പന്തളം ബ്ലോക്ക് പഞ്ചായത്തിലെ സാമൂഹികാരോഗ്യകേന്ദ്രമായ വല്ലനയെ കുടുംബാരോഗ്യകേന്ദ്രമാക്കി ഉയര്‍ത്തുന്നു. ആരോഗ്യരംഗത്ത് മെച്ചപ്പെട്ട സേവനങ്ങള്‍ ഉറപ്പ് വരുത്തുന്ന സംസ്ഥാന സര്‍ക്കാരിന്റെ ആര്‍ദ്രം പദ്ധതിയുടെ ഭാഗമായാണ് സാമൂഹിക ആരോഗ്യകേന്ദ്രത്തെ കുടുംബാരോഗ്യകേന്ദ്രമാക്കി ഉയര്‍ത്തുന്നത്. രോഗീ സൗഹൃദ ആശുപത്രി എന്ന നിലവാരത്തിലേക്ക് ഉയര്‍ത്തുന്നതോടെ ആശുപത്രിയിലെ ഭൗതിക സാഹചര്യങ്ങളും സേവനവും കൂടതുല്‍ മെച്ചപ്പെടും. പദ്ധതി നടത്തിപ്പിന്റെ ഭാഗമായി ജീവനക്കാര്‍ക്ക് പരിശീലനം നല്‍കുമെന്ന് ആശുപത്രി അധികൃതര്‍ പറഞ്ഞു.

    ജയില്‍ വിമുക്തരായ കുറ്റവാളികള്‍, അഞ്ച് വര്‍ഷത്തില്‍ കുറയാതെ തടവുശിക്ഷ അനുഭവിക്കുന്നവരുടെ ആശ്രിതര്‍, ജില്ലാ പ്രൊബേഷന്‍ ഓഫീസറുടെ മേല്‍നോട്ടത്തില്‍ കോടതി നല്ലനടപ്പു ജാമ്യത്തില്‍ വിട്ടവര്‍, സാമൂഹ്യനീതി വകുപ്പിന്റെ ഗവണ്‍മെന്റ് ചില്‍ഡ്രന്‍സ് ഹോമുകളില്‍ നിന്നും ഗവണ്‍മെന്റ് സ്‌പെഷ്യല്‍ ഹോമില്‍ നിന്നും വിട്ടയക്കപ്പെട്ടവര്‍ എന്നിവര്‍ക്ക് സ്വയംതൊഴില്‍ ധനസഹായത്തിന് അപേക്ഷിക്കാം. അപേക്ഷാഫോറവും വിശദവിവരവും പത്തനംതിട്ട മിനിസിവില്‍ സ്റ്റേഷനില്‍ പ്രവര്‍ത്തിക്കുന്ന ജില്ലാ പ്രൊബേഷന്‍ ഓഫീസറുടെ കാര്യാലയത്തില്‍ ലഭിക്കും. അപേക്ഷ ഈ മാസം 31നകം ജില്ലാ പ്രൊബേഷന്‍ ഓഫീസില്‍ നല്‍കണം. ഫോണ്‍: 0468 2325242.

ടൂറിസം വകുപ്പ് സംഘടിപ്പിക്കുന്ന 2018 ലെ ഓണം വാരാഘോഷത്തോടനുബന്ധിച്ച് തിരുവനന്തപുരം നഗരത്തില്‍ സുരക്ഷാ ക്രമീകരണം ശക്തമാക്കുന്നതിന്റെ ഭാഗമായി വിവിധ പരിപാടികള്‍ നടക്കുന്ന സ്ഥലങ്ങള്‍ ഉള്‍പ്പെടെയുള്ള സുരക്ഷാ മേഖലകളില്‍ ആഗസ്റ്റ് 24 മുതല്‍ 30 വരെ 10 വീഡിയോ ക്യാമറയും, 100 സിസിടിവി ക്യാമറകളും 20 പബ്ലിക് അഡ്രസ്സ് സിസ്റ്റവും താത്കാലിക അടിസ്ഥാനത്തില്‍ സ്ഥാപിക്കുന്നതിന് തത്പര്യമുള്ളവരുടെ ക്വട്ടേഷനുകള്‍ ആഗസ്റ്റ് 19ന് വൈകിട്ട് നാലിനു മുന്‍പായി തിരുവനന്തപുരം സിറ്റി ജില്ലാ പോലീസ് മേധാവിയുടെ കാര്യാലയത്തില്‍ സമര്‍പ്പിക്കണം.

