ഇടുക്കി ജില്ലയിലെ  കൊന്നത്തടി  ഗ്രാമ പഞ്ചായത്ത് സെക്രട്ടറി കെ.സന്തോഷിനെ സര്‍വീസില്‍ നിന്നും   സസ്‌പെന്‍ഡ് ചെയ്തു. സര്‍ക്കാര്‍ നിര്‍ദേശ പ്രകാരമുള്ള ദുരന്ത നിവാരണ പ്രവര്‍ത്തനങ്ങള്‍ നടത്തുന്നതില്‍ വീഴ്ച വരുത്തിയതിനും ദുരിത ബാധിതരെയും  ദുരന്ത നിവാരണ പ്രവര്‍ത്തനങ്ങളില്‍എര്‍പ്പെട്ടിരിക്കുന്നവരെയും അപമാനിക്കുന്ന തരത്തില്‍ നവമാധ്യമങ്ങളില്‍ പ്രചാരണം നടത്തിയതിനുമാണ് കെ.സന്തോഷിനെ പഞ്ചായത്ത് ഡയറക് ടര്‍ എം .പി .അജിത് കുമാര്‍ സസ്‌പെന്‍ഡ് ചെയ്തത് .

രൂക്ഷമായ പ്രളയക്കെടുതിയില്‍ നിശ്ചലമായ സംസ്ഥാനത്ത് മാതൃകാപരമായ ദുരിതാശ്വാസ പ്രവര്‍ത്തനങ്ങളുമായി കെഎസ്ആര്‍ടിസി. വ്യാപകമായ മണ്ണിടിച്ചിലും വെള്ളപ്പൊക്കവും മൂലം പലസ്ഥലങ്ങളിലും റോഡ് ഗതാഗതം തടസപ്പെടുകയും ജനജീവിതം സ്തംഭിക്കുകയും ചെയ്ത സാഹചര്യത്തില്‍ പ്രതികൂല സാഹചര്യങ്ങള്‍ കണക്കിലെടുക്കാതെയാണ് കെഎസ്ആര്‍ടിസി ജീവനക്കാര്‍ ദുരിതാശ്വാസ പ്രവര്‍ത്തനങ്ങളുമായി രംഗത്തിറങ്ങിയത്. 

   ജില്ലയില്‍ കാലവര്‍ഷക്കെടുതി തുടരുന്ന സാഹചര്യത്തില്‍ 9822 പേരെ 107 ക്യാമ്പുകളിലായി പുനരധിവസിപ്പിച്ചു. നിലവില്‍ ജില്ലയിലെ എല്ലാ താലൂക്കുകളിലും ക്യാമ്പുകള്‍ പ്രവര്‍ത്തിക്കുന്നുണ്ട്.

പാലക്കാട് താലൂക്കിലെ എ.യു.പി.സ്‌കൂള്‍ കല്‍പ്പാത്തി, അപ്നാഘര്‍, നവനീത ഗോപാലകൃഷ്ണ കല്ല്യാണ മണ്ഡപം, അകത്തേത്തറ പഞ്ചായത്ത് ഹാള്‍, പാഞ്ചാലിയമ്മന്‍ കോവില്‍ കല്ല്യാണമണ്ഡപം, ഹയര്‍സെക്കന്‍ഡറി സ്‌കൂള്‍ കുമാരപുരം, ജി.എല്‍.പി.സ്‌കൂള്‍ കാഞ്ഞിക്കുളം, ഐ.ആര്‍.റ്റി.സി മുണ്ടൂര്‍, യാക്കര സിവില്‍ നഗര്‍ അങ്കണവാടി, പുതുശേരി ശിവജോതി സ്‌കൂള്‍ എന്നിവടങ്ങളിലെ 10 ക്യാമ്പുകളില്‍ 1518 പേരാണുള്ളത്. 

