സംസ്ഥാനത്തിന്റെ വികസനപ്രവർത്തനങ്ങളുടെ ധനശേഖരണാർഥം 1,000 കോടി രൂപയുടെ കടപ്പത്രം പുറപ്പെടുവിക്കുന്നു. ഇതിനായുള്ള ലേലം സെപ്റ്റംബർ 23ന് റിസർവ് ബാങ്കിന്റെ മുംബൈ ഫോർട്ട് ഓഫീസിൽ ഇ-കുബേർ സംവിധാനം വഴി നടക്കും.

മാമലക്കണ്ടം ഗവൺമെൻ്റ് ഹൈസ്‌കൂളിൽ

 നൈപുണ്യ നിയമ ബോധവത്ക്കരണ പരിപാടിയുടെയും ക്ഷേമ പദ്ധതികളുടെയും ഉദ്ഘാടനം നാളെ (20/09/2025) നടക്കും. രാവിലെ 11ന് " ഹൃദയ വാതിൽ തുറക്കുമ്പോൾ" പരിശീലന പരിപാടിയുടെ ഉദ്ഘാടനം ഹൈക്കോടതി ജഡ്ജ് ജസ്റ്റിസ്‌ ദേവൻ രാമചന്ദ്രനും "എന്റെ മാമലക്കണ്ടം തുടർ പദ്ധതികളുടെ ഉദ്ഘാടനം ജസ്റ്റിസ് സി എസ് സുധയും നിർവഹിക്കും. ചടങ്ങിൽ ജില്ലാ ലീഗൽ സർവീസസ് അതോറിറ്റി സെക്രട്ടറിയും സബ് ജഡ്ജുമായ ആർ. രജിത സ്കൂളുകൾക്കുള്ള പഠനോപകരണങ്ങൾ വിതരണം ചെയ്യും.

കൊറിയർ സർവീസ് വഴി ആൻഡമാൻ നിക്കോബാർ ദ്വീപിൽ നിന്നും മാരക മയക്കുമരുന്നായ മെത്താംഫിറ്റമിൻ അരക്കിലോയോളം മഞ്ചേരിയിൽ എത്തിച്ച് വിൽപ്പന നടത്താൻ ശ്രമിച്ച കേസിൽ പ്രതികൾക്ക് 15 വർഷം കഠിനതടവ്. 

കേസിലെ ഒന്നാം പ്രതി ഏറനാട് താലൂക്കിൽ പാണക്കാട് വില്ലേജിൽ പഴങ്കര കുഴിയിൽ വീട്ടിൽ നിഷാന്ത് ( 25), രണ്ടാം പ്രതി ഏറനാട് താലുക്കിൽ മലപ്പുറം അംശം ഡൗൺ ഹിൽ ദേശത്ത് പുതുശ്ശേരി വീട്ടിൽ റിയാസ് (33), മൂന്നാം പ്രതി ഏറനാട് താലൂക്കിൽ പാണക്കാട് വില്ലേജിൽ പട്ടർക്കടവ് ദേശം മൂന്നുക്കാരൻ വീട്ടിൽ സിറാജുദീൻ (30) എന്നീ പ്രതികളെയാണ് ശിക്ഷിച്ചത്. 

2026ലെ നിയമസഭാ തിരഞ്ഞെടുപ്പിന് മുന്നോടിയായി രാഷ്ട്രീയ പാർട്ടി പ്രതിനിധികളുടെ യോഗം കളക്ടറേറ്റിൽ ചേർന്നു.

പോളിങ് സ്റ്റേഷനുകളുടെ പുന:ക്രമീകരണവും സമഗ്ര വോട്ടർ പട്ടിക പുതുക്കലിന്റെയും ഭാഗമായി സംസ്ഥാന മുഖ്യതിരഞ്ഞെടുപ്പ് ഓഫീസറുടെ നിർദ്ദേശ പ്രകാരമാണ് ജില്ലാ തിരഞ്ഞെടുപ്പ് ഓഫീസർ കൂടിയായ ജില്ലാ കളക്ടർ ജി പ്രിയങ്കയുടെ അധ്യക്ഷതയിൽ യോഗം ചേർന്നത്.

സ്ത്രീകൾക്ക് മെച്ചപ്പെട്ട ആരോഗ്യം ഉറപ്പുവരുത്തുന്നതിനായി കൃത്യമായ പരിശോധനകളും ചികിത്സയും നടത്തുന്നതിനും രോഗപ്രതിരോധ അവബോധം ഉണ്ടാക്കുന്നതിനും കേന്ദ്ര-സംസ്ഥാനസർക്കാരുകളുടെ നേതൃത്വത്തിൽ നടത്തുന്ന കാമ്പയിൻ എല്ലാവരും പ്രയോജനപ്പെടുത്തണമെന്നു ഹൈബി ഈഡൻ എം പി പറഞ്ഞു. 

