വെള്ളറട ഗ്രാമപഞ്ചായത്തിലെ പനച്ചമൂട് ചന്ത അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന്റെ ഭാഗമായി സി.കെ. ഹരീന്ദ്രന്‍ എം.എല്‍.എ. യുടെ നേതൃത്വത്തില്‍ വെള്ളറട പഞ്ചായത്ത് ഓഫീസ് ഹാളില്‍ അവലോകന യോഗം നടന്നു. പ്രാരംഭ നവീകരണത്തിന് ആവശ്യമായ പ്രോജക്ട് റിപ്പോര്‍ട്ട് തയ്യാറാക്കുന്നതിനായാണ് യോഗം ചേര്‍ന്നത്.  ഇതിനോടനുബന്ധിച്ച് എം.എല്‍.എ. സ്ഥലം സന്ദര്‍ശിച്ചു. ആറു മാസത്തിന്നുള്ളില്‍ നിര്‍മാണ പ്രവര്‍ത്തനങ്ങള്‍ ആരംഭിക്കുമെന്ന് അദ്ദേഹം അറിയിച്ചു.  20 കോടി രൂപയുടെ നവീകരണ പ്രവര്‍ത്തനങ്ങള്‍ നടത്തും.   ഒന്നാംഘട്ട നവീകരണ പ്രവര്‍ത്തനങ്ങള്‍ക്കായി അഞ്ച് കോടി രൂപയുടെ ഭരണാനുമതി ലഭിച്ചിട്ടുണ്ട്.

കെ.എസ്.ആര്‍.ടി.സി കണ്ണൂര്‍ ഡിപ്പോയുടെ സമഗ്രവികസനത്തിനായുള്ള പ്രവര്‍ത്തനങ്ങളുടെ പുരോഗതി തുറമുഖ-പുരാവസ്തു വകുപ്പു മന്ത്രി രാമചന്ദ്രന്‍ കടന്നപ്പള്ളി വിലയിരുത്തി. ഡിപ്പോയുടെ സമഗ്ര വികസനത്തിനു വേണ്ടി ഏപ്രിലില്‍ ഗതാഗതമന്ത്രി എ.കെ ശശീന്ദ്രന്റെ അധ്യക്ഷതയില്‍ തിരുവനന്തപുരത്ത് ചേര്‍ന്ന യോഗത്തില്‍ ആവിഷ്‌കരിച്ച സമഗ്ര മാസ്റ്റര്‍ പ്ലാനിന്റേയും വിവിധ പദ്ധതികളുടേയും പുരോഗതിയാണ് ഡിപ്പോ സന്ദര്‍ശിച്ച മന്ത്രി ഉദ്യോഗസ്ഥരുമായി ചര്‍ച്ച ചെയ്തത്. 

ജില്ലയിലെ എയര്‍ കണ്ടീഷന്‍ ടെക്‌നീഷ്യന്‍മാരുടെ കൂലി നിരക്ക് സംബന്ധിച്ച് എച്ച്.വി.എ.സി.ആര്‍ എംപ്ലോയിസ് യൂണിയന്‍ ജില്ലാ ലേബര്‍ ഓഫീസറുടെ സാന്നിധ്യത്തില്‍ നടന്ന ചര്‍ച്ചയില്‍ ഒത്തുതീര്‍പ്പായെന്ന രീതിയില്‍ പത്രങ്ങളില്‍ വന്ന വാര്‍ത്ത ശരിയല്ലെന്ന് ജില്ലാ ലേബര്‍ ഓഫീസര്‍ അറിയിച്ചു. ജില്ലാ ലേബര്‍ ഓഫീസില്‍ വെച്ച് കൂലി ഏകീകരിക്കുന്നതുമായി ബന്ധപ്പെട്ട് മാനേജ്‌മെന്റും യൂണിയനും തമ്മില്‍ ചര്‍ച്ച നടന്നുവരുന്നതേയുളളൂ.  ഇക്കാര്യത്തില്‍ ഇതുവരെ തീരുമാനമൊന്നും ആയിട്ടില്ല. യൂണിയന്‍ ഏകപക്ഷീയമായി പത്രസമ്മേളനം നടത്തിയാണ് പുതിയ നിരക്ക് അറിയിച്ചിരിക്കുന്നത്.

    വയോജനങ്ങള്‍ക്കായുള്ള പകല്‍വീടുകളില്‍ വ്യായാമത്തിനും വിനോദത്തിനും അവസരമൊരുക്കി ജില്ലാ പഞ്ചായത്തിന്റെ വയോജന ക്ഷേമം പദ്ധതിക്ക് തുടക്കമായി. ജില്ലാ പഞ്ചായത്തിന്റെ വാര്‍ഷിക പദ്ധതിയിലുള്‍പ്പെടുത്തി നടപ്പാക്കുന്ന പദ്ധതിയുടെ ജില്ലാതല ഉദ്ഘാടനം കടമ്പൂര്‍ പഞ്ചായത്തിലെ പനോന്നേരി വയോജനകേന്ദ്രത്തില്‍ തുറമുഖവകുപ്പ് മന്ത്രി രാമചന്ദ്രന്‍ കടന്നപള്ളി നിര്‍വ്വഹിച്ചു. 

