നാഷണല്‍ ആയുഷ് മിഷന്‍ കാരുണ്യ-വയോമിത്രം പദ്ധതിയുടെ ഭാഗമായി കൊയിലാണ്ടി താലൂക്ക് ഹോമിയോപ്പതി ആശുപത്രിയില്‍ പാലിയേറ്റീവ് വളണ്ടിയര്‍മാര്‍ക്ക് ബോധവത്കരണ ക്ലാസ് സംഘടിപ്പിച്ചു. നഗരസഭ വൈസ് ചെയര്‍പേഴ്‌സണ്‍ അഡ്വ. കെ സത്യന്‍ ഉദ്ഘാടനം നിര്‍വഹിച്ചു. നഗരസഭ സിഡിഎസ് ഹാളില്‍ നടന്ന ചടങ്ങില്‍ വിദ്യാഭ്യാസ സ്ഥിരം സമിതി അധ്യക്ഷ നിജില പറവക്കൊടി അധ്യക്ഷയായി. ക്ഷേമകാര്യ സ്ഥിരം സമിതി അധ്യക്ഷന്‍ കെ ഷിജു മാസ്റ്റര്‍, വാര്‍ഡ് കൗണ്‍സിലര്‍ രജീഷ്, താലൂക്ക് ഹോമിയോ ആശുപത്രി ആര്‍എംഒ ഡോ. മുഹമ്മദ് തസ്‌നീം, കാരുണ്യ പ്രോജക്ട് മെഡിക്കല്‍ ഓഫിസര്‍ ഡോ. എം ആതിര വിശ്വനാഥന്‍, ഡോ. ഇ കെ റസ്മിന എന്നിവര്‍ സംസാരിച്ചു. 

വയനാട് ഗവ. മെഡിക്കൽ കോളേജിലെ പ്രഥമ മെഡിസിൻ ബാച്ചിലെ പ്രഥമ വിദ്യാർത്ഥിയായി രാജസ്ഥാൻ സ്വദേശിനി. രണ്ടാം റൗണ്ടിൽ അഖിലേന്ത്യാ മെഡിക്കൽ പ്രവേശന ക്വാട്ടയിലാണ് ജയ്പൂർ സ്വദേശിനിയായ വിദ്യാർത്ഥിനി വെള്ളിയാഴ്ച്ച പ്രവേശനം പൂർത്തിയാക്കിയത്. 

മീനങ്ങാടി ഇലക്ട്രിക്കൽ സെക്ഷൻ പരിധിയിലെ മീനങ്ങാടി ടൗൺ, ബിഎസ്എൻഎൽ, ആരോഗ്യ, പിബിഎം, ബസ് സ്റ്റാൻഡ് , നെച്ചിയൻ ബിൽഡിംഗ്, ത്രിവേണി, ശാലോം ബിൽഡിംഗ്, ഫെയ്മസ്, ട്രെൻഡ്സ്, 54 ട്രാൻസ്ഫോർ പ്രദേശങ്ങളിൽ ഇന്ന്  (സെപ്റ്റംബർ 20)  രാവിലെ 8 മുതൽ വൈകിട്ട് 4 വരെ വൈദ്യുതി മുടങ്ങും.

 പനമരം ഐസിഡിഎസ് പ്രൊജക്ടിന് കീഴിലെ പുൽപള്ളി, പൂതാടി, മുള്ളൻകൊല്ലി ഗ്രാമപഞ്ചായത്തുകളിലെ അങ്കണവാടികളിലേക്ക്  പാൽ വിതരണം ചെയ്യാന്‍ വ്യക്തികള്‍ അല്ലെങ്കിൽ സ്ഥാപനങ്ങളില്‍ നിന്ന് ടെന്‍ഡര്‍ ക്ഷണിച്ചു. ടെൻഡറുകൾ സെപ്റ്റംബര്‍ 30 രാവിലെ   11.45 വരെ സ്വീകരിക്കും. ഫോണ്‍: 04936 240062.

കേരള കള്ളുവ്യവസായത്തൊഴിലാളി ക്ഷേമനിധി ബോർഡിൽ അംഗങ്ങളായ തൊഴിലാളികളുടെ മക്കളിൽ നിന്ന് ലാപ്ടോപ്പിനായി അപേക്ഷ ക്ഷണിച്ചു. കേന്ദ്ര- സംസ്ഥാന എൻട്രൻസ് കമ്മീഷൻ നടത്തുന്ന പ്രവേശന പരീക്ഷകളിലൂടെ കേരളത്തിലെ സർക്കാർ-സർക്കാർ അംഗീകൃത കോളേജുകളിൽ ഒന്നാം വർഷം പ്രവേശനം നേടിയവർക്കാണ് അവസരം. യോഗ്യരായവർ ഒക്ടോബര് 15 നകം അപേക്ഷകൾ നൽകണം. വിശദ വിവരങ്ങൾ വെൽഫെയർ ഫണ്ട് ഇൻസ്പെക്ടർ ഓഫീസിൽ ലഭ്യമാണ്. ഫോൺ: 0495 2384355.