കളമശ്ശേരി ഗവ. ഐ.ടി.ഐ യിൽ വിവിധ കോഴ്സുകളിൽ സീറ്റ് ഒഴിവ്. ഒഴിവുള്ള സീറ്റുകളിലേക്ക് സെപ്തംബർ 30 വരെ അപേക്ഷിക്കാം.

ഫോൺ: 0484 2555505.

വനിതാ ശിശു വികസന വകുപ്പിന്റെ കോതമംഗലം ഐ.സി.ഡി.എസ്. പ്രോജക്ടിനു കീഴിലുള്ള അങ്കണവാടികളിലേക്ക് പാൽ, മുട്ട എന്നിവ വിതരണം ചെയ്യുന്നതിനായി ടെൻഡറുകൾ ക്ഷണിച്ചു. വ്യക്തികൾക്കും സ്ഥാപനങ്ങൾക്കും ടെൻഡറിൽ പങ്കെടുക്കാം. ടെൻഡർ സ്വീകരിക്കുന്ന അവസാന തിയതി സെപ്തംബർ 23.

ഫോൺ : 0485-2828161, 9188959728. 

വന്യജീവി വാരാഘോഷത്തോടനുബന്ധിച്ച് വിദ്യാര്‍ഥികള്‍ക്കായി വനം - വന്യജീവി വകുപ്പ് ഒക്ടോബര്‍ രണ്ട്, മൂന്ന് തീയതികളില്‍ എസ്.ആർ.വി. ഗവ. ഹയർ സെക്കൻഡറി സ്കൂളിൽ വിവിധ മത്സരങ്ങൾ സംഘടിപ്പിക്കും.

എറണാകുളം ജില്ലയിലെ സ്കൂൾ, കോളേജ് തല വിദ്യാർത്ഥികൾക്ക് മത്സരങ്ങളിൽ പങ്കെടുക്കാം.

പ്രകൃതിയേയും വന്യജീവികളെയും അടിസ്ഥാനമാക്കി പെന്‍സില്‍ ഡ്രോയിംഗ്, വാട്ടര്‍ കളറിംഗ്, ഉപന്യാസ രചന, ക്വിസ്സ്, പ്രസംഗം എന്നിവയാണ് മത്സരങ്ങള്‍.

തൊഴില്‍പരിശീലനം

 നൈപുണ്യ വികസനം എന്നിവയിലുള്ള മികവ് തെളിയിക്കുന്നതിനും യുവാക്കളുടെ കഴിവുകൾ പ്രദർശിപ്പിക്കുന്നതിനും മെച്ചപ്പെടുത്തുന്നതിനുമായി

നൈപുണ്യ വികസന മന്ത്രാലയം സംഘടിപ്പിക്കുന്ന ഇന്ത്യാ സ്കില്‍സ് മത്സരത്തിൻ്റെ (ഐഎസ്‍സി) രജിസ്ട്രേഷൻ ആരംഭിച്ചു. 

 മത്സരത്തിൽ പങ്കെടുക്കാൻ സ്കില്‍ ഇന്ത്യ ഡിജിറ്റല്‍ ഹബ് (എസ് ഐ ഡി എച്ച്) പോര്‍ട്ടല്‍ വഴി ഓണ്‍ലൈനായി സെപ്റ്റംമ്പര്‍ 30നകം രജിസ്ട്രേഷന്‍ പൂര്‍ത്തീകരിക്കണം. 16 നും 25 നും ഇടയിൽ പ്രായമുള്ളവർക്ക് അപേക്ഷിക്കാം. 

കൂടുതല്‍ വിവരങ്ങള്‍ക്ക്: www.skillindiadigital.gov.in. 

കേരളത്തിൽ ഊർജ്ജ സംരക്ഷണ പ്രവർത്തനങ്ങൾ പ്രോത്സാഹിപ്പിക്കുന്നതിനായി സർക്കാർ ഏർപ്പെടുത്തിയിട്ടുള്ള ഊർജ്ജ സംരക്ഷണ അവാർഡിനുള്ള അപേക്ഷ ക്ഷണിച്ചു. അപേക്ഷ സമർപ്പിക്കുന്നതിനുള്ള മാനദണ്ഡങ്ങളും വ്യവസ്ഥകളും വിശദമാക്കുന്നതിനായി ഇന്ന് (സെപ്റ്റംബർ 20 ) രാവിലെ 9.30ന് കാക്കനാട് ലുലു ഐടി ട്വിൻ ടവറിൽ സെൻസിറ്റൈസേഷൻ പരിപാടി സംഘടിപ്പിക്കും. അവാർഡിനുള്ള അപേക്ഷകൾ ഒക്ടോബർ 15 നുള്ളിൽ സമർപ്പിക്കണം.