കലാപാഠം നൃത്തശാലയ്ക്ക് തുടക്കമായി

കൊച്ചി: പൊതുവിദ്യാഭ്യാസ വകുപ്പും കേരള സംഗീത നാടക അക്കാദമിയും സംയുക്തമായി സംഘടിപ്പിക്കുന്ന ''കലാപാഠം'' നൃത്തശില്പശാലയ്ക്ക് എറണാകുളം ഗവ: ഗേള്‍സ് ഹയര്‍ സെക്കണ്ടറി സ്‌കൂളില്‍ തുടക്കമായി. വിദ്യാഭ്യാസ ഉപഡയറക്ടര്‍ സി.എ.സന്തോഷ് ഉദ്ഘാടനം നിര്‍വഹിച്ചു. കേരള സംഗീത നാടക അക്കാദമി അഡ്മിനിസ്‌ട്രേറ്റീവ് ഓഫീസര്‍ പി.മധു അദ്ധ്യക്ഷത വഹിച്ചു. ചടങ്ങില്‍ ശ്രീലക്ഷ്മി ഗോവര്‍ദ്ധന്‍, അശ്വതി ശ്രീകാന്ത്, സ്‌കൂള്‍ ഹെഡ്മാസ്റ്റര്‍ രാധാകൃഷ്ണന്‍ എന്നിവര്‍ സംസാരിച്ചു.

കാക്കനാട്: തൃക്കാക്കര നഗരസഭയുടെ കീഴില്‍ എസ്.എസ്.എല്‍.സി, പ്ലസ് ടു പരീക്ഷയില്‍ എല്ലാവിഷയങ്ങള്‍ക്കും എ പ്ലസ് നേടിയ വിദ്യാര്‍ഥികളെ ആദരിച്ചു. തൃക്കാക്കര കമ്മ്യൂണിറ്റി ഹാളില്‍ വെച്ച് നടന്ന ചടങ്ങ്  പി ടി തോമസ് എം എല്‍ എ ഉദ്ഘാടനം ചെയ്തു. 

കാക്കനാട്:  ജില്ലയില്‍ തൊഴില്‍ നിയമങ്ങള്‍ പാലിക്കാതെ പ്രവര്‍ത്തിക്കുന്ന സ്ഥാപനങ്ങള്‍ക്കെതിരെ  തൊഴില്‍ വകുപ്പ് കര്‍ശന നടപടികള്‍ക്കൊരുങ്ങുന്നു.  2018 ജനുവരി മുതല്‍ ജൂലൈ വരെ നടത്തിയ അന്വേഷണ റിപ്പോര്‍ട്ടിനെ തുടര്‍ന്നാണ് നടപടി.

വേതന സുരക്ഷാ നിയമം, ഷോപ്പ് ആന്റ് എസ്റ്റാബ്ലിഷ്‌മെന്റ് ആക്റ്റ്, ഗര്‍ഭകാലാനുകൂല്യം, ദേശീയ അവധി നിയമം തുടങ്ങിയ  വിഭാഗങ്ങളില്‍ നിരവധി  നിയമ ലംഘനങ്ങള്‍ വകുപ്പ് പരിശോധയില്‍ കണ്ടെത്തി.

കോതമംഗലം: ചെറുവട്ടൂര്‍ ഗവണ്‍മെന്റ് മോഡല്‍ ഹയര്‍ സെക്കന്‍ഡറി സ്‌കൂള്‍ അന്താരാഷ്ട്ര നിലവാരത്തിലേക്ക് ഉയരുന്നു. .ഇതിന്റെ ഭാഗമായി സ്‌കൂളിലെ 11 ഹൈടെക് ക്ലാസ് മുറികളുടെ സ്വിച്ചോണ്‍ കര്‍മ്മം ആന്റണി ജോണ്‍ എംഎല്‍എ നിര്‍വഹിച്ചു. സ്‌കൂളിനെ അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിനുള്ള പദ്ധതിയുടെ ഒന്നാംഘട്ട കൂടിയാലോചന യോഗവും ഇതിനോടനുബന്ധിച്ച് നടന്നു.  ലിറ്റില്‍ കൈറ്റ് പദ്ധതിയുടെ സര്‍ട്ടിഫിക്കറ്റ് സമര്‍പ്പണവും എംഎല്‍എ നടത്തി.

പുകയില നിരോധിത നിയമം ലംഘിച്ചതിന് തീവണ്ടി എന്ന സിനിമയുടെ നിര്‍മാതാവിന്റെ പേരില്‍ ആരോഗ്യവകുപ്പ് കേസെടുത്തു.  സിഗററ്റിന്റെ മാതൃകയിലുള്ള അക്ഷരങ്ങള്‍ പതിച്ച ഫ്‌ളക്‌സ് ബോര്‍ഡ് തിരുവനന്തപുരം ജില്ലയിലെ കല്ലമ്പലത്തിനടുത്ത് ആഴാംകോണത്ത് കണ്ടെത്തിയിരുന്നു.  ഇത്തരത്തില്‍ പുകയില ഉല്‍പ്പന്നങ്ങളുടെ പരസ്യം നല്‍കുന്നത് രണ്ടു വര്‍ഷം വരെ തടവുശിക്ഷ ലഭിക്കാവുന്ന കുറ്റമാണെന്ന് ജില്ലാ മെഡിക്കല്‍ ഓഫീസിന്റെ അറിയിപ്പില്‍ പറയുന്നു.
(പി.ആര്‍.പി. 1927/2018)