കണ്ണൂര്‍ ജില്ലാ മാനസികാരോഗ്യ പരിപാടിയുടെ ഭാഗമായി പ്രവര്‍ത്തിക്കുന്ന ഡെ കെയര്‍ സെന്ററിലേക്ക്(പകല്‍ വീട്) വിവിധ തസ്തികകളിലേക്ക് കരാര്‍  നിയമനം നടത്തുന്നു.  തസ്തിക, ഒഴിവ്, യോഗ്യത എന്ന ക്രമത്തില്‍. പ്രൊജക്ട് ഓഫീസര്‍ - 1 - എം എസ് ഡബ്ല്യു-മെഡിക്കല്‍ & സൈക്യാട്രി, സ്റ്റാഫ് നഴ്‌സ് - 3 - ജനറല്‍ നഴ്‌സിങ്ങ്/ബി എസ് സി നഴ്‌സിങ്ങ്, ക്ലീനിംഗ് സ്റ്റാഫ് 3 - ഏഴാംസ്റ്റാന്റേര്‍ഡ്(എഴുതുവാനും വായിക്കുവാനും അറിഞ്ഞിരിക്കണം).

കണ്ണൂര്‍ ഗവ. ഐ.ടി.ഐയില്‍ എന്‍.സി.വി.ടി മെട്രിക്ക് ട്രേഡുകളിലേക്കുള്ള രണ്ടാം ഘട്ട കൗണ്‍സിലിംഗ് ജൂലൈ 23 ന് രാവിലെ 9 മണിക്ക് നടക്കും. താഴെ പറയുന്ന ഇന്‍ഡക്‌സ് മാര്‍ക്ക് ഉള്ളവര്‍ എല്ലാ അസ്സല്‍ സര്‍ട്ടിഫിക്കറ്റുകളുമായി കണ്ണൂര്‍ ഗവ. ഐ.ടി.ഐയില്‍ എത്തേണ്ടതാണ്. ജനറല്‍, ഒ.ബി.എച്ച്, ഈഴവ -230 വരെ, മുസ്ലിം -220 വരെ, എസ്.സി -180 വരെ, എസ്.ടി -185 വരെ, എല്‍.സി -150 വരെ. കൂടാതെ ഫിറ്റര്‍, ടര്‍ണര്‍, മെഷിനിസ്റ്റ്, വെല്‍ഡര്‍, പ്ലംബര്‍, ടി.പി.ഇ.എസ്, എം.എം.ടി എന്നീ ട്രേഡുകളില്‍ വനിതകള്‍ക്കായി സംവരണം ചെയ്തിരിക്കുന്ന ഏതാനും സീറ്റുകള്‍ ഒഴിവുണ്ട്.

എസ്.സി പ്രൊമോട്ടര്‍ തസ്തികയിലേക്ക് കണ്ണൂര്‍ കോര്‍പ്പറേഷന്‍, കൂത്തുപറമ്പ്, തലശ്ശേരി, തളിപ്പറമ്പ്, ആന്തൂര്‍, മട്ടന്നൂര്‍, കുന്നോത്ത് പറമ്പ്, മാങ്ങാട്ടിടം, തൃപ്രങ്ങോട്ടൂര്‍, എരമം-കുറ്റൂര്‍, ചൊക്ലി, പട്ടുവം, അയ്യന്‍കുന്ന്, ഉളിക്കല്‍, ആറളം എന്നീ തദ്ദേശ സ്ഥാപനങ്ങളില്‍ സ്ഥിരതാമസക്കാരായ പട്ടികജാതിയില്‍പ്പെടുന്ന 18 നും 40 നും ഇടയില്‍ പ്രായമുള്ള പ്ലസ് ടു പാസായവരില്‍ നിന്ന് അപേക്ഷ ക്ഷണിച്ചു.

തളിപ്പറമ്പ് താലൂക്കിലെ നടുവില്‍ & വെള്ളാട് ശിവക്ഷേത്രത്തില്‍ പാരമ്പര്യേതര ട്രസ്റ്റിമാരുടെ ഒഴിവുകളിലേക്ക് നിര്‍ദ്ദിഷ്ട ഫോറത്തില്‍ അപേക്ഷ ക്ഷണിച്ചു. അപേക്ഷകള്‍ നീലേശ്വരത്തെ മലബാര്‍ ദേവസ്വം ബോര്‍ഡ്, കാസര്‍കോഡ് ഡിവിഷന്‍ അസിസ്റ്റന്റ് കമ്മീഷണറുടെ ഓഫീസില്‍ ആഗസ്റ്റ് 18 ന് വൈകീട്ട് 5 മണിക്ക് മുമ്പായി ലഭിക്കണം. അപേക്ഷാ ഫോറം അസിസ്റ്റന്റ് കമ്മീഷണറുടെ ഓഫീസില്‍ നിന്നോ, തളിപ്പറമ്പ് ഇന്‍സ്‌പെക്ടറുടെ ഓഫീസില്‍ നിന്നോ സൗജന്യമായി ലഭിക്കും.  