പാലക്കാട് താലൂക്ക് ഓഫീസിന്റെ കീഴില്‍ ഇന്‍ഡോര്‍ സ്‌റ്റേഡിയത്തില്‍ പ്രവര്‍ത്തിക്കുന്ന കലക്ഷന്‍ സെന്ററില്‍ സാധനങ്ങള്‍ കയറ്റാനും ഇറക്കാനും സന്നദ്ധപ്രവര്‍ത്തകരെ ആവശ്യമുണ്ട്.മൊബൈല്‍ ;9961242055,8281751861

ജില്ലയിലെ നൂറിലേറെ ദുരിതാശ്വാസ ക്യാമ്പുകളിലായി പതിനായിരത്തിലേറെ പേരാണ് കഴിയുന്നത്. നിരവധി സന്നദ്ധ സംഘടനകളും വ്യക്തികളും ഇവര്‍ക്കുള്ള അവശ്യ സാധനങ്ങള്‍ ലഭ്യമാക്കുന്നുണ്ടെങ്കിലും ചില സാമഗ്രികളുടെ അഭാവമുണ്ട്. ക്യാമ്പുകളിലേക്ക് അവശ്യവസ്തുക്കള്‍ സംഭാവന ചെയ്യാന്‍ താല്‍പര്യമുള്ളവര്‍ക്ക് സിവില്‍ സ്റ്റേഷനിലുള്ള താലൂക്ക് ഓഫീസിലേക്ക് നേരിട്ടെത്തിക്കാം. 

ക്യാമ്പുകളിലേക്ക് ആവശ്യമായ സാധനങ്ങള്‍:

കുട്ടികള്‍ക്ക് പെന്‍സില്‍, നോട്ട്ബുക്കുകള്‍, ബാഗുകള്‍ തുടങ്ങിയ പഠനോപകരണങ്ങള്‍, ചെരുപ്പുകള്‍, അടിവസ്ത്രങ്ങള്‍.

ആലത്തൂര്‍ പ്ലാഴി,പഴയന്നൂര്‍ വഴി തൃശൂരിലേക്കുള്ള ഗതാഗതം പുനസ്ഥാപിച്ചതായി ആലത്തൂര്‍ സര്‍ക്കിള്‍ ഇന്‍സ്‌പെക്ടര്‍ അറിയിച്ചു.

നിയമ-സാംസ്‌കാരിക-പട്ടികജാതി -പട്ടികവര്‍ഗ വകുപ്പ് മന്ത്രി എ.കെ ബാലന്റെ നേതൃത്വത്തില്‍ ഇന്ന്് (ആഗസ്റ്റ് 19) രാവിലെ 10.30-ന് മഴക്കെടുതിയുമായി ബന്ധപ്പെട്ട് ്തൃത്താല ഗവ.റസ്റ്റ് ഹൗസില്‍ അവലോകനയോഗം ചേരും. തുടര്‍ന്ന്്് തൃത്താലയിലെ ദുരിതാശ്വാസ ക്യാമ്പ് മന്ത്രി സന്ദര്‍ശിക്കും.

മംഗലം പാലം നിറഞ്ഞു കവിഞ്ഞതിനെ തുടര്‍ന്ന് വൃദ്ധസദനത്തില്‍ ഒറ്റപ്പെട്ട 186 അമ്മമാരെ റാപ്പിഡ് ആക്ഷന്‍ ഫോഴ്സിന്റെ നേതൃത്വത്തില്‍ രക്ഷപ്പെടുത്തി സുരക്ഷിത സ്ഥാനത്തെത്തിച്ചു. വടക്കഞ്ചേരി ദൈവസദന്‍ വൃദ്ധസദനത്തിലെ 186 അന്തേവാസികളേയാണ്  സി.ആര്‍.പി.അഫിന്റെ നേതൃത്വത്തില്‍ രക്ഷിച്ച് വടക്കഞ്ചേരി സെന്റ് മേരീസ് ഐ.ടി.ഐ യില്‍ താമസിപ്പിച്ചിരിക്കുന്നത്. ഇവര്‍ക്കുള്ള ഭക്ഷണവും മറ്റ് അവശ്യ വസ്തുക്കളും ആലത്തൂര്‍ താലൂക്കില്‍ നിന്നും ലഭ്യമാക്കിയിട്ടുണ്ട്. കൂടാതെ ഇവര്‍ക്കായി മെഡിക്കല്‍ ക്യാമ്പും സംഘടിപ്പിച്ചിട്ടുണ്ട്.