രക്ഷാപ്രവർത്തനവുമായി സഹകരിക്കാതെ വിട്ടുനിന്ന അഞ്ചു ബോട്ടുടമകളിൽ നാലുപേരെ ദുരന്തനിവാരണ നിയമപ്രകാരം അറസ്റ്റ് ചെയ്തു.  ലേക്ക്‌സ് ആന്റ് ലഗൂൺസ് ഉടമ സക്കറിയ ചെറിയാൻ, റെയിൻബോസ് ഉടമ സാലി, കോസി ഉടമ കുര്യൻ, ആൽബിൻ ഉടമ വർഗീസ് സോണി എന്നിവരെ ഇതിനകം അറസ്റ്റുചെയ്തു. തേജസ് ഉടമ സിബിയെ ഉടൻ അറസ്റ്റുചെയ്ത് ഹാജരാക്കാൻ നിർദേശിച്ചിട്ടുണ്ട്. അറസ്റ്റ് ചെയ്തവരെ തുടർന്നുള്ള രക്ഷാപ്രവർത്തനത്തിന് ബോട്ടുകൾ വിട്ടുനൽകാമെന്ന വ്യവസ്ഥ രേഖാമൂലം നൽകിയതിനെത്തുടർന്ന് ഇവർക്ക് ജാമ്യം അനുവദിച്ചു.

ജില്ലയിൽ പ്രളയക്കെടുതിയിൽ അകപ്പെട്ടവരെ സുരക്ഷിത കേന്ദ്രത്തിലെത്തിക്കുന്നതിന് ദിവസങ്ങളായി നടന്നുവരുന്ന ഒഴിപ്പിക്കൽ പ്രവർത്തനങ്ങൾ അവസാന ഘട്ടത്തിലേക്ക് കടന്നതായി പൊതുമരാമത്ത് - രജിസ്‌ട്രേഷൻ വകുപ്പ് മന്ത്രി ജി.സുധാകരൻ പറഞ്ഞു. ഒഴിപ്പിക്കൽ നല്ല രീതിയിൽ നടന്നുവരുകയാണ്. ഇന്നും നാളെയുമായി എല്ലാവരെയും സുരക്ഷിത കേന്ദ്രത്തിലെത്തിക്കാൻ കഴിയുമെന്ന് മന്ത്രി പറഞ്ഞു. ഇപ്പോൾ തന്നെ അപകട മേഖലയിൽ നിന്ന് 90 ശതമാനം പേരെയും ക്യാമ്പുകളിൽ എത്തിക്കാൻ കഴിഞ്ഞിട്ടുണ്ട്. കുട്ടനാട് ഒഴിപ്പിക്കൽ 95 ശതമാനം പൂർത്തിയായി. പാണ്ടനാട് 97 ശതമാനം പേരേയും സുരക്ഷിത കേന്ദ്രങ്ങളിലേക്കു മാറ്റി.

പൊതുമരാമത്ത് വകുപ്പുമന്ത്രി ജി.സുധാകരൻ ഇന്നലെ ചെങ്ങന്നൂരിലെത്തി രക്ഷാ പ്രവർത്തനങ്ങൾ വിലയിരുത്തി. തുടർന്ന് പ്രവർത്തനങ്ങളുടെ അവലോകന യോഗവും നടത്തി. കൂടുതൽ സ്പീഡ് ബോട്ടുകൾ രാത്രി തന്നെ എത്തിച്ച് പുലർച്ചെ തന്നെ രക്ഷാപ്രവർത്തനങ്ങൾ ആരംഭിക്കാൻ നിർദ്ദേശം നൽകി. 

ആലപ്പുഴ: ജില്ലയിൽ 678 ദുരിതാശ്വാസ ക്യാമ്പുകളിലായി 50754 കുടുംബങ്ങളിലെ 210119 അംഗങ്ങൾ കഴിയുന്നു. അമ്പലപ്പുഴയിലെ 150 ക്യാമ്പുകളിലായി 16854 കുടുംബങ്ങളിലെ 60860 അംഗങ്ങൾ കഴിയുന്നു. ചേർത്തലയിൽ 60 ക്യാമ്പുകളിലായി 2900 കുടുംബങ്ങളിലെ 31552 പേർ കഴിയുന്നു. മാവേലിക്കരയിലെ 148 ക്യാമ്പുകളിലായി 15200 കുടുംബങ്ങളിലെ 52465 അംഗങ്ങളും കാർത്തികപ്പള്ളിയിലെ 320 ക്യാമ്പുകളിലായി 15800 കുടുംബങ്ങളിലെ 65242 അംഗങ്ങൾ കഴിയുന്നു. നിലവിൽ മാവേലിക്കരയിലും ചെങ്ങന്നൂരിലുമായി പ്രവർത്തിക്കുന്ന 199 ഭക്ഷണ വിതരണ കേന്ദ്രങ്ങളെ 1084 കുടുംബങ്ങളിൽ നിന്നുള്ള 2954 പേർ ആശ്രയിക്കുന്നു.

