പത്തനംതിട്ടയില്‍ ഇന്നലെയും ഇന്നുമായി ഇതുവരെ വീടുകളില്‍ കുടുങ്ങിയ 6050 പേരെ രക്ഷപ്പെടുത്തി സുരക്ഷിത സ്ഥാനത്തെത്തിച്ചു. 50 ലധികം ബോട്ടുകള്‍ രക്ഷാപ്രവര്‍ത്തനം തുടരുകയാണ്. ആറന്‍മുള കോഴഞ്ചേരി ഭാഗത്തു നിന്നാണ് കൂടുതല്‍ പേരെ രക്ഷിച്ചത്. റാന്നിയില്‍ വെള്ളം ഇറങ്ങിത്തുടങ്ങിയിട്ടുണ്ട്. നിലവില്‍ തിരുവല്ല ഭാഗത്താണ് വെള്ളം ഭീഷണിയുയര്‍ത്തുന്നത്. അപ്പര്‍കുട്ടനാട്ടില്‍ ജലനിരപ്പ് ഉയരുകയാണ്. തിരുവല്ലയില്‍ 550 ലൈഫ് ജാക്കറ്റുകള്‍ എയര്‍ഡ്രോപ്പ് ചെയ്തിട്ടുണ്ട്. ആറന്‍മുളയിലും കോഴഞ്ചേരിയിലും ഭക്ഷണവും എയര്‍ഡ്രോപ്പ് ചെയ്തിട്ടുണ്ട്.

മുഖ്യമന്ത്രി പിണറായി വിജയന്‍ സംസ്ഥാന ദുരന്ത പ്രതികരണ സേനയുടെ സെക്രട്ടേറിയറ്റിലെ കണ്‍ട്രോള്‍ റൂം സന്ദര്‍ശിച്ച് പ്രവര്‍ത്തനം വിലയിരുത്തി. റവന്യൂ അഡീഷണല്‍ ചീഫ് സെക്രട്ടറി പി.എച്ച്. കുര്യന്‍ കണ്‍ട്രോള്‍ റൂമിന്റെ പ്രവര്‍ത്തനം വിശദീകരിച്ചു. പ്രളയബാധിത പ്രദേശങ്ങളില്‍ ആവശ്യമായ രക്ഷാപ്രവര്‍ത്തനങ്ങള്‍ എത്തിക്കുന്നതിലും മറ്റും കണ്‍ട്രോള്‍ റൂം മികച്ച രീതിയില്‍ പ്രവര്‍ത്തിക്കുന്നതില്‍ മുഖ്യമന്ത്രി സംതൃപ്തി പ്രകടിപ്പിച്ചു.

സംസ്ഥാനത്ത് മഴ ചെറിയ തോതില്‍ കുറഞ്ഞിട്ടുണ്ടെങ്കിലും പലേടത്തും ശക്തമായി തുടരുകയാണെന്നും രക്ഷാ പ്രവര്‍ത്തനങ്ങള്‍ കാര്യക്ഷമമായി നടക്കുകയാണെന്നും മുഖ്യമന്ത്രി പിണറായി വിജയന്‍ വാര്‍ത്താ സമ്മേളനത്തില്‍ അറിയിച്ചു. സംസ്ഥാനത്തെ സ്ഥിതിഗതികള്‍ പ്രധാനമന്ത്രിയും പ്രതിരോധമന്ത്രിയുമായി രാവിലെ ഫോണില്‍ സംസാരിച്ചതായും മുഖ്യമന്ത്രി പറഞ്ഞു. 

തൃശൂര്‍ ജില്ലയില്‍ കാലവര്‍ഷക്കെടുതിയില്‍ ഇന്ന്‌ (ആഗസ്റ്റ്‌ 17) ഒരു മരണം റിപ്പോര്‍ട്ട്‌ ചെയ്‌തു. കൊടുങ്ങല്ലൂര്‍ എസ്‌.എന്‍.പുരം വില്ലേജില്‍ പാണങ്ങായില്‍ ശരത്‌(28) ആണ്‌ മരിച്ചത്‌. ആമ്പല്ലൂര്‍ വില്ലേജില്‍ വിലാസിനി അമ്മയുടെ മകന്‍ ചന്ദ്രനെ ഹൈവേ സിഗ്നലിലെ ഒഴുക്കില്‍പ്പെട്ട്‌ കാണാതായി.തലപ്പിള്ളി താലൂക്കില്‍ കുറാഞ്ചേരിയിലെ ഇന്നലത്തെ മണ്ണിടിച്ചില്‍ 12 പേര്‍ മരിച്ചത്‌ സ്ഥിരീകരിച്ചു. ഇവിടെ അഞ്ചുപേരെ കാണാതായിട്ടുണ്ട്‌. ഏഴുപേര്‍ക്ക്‌ മുറിവേറ്റതായി റിപ്പോര്‍ട്ട്‌ സൂചിപ്പിക്കുന്നു. 14 വീട്‌ പൂര്‍ണ്ണമായും 60 വീടുകള്‍ ഭാഗികമായും തകര്‍ന്നതായിട്ടാണ്‌ കണക്ക്‌.
 

