പരിശീലനം ഇന്ന് (സെപ്റ്റംബര്‍ 18ന്)

സംസ്ഥാന സര്‍ക്കാരും തദ്ദേശസ്ഥാപനങ്ങളും കൈവരിച്ച നേട്ടങ്ങള്‍ അവതരിപ്പിക്കുന്ന വികസന സദസ്സുകള്‍ ജില്ലയിലെ എല്ലാ തദ്ദേശസ്ഥാപനങ്ങളിലും സെപ്റ്റംബര്‍ 22 മുതല്‍ ഒക്ടോബര്‍ 20 വരെ സംഘടിപ്പിക്കും. വികസന സദസ്സ് റിസോഴ്‌സ് പേഴ്‌സണ്‍ന്മാര്‍ക്കുള്ള ഓണ്‍ലൈന്‍ പരിശീലനം സെപ്റ്റംബര്‍ 18ന് രാവിലെ 11ന് കാസര്‍കോട് കളക്ടറേറ്റ് മിനി കോണ്‍ഫറന്‍സ് ഹാളില്‍ നടക്കും.

കേരള സ്റ്റേറ്റ് ഇലക്ട്രിസിറ്റി ലൈസന്‍സിങ് ബോര്‍ഡിന്റെ 2024 ലെ വയര്‍മാന്‍ പരീക്ഷ വിജയിച്ചവര്‍ക്കുള്ള ഏകദിന വൈദ്യുത സുരക്ഷാ പരിശീലന ക്ലാസ് സെപ്റ്റംബര്‍ 28 ന് നടക്കും. പാലക്കാട് ഇലക്ട്രിക്കല്‍ ഇന്‍സ്പെക്ടറേറ്റിന്റെ ആഭിമുഖ്യത്തിലാണ് ക്ലാസ്. പാലക്കാട് ലയണ്‍സ് സ്‌കൂളില്‍ രാവിലെ ഒന്‍പത് മുതല്‍ ഒരു മണി വരെ ക്ലാസ് നടക്കും. പരീക്ഷ വിജയിച്ചവര്‍ നിര്‍ബന്ധമായും ക്ലാസില്‍ പങ്കെടുക്കണമെന്ന് ഇലക്ട്രിക്കല്‍ ഇന്‍സ്പെക്ടര്‍ അറിയിച്ചു. ഫോണ്‍: 0491 2972023, eipalakkad1@gmail.com.

മരുത റോഡ് സര്‍ക്കാര്‍ ടെക്നിക്കല്‍ ഹൈസ്‌കൂളില്‍ എച്ച്.എസ്.ടി മാത്തമാറ്റിക്സ് തസ്തികയില്‍ ഒഴിവ്. ദിവസവേതനാടിസ്ഥാനത്തില്‍ താല്‍ക്കാലികമായാണ് നിയമനം. ബി.എസ്.സി മാത്തമാറ്റിക്സ്, ബി.എഡ്, കെ.ടെറ്റ് എന്നിവയാണ് യോഗ്യത. ഉദ്യോഗാര്‍ഥികള്‍ സര്‍ട്ടിഫിക്കറ്റുകള്‍ സഹിതം സെപ്റ്റംബര്‍ 18 ന് രാവിലെ പത്തിന് സ്‌കൂളില്‍ നടക്കുന്ന അഭിമുഖത്തിന് എത്തണമെന്ന് സൂപ്രണ്ട് അറിയിച്ചു. ഫോണ്‍: 0491 2572038, 944752238

കേരള സര്‍ക്കാര്‍ പൊതുമേഖലാ സ്ഥാപനമായ കെല്‍ട്രോണ്‍ നടത്തുന്ന ജേണലിസം കോഴ്സുകളിലേക്ക് അപേക്ഷിക്കാം. പി.ജി ഡിപ്ലോമ ഇന്‍ അഡ്വാന്‍സ്ഡ് ജേണലിസം ആന്‍ഡ് മീഡിയ സ്ട്രാറ്റജീസ്, പോസ്റ്റ്ഡിപ്ലോമ ഇന്‍ അഡ്വാന്‍സ്ഡ് ജേണലിസം ആന്‍ഡ് മീഡിയ സ്ട്രാറ്റജീസ്, ഡിപ്ലോമ ഇന്‍ അഡ്വാന്‍സ്ഡ് ജേണലിസം ആന്‍ഡ് മീഡിയ സ്ട്രാറ്റജീസ് എന്നീ കോഴ്സുകളിലേക്കാണ് അപേക്ഷ ക്ഷണിച്ചത്. ബിരുദം/ പ്ലസ്ടു യോഗ്യതയുള്ളവര്‍ക്ക് അപേക്ഷിക്കാം. താല്‍പര്യമുള്ളവര്‍ സെപ്റ്റംബര്‍ 25 ന് മുമ്പായി പാലക്കാട് മഞ്ഞക്കുളം റോഡില്‍ പ്രവര്‍ത്തിക്കുന്ന കെല്‍ട്രോണ്‍ സെന്ററില്‍ അപേക്ഷ സമര്‍പ്പിക്കണം. ഫോണ്‍: 9544958182

