പുഴ സംരക്ഷണത്തിന് കിഫ്ബി ഫണ്ട് കണ്ടെത്തുമെന്ന് വ്യവസായ  വകുപ്പ് മന്ത്രി എ.സി. മൊയ്തീന്‍ പറഞ്ഞു. പൊന്നായി കോള്‍ സംരക്ഷണ സമിതിയുടെ ആഭിമുഖ്യത്തില്‍ കര്‍ഷകസംഗമം പഴഞ്ഞി മഹാന്‍ ഓഡിറ്റോറിയത്തില്‍ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. ജനപ്രതിനിധികളുടേയും ഉദ്യോഗസ്ഥരുടേയും കര്‍ഷകരുടേയും ഒരുമയോടെയുള്ള പ്രവര്‍ത്തനം കൃഷിഭൂമി സംരക്ഷണം മെച്ചപ്പെടുത്തി നെല്ലുല്പാദനം മെച്ചപ്പെടുത്താനും കൂട്ടായശ്രമം വേണമെന്നും മന്ത്രി ഓര്‍മ്മിപ്പിച്ചു. ഉല്പാദനക്ഷതയുള്ള കൃഷിരീതിക്കാവശ്യമായ രൂപരേഖ സമര്‍പ്പിച്ചാല്‍ സര്‍ക്കാര്‍ അതു നടപ്പാക്കാന്‍ പ്രതിജ്ഞാബദ്ധമാണെന്നും മന്ത്രി അറിയിച്ചു.

ദീര്‍ഘകാലമായി കിഡ്‌നി രോഗത്തിന് ചികിത്സയില്‍ കഴിയുന്ന ഇയ്യാല്‍ സ്വദേശി എടക്കളത്തൂര്‍ ബെന്നിയ്ക്ക് മുഖ്യമന്ത്രിയുടെ ദുരിതാശ്വാസനിധിയില്‍ നിന്ന് 3 ലക്ഷം രൂപ ചികിത്സാധനസഹായം നല്‍കി. ധനസഹായം ബെന്നിയുടെ വീട്ടില്‍ എത്തി വ്യവസായ മന്ത്രി എ.സി. മൊയ്തീന്‍ കൈമാറി.

കടങ്ങോട് ഗ്രാമപഞ്ചായത്ത് പ്രസിഡണ്ട് രമണി രാജന്‍, വൈസ്പ്രസിഡണ്ട് സുഹിജസുമേഷ്, സ്ഥിരം സമിതി അദ്ധ്യക്ഷരായ കെ.ആര്‍ സിമി, അഡ്വ കെ.എം നൗഷാദ് അംഗങ്ങളായ സന്ധ്യാ ബാലകൃഷ്ണന്‍, കെ.കെ മണികണ്ഠന്‍, പി.സി ഗോപാലകൃഷ്ണന്‍, റവന്യു ഉദ്യോഗസ്ഥര്‍ തുടങ്ങിയവര്‍ സന്നിഹിതരായിരുന്നു.
 

ആരോഗ്യ ശാസ്ത്ര സര്‍വ്വകലാശാല ജൂലൈയില്‍ പരീക്ഷ നടത്തി ഫലം പ്രസിദ്ധീകരിച്ച ഫൈനല്‍ ബിഡിഎസ്സ പാര്‍ട്ട് 2 സപ്ലിമെന്ററി (2012, 2011, 2010 പ്രവേശനം) പരീക്ഷയുടെ റീടോട്ടലിങ്ങ് ഫലം പ്രസിദ്ധീകരിച്ചു.

പ്രാക്ടിക്കല്‍ പരീക്ഷാ സെക്കന്റ് പ്രൊഫഷണല്‍ ബി എ എം എസ്സ് ഡിഗ്രി പാര്‍ട്ട് 1, പാര്‍ട്ട് 2 സപ്ലിമെന്ററി (2011, 2010 പ്രവേശനം) നവംബര്‍ ഏഴുമുതല്‍ ആരംഭിക്കുന്ന പരീക്ഷാ ടൈംടേബിള്‍ പ്രസിദ്ധീകരിച്ചു.
 

താലൂക്ക് വികസനസമിതിയോഗം തൃശൂര്‍ താലൂക്ക് ഓഫീസ് കോണ്‍ഫറന്‍സ് ഹാളില്‍ ചേര്‍ന്നു. അറിയിപ്പ് നല്‍കിയിട്ടും താലൂക്ക് വികസന സമിതി യോഗത്തില്‍ പല വകുപ്പ് ഉദ്യോഗസ്ഥരും പങ്കെടുക്കാത്തതില്‍ യോഗം പ്രതിഷേധം രേഖപ്പെടുത്തി. പഞ്ചായത്ത്/ബ്ലോക്ക് പ്രസിഡണ്ടുമാര്‍ ഉള്‍പ്പെടെയുള്ള ജനപ്രതിനിധികള്‍ യോഗത്തില്‍ പങ്കെടുത്തിട്ടും ഉദ്യോഗസ്ഥര്‍ പങ്കെടുക്കാതിരിക്കുന്നത് ഗൗരവമായി കാണുമെന്നും ഇക്കാര്യം കൃഷി വകുപ്പ് മന്ത്രിയുടെ ശ്രദ്ധയില്‍ കൊണ്ടുവരാനും യോഗം തീരുമാനിച്ചു.