കാലവര്‍ഷക്കെടുതിയില്‍ ദുരിതമനുഭവിക്കുന്നവരെ ദുരിതാശ്വാസ ക്യാമ്പുകളിലേക്ക്‌ മാറ്റുവാനും രക്ഷാപ്രവര്‍ത്തനങ്ങള്‍ നടത്താനും ഇന്ധനം ആവശ്യമാണ്‌. അതിനാല്‍ തൃശൂര്‍ ജില്ലയിലെ സ്വകാര്യ വ്യക്തികള്‍ക്ക്‌ ഇന്ധനം നല്‍കരുതെന്ന്‌ ജില്ലാ കളക്‌ടര്‍ ടി.വി.അനുപമ അറിയിച്ചു. പൊതു/സര്‍ക്കാര്‍ ആവശ്യങ്ങള്‍ക്കു ശേഷം മാത്രമെ സ്വകാര്യ വ്യക്തികള്‍ക്ക്‌ ഇന്ധനം നല്‍കാവൂ എന്നും കളക്‌ടര്‍ അറിയിച്ചു.
 

തൃശൂരില്‍നിന്ന്‌ കോട്ടയം വഴി തിരുവനന്തപുരത്തേക്ക്‌ പോകുന്ന തീവണ്ടികളും ശനിയാഴ്‌ച (ആഗസ്റ്റ്‌ 18) വൈകീട്ട്‌ നാല്‌ വരെ ഓടുന്നതല്ല. തൃശൂരില്‍നിന്ന്‌ ഷൊര്‍ണൂര്‍വഴി പാലക്കാട്ടേക്ക്‌ പോകുന്ന തീവണ്ടികളും ശനിയാഴ്‌ച (ആഗസ്റ്റ്‌ 18) വൈകീട്ട്‌ നാല്‌ വരെ ഓടുന്നതല്ലെന്ന്‌ തിരുവനന്തപുരം ഡിവിഷണല്‍ മാനേജര്‍ അറിയിച്ചു.
 

കനത്തമഴയെ തുടര്‍ന്ന് പാലക്കാട് ജില്ലയിലെ പ്രൊഫഷ്‌നല്‍ കൊളേജുകള്‍ മുതല്‍ അങ്കണവാടി വരെയുളള വിദ്യാഭ്യാസസ്ഥാപനങ്ങള്‍ക്ക് നാളെ (ആഗസ്റ്റ് 14-ന്) ജില്ലാ കലക്ടര്‍ അവധി പ്രഖ്യാപിച്ചു.

കാലവര്‍ഷകെടുതിയില്‍ ജില്ലയില്‍ ഏറെ നാശനഷ്ടങ്ങള്‍ ഉണ്ടായ സാഹചര്യത്തില്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് ധനസഹായം നല്‍കി പൊതുമേഖലാ-സ്വകാര്യ സ്ഥാപനങ്ങള്‍. സംസ്ഥാന ഹയര്‍ ഗുഡ്‌സ് ഓണേഴ്‌സ് അസോസിയേഷന്‍, പരംവീര്‍ എന്റര്‍പ്രൈസസ്, ഓള്‍ ഇന്ത്യാ എല്‍.പി.ജി ഡിസ്ട്രിബ്യൂട്ടേഴ്‌സ് എന്നിവര്‍ ഓരോ ലക്ഷം രൂപ വീതം മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കിയതായി ജില്ലാ കലക്ടര്‍ ഡി.ബാലമുരളി അറിയിച്ചു. എല്ലാ പൊതുമേഖലാ സ്വകാര്യ സ്ഥാപനങ്ങളും പൊതുജനങ്ങളും അകമഴിഞ്ഞ് സംഭാവന നല്‍കണം. ഈ തുകയ്ക്ക് നികുതിയിളവ് ലഭിക്കുന്നതാണ്.