കൊല്ലങ്കോട് ഐ.സി.ഡി.എസ് പ്രൊജക്ടിന്റെ ആവശ്യങ്ങള്‍ക്കായി ഒരു വര്‍ഷത്തേക്ക് വാഹനം വാടകയ്ക്ക് എടുക്കുന്നു. ടാക്‌സി പെര്‍മിറ്റോടുകൂടിയ, ഏഴ് വര്‍ഷത്തില്‍ താഴെ പഴക്കമുള്ള കാര്‍/ജീപ്പ് (ജീപ്പിന് മുന്‍ഗണന) ലഭ്യമാക്കുന്നതിന് വാഹന ഉടമകളില്‍ നിന്നും ടെന്‍ഡര്‍ ക്ഷണിച്ചു. പ്രതിമാസം 1500 കിലോമീറ്റര്‍ വരെ ഓടുന്നതിന് പരമാവധി 35,000 രൂപയാണ് വാടക.  ക്വട്ടേഷനുകള്‍ സെപ്റ്റംബര്‍ 22 രണ്ട് മണിവരെ സ്വീകരിക്കും. അന്നേദിവസം വൈകീട്ട് മൂന്നിന് ക്വട്ടേഷന്‍ തുറക്കും. കൂടുതല്‍ വിവരങ്ങള്‍ക്ക് ഫോണ്‍:  04923 254647

'സ്വച്ഛതാ ഹി സേവാ 2025- ശുചിത്വോത്സവം' ക്യാമ്പയിന്റെ ഭാഗമായി നടത്തുന്ന ശുചീകരണ പ്രവര്‍ത്തനങ്ങള്‍ക്ക് ജില്ലയില്‍ തുടക്കമായി. സെപ്റ്റംബര്‍ 17 മുതല്‍ ഒക്ടോബര്‍ രണ്ട് വരെ നീണ്ടുനില്‍ക്കുന്ന പരിപാടിയുടെ ജില്ലാതല ഉദ്ഘാടനം ജില്ലാ കളക്ടര്‍ എം എസ് മാധവിക്കുട്ടി നിര്‍വഹിച്ചു. മാലിന്യസംസ്‌കരണ രംഗത്തും അതുവഴി ആരോഗ്യ മേഖലയിലും ഹരിത കര്‍മസേനാംഗങ്ങള്‍ നടത്തുന്ന മികവാര്‍ന്ന പ്രവര്‍ത്തനങ്ങള്‍ പൊതുജനങ്ങള്‍ക്കുള്ള ഓര്‍മ്മപ്പെടുത്തലാണെന്ന് കളക്ടര്‍ അഭിപ്രായപ്പെട്ടു.'സ്വച്ഛതാ ഹി സേവാ' ക്യാമ്പയിന്റെ ജില്ലാതല ലോഗോ പ്രകാശനവും കളക്ടര്‍ നിര്‍വഹിച്ചു.

കെല്‍ട്രോണിന്റെ പാലക്കാട് നോളജ് സെന്ററില്‍ സായാഹ്ന കോഴ്സുകളിലേക്ക് അഡ്മിഷന്‍ ആരംഭിച്ചു. പ്രൊഫഷണല്‍ ഡിപ്ലോമ ഇന്‍ ലോജിസ്റ്റിക്സ് ആന്‍ഡ് സപ്ലൈ ചെയിന്‍ മാനേജ്മെന്റ്, ഡിപ്ലോമ ഇന്‍ കംപ്യൂട്ടര്‍ ഹാര്‍ഡ് വെയര്‍ ആന്‍ഡ് നെറ്റ് വര്‍ക്ക് മെയിന്റനന്‍സ് വിത്ത് ഇ ഗാഡ്ജറ്റ് ടെക്നോളജീസ്, കംപ്യൂട്ടറൈസ്ഡ് ഫിനാന്‍ഷ്യല്‍ അക്കൗണ്ടിങ്, ഡി.സി.എ, ഗ്രാഫിക്സ് ആന്‍ഡ് ഡിജിറ്റല്‍ ഫിലിംമേക്കിങ് ടെക്നിക്സ്, മലയാളം വേര്‍ഡ് പ്രോസസ്സിങ്, വേര്‍ഡ് പ്രൊസസ്സിങ് ആന്‍ഡ് ഡാറ്റാ എന്‍ട്രി, അഡ്വാന്‍സ് എക്സല്‍ മുതലായ കോഴ്സുകളിലേക്ക് സെപ്റ്റംബര്‍ 30 വരെ അപേക്ഷിക്കാം. ഫോണ്‍: 0491 2504599. 8590605273

കാഞ്ഞിരപ്പുഴ ജലസേചന പദ്ധതി അസി.എക്സിക്യൂട്ടീവ് എഞ്ചിനീയര്‍, കെ.പി.ഐ.പി ഹെഡ് വര്‍ക്സ് സബ്ഡിവിഷന്‍ (3) ഓഫീസിന് കീഴില്‍ വിവിധ മരങ്ങള്‍ ലേലം ചെയ്യുന്നു. വലതുകരമെയിന്‍ കനാലിന്റെയും ഡിസ്ട്രിബ്യൂട്ടറികളുടെയും ബണ്ടിനോട് ചേര്‍ന്നുള്ള മുറിച്ചിട്ട മരങ്ങള്‍, കാഞ്ഞിരപ്പുഴ വര്‍ക്ക്ഷോപ്പ് കോമ്പൗണ്ടില്‍ റോഡിനോട് ചേര്‍ന്ന് നില്‍ക്കുന്ന തേക്ക് മരം, ഗവ. യു.പി സ്‌കൂള്‍ പുളിക്കലിന് സമീപത്ത് ഭീഷണിയായി നില്‍ക്കുന്ന പാലമരം എന്നിവയാണ് ലേലം ചെയ്യുന്നത്. താല്‍പര്യമുള്ളവര്‍ സെപ്റ്റംബര്‍ 24ന് രാവിലെ 11 ന് കാര്യാലയത്തില്‍ എത്തണമെന്ന് അസി.എക്സിക്യൂട്ടീവ് എഞ്ചിനീയര്‍ അറിയിച്ചു.