തൃശ്ശൂര്‍ ഗവ.മെഡിക്കല്‍ കോളേജിലെ വിവിധ വകുപ്പുകളില്‍ കരാറടിസ്ഥാനത്തില്‍ ലക്ചറര്‍/ അസിസ്റ്റന്റ് പ്രൊഫസര്‍മാരെ നിയമിക്കുന്നു. നിബന്ധനകള്‍ക്ക് വിധേയമായി പ്രതിമാസം 35,000 രൂപ വേതനത്തില്‍ ഒരു വര്‍ഷത്തേയ്ക്കാണ് നിയമനം. ഏറ്റവും കുറഞ്ഞ യോഗ്യത എം.ബി.ബി.എസ് ബിരുദം.

ആര്‍ദ്രം പദ്ധതയില്‍ ഉള്‍പ്പെടുത്തി വേലൂര്‍ പ്രാഥമികാരോഗ്യ കേന്ദ്രത്തെ കുടുംബാരോഗ്യ ക്ഷേമ കേന്ദ്രമായി ഉയര്‍ത്തിയതിന്റെ ഉദ്ഘാടനം വ്യാവസായ വകുപ്പ് മന്ത്രി എ.സി. മൊയ്തീന്‍ നിര്‍വഹിച്ചു. വേലൂര്‍ ഗ്രാമപഞ്ചായത്ത് പ്രസിഡണ്ട് ഷേര്‍ളി ദിലീപ്കുമാര് അദ്ധ്യക്ഷത വഹിച്ചു. ജില്ലാ മെഡിക്കല്‍ ഓഫീസര്‍ ഡോ. കെ. സുഹിത പദ്ധതി വിശദീകരിച്ചു.

വേലൂര്‍ ഗ്രാമ പഞ്ചായത്ത് പാത്രമംഗലം കുടുംബശ്രീ ഇരുപതാം വാര്‍ഷികം പാത്രമംഗലം സാംസ്‌ക്കാരിക നിലയത്തില്‍ വ്യാവസായ വകുപ്പ് മന്ത്രി എ.സി.മൊയ്തീന്‍ ഉദ്ഘാടനം ചെയ്തു. സ്ത്രീ ശാക്തീകരണത്തിലും ദാരിദ്ര്യ നിര്‍മ്മാര്‍ജ്ജനത്തിലും കുടുംബശ്രീ നല്‍കിയ സംഭാവനകള്‍ അനുസ്മരിച്ചു കൊണ്ടായിരുന്നു ആഘോഷങ്ങള്‍ക്ക് തുടക്കം കുറിച്ചത്.

സമൂഹത്തിന്റെ വിവിധ മേഖലകളില്‍ വ്യക്തിമുദ്ര പതിപ്പിച്ച വരെ ആദരിക്കുകയും ഉന്നത വിജയം നേടിയ വിദ്യാര്‍ത്ഥികളെ അനുമോദിക്കുകയും ചെയ്തു. വേലൂര്‍ ഗ്രാമപഞ്ചായത്ത് പ്രസിഡണ്ട് ഷേര്‍ളി ദിലീപ്കുമാര്‍ അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡണ്ട് വി. സുമതി മുഖ്യാതിഥിയായി.

തയ്യല്‍ തൊഴിലാളി ക്ഷേമനിധി ബോര്‍ഡില്‍ നിന്നും പെന്‍ഷന്‍ ലഭിക്കുന്നവര്‍ ആധാര്‍ കാര്‍ഡ് സമര്‍പ്പിച്ചിട്ടില്ലെങ്കില്‍ നവംബര്‍ 20നകം ജില്ലാ ഓഫീസില്‍ ആധാര്‍ നല്‍കണം.

കീടനാശിനികളുടെയും  രാസവളങ്ങളുടെയും ഉപയോഗത്തിന് നിയന്ത്രണം കൊണ്ടുവരുമെന്ന് കൃഷി വകുപ്പ് മന്ത്രി വി.എസ് സുനില്‍കുമാര്‍ പറഞ്ഞു. കൊടുങ്ങല്ലൂര്‍ താലൂക്ക്  പ്രാഥമിക കാര്‍ഷിക ഗ്രാമവികസന ബാങ്കും ഫാര്‍മേഴ്‌സ് ക്ലബും ചേര്‍ന്ന് നബാര്‍ഡിന്റെ സഹായത്തോടെ സംഘടിപ്പിച്ച കാര്‍ഷക സെമിനാര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കൃഷി വകുപ്പും കുടുംബശ്രീയും ചേര്‍ന്ന് ഗ്രാമചന്തകളെ പ്രോത്സാഹിപ്പിക്കും.

ഇരുപത്തിരണ്ടാം ബാച്ച് ഫയര്‍മാന്‍ പാസ്സിംഗ് ഔട്ട് പരേഡ് ഇന്ന് (നവംബര്‍ 5) രാവിലെ 6.45 ന് വിയ്യൂര്‍ ഫയര്‍ ആന്‍ഡ് റെസ്‌ക്യൂ സര്‍വ്വീസസ് അക്കാദമിയില്‍ നടക്കും. മുഖ്യമന്ത്രി പിണറായി വിജയന്‍ അഭിവാദ്യം സ്വീകരിക്കും.

പുതുതായി നിര്‍മ്മിച്ച ബ്രീത്തിങ്ങ് അപ്പാരറ്റസ് പരിശീലന കേന്ദ്രത്തിന്റെ ഉദ്ഘാടനവും മുഖ്യമന്ത്രി നിര്‍വഹിക്കും. ഫയര്‍ ആന്റ് റെസ്‌ക്യൂ സര്‍വ്വീസസ് ഡയറക്ടര്‍ ജനറല്‍, അക്കാദമി ഡയറക്ടര്‍മാര്‍ തുടങ്ങിയവര്‍ സംബന്ധിക്കും.