പൊതുജനങ്ങളെ പരിഭ്രാന്തരാക്കുംവിധം സ്ഥിരീകരണമില്ലാത്ത വ്യാജവാര്‍ത്തകള്‍ അറിഞ്ഞൊ അറിയാതെയൊ പ്രചരിപ്പിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് പാലക്കാട് ജില്ലാ കലക്ടര്‍ ഡി. ബാലമുരളി അറിയിച്ചു

    നിലവില്‍ ജില്ലയില്‍ മൂന്നിടത്ത് ഗതാഗതം തടസ്സപ്പെട്ടിട്ടുണ്ട്. പറളി എടത്തറ സി.എസ് പുരം റോഡും പരിസരവും څഭാരതപുഴയില്‍ ജലനിരപ്പുയര്‍ന്നതിനെ തുടര്‍ന്ന്  മണ്ണിടിയുകയും മരങ്ങള്‍ കടപുഴകി വീഴുകയും ചെയ്തിട്ടുണ്ട്. നെല്ലിയാമ്പതി ചെക്ക് പോസ്റ്റിന് ശേഷമുളള എഴു കിലോമീറ്റര്‍ റോഡ് മണ്ണിടിഞ്ഞ് വീണതിനെ തുടര്‍ന്ന്  നെന്മാറ-നെല്ലിയാമ്പതി റോഡ് ബന്ധം വിഛേദിക്കപ്പെട്ടിരിക്കുകയാണ്.  അട്ടപ്പാടിയില്‍ ചുരം റോഡും മണ്ണിടിച്ചിലിലും മരം കടപുഴകിയതിനെ തുടര്‍ന്നും തടസപ്പെട്ടിട്ടുണ്ട്. അട്ടപ്പാടി നിവാസികള്‍ക്ക് മണ്ണാര്‍ക്കാട്, പാലക്കാട് എന്നിവിടങ്ങളുമായുളള ബന്ധം വിഛേദിക്കപ്പെട്ടിരിക്കുകയാണ്. 

കനത്തമഴ തുടരുകയും ഡാമുകൾ തുറന്നു വിടുകയും ചെയ്യുന്ന സാഹചര്യത്തിൽ കുട്ടനാട്ടിലും അപ്പർ കുട്ടനാട്ടിലും  ജാഗ്രതാ നിർദ്ദേശം. കിഴക്കൻ വെള്ളം ജില്ലയിലേക്ക് കൂടുതലായി ഒഴുകി വരാനുള്ള സാധ്യത കണക്കിലെടുത്ത് നദികളുടെയും ആറുകളുടെയും തീരങ്ങളിൽ താമസിക്കുന്നവർ  ഉയർന്ന പ്രദേശങ്ങളിലേക്കോ ക്യാമ്പുകളിലേക്കോ മാറണമെന്ന് ജില്ലാകളക്ടർ അഭ്യർത്ഥിച്ചു. അടിയന്തിര സാഹചര്യം നേരിടുന്നതിനായി കലക്ടറേറ്റിൽ  ജില്ലാതല ദുരന്തനിവാരണ സമിതി യോഗം ചേർന്നു.

നീരേറ്റുപുറം കുതിരച്ചാൽ കോളനിയിൽ നിന്ന് കുടുംബങ്ങളെ ഒഴിപ്പിക്കുന്നു. അഞ്ചുകുടുംബങ്ങളെ എൻ.ഡി.ആർ.എഫ് ആണ് ഒഴിപ്പിച്ചത്. 30 കുടുംബങ്ങളാണ് കോളനിയിലുള്ളത്. ഒഴിപ്പിച്ചവരെ ചക്കുളത്തുകാവ് ക്ഷേത്രം ഹാളിലേക്ക് മാറ്റി. കക്തമായ ഒഴുക്കുള്ളതിനാൽ ഒഴിപ്പിക്കലിന് താമസം നേരിടുന്നു.

(പി.എൻ.എ 2327/2018)

കുട്ടനാടും അപ്പർകുട്ടനാട് മേഖലകളിലും ജലനിരപ്പ് ഉയരുന്ന സാഹചര്യത്തിൽ ജില്ലാഭരണകൂടം നേവിയുടെ സഹായം തേടിയതായി ജില്ലാ കളക്ടർ അറിയിച്ചു. ദേശീയ ദുരന്തനിവാരണ സേനയുടെ നാൽപ്പത് പേരെ ജില്ലയിൽ വിന്യസിപ്പിച്ചു.  ഇൻഡോ ടിബറ്റൻ  ബോർഡർ പോലീസിന്റെ സഹായവും തേടിയിട്ടുണ്ട്.  മുട്ടാർ,  മങ്കൊമ്പ് എന്നിവിടങ്ങളിൽനിന്ന് വെള്ളം കയറിയ പ്രദേശങ്ങളിലുള്ളവരെ ഒഴിപ്പിക്കുന്നുണ്ട്.  കൈനകരി നോർത്ത് , സൗത്ത് വില്ലേജുകളിലെ ജനങ്ങളെ വെള്ളം കയറിയ ഭാഗങ്ങളിൽ നിന്ന് ഒഴിപ്പിക്കുന്നതിന് രണ്ടു  ഹൗസ് ബോട്ടുകൾ ഏർപ്പാടാക്കി.

(പി.എൻ.എ 2324/2018)

കുട്ടനാട്, അപ്പർ കുട്ടനാട് മേഖലകളിൽ  ജലനിരപ്പ് ഉയരാനുള്ള അടിയന്തര സാഹചര്യം കണക്കിലെടുത്ത് ബന്ധപ്പെട്ട തദ്ദേശ സ്വയംഭരണ സ്ഥാപനങ്ങൾ കമ്മറ്റികൾ വിളിച്ചുകൂട്ടി ജനങ്ങളുടെ ആവശ്യങ്ങൾക്ക് പരിഹാരം കാണാനും ആവശ്യങ്ങൾ ജില്ലാ ഭരണകൂടത്തിന്റെ ശ്രദ്ധയിൽപ്പെടുത്താനും ശ്രദ്ധിക്കണമെന്ന് പൊതുമരാമത്ത് രജിസ്‌ട്രേഷൻ വകുപ്പുമന്ത്രി ജി.സുധാകരൻ പറഞ്ഞു. വെള്ളപ്പൊക്ക സാധ്യത കണക്കിലെടുത്ത് കളക്‌ട്രേറ്രിൽ ചേർന്ന തദ്ദേശ സ്വയംഭരണ സ്ഥാപനങ്ങളുടെ പ്രതിനിധികളുടെ യോഗത്തിൽ സംസാരിക്കുകയായിരുന്നു മന്ത്രി. ചെങ്ങന്നൂർ താലൂക്കിലെ ആല ഒഴികെയുള്ള എല്ലായിടവും ജലനിരപ്പ് ഉയരാനുള്ള സാധ്യതയുണ്ട്.