ലോക്സഭാ തെരഞ്ഞെടുപ്പിനോട് അനുബന്ധിച്ച് നിയമവിരുദ്ധമായ ലഹരി ഉപയോഗവും വില്‍പ്പനയും  തടയുന്നതിന് എക്സൈസ് വകുപ്പ് സ്പെഷ്യല്‍ ഡ്രൈവ് ആരംഭിച്ചു. ഇതിന്റെ ഭാഗമായി ഇടുക്കി എക്സൈസ് ഡിവിഷന്‍ ഓഫീസില്‍ 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം തുറന്നു. പരാതികളില്‍ അടിയന്തര നടപടി സ്വീകരിക്കുന്നതിന്  പ്രത്യേക സ്ട്രൈക്കിംഗ് ഫോഴ്സിനെയും നിയോഗിച്ചിട്ടുണ്ട്. അതിര്‍ത്തി ചെക്ക് പോസ്റ്റുകളില്‍ പരിശോധന നടത്തുന്നതിന്  പ്രത്യേക സംഘത്തെ നിയോഗിച്ചതായും ഡെപ്യൂട്ടി എക്സൈസ് കമ്മീഷണര്‍ എം.ജെ ജോസഫ് അറിയിച്ചു. 

ലോക്‌സഭാ തെരഞ്ഞെടുപ്പിനുള്ള  മീഡിയ സര്‍ട്ടിഫിക്കേഷന്‍ മോണിറ്ററിങ്ങ് കമ്മിറ്റിയുടെ ഓഫീസും മീഡിയ നിരീക്ഷണ കേന്ദ്രവും ജില്ലാ വരണാധികാരിയായ ജില്ലാ കളക്ടര്‍ ഡോ.ഡി സജിത്ത് ബാബു കളക്ടറേറ്റിലെ ജില്ലാ ഇന്‍ഫര്‍മേഷന്‍ ഓഫീസില്‍ ഉദ്ഘാടനം ചെയ്തു. തെരഞ്ഞെടുപ്പ് നിരീക്ഷകന്‍ പ്രമോദ് കുമാര്‍ ചടങ്ങില്‍ മുഖ്യാതിഥിയായിരുന്നു.സെന്ററിന്റെ പ്രവര്‍ത്തനത്തെകുറിച്ച് കളക്ടര്‍ തെരഞ്ഞെടുപ്പ് നിരീക്ഷകന് വിശദീകരിച്ചു കൊടുത്തു.

ലോക്‌സഭാ തെരഞ്ഞെടുപ്പുമായി ബന്ധപ്പെട്ട് സ്ഥാനാര്‍ത്ഥികളുടേയും രാഷ്ട്രീയ പാര്‍ട്ടികളുടേയും തെരഞ്ഞെടുപ്പ് ചെലവ് നിരീക്ഷിക്കുന്നതിനു കേന്ദ്ര തെരഞ്ഞെടുപ്പ് കമ്മീഷന്‍ കാസര്‍കോട് ജില്ലയിലേക്ക് നിയോഗിക്കപ്പെട്ട നിരീക്ഷകന്‍ പ്രമോദ് കുമാര്‍ കളക്ടറേറ്റിലെത്തി ചുമതലയേറ്റു. ഡല്‍ഹിയില്‍ ധനകാര്യ വകുപ്പില്‍ ജോയിന്റ് കമ്മീഷണര്‍ ആണ് ഇദ്ദേഹം. ജനാധിപത്യപരവും സുതാര്യവുമായ തെരഞ്ഞെടുപ്പ് ഉറപ്പ് വരുത്തുന്നതിനും സ്ഥാനാര്‍ഥികള്‍ക്ക് പരമാവധി ചെലവഴിക്കാവുന്ന തുകയില്‍ കൂടുതല്‍ ചെലവഴിക്കുന്നുണ്ടോയെന്നും പരിശോധിക്കും. തെരഞ്ഞെടുപ്പ് പ്രചാരണത്തിന് ഉപയോഗിക്കുന്ന 90ഓളം സാധന സാമഗ്രികളുടെ അടിസ്ഥാനവില നിശ്ചയിച്ചിട്ടുണ്ട്.

കേരള സഹകരണ ട്രൈബ്യൂണൽ എം.ജി പത്മിനി ഏപ്രിൽ രണ്ടിന് കണ്ണൂർ ജില്ലാ സഹകരണ ബാങ്കിലും അഞ്ചിന് എറണാകുളം സർക്കാർ ഗസ്റ്റ് ഹൗസ് ലൈബ്രറി ഹാളിലും 11ന് ആലപ്പുഴ പോലീസ് ക്രെഡിറ്റ് കോപ്പറേറ്റീവ് സൊസൈറ്റി ഹാളിലും 24ന് തൃശൂർ ജില്ലാ സഹകരണ ബാങ്കിലും 22നും 30നും ആസ്ഥാനത്തും സിറ്റിംഗ് നടത്തും.

