സംസ്ഥാനത്തെ 5645 ദുരിതാശ്വാസ ക്യാമ്പുകളില്‍ 724649 പേര്‍ കഴിയുന്നതായി മുഖ്യമന്ത്രി പിണറായി വിജയന്‍ പറഞ്ഞു. ആഗസ്റ്റ് 19ന് 13 മരണം റിപ്പോര്‍ട്ട് ചെയ്തിട്ടുണ്ട്. ആഗസ്റ്റ് 19ന് വൈകുന്നേരം വരെ ലഭ്യമായ കണക്കനുസരിച്ച് 22,034 പേരെ രക്ഷപെടുത്തി. 

നിലവില്‍ എത്ര സഹായം ലഭിച്ചാലും മതിയാവില്ലെന്ന് മുഖ്യമന്ത്രി പിണറായി വിജയന്‍ പറഞ്ഞു. എല്ലാ സഹായത്തെയും സര്‍ക്കാര്‍ സ്വാഗതം ചെയ്യുന്നു. സംസ്ഥാനത്തിന് പുറത്തു നിന്നുള്ള സഹായങ്ങള്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന എന്ന നിലയില്‍ അയയ്ക്കുന്നതാവും സൗകര്യപ്രദം. മറ്റു സംസ്ഥാനങ്ങളില്‍ നിന്ന് ലഭിക്കുന്ന സാധനങ്ങള്‍ സംസ്ഥാന ദുരന്തനിവാരണ അതോറിറ്റിയാണ് ക്രോഡീകരിക്കുന്നത്. അവര്‍ നിര്‍ദ്ദേശിക്കുന്ന തരത്തിലുള്ള സാധനങ്ങളാണ് ലഭ്യമാക്കേണ്ടത്. 

കനത്ത മഴയിലും പ്രളയത്തിലുമായി സംസ്ഥാനത്തെ റോഡുകള്‍ക്ക് വ്യാപക നാശമുണ്ടായതായി മുഖ്യമന്ത്രി പിണറായി വിജയന്‍ പറഞ്ഞു. 4441 കോടി രൂപയുടെ പ്രാഥമിക നഷ്ടമാണ് കണക്കാക്കിയിട്ടുള്ളത്. പാലങ്ങള്‍ക്കും കേടുപാടുണ്ട്. 221 പാലങ്ങളാണ് പ്രളയത്തില്‍ പെട്ടത്. 59 പാലം ഇപ്പോഴും വെള്ളത്തിലാണ്. 

പ്രളയബാധിത സ്ഥലങ്ങളിലെ വീടുകളും പരിസരങ്ങളും ജനകീയ പങ്കാളിത്തത്തോടെ ശുചിയാക്കി പൂര്‍വസ്ഥിതിയിലാക്കുന്നതിനു വാര്‍ഡ് തലത്തില്‍ സമിതികള്‍ രൂപീകരിച്ച് പ്രവര്‍ത്തിക്കാന്‍ മുഖ്യമന്ത്രിയുടെ അധ്യക്ഷതയില്‍ ചേര്‍ന്ന യോഗം തീരുമാനിച്ചതായി ഹരിതകേരള മിഷന്‍ വൈസ് ചെയര്‍ പേഴ്സണ്‍ ഡോ. ടി.എന്‍. സീമ അറിയിച്ചു. ഹരിതകേരളം, ശുചിത്വ മിഷന്‍, ആരോഗ്യ വകുപ്പ്, തദ്ദേശ സ്വയംഭരണ വകുപ്പ് എന്നിവരുടെ സഹകരണത്തോടെ ഇതിനുവേണ്ട പദ്ധതികള്‍ ആവിഷ്‌കരിക്കും. 

മഴക്കെടുതി ബാധിച്ച പ്രദേശങ്ങളിലെ രക്ഷാപ്രവര്‍ത്തനങ്ങളും ദുരിതാശ്വാസ പ്രവര്‍ത്തനങ്ങളും ഏകോപിപ്പിക്കുന്നതിനായി സംസ്ഥാനത്തെ മിക്ക സര്‍ക്കാര്‍ ഓഫീസുകളും അവധി ദിവസമായ ഞായറാഴ്ചയും പ്രവര്‍ത്തിച്ചു. റവന്യൂ, ദുരന്തനിവാരണ, വിഭാഗങ്ങളിലെ ജീവനക്കാര്‍ മറ്റു പ്രവൃത്തിദിനങ്ങളിലേതുപോലെ തന്നെ  ഹാജരായി ബന്ധപ്പെട്ടപ്രവര്‍ത്തനങ്ങളില്‍ വ്യാപൃതരായി. 