ജല അതോറിറ്റിയുടെ ജില്ലയിലെ വിവിധ ജല പരിശോധന ലാബുകളിലേക്ക് ഡെപ്യൂട്ടി ക്വാളിറ്റി മാനേജര്‍/ടെക്നിക്കൽ മാനേജര്‍ (കെമിക്കൽ) തസ്തികയിലേക്ക് താത്കാലിക നിയമനം നടത്തുന്നു. ബിഎസ്‍സി കെമിസ്ട്രിയും ജലപരിശോധന മേഖലയിൽ മൂന്ന് വര്‍ഷത്തെ പ്രവൃത്തി പരിചയവുമാണ് യോഗ്യത. എംഎസ്‍സി കെമിസ്ട്രി യോഗ്യതയുള്ളവര്‍ക്ക് രണ്ട് വര്‍ഷത്തെ പ്രവൃത്തി പരിചയം മതിയാവും. ഐഎസ്ഒ പരിശീലനം അഭികാമ്യം. പ്രായപരിധി 48. ബയോഡേറ്റ, യോഗ്യത, വയസ്സ് എന്നിവ തെളിയിക്കുന്ന രേഖകളുടെ അസലുമായി  സെപ്റ്റംബര്‍ 26 രാവിലെ 11 ന് സുൽത്താൻ ബത്തേരി ജല അതോറിറ്റി ജില്ലാ ലാബിൽ നടക്കുന്ന അഭിമുഖത്തിൽ പങ്കെടുക്കണം. ഫോൺ:  0495 2374570.

മാനന്തവാടി ട്രൈബൽ ഡവലപ്മെന്റ് ഓഫീസിനു കീഴിലുളള വാളേരി (ഗേൾസ്), അഞ്ചുകുന്ന് (ബോയ്‌സ്) പനമരം (ഗേൾസ്), തൃശ്ശിലേരി (ഗേൾസ്) പ്രീ മെട്രിക്ക് ഹോസ്റ്റലുകളിലേക്ക് ദിവസ വേതനാടിസ്ഥാനത്തിൽ വാർഡൻ നിയമനം നടത്തുന്നു. അടിസ്ഥാന യോഗ്യത പത്താംതരം. പ്രവൃത്തി പരിചയമുളളവർക്ക് മുൻഗണന. മാനന്തവാടി താലൂക്ക് പരിധിയിലെ സ്ഥിരതാമസക്കാരായ 25 നും 50 നുമിടയിൽ പ്രായമുള്ള പട്ടികവർഗ വിഭാഗക്കാർക്കാണ് അവസരം. സ്വയം തയ്യാറാക്കിയ ബയോഡാറ്റ, ജാതി, വിദ്യാഭ്യാസ യോഗ്യത, തൊഴിൽ പരിചയം എന്നിവയുടെ അസലുമായി  സെപ്റ്റംബർ 24 ന് രാവിലെ 11 ന് മാനന്തവാടി പട്ടികവർഗ വികസന ഓഫീസിൽ  നടക്കുന്ന വാക്ക് ഇൻ ഇൻറർവ്യൂവിൽ പങ്കെടുക്കണം. ഫോൺ: 04935-240210. 

മാനന്തവാടി ശിശുവികസന വകുപ്പിന് കീഴിലെ കല്ലോടി അങ്കണവാടിയില്‍ പ്രവര്‍ത്തനമാരംഭിക്കുന്ന ക്രഷിലേക്ക്
ക്രഷ് വര്‍ക്കര്‍, ക്രഷ് ഹെല്‍പ്പര്‍ തസ്തികകളിലേക്ക്  വനിതകളിൽ നിന്ന് അപേക്ഷ ക്ഷണിച്ചു. എടവക ഗ്രാമപഞ്ചായത്തിലെ സ്ഥിരതാമസക്കാർക്ക് അപേക്ഷിക്കാം. ഒന്നാം വാർഡിലെ സ്ഥിരതാമസക്കാർക്ക് മുൻഗണന. പ്രായം 18-35. 

ഒക്ടോബർ മൂന്ന് മുതൽ 18 വരെ ജില്ലയിലെ വിവിധ സ്ഥലങ്ങളിലായി കേരള മോട്ടോർ തൊഴിലാളി ക്ഷേമനിധി ബോർഡ് കുടിശ്ശിക നിവാരണ ക്യാമ്പ് സംഘടിപ്പിക്കുന്നു. ഇതിനോടനുബന്ധിച്ച് സെപ്റ്റംബർ 22, 23 തിയ്യതികളിലായി ജില്ലയിൽ വാഹന പ്രചാരണ യാത്ര നടത്തും. സെപ്റ്റംബർ 22 ന് രാവിലെ 9 ന് കൽപ്പറ്റ പുതിയ ബസ്സ്റ്റാൻഡ് പരിസരത്ത് കൽപ്പറ്റ മുൻസിപ്പൽ ചെയർമാൻ ടി ജെ ഐസക്ക് ഫ്ലാഗ് ഓഫ് ചെയ്യും. കൽപ്പറ്റ  പുതിയ ബസ് സ്റ്റാൻഡ് മുതൽ മുൻസിപ്പൽ ഓഫീസ് വരെ വാഹന റാലി ഉണ്ടായിരിക്കും.