റ് സിലബസിൽ എല്ലാ വിഷയങ്ങൾക്കും എ+, സി.ബി.എസ്.ഇയിൽ എല്ലാ വിഷയങ്ങൾക്കും എ1, ഐ.സി.എസ്.ഇയിൽ എല്ലാ വിഷയങ്ങൾക്കും 90 ശതമാനമോ, അതിലധികമോ നേടിയവർക്ക് അപേക്ഷിക്കാം.

സംസ്ഥാനത്തെ സ്‌കൂളുകളിൽ നടപ്പാക്കുന്ന ഉച്ചഭക്ഷണ പദ്ധതി പ്രവർത്തനങ്ങൾക്കായി നടപ്പുവർഷം 342 കോടി രൂപയുടെ പദ്ധതിക്ക് ഡൽഹിയിൽ ചേർന്ന കേന്ദ്ര മാനവവിഭവശേഷി വികസന മന്ത്രാലയത്തിന്റെ പ്രോഗ്രാം അപ്രൂവൽ ബോർഡ് യോഗം അംഗീകാരം നൽകി. ഇതിൽ 219 കോടി രൂപ കേന്ദ്ര വിഹിതമാണ്.

സംസ്ഥാന സർക്കാരിന് വേണ്ടി പൊതുവിദ്യാഭ്യാസവകുപ്പ് സെക്രട്ടറി എ.ഷാജഹാൻ ആണ് 342 കോടി രൂപയുടെ പ്രൊപ്പോസൽ കേന്ദ്രസർക്കാരിന് മുൻപാകെ അവതരിപ്പിച്ചത്.

കേരള സർക്കാർ സ്ഥാപനമായ ഐ.എച്ച്.ആർ.ഡിയുടെ കീഴിൽ പ്രവർത്തിക്കുന്ന ധനുവച്ചപുരം കോളേജ് ഓഫ് അപ്ലൈഡ് സയൻസിൽ ഒന്നാംസെമസ്റ്റർ ബി.എസ്.സി കമ്പ്യൂട്ടർ സയൻസ്, ബി.എസ്.സി ഇലക്‌ട്രോണിക്‌സ്, ബി.കോം (കമ്പ്യൂട്ടർ ആപ്ലിക്കേഷൻ) കോഴ്‌സുകളിലെ മെറിറ്റ് സീറ്റുകളിലേക്ക് പ്രവേശനത്തിന് അപേക്ഷ ക്ഷണിച്ചു. അപേക്ഷാഫോമും പ്രോസ്‌പെക്ടസും കോളേജ് ഓഫീസിൽ ലഭ്യമാണ്. കൂടാതെ  www.ihrd.ac.inൽ നിന്നും ഡൗൺലോഡ് ചെയ്യാം. കൂടുതൽ വിവരങ്ങൾക്ക്: 0471-2234374, 8547005065.

പി.എൻ.എക്സ്. 1344/19