ദുരിതബാധിത പ്രദേശങ്ങളില്‍ പ്രാഥമികാരോഗ്യ കേന്ദ്രങ്ങളെപ്പോലെ താത്ക്കാലിക ആശുപത്രികള്‍ തുടങ്ങുമെന്ന് ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചര്‍. സംസ്ഥാനത്തുടനീളം 150 മുതല്‍ 200 വരെ കേന്ദ്രങ്ങളാണ് സജ്ജമാകുന്നത്. 30 ദിവസത്തേയ്ക്ക് പ്രവര്‍ത്തിക്കുന്ന ഈ കേന്ദ്രങ്ങളില്‍ ആരോഗ്യ വകുപ്പിലെ ജീവനക്കാരോടൊപ്പം സന്നദ്ധരായ സ്വകാര്യ ഡോക്ടര്‍മാരേയും ഉള്‍ക്കൊള്ളിക്കും. മന്ത്രിയുടെ ചേംബറില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു കെ.കെ. ശൈലജ ടീച്ചര്‍.

പ്രളയബാധിത മേഖലയിലെ മൊബൈല്‍ കണക്ഷനുകള്‍ യുദ്ധകാലാടിസ്ഥാനത്തില്‍ പുന:സ്ഥാപിക്കാന്‍ വിവിധ മൊബൈല്‍ കമ്പനികള്‍ക്ക് നിര്‍ദ്ദേശം നല്‍കി. പ്രളയ പ്രദേശങ്ങളില്‍ കടന്നു ചെന്ന് മൊബൈല്‍ ടവറുകള്‍ നന്നാക്കാനും ജനറേറ്ററുകളില്‍ ഇന്ധനം നിറയ്ക്കാനും മൊബൈല്‍ കമ്പനി ടെക്നീഷ്യന്‍മാര്‍ക്ക് അനുമതി നല്‍കും. ഇതിനായി എത്തുന്ന ഉദ്യോഗസ്ഥര്‍ തങ്ങളുടെ അസല്‍ തിരിച്ചറിയല്‍ കാര്‍ഡ് കൈയില്‍ കരുതണം. ജനറേറ്ററുകള്‍ക്ക് ആവശ്യമായ ഇന്ധനം ജില്ലാ കളക്ടര്‍മാര്‍ ഉറപ്പാക്കണമെന്നും നിര്‍ദ്ദേശിച്ചു.

ആഗസ്റ്റ് എട്ടുമുതല്‍ 17 രാവലെ വരെ സംസ്ഥാനത്തെ വിവിധ പ്രളയ ബാധിതമേഖലകളിലെ 52,686 കുടുംബങ്ങളില്‍ നിന്ന് 2,23,139 പേരെ രക്ഷപെടുത്തി 1568 ദുരിതാശ്വാസ ക്യാമ്പുകളില്‍ പാര്‍പ്പിച്ചതായി ദുരന്ത നിവാരണ കണ്‍ട്രോള്‍ റൂം അറിയിച്ചു. വിവിധ സ്ഥലങ്ങളിലായി 27 പേരെ കാണാതായി. 164 പേര്‍ മരണപ്പെട്ടു. 56 പേരെ വിവിധ ആശുപത്രികളില്‍ പ്രവേശിപ്പിച്ചു. 

കേരളത്തെ നടുക്കിയ മഴയും വെളളപൊക്കവും സൃഷ്ടിച്ച ദുരിതങ്ങള്‍ക്ക് കൈത്താങ്ങാകാന്‍ ഫിഷറീസ് വകുപ്പ് സജ്ജമാക്കിയ 400- ഓളം ഔട്ട്‌ബോഡ് മോട്ടോര്‍ വളളങ്ങളും ബോട്ടുകളും ദുരിതാശ്വാസ പ്രവര്‍ത്തനമാരംഭിച്ചതായി ഫിഷറീസ് മന്ത്രി ജെ. മേഴ്‌സിക്കുട്ടി അമ്മ അറിയിച്ചു.

സംസ്ഥാനത്തെ വിവിധ ജില്ലകളില്‍ നിന്ന് മത്സ്യത്തൊഴിലാളികളുടെയും മറ്റുളളവരുടെയും സഹായത്തോടെയാണ് ദുരിതാശ്വാസ പ്രവര്‍ത്തനങ്ങള്‍ക്കുളള ബോട്ടുകള്‍ കണ്ടെത്തിയത്.

വെള്ളപ്പൊക്ക ദുരിതാശ്വാസ പ്രവര്‍ത്തനങ്ങളെയും സര്‍ക്കാരിനെയും ദുരിതാശ്വാസ പ്രവര്‍ത്തനങ്ങള്‍ ഏകോപിപ്പിക്കുന്ന സര്‍ക്കാര്‍ ജീവനക്കാരെയും സന്നദ്ധ സംഘടനകളെയും പരിഹസിച്ച് ഫെയ്‌സ്ബുക്ക് പോസ്റ്റിട്ട കോഴിക്കോട് പുതിയ സബ് ട്രഷറിയിലെ ജീവനക്കാരനും  ഇപ്പോള്‍ കോഴിക്കോട് പെന്‍ഷന്‍ പേയ്‌മെന്റ് സബ് ട്രഷറിയില്‍ സേവനമനുഷ്ഠിക്കുകയും ചെയ്യുന്ന ബോബന്‍ ജോണിനെ അന്വേഷണ വിധേയമായി ട്രഷറി ഡയറക്ടര്‍ സസ്‌പെന്റ് ചെയ്തു.