ജില്ലയില്‍ 2018-19 വര്‍ഷത്തിലെ ശേഷിക്കുന്ന കാലയളവിലേക്ക് പിണറായി റേഞ്ചിലെ രണ്ടാം ഗ്രൂപ്പിലെ കള്ളുഷാപ്പുകളുടെ പരസ്യ വില്‍പന ജൂലൈ 28 ന് രാവിലെ 11 മണിക്ക് ജില്ലാ കലക്ടറുടെ സാന്നിദ്ധ്യത്തില്‍ കലക്ടറേറ്റ് കോണ്‍ഫറന്‍സ് ഹാളില്‍ നടത്തും. പങ്കെടുക്കുവാന്‍ ആഗ്രഹിക്കുന്നവര്‍ രാവിലെ 10 മണിക്ക് മുമ്പായി  ആവശ്യമായ രേഖകള്‍ സഹിതം വില്‍പ്പന ഹാളില്‍ എത്തിച്ചേരേണ്ടതാണ്. 

മാടായി ഗവ.ഐ ടി ഐ യില്‍ ഇലക്ട്രീഷ്യന്‍ ട്രേഡില്‍ രണ്ട് ഗസ്റ്റ് ഇന്‍സ്ട്രക്ടര്‍മാരുടെ ഒഴിവുണ്ട്.  നിശ്ചിത യോഗ്യതയുള്ള ഉദേ്യാഗാര്‍ഥികള്‍ ജൂലൈ 23 ന് രാവിലെ 10.30 മണിക്ക് അസ്സല്‍ സര്‍ട്ടിഫിക്കറ്റുകള്‍ സഹിതം ഐ ടി ഐ യില്‍ കൂടിക്കാഴ്ചക്ക് ഹാജരാകണം.

മത്സ്യസമ്പത്ത് പുനരുജ്ജീവിപ്പിക്കുന്നതിനായി ഉള്‍നാടന്‍ പൊതുജലാശയങ്ങളില്‍ ചെമ്മീന്‍, മത്സ്യവിത്ത് നിക്ഷേപം നടത്തുന്ന പദ്ധതിയുടെ ഏഴോം ഗ്രാമപഞ്ചായത്തിലെ ഉദ്ഘാടനം പ്രസിഡന്റ് സി. വിമല 50,000 പൂമീന്‍ കുഞ്ഞുങ്ങളെ കോട്ടക്കീല്‍ ഫിഷ് ലാന്റിംഗ് സെന്ററിന് സമീപം പുഴയില്‍ നിക്ഷേപിച്ച് നിര്‍വ്വഹിച്ചു. വൈസ് പ്രസിഡന്റ് സി.ഒ പ്രഭാകരന്‍ അധ്യക്ഷത വഹിച്ചു.

2017-2018 അധ്യയന വര്‍ഷത്തില്‍ എസ്.എസ്.എല്‍.സി പരീക്ഷയില്‍ എല്ലാ വിഷയങ്ങള്‍ക്കും ബി പ്ലസില്‍ കുറയാതെ ഗ്രേഡ് നേടിയ ജില്ലയിലെ പ്രമുഖ പരിശീലന സ്ഥാപനങ്ങളില്‍ മെഡിക്കല്‍, എഞ്ചിനീയറിംഗ് കോഴ്‌സുകള്‍ക്ക് ചേര്‍ന്നു പഠിക്കുന്ന പട്ടികജാതി വിഭാഗത്തില്‍പ്പെട്ട പ്ലസ് വണ്‍ വിദ്യാര്‍ഥികള്‍ക്ക് ധനസഹായത്തിന് അപേക്ഷിക്കാം. വാര്‍ഷിക വരുമാന പരിധി 4.50 ലക്ഷം രൂപ.

ഗിഫ്റ്റഡ് ചില്‍ഡണ്‍ 2018-19 അക്കാദമിക് വര്‍ഷത്തേക്ക് ജില്ലയിലെ മൂന്ന് വിദ്യാഭ്യാസ ജില്ലകള്‍ക്കായി കോ-ഓര്‍ഡിനേറ്റര്‍മാരെ നിയമിക്കുന്നു. 10 വര്‍ഷത്തില്‍ കുറയാത്ത ഗവ. ഹൈസ്‌കൂള്‍ അസിസ്റ്റന്റ് സേവനപരിചയമുള്ളവര്‍ സ്വയം തയാറാക്കിയ അപേക്ഷ ജില്ലാ വിദ്യാഭ്യാസ ആഫീസര്‍ സാക്ഷ്യപ്പെടുത്തിയ സര്‍ട്ടിഫിക്കറ്റുകള്‍ സഹിതം വിദ്യാഭ്യാസ ഉപ ഡയറക്ടര്‍ക്ക് ജൂലൈ 25ന് വൈകീട്ട് അഞ്ച് മണിക്കുള്ളില്‍ സമര്‍പ്പിക്കുക. ഫോണ്‍: 8301064274.

വ്യാജമദ്യം തടയാന്‍ ഓണത്തിന് മുന്നോടിയായി പഞ്ചായത്ത് തലത്തില്‍ വിവിധ വകുപ്പുകളുടെ സംയുക്ത റെയ്ഡുകള്‍ നടത്താന്‍ ജില്ലാതല ജനകീയ കമ്മിറ്റിയോഗം തീരുമാനിച്ചു. ആഗസ്റ്റ് ഒന്നു മുതല്‍ 31 വരെ സ്‌പെഷല്‍ ഡ്രൈവുകള്‍ നടത്തും.