കണ്‍സ്യൂമര്‍ ഫെഡിന്റെ ഓണം-ബക്രീദ് സഹകരണ വിപണിയുടെ സംസ്ഥാനതല ഉദ്ഘാടനം നാളെ (ആഗസ്റ്റ് 16) മുഖ്യമന്ത്രി പിണറായി വിജയന്‍ നിര്‍വഹിക്കും. പാളയം എല്‍.എം.എസ് ഗ്രൗണ്ടില്‍ വൈകിട്ട് 3.30ന് നടക്കുന്ന ചടങ്ങില്‍ സഹകരണ-ടൂറിസം വകുപ്പ് മന്ത്രി കടകംപള്ളി സുരേന്ദ്രന്‍ അധ്യക്ഷത വഹിക്കും. ത്രിവേണി ഓണസദ്യ കിറ്റിന്റെ ആദ്യവില്‍പന കെ. മുരളീധരന്‍ എം.എല്‍.എ നിര്‍വഹിക്കും. മേയര്‍ വി.കെ. പ്രശാന്ത് വിശിഷ്ടാതിഥിയായിരിക്കും.

ആഗസ്റ്റ് 16 മുതല്‍ 24 വരെ 3500 ഓണം-ബക്രീദ് വിപണികള്‍ കേരളമാകെ പ്രവര്‍ത്തിക്കും. പൊതു വിപണിയേക്കാള്‍ 50 ശതമാനം വരെ വിലക്കുറവില്‍ നിത്യോപയോഗ സാധനങ്ങള്‍ വിതരണം ചെയ്യും. 

        കേരള നെല്‍വയല്‍ തണ്ണീര്‍ത്തട സംരക്ഷണ (ഭേദഗതി) ആക്ട് നിലവില്‍ വന്ന 2017 ഡിസംബര്‍ 30 ന് മുമ്പ് പെര്‍മിറ്റ് അനുവദിക്കുകയും അതുപ്രകാരം കെട്ടിടങ്ങള്‍ നിര്‍മ്മിച്ച് ഒക്ക്യുപ്പന്‍സി/കെട്ടിടനമ്പര്‍/പെര്‍മിറ്റ് റിന്യൂവല്‍ എന്നിവയ്ക്ക് അതിനു ശേഷം തദ്ദേശസ്ഥാപനങ്ങളെ സമീപിക്കുകയും ചെയ്യുമ്പോള്‍  ആക്ടിലെ വ്യവസ്ഥകള്‍ പ്രകാരം ആര്‍ഡിഒ യുടെ അനുമതിപത്രം വേണമെന്ന് പല തദ്ദേശസ്ഥാപന സെക്രട്ടറിമാരും നിര്‍ദ്ദേശിക്കുന്നത് സര്‍ക്കാരിന്റെ ശ്രദ്ധയില്‍പ്പെട്ടതിന്റെ അടിസ്ഥാനത്തില്‍ അവയ്ക്ക് സ്പഷ്ടീകരണം നല്‍കിക്കൊണ്ട് സര്‍ക്കാര്‍ പുതിയ സര്‍ക്കുലര്‍ പുറപ്പെടുവിച്ചു. 

ഇ. പി. ജയരാജന്‍ വ്യവസായ, കായിക മന്ത്രിയായി സത്യപ്രതിജ്ഞ ചെയ്ത് ചുമതലയേറ്റു. രാജ്ഭവനില്‍ നടന്ന ചടങ്ങില്‍ ഗവര്‍ണര്‍ പി. സദാശിവം സത്യവാചകം ചൊല്ലിക്കൊടുത്തു. മന്ത്രിയായി സഗൗരവമാണ് പ്രതിജ്ഞയെടുത്തത്. 

രാവിലെ പത്തു മണിക്ക് ചീഫ് സെക്രട്ടറി ടോംജോസ് സത്യപ്രതിജ്ഞ ചെയ്യാന്‍ അദ്ദേഹത്തെ വേദിയിലേക്ക് ക്ഷണിച്ചു. സത്യപ്രതിജ്ഞയ്ക്ക് ശേഷം ഗവര്‍ണറും മുഖ്യമന്ത്രി പിണറായി വിജയനും അനുമോദിച്ചു. തുടര്‍ന്ന് മന്ത്രിമാരും മറ്റു പ്രമുഖ വ്യക്തികളും അനുമോദിക്കാനെത്തി. 

* 'സുരക്ഷാമിത്ര' വാഹനനിരീക്ഷണ സംവിധാനവും ഏര്‍പ്പെടുത്തി

ഒക്‌ടോബര്‍ ഒന്നുമുതല്‍ ജി.പി.എസ് ഘടിപ്പിക്കാത്ത വിദ്യാഭ്യാസ സ്ഥാപന ബസുകള്‍ നിരത്തില്‍ ഇറങ്ങാന്‍ അനുവദിക്കില്ലെന്ന് ട്രാന്‍സ്‌പോര്‍ട്ട് കമ്മീഷണര്‍ അറിയിച്ചു. പദ്ധതി നടപ്പാക്കുന്നതിനും മേല്‍നോട്ടത്തിനുമായി സി-ഡാക്കുമായി ചേര്‍ന്ന് 'സുരക്ഷാമിത്ര' എന്ന പേരില്‍ വാഹനനിരീക്ഷണ സംവിധാനം ഏര്‍പ്പെടുത്തുകയും ചെയ്തിട്ടുണ്ട്. 

മുന്‍ പ്രധാനമന്ത്രി രാജീവ് ഗാന്ധിയുടെ ജന്‍മദിനമായ ആഗസ്റ്റ് 20 ന് സദ്ഭാവനാദിനമായി ആചരിക്കും. ഇതിന്റെ ഭാഗമായി സെക്രട്ടേറിയറ്റിലെ സദ്ഭാവനാ പ്രതിജ്ഞാ ചടങ്ങ് 20ന് രാവിലെ 11ന് ദര്‍ബാര്‍ ഹാളില്‍ നടത്തും. ചീഫ് സെക്രട്ടറി ടോം ജോസ് സത്യപ്രതിജ്ഞ ചൊല്ലിക്കൊടുക്കും.

സദ്ഭാവനാദിന പ്രതിജ്ഞ ചുവടെ:

'സമുദായം, മതം, പ്രദേശം, ഭാഷ തുടങ്ങിയ യാതൊരുവിധ പരിഗണനയും കൂടാതെ ഭാരതത്തിലെ എല്ലാ വിഭാഗം ജനങ്ങളുടേയും ഐക്യത്തിനും സൗഹാര്‍ദ്ദത്തിനും വേണ്ടി അര്‍പ്പണ ബോധത്തോടെ പ്രവര്‍ത്തിക്കുമെന്ന് ഞാന്‍ ദൃഢപ്രതിജ്ഞ ചെയ്യുന്നു.