പ്രളയബാധിതര്‍ക്ക് ആശ്വാസമേകി പഞ്ചായത്ത് വകുപ്പിന്റെ നേതൃത്വത്തില്‍ ഭക്ഷണമുള്‍പ്പെടെയുള്ള അവശ്യസാധനങ്ങളുടെ വിതരണം സംസ്ഥാനത്ത് പുരോഗമിക്കുന്നു.  തിരുവനന്തപുരം പഞ്ചായത്ത് ഡയറക്ടറേറ്റില്‍ പ്രവത്തിക്കുന്ന കളക്ഷന്‍ സെന്റര്‍ കേന്ദ്രീകരിച്ചാണ് അവശ്യസാധനങ്ങള്‍ വിവിധ ക്യാമ്പുകളില്‍ എത്തിക്കുന്നത്.  

പ്രളയക്കെടുതിയില്‍ സംസ്ഥാനത്തെ സഹായിച്ച എല്ലാ മേഖലയിലുള്ളവര്‍ക്കും മുഖ്യമന്ത്രി പിണറായി വിജയന്‍ നന്ദി രേഖപ്പെടുത്തി. രക്ഷാപ്രവര്‍ത്തനത്തിന്റെ ആദ്യഘട്ടം നല്ലരീതിയില്‍ പൂര്‍ത്തികരിക്കുമ്പോള്‍ നമ്മുടെ നാട്ടിലെ മനുഷ്യസ്‌നേഹത്തിന്റെയും ത്യാഗസന്നദ്ധതയുടെയും സേവനതത്പരതയുടെയും അടിത്തറയാണ് സമാനതകളില്ലാത്തപ്രതിസന്ധിയെ മറികടക്കാന്‍ കരുത്തായത്. അപൂര്‍വം ചില സ്ഥലങ്ങളില്‍ രക്ഷാ പ്രവര്‍ത്തനം തുടരേണ്ടിവരും. 

*മാലിന്യ വിമുക്ത പ്രോട്ടോകോള്‍ നടപ്പാക്കും

അവശ്യസാധനങ്ങൾക്ക് വിലകൂട്ടുന്നതായുള്ള പരാതിയുടെ അടിസ്ഥാനത്തിൽ ജില്ലയിൽ അവശ്യസാധനങ്ങളുടെ വില കൂട്ടുന്നത് നിരോധിച്ച് ജില്ല കളക്ടർ ഉത്തരവായിട്ടുണ്ട്.  ജില്ലയിലുടനീളം മിന്നൽപരിശോധന നടത്തി നടപടിയെടുക്കാൻ മന്ത്രി  നിർദേശിച്ചു. 

വെള്ളപ്പൊക്ക ദുരിതാശ്വാസം : ധനസഹായങ്ങൾ  അർഹരായ എല്ലാവർക്കും ലഭിക്കും

    ആലപ്പുഴ: വെള്ളപ്പൊക്ക ദുരിതാശ്വാസവുമായി ബന്ധപ്പെട്ട് സർക്കാർ പ്രഖ്യാപിച്ച എല്ലാവിധ ധനസഹായങ്ങളും അർഹരായ എല്ലാവർക്കും ലഭിക്കും. അതിനുവേണ്ടി ദുരിതാശ്വസ ക്യാമ്പിൽ രജിസ്റ്റർ ചെയ്യണമെന്ന് നിബന്ധനയില്ല. മറിച്ചുള്ള വാർത്തകൾ തെറ്റാണ്.

രക്ഷാപ്രവർത്തനവുമായി സഹകരിക്കാതെ വിട്ടുനിന്ന അഞ്ചു ബോട്ടുടമകളിൽ നാലുപേരെ ദുരന്തനിവാരണ നിയമപ്രകാരം അറസ്റ്റ് ചെയ്തു.  ലേക്ക്‌സ് ആന്റ് ലഗൂൺസ് ഉടമ സക്കറിയ ചെറിയാൻ, റെയിൻബോസ് ഉടമ സാലി, കോസി ഉടമ കുര്യൻ, ആൽബിൻ ഉടമ വർഗീസ് സോണി എന്നിവരെ ഇതിനകം അറസ്റ്റുചെയ്തു. തേജസ് ഉടമ സിബിയെ ഉടൻ അറസ്റ്റുചെയ്ത് ഹാജരാക്കാൻ നിർദേശിച്ചിട്ടുണ്ട്. അറസ്റ്റ് ചെയ്തവരെ തുടർന്നുള്ള രക്ഷാപ്രവർത്തനത്തിന് ബോട്ടുകൾ വിട്ടുനൽകാമെന്ന വ്യവസ്ഥ രേഖാമൂലം നൽകിയതിനെത്തുടർന്ന് ഇവർക്ക് ജാമ്യം അനുവദിച്ചു.