പി.എന്‍.എക്‌സ്.3657/18

സംസ്ഥാന ആസൂത്രണ ബോര്‍ഡിലെ റിസര്‍ച്ച് അസിസ്റ്റന്റ് (പ്രൊവിഷണല്‍) തസ്തികയിലേക്ക് 20ന് നടത്താന്‍ നിശ്ചയിച്ചിട്ടുള്ള ഇന്റര്‍വ്യൂ മാറ്റി. പുതുക്കിയ തിയതി പിന്നീട് അറിയിക്കും.

പി.എന്‍.എക്‌സ്.3656/18

കേരള എയ്ഡ്‌സ് കണ്‍ട്രോള്‍ സൊസൈറ്റിയില്‍  ജോയിന്റ് ഡയറക്ടര്‍, അസിസ്റ്റന്റ് ഡയറക്ടര്‍, ഡിസ്ട്രിക്റ്റ് സൂപ്പര്‍വൈസര്‍, ഡിവിഷണല്‍ അസിസ്റ്റന്റ് ആന്റ് കമ്പ്യൂട്ടര്‍ ലിറ്ററേറ്റ് സ്റ്റെനോ ആന്റ് ഡിസ്ട്രിക്റ്റ് അസിസ്റ്റന്റ്, ഫിനാന്‍സ് അസിസ്റ്റന്റ് തസ്തികകളിലേക്ക് നടത്താനിരുന്ന ഒ.എം.ആര്‍ രീതിയിലുള്ള പരീക്ഷ മഴക്കെടുതി കാരണം മാറ്റി. പുതിയ തിയതി പിന്നീട് അറിയിക്കും.

പി.എന്‍.എക്‌സ്.3655/18

വെള്ളപ്പൊക്കത്തില്‍ ദുരിതം അനുഭവിക്കുന്നവര്‍ക്ക് സഹായം എത്തിക്കാന്‍ ആഗ്രഹിക്കുന്ന പ്രവാസി മലയാളികള്‍ക്ക് ആവശ്യമായ സൗകര്യം ഒരുക്കിയതായി നോര്‍ക്ക റൂട്ട്‌സ് ചീഫ് എക്‌സിക്യുട്ടീവ് ഓഫീസര്‍ അറിയിച്ചു. 

വിദേശത്തുനിന്ന് പണം കൈമാറുന്ന സ്വകാര്യ സ്ഥാപനങ്ങളായ അല്‍ അന്‍സാരി എക്‌സ്‌ചേഞ്ച്, യു.എ.ഇ എക്‌സ്‌ചേഞ്ച്, ലുലു എക്‌സ്‌ചേഞ്ച് എന്നീ സ്ഥാപനങ്ങള്‍ മുഖേന മുഖ്യമന്ത്രിയുടെ ദുരിതാശ്വാസനിധിയിലേയ്ക്ക് സൗജന്യമായി പണം അയയ്ക്കാം. വിദേശത്തുനിന്ന് സഹായം എത്തിക്കാന്‍ ആഗ്രഹിക്കുന്നവര്‍ക്ക് ഈ സൗകര്യം വിനിയോഗിക്കാം. 

* ഒരു പഞ്ചായത്തില്‍ 6 ജൂനിയര്‍ ഹെല്‍ത്ത് ഇന്‍സ്പെക്ടര്‍മാരെ വീതം നിയമിക്കും

മഴക്കെടുതികളെ തുടര്‍ന്ന് ആരോഗ്യ വകുപ്പ് സ്വീകരിക്കേണ്ട അടിയന്തര നടപടികളെപ്പറ്റി ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചറുടെ നേതൃത്വത്തില്‍ മന്ത്രിയുടെ ചേംബറില്‍ വച്ച് ഉന്നതതല യോഗം കൂടി. ഇപ്പോള്‍ പകര്‍ച്ച വ്യാധികള്‍ നിയന്ത്രണ വിധേയമാണെങ്കിലും വെള്ളം ഇറങ്ങുന്ന സമയത്ത് വളരെയധികം ശ്രദ്ധിച്ചില്ലെങ്കില്‍ ഗുരുതരമായ ആരോഗ്യ പ്രശ്നങ്ങളുണ്ടാകുന്നതാണ്. ഇത് മുന്നില്‍ കണ്ടാണ് അടിയന്തര യോഗം മന്ത്രി വിളിച്ചുകൂട്ടിയത്.

വ്യവസായ കായിക യുവജനകാര്യവകുപ്പ് മന്ത്രി ഇ.പി ജയരാജന്റെ പ്രൈവറ്റ് സെക്രട്ടറിയായി എം. പ്രകാശന്‍ മാസ്റ്ററെ നിയമിച്ചു. അഴീക്കോട് നിയോജക മണ്ഡലത്തെ പ്രതിനിധീകരിച്ച്  രണ്ട് തവണ  നിയമസഭാംഗമായിട്ടുണ്ട്. കണ്ണൂര്‍ സര്‍വ്വകലാശാല സിന്‍ഡിക്കേറ്റ് അംഗവും, കണ്ണൂര്‍ എ.കെ.ജി  ആശുപത്രി ഭരണസമിതി പ്രസിഡന്റുമാണ്.

പി.എന്‍.എക്‌സ്.3652/18