പി.എൻ.എക്സ്. 1004/19

കേരള ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷൻ (കൈറ്റ്) നടപ്പാക്കുന്ന കേരളത്തിലെ ഏറ്റവും വലിയ ഓൺലൈൻ പരിശീലന പദ്ധതിയായ  KOOL (KITEs Open Online Learning) വഴി നടത്തിയ കോഴ്‌സിന്റെ രണ്ടാം ബാച്ചിന്റെ ഫലം പ്രഖ്യാപിച്ചു. ഈ ബാച്ചിലെ 2883 അധ്യാപകരിൽ 2765 പേർ (95.91%) കോഴ്‌സ് വിജയിച്ചു. അധ്യാപകരുടെ പ്രൊബേഷൻ വിജയകരമായി പൂർത്തിയാക്കുന്നതിന് 'കൂൾ' കോഴ്‌സ് പാസായി നൽകുന്ന സർട്ടിഫിക്കറ്റ് പര്യാപ്തമാണെന്ന സർക്കാർ ഉത്തരവ് പുറത്തിറക്കിയിരുന്നു. കേരളത്തിൽ ആദ്യമായി ഒരു ഓൺലൈൻ കോഴ്‌സിന് സർക്കാർ അംഗീകാരം നൽകിയതും 'കൂളി'നാണ്.

ആലപ്പുഴ: 2012 മാർച്ച് മുതൽ ഐ.ടി. പരീക്ഷയ്ക്ക് പങ്കെടുക്കാൻ കഴിയാതിരുന്ന അല്ലെങ്കിൽ പരാജയപ്പെട്ട വിദ്യാർഥികൾക്കും 2019 എസ്.എസ്.എൽ.സി ഐ.ടി പരീക്ഷയ്ക്ക് പങ്കെടുക്കാൻ കഴിയാതെ വന്നവർക്കും  മാർച്ച് 29ന് രാവിലെ 10ന് ഗവ.മുഹമ്മദൻസ് ഗേൾസ് എച്ച്.എസ് ആലപ്പുഴയിൽ  ഐ.ടി. പരീക്ഷ നടത്തും.

ആലപ്പുഴ: പൊതുതിരഞ്ഞെടുപ്പുമായി ബന്ധപ്പെട്ട് ജില്ലാതല പരിശീലകർക്ക് നൽകിവന്നിരുന്ന പരിശീലനം അവസാനിച്ചു . ഇ.വി.എം എങ്ങനെ ബന്ധിപ്പിച്ച്  വോട്ട് ചെയ്യിക്കാം, കൺട്രോൾ യൂണിറ്റ് തുറക്കുന്നതെങ്ങനെ,മോക് പോൾ കഴിഞ്ഞാൽ എന്തുചെയ്യണം എന്നീ ചോദ്യങ്ങൾക്കുള്ള ഉത്തരങ്ങളടങ്ങിയ സ്ലൈഡുകളും  പരിശീലനത്തിൽ അവതരിപ്പിച്ചു. വി.വി പാറ്റിൽ തകരാർ   സംഭവിച്ചാൽ അത് ബാറ്ററിയുടെ പ്രശ്നമാണെങ്കിൽ ബാറ്ററി മാറ്റുകയാണ് വേണ്ടത്. മറ്റെന്തെങ്കിലും തകരാറണെങ്കിൽ മെഷീൻ മാറ്റണമെന്നും പരിശീലകർ അറിയിച്ചു. ഇതിനുള്ള പരിശീലനവും നൽകി. തിരഞ്ഞെടുപ്പുചുമതലയുള്ള ഉദ്യോഗസ്ഥർ പ്രിസൈഡിങ് ഓഫീസറുടെ നിർദ്ദേശങ്ങൾ പാലിക്കണം.

ആലപ്പുഴ: വൃദ്ധസദനത്തിലെ അന്തേവാസികളോട് സമ്മതി ദാനവകാശം വിനിയോഗിക്കണമെന്ന സന്ദേശവുമായി ജില്ലാ കളക്ടർ എസ്.സുഹാസ് എത്തി. പ്രായാധിക്യത്തിന്റെ പിടിയിലായ ഒരു കൂട്ടം വൃദ്ധ ജനങ്ങൾക്ക് തങ്ങളുടെ സമ്മതിദാനാവകാശം നിർവഹിക്കുന്നതിനായി എല്ലാ സൗകര്യങ്ങളും ഒരുക്കി നൽകുകയാണ് ജില്ലാ ഭരണകൂടം. ഇതിന്റെ ഭാഗമായാണ് കളക്ടർ ചൊവ്വാഴ്ച ആലപ്പുഴ വാടക്കലിലുള്ള കയർ തൊഴിലാളികളുടെ വൃദ്ധ സദനത്തിൽ എത്തിയത്.  അന്തേവാസികളോട് നേരിട്ട് അദ്ദേഹം ഏറെ നേരം സംവദിച്ചു.

പ്ലസ്ടു വിദ്യാര്‍ത്ഥികളുടെ അധ്യായന വര്‍ഷാവസാനമായ ഇന്ന്(മാര്‍ച്ച് 27) ആഘോഷങ്ങള്‍ പരിധി വിടാതിരിക്കാന്‍  ആര്‍.ടി.ഒയുടെ നേതൃത്വത്തിലുള്ള പ്രത്യേക സംഘംരംഗത്തിറങ്ങും. ജില്ലയിലെ വിവിധ സ്‌കൂളുകള്‍ക്ക് മുമ്പില്‍ ആര്‍.ടി.ഒവാഹന പരിശോധന നടത്തും.പരിശോധനയില്‍ പ്രായപൂര്‍ത്തിയാവാതെവാഹനം ഓടിക്കുന്നവരെ കണ്ടെത്തിയാല്‍ അവരുടെ മാതാപിതാക്കള്‍ക്കെതിരെ കര്‍ശന നടപടിസ്വീകരിക്കും. കൂടാതെറോഡുകളില്‍അഭ്യാസ പ്രകടനം നടത്തുന്നര്‍ക്കെതിരെയും  കര്‍ശന നടപടികള്‍ കൈക്കൊള്ളുമെന്ന് ആര്‍.ടി.ഒ അറിയിച്ചു.