പി.എന്‍.എക്‌സ്.3510/18

കേരള നിയമസഭയുടെ ഹര്‍ജികള്‍ സംബന്ധിച്ച സമിതി 13ന് രാവിലെ 10.30ന് മലപ്പുറം ജില്ലാ പഞ്ചായത്ത് കോണ്‍ഫറന്‍സ് ഹാളില്‍ തെളിവെടുപ്പ് നടത്തും. സമിതിയുടെ പരിഗണനയിലുള്ള മലപ്പുറം ജില്ലയിലെ ഹര്‍ജികളിന്മേല്‍ ബന്ധപ്പെട്ട വകുപ്പുകളിലെ ജില്ലാതല ഉദ്യോഗസ്ഥര്‍, ഹര്‍ജിക്കാര്‍ എന്നിവരുമായി ചര്‍ച്ചയും തെളിവെടുപ്പും നടത്തും. വ്യക്തികളില്‍ നിന്നും സംഘടനകളില്‍ നിന്നും പുതിയ പരാതികള്‍/നിര്‍ദ്ദേശങ്ങള്‍ സ്വീകരിക്കും. താത്പര്യമുള്ള വ്യക്തികള്‍ക്കും സംഘടനകള്‍ക്കും യോഗത്തില്‍ നേരിട്ടെത്തി പരാതികളും നിര്‍ദ്ദേശങ്ങളും സമര്‍പ്പിക്കാം.

പി.എന്‍.എക്‌സ്.3509/18

കേരള നിയമസഭയുടെ പരിസ്ഥിതി സംബന്ധിച്ച സമിതി 16ന് രാവിലെ 10.30ന് കാസര്‍കോഡ് ജില്ലാ കളക്ടറേറ്റ് കോണ്‍ഫറന്‍സ് ഹാളില്‍ യോഗം ചേരും. കാസര്‍കോട് ജില്ലയിലെ വിവിധ പരിസ്ഥിതി മലിനീകരണ പ്രശ്‌നങ്ങള്‍ സംബന്ധിച്ച് സമിതിയുടെ പരിഗണനയിലുള്ള നിവേദനങ്ങളില്‍ ബന്ധപ്പെട്ട വകുപ്പ് അധ്യക്ഷന്‍മാര്‍, ജില്ലാതല ഉദ്യോഗസ്ഥര്‍, പരിസ്ഥിതി പ്രവര്‍ത്തകര്‍ എന്നിവരില്‍ നിന്ന് തെളിവെടുക്കും. പരിസ്ഥിതി പ്രവര്‍ത്തകര്‍, പെതുജനങ്ങള്‍ എന്നിവരില്‍ നിന്നും നിവേദനങ്ങള്‍ സ്വീകരിക്കും. കാഞ്ഞങ്ങാട്, നീലേശ്വരം, തൃക്കരിപ്പൂര്‍ എന്നീ സ്ഥലങ്ങള്‍ സമിതി സന്ദര്‍ശിക്കും

പി.എന്‍.എക്‌സ്.3508/18

തദ്ദേശമിത്രം പദ്ധതിയുടെ രണ്ടാം ഘട്ടത്തിനുവേണ്ടിയുള്ള പ്രൊപ്പോസല്‍ കേന്ദ്ര സര്‍ക്കാരിന്റെ ഇക്കണോമിക്‌സ് അഫയേഴ്‌സ് ഡിപ്പാര്‍ട്ട്‌മെന്റ് അംഗീകരിച്ചു. ഇക്കണോമിക്‌സ് അഫയേഴ്‌സ് ഡിപ്പാര്‍ട്ട്‌മെന്റ് ജോയിന്റ് സെക്രട്ടറിയുടെ അധ്യക്ഷതയില്‍ ചേര്‍ന്ന സ്‌ക്രീനിംഗ് കമ്മിറ്റി യോഗത്തില്‍ തദ്ദേശമിത്രം പ്രോജക്ട് ഡയറക്ടര്‍ പി. ബാലകിരണ്‍ അവതരിപ്പിച്ച പ്രൊപ്പോസലിന്റെ അടിസ്ഥാനത്തില്‍ 1950 കോടി രൂപ ലോക ബാങ്ക് വിഹിതത്തിന് താത്വികമായ അംഗീകാരം ലഭിച്ചു.