   ആലപ്പുഴ: ജില്ലയിലെ പ്രളയ ബാധിത പ്രദേശങ്ങളിൽ രക്ഷാപ്രവർത്തത്തിൽ സർക്കാരിന്  ഒപ്പം നിന്ന് മൽസ്യ തൊഴിലാളികളും. ദുരന്തമുഖങ്ങളിൽ ഇപ്പോൾ കൂടുതലായി രക്ഷാപ്രവർത്തനത്തിൽ നിൽക്കുന്നത് ഇവരാണ്. ജില്ലയിലെ വിവിധ ഭാഗങ്ങളിൽ നിന്നും മറ്റു ജില്ലകളിൽ നിന്നുമുള്ളവർ ഒരേമനസോടെ നടത്തുന്ന രക്ഷാപ്രവർത്തനം സമാനതകളില്ലാത്തതാണ്. എൺപതോളം   മൽസ്യബന്ധന ബോട്ടുകളിലായി നാനൂറോളം  മൽസ്യ തൊഴിലാളികളാണ് രക്ഷാപ്രവർത്തനവുമായി ബന്ധപ്പെട്ട് പ്രവർത്തിക്കുന്നത്. 

സർക്കാർ ജലാശയത്തിലുള്ള എല്ലാ ബോട്ടുകളും പിടിച്ചെടുത്ത് രക്ഷാപ്രവർത്തനത്തിന് ഉപയോഗിക്കാൻ പൊതുമരാമത്ത് വകുപ്പു മന്ത്രി ജി.സുധാകരൻ നിർദ്ദേശിച്ചു. ആവശ്യമായ ബോട്ട് ലഭിക്കുന്നില്ല എന്ന പരാതി ശ്രദ്ധയിൽപ്പെട്ടതിനെത്തുടർന്നാണ് നടപടി. രാവിലെ മന്ത്രി കളക്ട്രേറ്റിലെത്തി  രക്ഷാപ്രവർത്തനങ്ങളുടെ വിശദാംശങ്ങൾ ആരാഞ്ഞു. പ്രളയക്കെടുതി തുടങ്ങി അഞ്ചുദിവസമായിട്ടും കയ്യിലുള്ള ബോട്ടുകളുടെ മൂന്നിൽ രണ്ട് ഭാഗമെങ്കിലും വിട്ടുകൊടുക്കാത്ത ബോട്ട് ഉടമകളെ അറസ്‌ററ് ചെയ്യാൻ ജില്ലാ കളക്ടർക്ക് നിർദ്ദേശം നൽകി. ഇതിൽ വീഴ്ചവരുത്തുന്ന ഉദ്യോഗസ്ഥരെ സസ്പൻഡ് ചെയ്യാനും മന്ത്രി നിർദ്ദേശിച്ചു.

മഴക്കെടുതിയുടെ പശ്ചാത്തലത്തില്‍ ഞായറാഴ്‌ച പ്രവൃത്തിദിവസമാക്കി മാറ്റിയപ്പോള്‍ ജില്ലാ കളക്‌ടറേറ്റില്‍ ഹാജരായത്‌ 278 ജീവനക്കാര്‍. ദുരന്തനിവാരണ പ്രവര്‍ത്തനങ്ങള്‍ ഏകോപിപ്പിക്കാന്‍ മുഴുവന്‍ ജീവനക്കാരും ഹാജരാകണമെന്നാവശ്യപ്പെട്ട്‌ ജില്ലാ കളക്‌ടര്‍ ശനിയാഴ്‌ച വൈകീട്ടാണ്‌ ഉത്തരവിട്ടത്‌. മറ്റ്‌ ഓഫീസുകളിലെ 127 ജീവനക്കാരും റവന്യൂ വകുപ്പിന്‌ കീഴിലെ 151 ജീവനക്കാരും ഹാജരായി. ഇതിന്‌ പുറമേ ദുരിതാശ്വാസ ക്യാമ്പുകള്‍, ഹെലിപാഡ്‌ തുടങ്ങിയ ഇടങ്ങളിലും താലൂക്ക്‌, വില്ലേജ്‌ ഓഫീസുകളിലും ജീവനക്കാര്‍ ദുരന്തനിവാരണ പ്രവര്‍ത്തനങ്ങളില്‍ ഏര്‍പ്പെട്ടു.

കനത്ത മഴയിലും മണ്ണിടിച്ചിലും എറണാകുളം-ഷൊര്‍ണ്ണൂര്‍ റെയില്‍പാതയില്‍ വിവിധ ഭാഗങ്ങളില്‍ തകരാറിലായ ട്രക്കുകള്‍ പുന:സ്ഥാപിക്കുന്നതിനുളള പ്രവൃത്തികള്‍ യുദ്ധകാലാടിസ്ഥാനത്തില്‍ നടക്കുകയാണെന്നും എറണാകുളത്തും നിന്നും തൃശൂര്‍ വഴി ഷൊര്‍ണ്ണൂര്‍ വരെ ട്രെയിന്‍ ഗതാഗതത്തിനുളള താല്‍ക്കാലിക നിരോധനം തുടരുമെന്ന്‌ സതേണ്‍ റെയില്‍വേ അറിയിച്ചു.

പ്രളയക്കെടുതിയെ തുടര്‍ന്നുളള ദുരിതാശ്വാസ പ്രവര്‍ത്തനങ്ങള്‍ ഏകോപിപ്പിക്കുന്നതിനായി ഭക്ഷ്യവകുപ്പ്‌ ഉത്തരമേഖലാ റേഷനിങ്‌ ഡെപ്യൂട്ടി കണ്‍ട്രോളര്‍ കാര്യാലയത്തില്‍ കണ്‍ട്രോള്‍ റൂം തുറന്നു. ഫോണ്‍ : 0495-2374798, 9188527314.